Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

6-12 KA JULHU

WUKOSI BYI NGA BIBELENI | EKSODA 6-7

“Kutani U Ta Swi Vona Leswi Ni Taka Swi Yentxa Ku Faro”

Perspicaz vol-3 p. 16 § 7

Moxe

Ku ve ni ku txintxa lokukulu ka va-Israyele. A ku sunguleni va ma yamukelile mazritu ya Moxe, kambe loko Faro a ya a va bindzrisela ntizro va ye ngurangura ka Moxe lakakuva a za a ya byela Yehovha na a hele ntamu. (Eks 4:29-31; 5:19-23) Hi nkama lowo, Nkulukumba a tiyise lipfumelo dzrakwe hi ku hlaya leswaku Yene a ta hetisisa leswi Abrahamu, Izaki na Yakobe a va swi yimelile, ku hlayiwa ka ntlhamuxelo lowu heleliki wa vito dzra Yehovha hi ku tsrhunxa va-Israyele ni ku va yisa a tikweni dzra xidumbiso. (Eks 6:1-8) Nambitanu, va-Israyele a va mu yingisetanga Moxe. Ka khombo dzra wu 9 kutani va yime na yene, va tizrisane lakakuva ntsrhaku ka khombo dzra wu 10, a kote ku va kongomisa a va humexa hi ndlela leyi hlelekiki, va ‘huma na va hlomile’.​—Eks 13:18.

Perspicaz vol-3 p. 16 §§ 5-6

Moxe

Mahlweni ka Faro wa Egipta. Moxe na Aroni a va li vazrangeli va ‘yimpi ya swikwembu’. Faro ni tinyanga takwe, leti vazrangeli va tone ku nga Yanes na Yambes (2Tm 3:8), va vitane ntamu wa swikwembu hinkwaswu swa va-Egipta ku ta lwa na Yehovha. Hi ku kongomisiwa hi Moxe, Aroni a hambe hlolana dzra ku sungula ledzri kombisiki ntamu wa Yehovha mahlweni ka swikwembu swa va-Egipta nambileswi Faro a tamiki a tinonon’whisa. (Eks 7:8-13) Ntsrhaku ka loko ku humelele khombo dzra wuzrazru, vaprista va Faro va sindzriseke ku pfumela ka leswaku ‘i litiho la Xikwembu Nkulukumba leswi’! Nakone hinkwavu va biwe hi mazrumba lakakuva va nga swi koti ku humelela mahlweni ka Faro ku ya lwa na Moxe hi nkama wa khombo ledzri.​—Eks 8:16-19; 9:10-12.

Makhombo ma vanga ku zrula ni ku tinonon’whisa. Moxe na Aroni va ve vatwalisi va makhombo hinkwawu ya 10. Makhombo ma humelele hi la ma twalisiwiki hakone, ku tiyisekisa leswaku Moxe i muyimeli wa Yehovha. Vito dzra Yehovha dzri twalisiwile nakone ku vulavuliwe ngopfu ha dzrone a Egipta, leswi vangiki ku zrula ni ku tinonon’whisa hi mhaka ya vito ledzri​—leswi vangiki ku zrula ka va-Israyele ni le ka va-Egipta van’wana, kambe swi nonon’whisa mbilu ya Faro, valayi kun’we ni malandzra yakwe. (Eks 9:16; 11:10; 12:29-39) A matsrhan’wini ya ku va va-Egitpa va pfumela leswaku va khomise tingana swikwembu swavu, a va swi tiva leswaku i Yehovha lwa a a yavanyisa swikwembu swavu. Ntsrhaku ka khombo dzra wu 9 Moxe ‘a ve nkulu ngopfu a tikweni dzra Egipta, a mahlweni ka malandzra ya Faro, ni le mahlweni ka vhanu’.​—Eks 11:3.

Djulisisa Tindzralama Ta Moya

Perspicaz vol-3 p. 723 §§ 6-7

Lwe Wa Ntamu Hinkwawu

Yehovha a tizrise xithopo lexi liki ‘Xikwembu Nkulukumba Wa Ntamu Hinkwawu’ (ʼEl Shad·daiʹ) loko a hamba xidumbiso lexi ka Abrahamu mayelanu ni ku pswaliwa ka Izaki, leswi a swi djula leswaku Abrahamu a va ni lipfumelo ledzrikulu a ku hetisiseni ka xidumbiso lexi. Dzri sungule ku tizra kolanu loko ku hlayiwa Xikwembu Nkulukumba swanga lwa a a ta tovokisa Izaki na Yakobe swanga vamadapfindla va xipfumelelano xa Abrahamu.​—Gn 17:1; 28:3; 35:11; 48:3.

Hi ku twanana ni mazritu lawa, a swi twala kuva Yehovha a hlaya leswi ka Moxe: ‘Ndzra voneki ku Abrahamu, ni le ku Izaki, ni le ku Yakobe, na ndzri Xikwembu Nkulukumba wa Ntamu Hinkwawu [beʼElʹ Shad·daiʹ]; kambe hi vito dzranga dzra Yehovha, afa ndzri nga tiveki ku vone.’ (Eks 6:3) A swi nga hlayi swone leswaku vamulumuzana lavo, a va nga dzri tivi vito dzra Yehovha hikusa vone ni vambeni a va dzri tizrisa hi xitalo. (Gn 4:1, 26; 14:22; 27:27; 28:16) Nakunene, ka buku dzra Genesis, lani ku vulavuliwaka ngopfu hi wutomi bya vamulumuzana, xithopo lexi liki ‘Lwe Wa Ntamu Hinkwawu’ xo humelela ntsena ka 6, kasi vito ledzri liki Yehovha dzri humelela ka 172 ka matsralwa ya xi-Heberu. Nambileswi vamulumuzana a va tiva tsrhamela dzra Xikwembu Nkulukumba ka xithopo lexi liki ‘Lwe Wa Ntamu Hinkwawu’, a va vanga nayu ndjombo ya ku tiva ntlhamuxelo lowu heleliki wa vito dzra Yehovha ni leswi patsrekaka ka dzrone. A mhakeni leyi a Novo Dicionário Da Bíblia (Vol. 1, p. 572) dzri hlaya leswi: “Leswi byeliwiki vamulumuzana mayelanu ni swidumbiso leswi, a swa ha ta teka nkama kuva swi hetiseka. Xileswo a ku djuleka xitiyisekiso xa leswaku Yene, Yahweh, a a li Xikwembu Nkulukumba (ʼel) lwa a a ni wuswikoti (sadday) bya ku swi hetisisa. Leswi hlayiwiki ka xinsinyana lexi pfuzraka, swi ve ni ntamu swi tlhela swi khumba ngopfu, hikusa a ntamu ni wukone bya Xikwembu Nkulukumba byi patsrekile ka vito ledzri tolovelekiki Yahweh.”​—Swi tsraliwe hi J. D. Douglas, 1980.

Perspicaz vol-3 p. 16 § 2

Moxe

Moxe a tame a tizrisiwa nambileswi a tiyimeleliki. Moxe a tiyimelelile hi ku hlaya leswaku a nga swi koti ku vulavula hi ndlela leyinene. A a hambane ngopfu ni lweyi ku sunguleni a tinyikeliki akuva a huluxa va-Israyele 40 wa malembe ntsrhaku. A tame a kombela Yehovha leswaku a nga mu nyiki xiyavelo lexi, kambe a nyika mumbeni. Nambileswi a swi ta mu hlundzrukisa Yehovha, a nga mu tsrhikanga Moxe kambe a mu nyike Aroni makwavu swanga muvulavuleli wakwe. Swanga hi leswi Moxe a a li muyimeli wa Yehovha, Moxe na yene a ve ‘Xikwembu Nkulukumba’ ka Aroni, lwa a a vulavula swanga muyimeli wakwe. Ka ntlhanganu lowu viki kone ni vakulu va Israyele, ni loko va ye tlhangana na Faro, swi tikomba na Xikwembu Nkulukumba a nyike Moxe swileleto, kutani Moxe a byela Aroni, Aroni hi yene lwe a a vulavula mahlweni ka Faro. (Eks 2:23; 4:10-17) Ntsrhaku ka leswo, Yehovha a vitane Aroni swanga ‘muprofeta’ wa Moxe, na a dja ku hlaya leswaku swanga hi leswi Moxe a a li muprofeta wa Xikwembu Nkulukumba, na a kongomisiwa hi Nkulukumba, Aroni na yene a a fanela ku kongomisiwa hi Moxe. A tlhele a byela Moxe leswaku a mu hambe xikwembu ku Faro, leswi hlayaka leswaku hi ntamu ni hi wulawuli lebyi pfaka ku ‘Xikwembu Nkulukumba ku Faro’, a a nga fanelanga ku txhava hosi ya Egipta.​—Eks 7:1, 2.

13-19 KA JULHU

WUKOSI BYI NGA BIBELENI | EKSODA 8-9

“Ku Tinonon’whisa Ka Faro Ku Yentxe Leswaku Ku Zrandzra Ka Xikwembu Nkulukumba Ku Hetiseka”

Perspicaz vol-3 p. 117 § 2

Ku Nonon’wha

Ka swipfumelelano swakwe ni vhanu, Yehovha Xikwembu Nkulukumba a pfumelela leswaku vhanu a misaveni hinkwayu nambi loko va faneliwa hi lifu va tama va hanya. (Gn 15:16; 2Pe 3:9) Vambeni va yangule ha hombe akuva va kota ku yamukela timpswalu (Yš 2:8-14; 6:22, 23; 9:3-15), vambeni va nonon’whise timbilu hi ndlela leyi tlulisaka ka Yehovha ni vhanu vakwe. (Dt 2:30-33; Yš 11:19, 20) Nambi leswi Yehovha a nga va sivelikiki vhanu kuva va tinonon’whisa awa va pfumelela, yene a hlayiwa lweyi a va ‘pfumelelaka kuva va tinonon’whisa’ kumbe ‘ku tiyisa timbilu tavu’. Loko hi wugamu a tidzrihisela ka lava va tinonon’whisaka swi kombisa ntamu wakwe lowukulu, swi tlhela swi yentxa leswaku vito dzrakwe dzri twalisiwa.​—vona Eks 4:21; Yh 12:40; Ro 9:14-18.

Perspicaz vol-2 p. 397 §§ 1-3

Wubihi

Ku tlula kolanu, Yehovha a nga yentxa leswaku lavamfani va hetisisa kongometo wakwe va nga swi xiyanga. Nambi loko va mu yala, Xikwembu Nkulukumba a nga nonon’whisa timbilu tavu akuva a hlayisa malandzra yakwe ma li lama dumbekiki, ni ku yentxa leswaku swiyentxo swa lavamfani swi twalisa wululami byakwe. (Ro 3:3-5, 23-26; 8:35-39; Ps 76:10) A mhaka leyi yi kumeka ka Amaproverbia 16:4, leyi liki: ‘Yehovha a yentxe mintxhumu hinkwayu a makungwini yakwe; na yene lwe wa ku biha a yentxeliwe siku dzra khombo.’

Xikombiso lexi hanyaka i Faro, lweyi Yehovha hi ku tizrisa Moxe na Aroni, a mu byeliki leswaku a a tsrhunxe va-Israyele a wukazraweni. A hi yene Xikwembu Nkulukumba lwa yentxiki mufumi lwe wa Egipta a va lwe wa ku biha, kambe a pfumelele leswaku Faro a tama a hanya nakone a pfule mukhandlu wa leswaku a tama a yentxa leswa ku biha, hi wugamu a faneliwa hi ku fa. Nkongometo wa Yehovha wa ku yentxa leswo wu kumeka ka Eksoda 9:16, leyi liki: ‘Kambe kunene ndzri ku yimise hi leswi, akuva ndzri ku komba ntamu wanga, ni kuva vito dzranga dzri twala a misaveni hinkwayu.’

Makhombo ya 10 lama weliki va-Egipta, ma hele hi ku suvisiwa ka Faro ni mabutsrhu yakwe a lwandle dzra libungu, lani ku kombisiwiki ntamu lowukulu wa Yehovha. (Eks 7:14–12:30; Ps 78:43-51; 136:15) Swi teke malembe na matiko lama nga kusuhi ma vulavula hi mhaka leyi, xileswo a vito dzra Xikwembu Nkulukumba a dzri li ku dzrumisiweni a misaveni hinkwayu. (Yš 2:10, 11; 1Sa 4:8) Loko Yehovha e e tekela ku suvisa Faro, ku kombisiwa ka ntamu wakwe lowukulu akuva a phatimisiwa ni ku tsrhunxiwa ka vhanu vakwe a ku nga ti koteka.

Djulisisa Tindzralama Ta Moya

Perspicaz vol-3 p. 33 §§ 5-6

Bawu

A hi tiyiseki leswaku hi xini xihazri lexi kongomiki, lexi ku vulavuliwaka ha xone ka matsralwa ya xi-Heberu, loko ku vulavuliwa hi khombo dzra wu 4 ledzri weliki va-Egipta, a dzra ku sungula ledzri va-Israyele va huluxiwiki ka dzrone a Goxeni. (Eks 8:21, 22, 24, 29, 31; Ps 78:45; 105:31) Zrito ʽA·rovʹ dzri ndzruluteliwa hi tindlela ta ku hambanahambana ku nga va “bawa” (JB, NM, Ro), “xifufunhunu” (yg), “tinhongana” (AS, KJ, RS), “tinsuna” (AT) “nhongana ya ku hlasela tihomu” (LXX).

Zrito “bawa” dzri yimela tinhongana ta mixakaxaka. A pswele dzra wun’we wa mixaka wa bawa dzri mpswompswa ngati ya swihazri nhambi ya vhanu. Ku ni muxaka wa bawa lowu loko wa ha li xipungwana wu nga nghenaka ka nyama ya mhunu kumbe ya xihazri wu va wu hanya kone. Muxaka lowu hlaselaka vhanu wu kumeka ka mimbangu leyi ku nga titimetiki ngopfu. Kutani a va-Egipta kun’we ni swihazri swavu va nga va va xaniseke ngopfu hi khombo ledzri dzra mabawa, mfuzri swi vange lifu.

Sentinela 15/03/2004 p. 25 § 9

Nkantsrakanyu Wa Buku Dzra Eksoda

8:26, 27—Ha yini Moxe a hlaye leswaku magandzrelo ya va-Israyele a ma ta fana ni ‘likasi ku va-Egipta’? Va-Egipta a va gandzrela swihazri swa ku siyanasiyana. Xileswo, ku va Moxe a vulavule hi magandzrelo, a a ntshimisisa mhaka ya leswaku va-Israyele a va fanela ku tsrhikiwa va famba akuva va ta ya hambela Yehovha magandzrelo.

20-26 KA JULHU

WUKOSI BYI NGA BIBELENI | EKSODA 10-11

“Moxe Na Aroni Va Kombise Xixixi Lexikulu”

Sentinela 15/07/2009 p. 20 § 6

Yetisela Yesu Hi Ku Zrezra Hi Xixixi

Yanakanya hi xixixi lexi Moxe a a li na xone lakakuva a ya vulavula na Faro, hosi leyi a yi nga voniwi ntsena swanga muyimeli wa swikwembu kambe a yi voniwa swanga xikwembu, n’wana wa xikwembu xa dambu lexi vitaniwaka Ra. Swi nga yentxeka Faro a a khinsamela xifaniso xakwe hi lani tihosi timbeni ta Egipta a ti yentxa hakone. Faro a a li mubeki wa nawu, a a ni wulawuli, a a tikulisa nakone a a wome nhloko. Phela a a nga li wa ku twa mavonela ya mhunu, a a li mahlaxin’we. Moxe wanuna lweyi a a li mubyisi wa ku titsrongahata, a ye vulavula na Faro hi ku phindaphinda. Faro a a nga mu vitananga Moxe, mfuzri a a nga swi djuli kuva a mu yendzrela. Kasi Moxe a a yela yini ka Faro? A a yela ku ya mu byela hi makhombo ya ku txhavisa. Xana Moxe a kombele yini? A kombele ku ntsrhunxiwa ka makhulukhulu ya vhanu lava a va tizra swanga swikazrawa a Egipta. Swi tiyile leswaku Moxe a a fanela ku va ni xixixi ku ya vulavula na Faro.​—Tin 12:3; Hb 11:27.

Perspicaz vol-3 p. 17 § 1

Moxe

A swi djula xixixi ni lipfumelo ku vulavula na Faro. Hi ku tizrisa moya wa ku xwenga Yehovha a pfune Moxe na Aroni, akuva va faneleka ku hetisisa xiyavelo lexi a va nyikiki xone. Yanakanya hi mfumu wa Faro, hosi ya ntamu leyi mfumu wa yone a wu tlakukile a misaveni hinkwayu a nkameni wa kone. A a li muti wa wumenyemenye, kasi Faro a a titeka a li xikwembu lexi nga ni vapfunisi, masotxha, vazrindzri ni swikazrawa. A tlhela a va ni vazrangeli va wukhongoti, ni tinyanga, ku nga lava a va ta lwisana na Moxe. Vavanuna lava hi vone lava a va li vhanu lava tlakukiki swinene a Egipta. Ntlawa lowu hinkwawu a wu lulamele ku seketela swikwembu swa va-Egipta hi ku pfuna Faro. Kambe Moxe na Aroni va ye ka Faro, ku nge kan’we kambe makhambi manyingi, nambitanu Faro a a ya a tlanyalisa mbilu hi leswi a a funge ku tama a fuma va-Heberu swanga swikazrawa. Hi ntiyiso wa kone, Moxe na Aroni va hlongoliwile ntsrhaku ka ku tivisa khombo dzra wu 8, kambe loko va tlhelelile ku ya tivisa dzra wu 9 va byeliwe leswaku loko vo tlhela va ya a Egipta a va ta dlayiwa.—Eks 10:11, 28.

Djulisisa Tindzralama Ta Moya

Sentinela 01/09/1995 p. 11 § 11

Timboni Leti Lwisanaka Ni Swikwembu Swa Madzrimi

Loko va-Israyele va ha li a Egipta, Yehovha a zrumele Moxe ka Faro kutani a ku: ‘Yana ku Faro; hikusa ndzri nonon’whise mbilu yakwe, ni timbilu ta malandzra yakwe, akuva ndzri hamba makazri kwavu leswi swikombiso swanga: ni kuva u ndzrungulela tindleveni ta n’wanaku, ni le ku ta n’wana wa n’wanaku, leswi ndzri swi yentxeliki va-Egipta, ni swikombiso swanga leswi ndzri swi yentxiki makazri kwavu, akuva n’wi swi tiva leswaku ndzri Yehovha.’ (Eksoda 10:1, 2) Va-Israyele lava yingisetaka, a va ta dzrungulela vanavu swiyentxo swa ntamu swa Yehovha. Hi ku fanana, na vone a va ta swi dzrungulela vanavu, swi fambisa xiswoswo, swi yentxiwa a lixakeni dzrin’wana ku ya ka dzrin’wana. Xileswo, swiyentxo swa ntamu swa Yehovha a swi ta dzrimukiwa. Ni namunhla vapswele va ni wutiyanguleli bya ku nyikela wumboni ka vanavu.​—Deuteronoma 6:4-7; Amaproverbia 22:6.

Perspicaz vol-2 p. 79 § 2

Eksoda

Yehovha a twalise vito dzrakwe ni ku huluxa va-Israyele hi xiyentxo xin’we xa ntamu lexi hlamalisaka. Loko va huluxiwile a Lwandle dzra libungu, Moxe a zrangele vana va Israyele kuva va yimbelela lisimu, Miriamu makwavu wa Moxe muprofeta wa xisati, a tamele dandana a vokweni na a zrangela ntlawa wa vavasati lava na vone va nga ku txhayeni ka madandana na va kina va tlhangaveta lava xinuna va yimbelelaka. (Eks 15:1, 20, 21) Ku ve ni ku tsravukana lokukulu ka va-Israyele ni valala vavu. A ku humeni kwavu a Egipta a va zanga va hlaseliwa hi mhunu, kumbe xihazri nambi mbyana yinene a yi zanga yi va bukula nambi ya ku va tsrekatsrekisela lidzrimi. (Eks 11:7) Nambi leswi wudzrunguli bya Eksoda byi nga hlayiki leswaku Faro ha byakwe a ninghene a lwandle dzra ku pswhuka kun’we ni mabutsrhu yakwe va va va suvisiwa, Amapsalma 136:15 yi hlaya leswaku Yehovha ‘a susumetele Faro ni yimpi yakwe a Lwandle ledzra Libungu’.

27 KA JULHU–2 KA AGOXTU

WUKOSI BYI NGA BIBELENI | EKSODA 12

“Leswi Paska Dzri Tlhamuxelaka Swone Ka Vakriste”

Sentinela 01/01/2007 p. 20-21 § 4

U Fanela Ku Nyonxa Hi La Ku Heleliki

Yesu a fe hi 14 ka Nisani wa 33 N.Y. 14 ka Nisani a a li siku dzra ku nyonxisa ka nkhuvu wa Paska. Lembe ni lembe a Israyele hi siku ledzro, mindangu a yi da swakuda leswi patsraka hambana leyi kalaka yi nga limalanga. Hi ndlela leyo a va dzrimuka ntizro lowu ngati ya hambana yi wu yentxiki hi nkama wa ku ponisiwa ka mativula ya va-Israyele loko ntsrumi ya lifu yi dlaya mativula ya va-Egipta hi 14 ka Nisani wa 1513 M.N.Y. (Eksoda 12:1-14) Hambana ya Paska a yi fanekisela Yesu, lweyi mupostola Pawulo a vulavuliki ha yene loko a ku ‘Kriste, a nga Paska dzredzru a tlhaviwile.’ (1 Ba-le-Korinte 5:7) Ku fana ni ngati ya hambana ya Paska, ngati ya Yesu leyi halatiwiki, yi ponisa va ku tala.—Yohan 3:16, 36.

Perspicaz vol-3 p. 181 § 5

Paska

Mayentxela man’wana ya ku tlangela Paska ma hetiseke ka Yesu. Man’we ya kone a ve ku xwanyiwa ka ngati a swizrimbeni swa tiyindlu ta va-Israyele a Egipta, leswi ponisiki a mativula ya va-Israyele a mavokweni ya ntsrumi leyi dlayaka. Pawulo a vulavule hi vakriste lava totiwiki swanga nhlengeletanu ya mativula (Hb 12:23), a tlhela a vulavula hi Yesu swanga muhuluxi hi ku tizrisa ngati. (1Te 1:10; Ef 1:7) A ku nga fanelanga ku tsrhoviwa ni zrambu ni dzrin’we dzra hambana ya Paska. A ku profetiwe leswaku ni dzrin’we dzra mazrambu ya Yesu a ma ta tsrhoviwa, leswo swi hetiseke a ku feni kwakwe. (Ps 34:20; Yh 19:36) Xileswo, a Paska ledzri va-Yuda va dzri yentxiki ku dzringana malembe manyingi, a dzri li xikombiso xa leswi a swi ta humelela ka Yesu Kriste, ‘Xihambana xa Xikwembu Nkulukumba’.​—Hb 10:1; Yh 1:29.

Sentinela 15/12/2013 p. 20 §§ 13-14

Leswi Swi Ta Va Xidzrimuxo Kwenu

Ku suka ka xitukulwana xin’wana ku ya ka xin’wana, vatatana a va ta dondzrisa vanavu tindondzro ta lisima. Yin’we ya tone i ya leswaku Yehovha awa swi kota ku sizrelela vagandzreli vakwe. Vana va dondzre leswaku Yehovha a hi Xikwembu Nkulukumba lwa nga twisisekiki, kambe i Xikwembu Nkulukumba wa ntshima, lwa hanyaka, lwa zron’wekaka hi vhanu vakwe a tlhela a va sizrelela. Leswo a swi kombise loko a sizrelela mativula ya va-Israyele ‘loko a ba va-Egipta’. A nga ma dlayanga mativula ya va-Israyele.

Vapswele lava nga vakriste namunhla a va tsrhameli ku byela vanavu ntlhamuxelo wa Paska lembe ni lembe. Kambe, xana wa va dondzrisa vanaku ndondzro leyi fanaka​—ya leswaku Xikwembu Nkulumba a sizrelela vhanu vakwe? Xana vanaku va swi vona leswaku wa dumba leswaku Yehovha i musizreleli wa vhanu vakwe? (Ps 27:11; Eza 12:2) Xana a nkama u va tluletaka ndondzro leyi u yentxa leswaku mi va ni mabulu lama nyonxisaka kumbe ho va leletela ntsena? Tikazrateli ku patsra ndondzro leyi leswaku ndangu waku wu kula hi tlhelo dzra moya.

Djulisisa Tindzralama Ta Moya

Perspicaz vol-3 p. 180 § 1

Paska

Makhombo ya 10 ma ve yavanyiso ka swikwembu swa va-Egipta, ngopfu ledzra wugamu, ku nga ku dlayiwa ka mativula yavu. (Eks 12:12) A hambana a yi xwenge ngopfu ka xikwembu Ra, lakakuva a ku xwanya ngati ya hambana ya Paska a swizrimbeni swa tiyindlu a swi li xizruku ka va-Egipta. Handle ka leswo a homu a yi xwengile, xileswo ku dlayiwa ka mativula ya tihomu a ku ta va xizruku ka xikwembu Osiri. Faro habyakwe a a gandzreliwa swanga n’wana wa Ra. Xileswo ku dlayiwa ka mativula ya Faro a ku kombisa ku pfumala wuswikoti ka xikwembu Ra ni le ka Faro.

Perspicaz vol-1 p. 543 § 7

Nhlengeletanu Leyikulu

Ka ‘tinhlengeletanu ta ku xwenga’ hinkwatu, a vhanu a va nga fanelanga va hamba mintizro ya ku bindzra. Hi xikombiso, siku dzra ku sungula ni dzra wu 7 dzra Nkhuvu wa Makati lama Kalaka ma nga Kandzreliwanga, a ma li ‘tinhlengeletanu leta ku xwenga’, leti ha tone Yehovha a tiki: ‘Ku nga tizriweni ni mun’we ntizro ha wone, loko wu nge wa leswi vhanu va daka swone, hi wone ku hela lowu nga tizriwaka hi n’wine.’ (Eks 12:15, 16) Nambitanu hi minkama ya ‘tinhlengeletanu leta ku xwenga’, a vaprista a va khomekile hi ku nyikela magandzrelo ka Yehovha (Lv 23:37, 38), leswo a ku nga li ku tlula nawu wa leswaku a va nga fanelanga va hamba mintizro ya siku ni siku. Lowo a ku nga li nkama wa kuva va tsrhama va wisa kambe a ku li nkama wa kuva va susa londzrovoto dzrikulu hi tlhelo dzra moya. Hi siku dzra savata vhanu a va hlengeletana kuva va gandzrela ni ku dondzrisiwa a livaleni. Kutani a va kutxeka hi ku dondzreliwa ni ku tlhamuxeliwa zritu dzra Xikwembu Nkulukumba a livaleni hi lani a swi yentxiwa hakone a masinagogeni ya khale. (Min 15:21) Xileswo nambileswi vhanu a va nga yentxi mintizro ya ku bindzra hi savata kumbe hi masiku ya ‘tinhlengeletanu leta ku xwenga’ a va tinyiketela ku khongoteni ni ku yanakanyisisa hi muvumbi ni minkongometo yakwe.​—vona ASSEMBLEA.