Mintlhamuxelo Ya Xibukwana Xa Wutomi Ni Wutizreli Byezru

1-7 KA JULHU

WUKOSI BYI NGA BIBELENI | BA-LE-KOLOSA 1-4

“Susani Wumhunu Bya Khale, Kutani Mi Yambala Lebyinpswha”

Sentinela 15/03/2011 p. 8 §§ 12-13

Yamukelani Moya Wa Xikwembu Nkulukumba Ku Nga Li Wa Misava

Xana wumhunu byanga byi kombisa moya wini? (Dondzra Ba-le-Kolosa 3:8-10, 13.) Moya wa misava wu kutxetela mintizro ya nyama. (Ga 5:19-21) Moya lowu hi nga na wone wu tikomba livaleni ku nga li ntsena loko swi hi fambela ha hombe kambe ni loko hi dzringiwa, ku fana ni loko makwezru a bandleni a nga hi londzrisi, a hi khunguvanyisa, kumbe ku hi dohela. Nambi loko hi li makaya kwezru swi nga koteka kuva moya lowu hi nga na wone wu voneka. Ku tikambela swi nga hi pfuna. Tivutise, ‘Ndzreni ka 6 wa tiwheti leti khalutiki, xana wumhunu byanga byi ye byi byekemela ka wukriste kumbe ka mahanyela ya khale?’

Moya wa Xikwembu Nkulukumba wu nga hi pfuna ku ‘susa mhunu wa khale kun’we ni mintizro yakwe’ kutani hi tiyambexa ‘mhunu lwemunpswha’. Leswo swi ta hi pfuna ku va ni lizrandzru ni wunene. Swi ta hi nabyalela ngopfu ku dzrivalelana hi ku ntsrhunxeka, nambi loko hi ni xivangelo xa ku khunguvanyeka. Hi ta swi ba hi makatla loko hi nga kombiwi wululami, hi va hi susa ‘xiviti hinkwaxu ni tihanyi ni mahlundzru ni pongwe ni swifingeto’. A matsrhan’wini ya leswo, hi ta lwa hi tindlela hinkwatu ku va hi ‘vavelelanana’.​—Ef 4:31, 32.

Sentinela 15/09/2013 p. 21 §§ 18-19

Xana U Txintxile?

Kuva Zritu dzra Xikwembu Nkulukumba dzri hi txintxa hi fanela ku dzri dondzra nkama hinkwawu, kambe leswo kova masungulu. Vanyingi va txhuka va dzri dondzra, kutani va tolovelana na dzrone. Kumbexana u kumana navu vhanu lavo a nsin’wini. Phela vambeni va va va bekisa swiyenge swa matsralwa nhlokweni. Nambitasu, mahanyela ni mapimisela yavu swa hambana ni leswi va swi dondzraka. Ku kiyela yini? Kuva Zritu dzra Nkulukumba dzri kutxetela ni ku txintxa mhunu, mhunu lweyo a fanela ku dzri pfumelela dzri nhingena mbilwini yakwe. (Ga 6:6) Xileswo, hi fanela ku tinyika nkama wa ku yanakanyisisa hi leswi hi swi dondzraka. Swi nga va swinene loko hi ngo tivutisa leswi: ‘Xana na kholwiseka leswaku leswi a kova ntsena dondzro ya wukhongoti? Xana a ni swi voni leswaku lowu i ntiyiso? Xana na ti vona tindlela ta ku tizrisa leswi ni swi dondzraka a wuton’wini byanga ku nge ku dondzrisa vambeni ntsena? Xana na swi twisisa swaku Yehovha ha byakwe o vulavula na mine?’ Ku yanakanyisisa hi swivutiso leswi swi nga hi pfuna ku tiyisa matitwela yezru ha Yehovha. Lizrandzru dzrezru ha yene dzri ta kula. Kutani loko timbilu tezru ti khumbeka hi ta pswala minhandzru leminene.​—Pr 4:23; Lk 6:45.

Ku dondzra Zritu dzra Xikwembu Nkulukumba minkama hinkwayu ni ku yanakanyisisa ha dzrone swi ta hi pfuna ku ya mahlweni hi yentxa leswi kumbexana hi mpimu wa kukazri hi swi yentxiki ku nga ku ‘susa mhunu wa khale kun’we ni mintizro yakwe, hi yambala mhunu lwemunpswha, lwa bandzrulekaka akuva a ta tiva.’ (Kl 3:9, 10) Ina, swi ta tama swi hi fambela ha hombe loko hi ya hi twisisa mongo ni ntamu wa Zritu dzra Nkulukumba. Wumhunu lebyo lebyinpswha bya wukriste byi ta hi pfuna ku tisizrelela ka mazrengu ya Sathana.

Djulisisa Tindzralama Ta Moya

Perspicaz vol-3 p. 412 §§ 2-4

Mfumu Wa Xikwembu Nkulukumba

‘Mfumu Wa N’wanakwe Lwe Wa Ku Zrandzriwa.’ Ntsrhaku ka khume wa masiku na Yesu a tlhantukele matilweni, hi Pentekosta dzra 33 Nguveni Yezru, vadondzrisiwa vakwe va pfuleteliwe leswaku Yesu a ‘tlakuxeliwi a xineneni xa Xikwembu Nkulukumba’ loko yene a va txhululela moya lowa ku xwenga. (Min 1:8, 9; 2:1-4, 29-33) A ‘xipfumelelanu leximpswha’ xi tizre ka vone, kutani vone va ve ‘tiko dzra ku xwenga’, Israyele wa moya.​—Hb 12:22-24; 1Pe 2:9, 10; Ga 6:16.

Hi nkama lowo Kriste kutani a a tsrhame xineneni xa Tatana wakwe nakone a a li Nhloko ya bandla ledzri. (Ef 5:23; Hb 1:3; Flp 2:9-11) Matsralwa ma kombisa leswaku ku sukela hi Pentekosta dzra 33 Nguveni Yezru, ku simekiwi mfumu wa moya henhla ka vadondzrisiwa vakwe. Loko Pawulo a tsralela vakriste va dzana dzra ku sungula a Kolosa, a vulavule hi Yesu Kriste swanga Hosi leyi afaka yi ni mfumu: ‘[Xikwembu Nkulukumba] hi yene lweyi a nga hi huluxa a ntan’wini wa munyama, a hi zruzrisela mfun’weni wa N’wanakwe, lwe wa ku zrandzriwa.’​—Kl 1:13; dzringanisa ni Min 17:6, 7.

Ku sukela hi Pentekosta dzra 33 Nguveni Yezru ku ya phambeni mfumu wa Kriste wu ve wa moya nakone a wu fuma Israyeli wa moya, ku nga vakriste lava pswaliwiki hi moya wa Nkulukumba leswaku va va vana va moya va Xikwembu Nkulukumba. (Yh 3:3, 5, 6) Loko vana volavo lava pswaliwiki hi moya va kuma hakelo dzravu dzra le matilweni, a va nge he ti va vafumiwa va la misaveni va mfumu wa Kriste wa moya, kambe va ta va tihosi na Kriste a matilweni.​—Mpf 5:9, 10.

Sentinela 15/08/2008 p. 28 § 9

Nkatsrakanyu Wa Mapapela Ya Ba-le-Galatia, Ba-le-Efesa, Ba-le-Filipi Ni Ba-le-Kolosa

2:8—I yini ‘vutule bya misava’ kumbe mintxhumu ya misava ya Sathana leyi Pawulo a vulavuliki ha wone? Vutule bya misava ya Sathana i mintxhumu ya misava ya Sathana kumbe minsinya ya milawu leyi kongomisaka, kumbe leyi mi kutxetelaka. (1Yh 2:16) Leswi patsraka filozofiya, mintxhumu leyi mi vonekaka ni wukhongoti bya madzrimi bya misava leyi.

8-14 KA JULHU

WUKOSI BYI NGA BIBELENI | 1 BA-LE-THESALONIKA 1-5

“Khongotelanani N’wi Yakisana”

Sentinela 15/06/2011 p. 26 § 12

‘N’wi Va Ni Xihluwa Ku Lava Tizraka Makazri Kwenu’

Ku byisa a bandleni a swi gameli ka ku dondzrisa ntsena. Xiga lexi xi tlhela xi tizrisiwa ka 1 Timoteo 3:4. Pawulo a hlaye leswaku mulaviseli a fanela ku va ‘lwe a fumaka yindlu yakwe swinene, a bekisaka vana a ku yingiseteni kun’we ni le xihluweni’. Lani a xiga lexi liki “fumaka” a xi tlhamuxeli ku dondzrisa vana vakwe ntsena kambe ni ku zrangela ndangwini ni ku ‘bekisa vana a xihluweni’. Ina, vakulu va zrangela bandleni, hi ku pfuna hinkwavu ku va ni xihluwa ka Yehovha.​—1Tm 3:5.

Sentinela 15/06/2011 p. 28 § 19

‘N’wi Va Ni Xihluwa Ku Lava Tizraka Makazri Kwenu’

Afa u ta kuyini loko wo yamukela xihiwa xa ku hlawuleka lexi bekiseliwiki wene? Xana afa u ta kombisa ku tlangela hi ku xi tizrisa? Hi ku tizrisa Yesu Yehovha a ku ‘nyike vhanu swanga xihiwo’. Yin’we ya tindlela leyi u nga kombisaka ha yone ku tlangela tinyiko leti i ku yingiseta hi wuzron’wana loko vakulu va nyikela wukaneli ni ku zama ku hanya hi leswi va swi dondzrisaka. Ndlela yin’wana i ku nyikela tinhlamulo ta ku wupfa loko u li mintlhanganwini. Seketela mintizro leyi zrangeliwaka hi vakulu, ku fana ni ntizro wa nsimu. Loko u same u pfuneka hi xilayu lexi pfaka ka nkulu, ha yini u nga n’wi byele ha swone? Ku yengesela ka leswo, xana u nga kombisa ku tlangela kwaku ka swizro swa mindangu ya vakulu? U nga dzrivali leswaku akuva nkulu a kota ku tihita bandleni, ndangu wakwe wu titsrona nkama wa ku va na yene.

Sentinela 10/2017 p. 10 § 13

“A Hi Zrandzrananeni Hi Swiyentxo Ni Hi Ntiyiso”

Byatsrhani lava gome. Loko lizrandzru dzrezru dzri li dzra xihlayelamfuzri swoswo swi ta tikomba hi loko hi kota ku landzra nawu wa Bibele lowu nge: ‘Byatsrhani lava gome, n’wi lehiselana a timbilu.’ (1Te 5:14) Nambi leswi ntalu wa lava nga ni gome va gamaka va tiya lipfumelweni, vambeni va djula ku lehiseliwa mbilu ni ku tama va seketeliwa. Leswi swi nga ha patsra ku va byela miyanakanyu ya matsralwa leyi tiyisaka, ku va zramba a ntizrweni wa nsimu, kumbe ku tinyika nkama wa ku va yingiseta. Ntlhantakubidzri, a matsrhan’wini ya kuva ntsena hi yanakanya leswaku makwezru a “tiyile” kumbe a ni “gome”, hi fanela ku twisisa leswaku hinkwezru hi nga ha tiya kumbe hi va ni gome. Nambi mupostola Pawulo a pfumelile ku tsrana kwakwe. (2Ko 12:9, 10) Kutani ke, hinkwezru hi nga londzrovota mpfunu wa vakriste-kulozri.

Sentinela 15/02/2015 p. 9 § 16

Yetisa Ku Titsrongohata Ni Lizrezre Dzra Yesu

Mazritu yezru ya lizrezre. A lizrezre dzri hi susumeta ku ‘khongotela lava kazraliki’. (1Te 5:14) Hi nga hlaya yini ku tiyisa vhanu lavu? Hi nga va komba leswaku ha zron’weka ha vone. Hi nga va pfuna ku vona tsrhamela ni wuswikoti lebyinene va nga na byone. Hi nga va dzrimuxa leswaku Yehovha a va hanane N’wanakwe, xileswo vone va hlawulekile matihlweni yakwe. (Yohan 6:44) Hi nga va dumbisa leswaku Yehovha awa ma londzrisa swinene malandzra yakwe lama nga ni ‘mbilu leyi tsrhovekiki’ kumbe lama ‘xanisiwaka moyeni’. (Ps 34:18, Testamente Ledrimpshwa Ni Mapsalma) Mazritu yezru ya lizrezre ma tlema lava djulaka ku xingazriwa.​—Pr 16:24.

Djulisisa Tindzralama Ta Moya

Perspicaz vol-2 p. 155 § 1

A wuwoswani

A wuwoswani i ntxhumu wa ku nyenyentsa lowu nga yentxaka mhunu a susiwa bandleni dzra wukriste. (1Ko 5:9-13; Hb 12:15, 16) Mupostola a tlhamuxela leswaku mukriste lwa yentxaka wuwoswani a dohela mizri wakwe, hi ku tizrisa swizro swakwe swa mbeleko hi nkongometo wa ku biha. Leswo swi khumba wumoya byakwe, swi tisa khombo bandleni dzra Xikwembu Nkulukumba, mfuzri a tinhingenisa nghozini ya ku kumiwa hi mavabyi lama tlulelanaka. (1Ko 6:18, 19) A nga wu bekeli xihluwa ntsrhuxeko wa vamakwavu bandleni. (1Te 4:3-7) hi 1) ku buyisa leswi nyenyentsaka ni leswi nga khensekiki, swa ku soleka a ndzreni ka bandla (Hb 12:15, 16), 2) a sivela lweyi a hambiki wuwoswani na yene ku va ni mahanyela lama basiki, nakone loko a li leswaku mhunu lweyo a nga txhatanga a mu susela wun’hwanyana kumbe wudjaha byakwe, 3) a tisela ndangu wakwe ndhuma leyi ntxhimiki, ni ku 4) hoxela vapswele, nuna, kumbe lwa a taka tekana ni lweyi a hambiki na yene wuwoswani. A nga doheli vhanu ntsena, lava minawu yavu yi nga ha byi seketelaka wuwoswani ,kambe a dohela Nkulukumba, lweyi a taka mu khatisa hi xidoho xakwe.​—1Te 4:8.

Sentinela 15/07/2015 pp. 18-19 §§ 14-15

‘Ku Tizruliwa Kwenu Ku Kusuhi’!

Ku ta yentxeka yini ntsrhaku ka loko Gog wa Magog a sungula ku lwa ni vhanu va Xikwembu Nkulukumba? Matewu na Marka va vulavule hi xiyentxakalu xa xin’we: ‘[N’wana wa mhunu] a ta zruma xizrun’wa a hlengeleta vahlawuliwa vakwe, va pfa ku mune wa timheho, ku sungula wuganwini bya misava, ku ya txhikela wugan’wini bya tilu.’ (Mr 13:27; Mt 24:31) Leswi a swi tlhamuxeli ku hlengeletiwa loku ka ku sungula ka vatotiwa nakone a ku tlhamuxeli ku fungiwa ka wugamu ka lava nsali. (Mt 13:37, 38) Ku fungiwa koloko ku ta yentxeka ntsrhaku ka ku sungula ka nhlomulu lowukulu. (Mpf 7:1-4) Kutani, i ku hlengeleta kwini loku Yesu a vulavuliki ha kone? I nkama lowu lava nsali va taka yamukela hakelo dzravu dzra le tilweni. (1Te 4:15-17; Mpf 14:1) Xiyentxakalu lexi xi ta va kone a ntsrhaku ka ku sungula a nhlaselo wa Gog wa Magog. (Ezk 38:11) Kutani ku ta hetiseka mazritu ya Yesu la ma liki: ‘A nkameni lowo, a valulami va ta phatima swanga hi dambu, a Mfun’wini wa Tatana wavu.’​—Mt 13:43.

¹⁵ Xana leswi swi tlhamuxela leswaku ku ta va ni ku “wutliwa” ka vatotiwa hi mizri wa nyama? Vhanu vanyingi va wukhongoti bya madzrimi, hi ku ya hi dondzro leyi, va pfumela leswaku vakriste va ta tekiwa hi mizri wa nyama. Kutani, va zrindzrela ku vona Yesu hi nyama a tlhela a ta ku ta fuma misava. Nambitanu, swe dla a Bibeleni leswaku ‘xikombiso xa n’wana wa mhunu’ xi ta humelela matilweni nakone Yesu a ta ta ‘a henhla ka matlavi ya tilu’. (Mt 24:30) Swiga leswi ha swibidzri swi vulavula hi leswi nga vonekikiki. Ntlhantakubidzri, ‘a nyama ni ngati swi nga di pfindla dzra Mfumo wa Xikwembu Nkulukumba, ni leswi bolaka swi nga di pfindla dzra leswi nga bolikiki’. (Dondzra 1 Ba-le-Korinte 15:50-53.) Vatotiwa va ku dumbeka lava taka va la misaveni va ta hlengeletiwa hi nkamanyana wutsrongo.

15-21 KA JULHU

WUKOSI BYI NGA BIBELENI | 2 BA-LE-THESALONIKA 1-3

“Ku Vonekisiwa Ka Lwemfani”

Perspicaz vol-1 p. 704 § 3

Ku Zrandzra Yehovha

Hi kuma ntxhumu wumbeni wa ku hlamalisa lowu fambisanaka ni ‘xihundla xa ku xwenga’. I ‘xihundla xa wusomboloki’. Lexi a ku li xihundla xa vakriste va xihlayelamfuzri hikusa a minkameni ya mupostola Pawulo ‘wanuna lwemfani’ a nga ti kombisanga a li leswi a nga swone hi ku helela. Nambi ntsrhaku ka loko “wanuna” lweyi a pfumelile, leswi a nga swone a swa ha ta tama swi va xihlamaliso ka va ku tala, hikusa a wubihi byakwe a byi ta yentxiwa hi ndlela leyi nga vonekiki ni hi vito dzra Xikwembu Nkulukumba. Hakunene, a ku ta va wukanganyisi. Pawulo a te ‘a xihundla xa wusomboloki’ a xi yentxiwa a masikwini yakwe, hikusa a ku ni kuntxetelo lowu lwisanaka ni nawu a bandleni dzra xikriste, lani hi wugamu a ku ta humelela ntlawa lowu wa vakanganyisi. Hi wugamu, a byi ta helisiwa hi Yesu Kriste a ku buyeni kwakwe. “Wanuna” lweyi wa mukanganyisi lwa kongomisiwaka hi Sathana a a ta va henhla ‘ka hinkwaswu leswi hlayiwaka ‘xikwembu’ ni leswi gandzreliwaka’ (Gr., seʹba·sma). Mukaneti lweyi lwenkulu wa Xikwembu Nkulukumba, swanga xibya xa Sathana, a ta kanganyisa nakone a ta tisa khombo dzra ku suvisiwa ka lava hlawulaka swiyentxo swa yene. A ku humelela ka ‘wanuna lwemfani’ a ku ta pfela ka wubihi byakwe lebyi tumbeliki bya wukanganyisi, ingi hi loko a yentxa ku zrandzra ka Yehovha.​—2Te 2:3-12; dzringanisa Mt 7:15, 21-23.

Perspicaz vol-2 p. 808 § 6

Madzrimi

Yehovha Xikwembu Nkulukumba a pfumelela kuva ‘mintizro ya ku biha’ yi wela vhanu lava langaka wukanganyisi, ‘va ta pfumela swa madzrimi’ matsrhan’wini ya ku pfumela madzrungula lamanene mayelanu na Yesu Kriste. (2Te 2:9-12) Nsinya lowu wa nawu wu kombisa leswi humeleliki madzana ya malembe ntsrhaku ka hosi Akabu wa Israyele. Vaprofeta va madzrimi va dumbise Akabu leswaku a a ta hlula Ramote wa Giliyadi a yimpini, kambe muprofeta Mika afa a profete dzrungula dzra khombo. Hi lani swi viki hakone ka xivono xa Mika, Yehovha a pfumelele xivumbiwa xa moya kuva xi ndzruluka ‘moya wa madzrimi’ a milon’wini ya vaprofeta va Akabu. Leswi liki a xivumbiwa lexi xa moya xi tizrise ntamu wa xone kuva xi va yentxa va nga hlayi ntiyiso kambe va hlaya leswi vone afaka va djula swone ni leswi Akabu afaka a djula ku swi yingela kwavu. Nambi leswi Akabu a byeliwiki, a lange ku kanganyisiwa hi madzrimi yavu kutani swoleswo swi mu tekele wutomi.​—1Th 22:1-38; 2Mk 18.

Djulisisa Tindzralama Ta Moya

Perspicaz vol-2 p. 149 § 8

Ndzrilo

Petro a tsrale leswaku ‘a matilo ni misava ya swoswi swi bekisiwa swi londzrovoteliwa ndzrilo’. Hi ku ya hi mongo ni mpfuletelo wa matsralwa mambeni, swi le livaleni leswaku lowu a hi ndzrilo wa hakunene kambe ku vulavuliwa hi ku suvisiwa hi ku helela. Swanga hi leswi ndhambhi ya siku dzra Nowa yi nga helisangakiki matilo ni misava ya hakakunene, kambe ku suvisiwe lavamfani. Kutani hi ku fanana, ku pfuleteliwa ka Yesu Kriste ni tintsrumi takwe ta ntamu a ndzrilweni lowu pfuzraka ku ta hlaya ku suvisiwa hi ku helela ka lavamfani ni xiyimu xa ku biha xi nga lexi va nga xiyenge xa xone.​—2Pe 3:5-7, 10-13; 2Tm 1:6-10; dzringanisa Eza 66:15, 16, 22, 24.

Perspicaz vol-2 p. 402 § 6

Ku huhutiwa

Mazritu Lama Huhutiwiki—Xihlayelamfuzri ni Madzrimi. Zritu dzra xigrika ledzri liki pneuʹma (moya) dzri tizrisiwa hi ndlela ya ku hlawuleka ka man’wana matsralwa ya vapostola. Ka 2 Ba-le-Thesalonika 2:2, hi xikombiso, mupostola Paulo a tsratsriya vamakwavu va le Tesalonika ku va va nga hatli va tsrekatsrekisiwa kumbe ku ganaganisiwa hi mavonela yavu ‘kumbe hi mazritu [hi ku kongoma, ‘hi moya’], kumbe hi zritu, kumbe papela ledzranga hi loko dzra ku pfa ku hine, swanga hi loko a siku dzra Hosi dzre ku tsrhindzrekela’. Swi le livaleni leswaku Pawulo a tizrisa zritu pneuʹma (moya) hi ku fambisana ni ku kanelisana, ku fana ni “mazritu” kumbe “papela”. Hi leswo ke, ka buku ledzri liki Comentário Sobre as Escrituras Sagradas, dzra Lange (p. 126), dzri li: “Hi mazritu lawa muapostola a vulavula hi moya, ku profeta, mazritu ya muprofeta.” (leswi tsraliwiki ni ku yampswisiwa P. Schaff, 1976) Ka dzravisiso wakwe, Vincente a kume leswi: “Hi moya. Hi mazritu ya wuprofeta ka hlengeletanu ya vakriste, lava afaka va tibyela leswaku va nyikiwi wuhosi bya mpfuletelo wa le tilweni.” (1957, Vol. IV, p. 63) Nambi leswi wundzruluteli byin’wana byi ndzruluteliki zritu pneuʹma hi ndlela leyi kumbe leyi fanaka swanga “moya” wundzruluteli byin’wana byi li ‘dzrungula dzra moya’ (AT), ‘ku profeta’ (JB) ‘Ku huhutiwa’ (D’Ostervald; Segond [Xifaransa]), ‘mazritu ya ku huhutiwa’ (NM).

22-28 KA JULHU

WUKOSI BYI NGA BIBELENI | 1 TIMOTEO 1-3

“Lwela Ku Tlhasela ‘Ntizro Wa Hombe’ Kumbe Wa Wulaviseli”

Sentinela 08/2016 p. 21 § 3

Xana Wa Xi Vona Xivileleko Xa Ku Yentxa Nhluvuku Hi Tlhelo Dzra Moya?

Dondzra 1 Timoteo 3:1. Zritu dzra Xigriki ledzri ndzruluteliwiki dzri ku ‘ku navela’ swi tlhamuxela ku tikazratela ku kuma xa kukazri, a nga ha va ntxhumu lowu vonekaka ingi wa kazrata ku wu tlhaselela. Loko mupostola Pawulo a tizrisa zritu ledzri a kombisa leswaku ku hluvuka hi tlhelo dzra moya swi djula ku tikazrata. Yanakanya hi makwezru lweyi a pimisaka hi wumundzruku byakwe bandleni. Nambi leswi a nga tizrikiki swanga nandzra wa wutizreli swoswi a vona xivileleko xa ku txutxela matsrhamela ya moya. Xa ku sungula, a lwela ku fanelekela ku va nandzra wa wutizreli .Hi ku famba ka nkama, a yimela ku fanelekela ku va mulaviseli. Ka xiyimu ha xin’we a lwela ku fanelekela ku yengeseliwa wutiyanguleli bandleni.

Ministério Do Reino 02/1979 p. 3 § 7

Lava ‘Tiyentxelaka Wutsrhamu Lebyinene’

Swa twisiseka leswaku ha yini Pawulo a hlaye leswaku vanhu volavo hi lava ‘tiyentxelaka. . . wutsrhamu lebyinene’. Vambeni va swi teka a li ku kuma xitsrhamu a kezrekeni kambe leswo swa siyana ni leswi mhaka yi nga swone. Malandzra ya wutizreli lama ‘tiyentxelaka wutsrhamu lebyinene’ ma dumbisiwa leswaku ma tovokisiwa ha Yehova na Yesu, nakone a bandla hinkwadzru dzri va bekela xihluwa ni ku va seketela. Va kuma ku ‘tiya lokukulu a ku pfumeleni loku nga ka Yesu Kriste’. Hi ntiyiso wa kone, vone va zrandzriwa hi kola ka ntizro wavu lowunene, va tiyile a ku pfumeleni nakone a va na xa ku va khomisa tingana.

Djulisisa Tindzralama Ta Moya

Perspicaz vol-2 p. 197 § 1

Lixaka

A swi nga twali ku dondzra nambi ku bula hi mhaka leyi, ngopfu-ngopfu nkama lowu Pawulo a tsraleliki Timotewu. A swi nga ha bohi ku hlayisa leswi tsraliwiki mayelanu ni lixaka kumbe swiloso swa kukazri ku kombisa lomu mhunu a pfaka kone, hikusa Xikwembu Nkulukumba a a nga ha hambanise va-Yuda ni vamatiko ndzreni ka bandla dzra xikriste. (Ga 3:28) Leswi tsraliwiki mayelanu ni lixaka kumbe swiloso swi beke mhaka livaleni leswaku Kriste a huma ka lixaka dzra Davhida. Nakone, a swi nga ha ta teka nkama wa ku leha, ntsrhaku ka loko Pawulo a tsrale xikombiso lexi, ku ya tlhasela lani Yerusalema a ta lovisiwa kun’we ni leswi tsraliwiki mayelanu ni va-Yuda. Xikwembu Nkulukumba a nga swi bekisanga. Kutani, Paulo afa a vilela hi leswaku Timotewu ni mabandla va nga txhuki va kanganyisiwa hi ku heta nkama na va setxhisisa kun’we ni timholova mayelanu ni timhaka ta ximhunu, leti afaka ti nga va yaki lipfumelo. A lixaka ledzri Bibele dzri vulavulaka ha dzrone dzra yenela kuva dzri kombisa leswaku Yesu i Mesiya, a nga dzrungula dzra lisima ka vakriste. Madzrungula mambeni ya tinxaka ya le Bibeleni ma beka wumboni bya xihlayelamfuzri mayelanu ni dzrungula dzra Bibele, leswi kombisaka leswaku i dzrungula dzra matimu dzra ku dumbeka.

Achegue-se a Jeová p. 12 § 15

“Langutani! Lweyi I Xikwembu Nkulukumba Wezru”

Mavitanela mambeni lama tizrisiwaka ku vitana Yehovha hi lama liki ‘Hosi ya minkama leyi ngeke na ku bola’. (1 Timoteo 1:17; Apfuletelo 15:3) Xana leswi swi hi byela yini? Swa hi kazratela ku swi twisisa swanga hi leswi hi gomiki miyanakanyu, kambe Yehovha i wa minkhama leyi ngeke na ku bola hi matlhelo hinkwawu​—lemi khalutiki ni leyi ma ha taka. Amapsalma 90:2 yi li: ‘A ku ya tlhasa la ku ngeke na vuhelo, n’ana wa ku va Xikwembu Nkulukumba’. Hi swoswo Yehovha a nga na masungulo; a tsrhama a li kone. Swa mu fanela ku vitaniwa ‘Lwe wa masiku’​—a vi kone hi masiku na ku nga si va na munhu kumbe ntxhumu wa kukazri a wuyakwini hinkwabyu! (Daniel 7:9, 13, 22) Hi mani lwa nga vaka ni xivangelo lexi twalaka xa ku yala leswaku Yehovha i Hosi ya wuyaku hinkwabyu?

29 KA JULHU-4 KA AGOXTO

WUKOSI BYI NGA BIBELENI | 1 TIMOTEO 4-6

“Wupfundzri Ni Ku Zrandzra Yehovha—Xana U Ta Langa Yini?”

Sentinela 01/06/2003 p. 9 §§ 1-2

Ku Dondzra Xihundla Xa Ku Yaneliseka Hi Leswi U Nga Na Swone

Ntxhumu wa lisima lowu yentxiki Pawulo a va ni ku tsrhava hi leswaku afa a li mhunu wa ku yaneliseka. Kasi swi tlhamuxela yini ku va lwe a yanelisekaka? Hi ku tsrema, swi tlhamuxela ku nyonxa hi ku kuma leswi vilelekaka ntsena. Mayelanu ni leswi, Pawulo a byele Timotewu, muzrezri-kulobye, a ku: ‘Kambe a wukhongoti kun’we ni ku tsrhava i wupfundzri lebyikulu. Hikusa a hi tanga na ntxhumu misaveni; swa voneka ke leswaku hi nga teki ntxhumu loko hi suka ku yone. Ke, loko hi ni swakuda ni swa ku yambala hi ta yanela.’​—1 Timoteo 6:6-8.

Xiya leswaku Pawulo a twananise ku yaneliseka ni ku tinyiketela ka swa wukhongoti. Afa a swi tiva leswaku a ku tsrhava ka xihlayelamfuzri ku ta hi zrandzra swa wukhongoti, leswi liki, hi zrangisa ku tizrela Yehovha a phambeni ka hinkwaswu, ku nga li ka mintxhumu leyi vonekaka kumbe wupfundzri. ‘Swakuda ni swa ku yambala’ afa ku li swone ntsena leswi afaka a swi vilela kuva a ya mahlweni a tizrela Yehovha. Kutani ka mupostola Pawulo a xihundla xa ku yaneliseka afa a li ku dumbela ka Yehovha, swi nge na mhaka leswaku a swiyimu a swi tsrhamisise kuyini.

Despertai! 06/2007 p. 6 § 2

Ku Tiyimisela Ku Va Ni Wukosi—Xana Swi Nga Ku Khumbisa Kuyini?

I ntiyiso leswaku, ntalu wa vhanu a va fi hi mhaka ku hlongolisa wupfundzri. Nambitasu, a wutomi byi nga va phonyokela hi ku byavuta ka tihlu na va li ku hlongoliseni ka wupfundzri. Nakone, xiyimu xa wutomi xi nga sungula ku va bindzrela loko ku kameka hi ntizro ni swa timali swi va vangela mavabyi ya mbilu, ku pfumala wuzrongo, mavabyi ya nhloko ya ku ka yi nga miyeli kumbe mavabyi mambeni lama nga ha gomisaka wutomi byavu. Lani ka ku nambi loko mhunu o djula ku txintxa leswi a swi zrangisaka a wuton’wini nkama a wu nga ha mu pfumeleli. Swi nga yentxa kuva munghanu wakwe wa wukati a nga ha mu dumbi, vanakwe va ga ha va va tsrhovekile a moyeni nakone wutomi byakwe byi hahlukile. Swiyimu swimbeni swi nga ha lulamisiwa kambe swi nga ha djula ku va a balha. Hakunene vhanu volavo, ‘va titlhavi hi mahlomulo lamanyingi’.​—1 Timoteo 6:10.

Despertai! 11/2008 p. 6 § 4-6

6 Wa Tindlela Ta Ku Kuma Ku Nyonxa

Hi lani hi swi voniki ha kone ka nhloko-mhaka ya ku sungula ya nxaxamelo wa revhixta ledzri, vhanu lava djulaka wokosi hi nkhinkhi swo fana ni kuva va hlongolisa moya. Wutomi lebyi a byo va pfumata ku nyonxa ntsena kambe byi va vangela switlhavi swa ku tala. Hi xikombiso, loko mhunu a djula wukosi hi nkhinkhi swi yentxa kuva a luza wuxaka byakwe ni ndangu kun’we ni vanghanu. Vambeni va pfumala ni nkama wa ku yetlela hi kola ka ntizro ni ku vilela kumbe ku hlatiyela. Eklesiasta 5:12 yi li: ‘A wuzrongo bya mhunu lwa tizraka bya nandzrika, nambi a da ngopfu, nambi a da kutsrongo; kambe ku xuzra ka mupfundzri a ku mu pfumeleli ku khutsriyela.’

Handle ka kuva mali yi li mufumi wa ku biha, ya kanganyisa. Yesu Kriste a vulavule hi ‘ku kanganyisa ka wukosi’. (Marka 4:19) Hi mazritu man’wana, wupfundzri byi dumbisa ku nyonxa kambe a byi na kone. Byi yentxa kuva mhunu a djula lebyi yengetelekiki. Eklesiasta 5:10 yi li: ‘Lwa zrandzraka mali, a nga ka a nga kholwisiwi kumbe ku yanelisiwa hi mali.’

Hi ku gomisa, lizrandzru dzra mali dzri tale hi swikazratu nakone a wugamu bya kone i ku vaviseka, ku pfilunganyeka nambi wugevenga. (Amaproverbia 28:20) Mintxhumu leyi yelanaka ni ku nyonxa ni ku humelela i ku hanana, ku va ni moya wa ku dzrivalela, ku basa a mahanyelweni, lizrandzru ni wumoya.

Djulisisa Tindzralama Ta Moya

Amar a Deus p. 23 § 17

Ku Va Ni Lipfalu Ledzri Basiki Ku Xikwembu Nkulukumba

Mupostola Pawulo a tsrale leswi: ‘N’wi va ni lipfalu lolinene.’ (1 Petros 3:16) Khombo dzra kone, loko vhanu va bakanya milawu ya Yehovha, lipfalu dzravu a dzra ha va dzrimuxi ntxhumu. Pawulo a hlaye leswaku lipfalu dzra muxaka lowo hi ledzri “hisiwiki”. (1 Timoteo 4:2) Xana u sama u hisiwa? Nsimbi leyi hisaka yi siya ntsrhosi nyameni lowu hi ku famba ka nkama wu nga ha vavisikiki. Vanyingi va ni lipfalu ledzri fiki lakakuva a dzra ha va dzrimuxi ntxhumu. Dzri va susa tingana ni ku titwa nandzru hi swihoxo va nga ha swi yentxaka. Vanyingi va ma zrandzra matitwela lawo.

Perspicaz vol-2 p. 688 §§ 5-6

Ku Dondzra Ka Le Livaleni

A Bandleni Dzra Xikriste. A dzaneni dzra ku sungula, a hi vangani lava a va ni Bibele, kutani a ku dondzra ka le livaleni a ku li ka lisima. Mupostola Pawulo a lelete leswaku ku dondzriwa mapapela yakwe a livaleni ka mintlhanganu ya wukriste, a tlhele a leleta leswaku va ntxintxana mapapela ni mabandla man’wana lawa a ma zrumeliki, akuva na wone ma dondzriwa. (Kl 4:16; 1Te 5:27) Pawulo a tsratsriye Timotewu lwa afaka a li mulaviseli, leswaku a ‘tinyiketa ku dondzreni, ni le ku khongoteleni, ni le ku dondzriseni’.​—1Tm 4:13.

Ku dondzra ka le livaleni ku fanela ku yentxiwa hi ndlela leyinene. (Hab 2:2) Ku dondzra ka le livaleni ku yenxtiwa hi kongometo wa ku dondzrisa van’wana, mudondzri wa le livaleni a fanela a yanakanyisisa hi leswi a swi dondzraka ni ku swi twisisa ha hombe leswi tsraliwiki, akuva a nga dondzreli vayingiseti kumbe ku va byela mintxhumu leyi hoxekiki. Hi ku ya hi Apfuletelo 1:3, lava dondzraka wuprofeta lebyi kun’we ni lava yingelaka mazritu ya byone ni ku ma bekisa, va ta nyonxa.