Yesu “A Dondzre Ku Yingiseta”

Minkama hinkwayu Yesu a a yingiseta Yehovha. (Yoh. 8:29) Kutani, ha yini Bibele dzri hlaya leswaku: “A dondzre ku yingiseta hi tinxanisa leti a kumaniki na tone”?—Heb. 5:8.

Nkama na Yesu a li lani misaveni, a kumane ni swiyimu leswi a a nge si sama a kumana na swone nkama lowu a a li matilweni. Hi xikombiso, vapswele vake a va dumbekile ka Yehovha kambe a va nga hetisekanga. (Luk. 2:51) Yene a xanisekile a mavokweni ya vazrangeli va wukhongoti ni vafumi. (Mat. 26:59; Mar. 15:15) Handle ka leswo, “a titsrongahatile ni ku tlhela a yingiseta ku ya tlhasa ku feni”, lani a fiki hi ndlela ya ku vavisa ngopfu swinene.—Filp. 2:8.

Hinkwaswu leswo swi dondzrise Yesu kuva a yingiseta hi ndlela leyimpshwa. Xileswo, yene a kote ku va Hosi tlhelo Muprista Lwenkulu lweyi a hetisekiki lweyi a kotaka ku twisisa matitwela yezru. (Heb. 4:15; 5:9) Ntsrhaku ka loko a dondzre ku yingiseta hi tinxanisa leti a kumaniki na tone, Yesu a ye a va wa lisima a tlhela a tizrisiwa ha Yehovha. Na hine hi nga va va lisima ka Yehovha hi tlhela hi tizrisiwa ha yene loko hi tama hi yingiseta nambiloko hi kumana ni swiyimu swa ku kazrata.—Yak. 1:4.