1925​​—⁠100 WA MALEMBE LAWA MA KHALUTIKI

KU LANGUTELA LOKU GAMIKI KU NGA YENTXEKI

Swidondzri swinyingi swa Bibele a swi langusele leswaku hi 1925 a misava a yi ta va Paradeyisi. Ha yini a swi yanakanya leswo? Makwezru Albert Schroeder, lweyi a viki xizro xa Huvo Leyi Zrangelaka, a te: “A ku yanakanyiwa leswaku hi 1925 a valandzreli va Kriste lava totiwiki lava a va ha salile lani misaveni a va ta ya tilweni akuva va hamba xiyenge xa Mfumu. Nakone vavanuna va ku dumbeka va khale va ku fana na Abrahamu, Davhida ni van’wana a va ta pfuxiwa swanga vazrangeli akuva va fuma a misaveni swanga swizro swa Mfumu wa Xikwembu Nkulukumba.” Kambe loko leswo swi nga yentxekanga, van’we va vamakwezru va hele ntamu.—Amapr. 13:12.

Nambitanu, wunyingi bya swidondzri swa Bibele swi tame swi khomeka a ntizrweni wa ku zrezra. Nakone swi ye swi swi khanyela leswaku a swi ni wutiyanguleli bya ku nyikela wumboni mayelanu na Yehovha. Hi xikombiso, a hi voneni ndlela leyi swi tizrisiki a radiyu ha yone akuva swi nyikela wumboni bya ntiyiso ka vhanu vanyingi hi lani swi swi kotiki ha kone.

KU YENGETELEKA KA NHLAYU YA SWITITXHI SWA RADIYU

Leswi a xititxhi xa WBBR xi viki ni mabindzru lawa ma nyonxisaka, hi 1925 a swidondzri swa Bibele swi hambe a xititxhi xa radiyu lexi nga ni ntamu a kusuhi ni Chicago, Illinois. A xititxhi lexo leximpshwa a xi vitaniwa WORD. “A enjinyeru wa radiyu” lweyi a vitaniwaka Ralph Leffler lweyi a tizriki a ku hambeni ka xititxhi lexo, a te: “Hi nkama wa wuxika a xititxhi xa WORD a xi yingeliwa ni le kule ngopfu swinene ni wusiku.” Hi xikombiso, a ndangu lowu a wu tsrhama a Estação Piloto a Alasca kolomu ka 5.000 wa makilometru ni xititxhi, wu kote ku yingela wuhaxi bya ku sungula bya xititxhi lexo. Ntsrhaku, ndangu lowu wu tsrale papela wu tlangela nongonoko wa moya lowu a wu tiyisana ngopfu.

Loko xi khanela hi lomu a xititxhi lexo a xi kota ku tlhasa kone, a Xihondzro Xa Ku Zrindzra xa 1 ka Dezembru wa 1925 xi hlaye leswi: “WORD i xin’we xa swititxhi lexi nga ni ntamu ngopfu swinene a Estados Unidos. A xititxhi lexi xi nga yingeliwa a wuxeni ni mpeladambu wa Estados Unidos, a nyingitimu wa Cuba ni le kule swinene a n’walungu wa Alasca. Vanyingi lava a va nga si tiva ntiyiso va nyonxele ku dondzra loko va yingele xititxhi lexo.”

Hi nkama wolowo, swidondzri swa Bibele swi tikazratele ku yingiseta a xititxhi lexo akuva swi zrezra a Canadá. Hi 1924 ku hambiwe xititxhi lexi vitaniwaka CHUC a Saskatoon a Saskatchewan. Lexi a ve xititxhi xa ku sungula a Canadá lexi hambiwiki hi nkongometo wa kuva xi haxa swa wukhongoti. Hi 1925 swi vilele leswaku ku djuliwa mbangu wa wukulu akuva ku hambiwa xititxhi lexo, xileswo a nhlengeletanu yi xave ni ku pfuxeta a sinema dzra khale a Saskatoon lani a xititxhi xa CHUC xi zruzrisiwiki xi ya kone.

Hi kola ka xititxhi lexo, vhanu vanyingi lava a va tsrhama ka madoropa matsrongo ne tintlhaveni ta Saskatchewan va yingele madzrungula lamanene hi khambi dzra ku sungula. Hi xikombiso, wansati wa kukazri lweyi a vitaniwaka Graham lweyi a tsrhamaka ka doropa dzra le kule a yingele nongonoko ka radiyu ntsrhaku a tsrala papela a kombela mabuku lawa ma seketeliwiki a Bibeleni. Makwezru George Naish a hlaye leswi: “Xikombelo xake xa mpfunu a xi twala nakone a xi khanyile xileswo hi mu zrumelele mavhulumi hinkwawu ya buku ledzri liki Estudos das Escrituras.” Hi nkamanyana wutsrongo, Graham a sungule ku zrezra dzrungula dzra Mfumu a mimbangwini ya le kule ngopfu swinene.

MATWISISELA LAMAMPSHWA

A Xihondzro Xa Ku Zrindzra xa 1 ka Marsu wa 1925, xi humese nhlokomhaka ya ku a yi nge dzrivaliwi, leyi liki: “Nascimento da Nação.” Ha yini nhlokomhaka leyo a yi li ya lisima ngopfu? Ku dzringana nkama wa kukazri swidondzri swa Bibele a swi pfumela leswaku Sathana a ni nhlengeletanu matilweni leyi vumbiwaka hi mademona ni yin’wana lani misaveni leyi vumbiwaka hi vakhongoti, vahambi va manegosiyu ni vapolitika. Kambe ka nhlokomhaka leyo, “nandzra wa ku dumbeka ni ku tlhazriha” a pfune vamakwezru akuva va twisisa leswaku Yehovha a ni nhlengeletanu leyi lwisanaka ni nhlengeletanu ya Sathana nakone yi hambaniki hi ku helela na yone. (Mat. 24:45) Handle ka leswo, a nandzra wa ku dumbeka ni ku tlhazriha a tlhamuxele leswaku a Mfumu wa Xikwembu Nkulukumba wu simekiwe hi lembe dzra 1914 nakone ku ve hi lembe ledzro ku viki ni yimpi a matilweni leyi yentxiki leswaku Sathana ni mademona yake va txukumeteliwa a misaveni nakone a va ha swi kotanga ku tlhelela a matilweni.—Mpful. 12:7-9.

Van’wana va swi vone na swi kazrata ku yamukela matwisisela lawa lamampshwa. Hi ku tiva leswaku leswo a swi ta yentxeka, a nhlokomhaka leyo yi te: “Loko mudondzri mun’wana wa Xihondzro Xa Ku Zrindzra a nga pfumelelani ni leswi tsraliwiki lani, hi mu tsratsriya kuva a yimela Hosi hi ku dumba a tlhela a zrula ni ku tama a tiyimisela ku va ni mbilu leyi basiki.”

Makwezru Tom Eyre, lweyi a a li phayona dzra nkama hinkwawu a Grã-Bretanha a hlaye ndlela leyi swidondzri swa Bibele swi titwiki ha yone ntsrhaku ka loko swi dondzre nhlokomhaka liyani. Yene a te: “Vamakwezru va nyonxe swinene loko va twisise leswaku a Mfumu wu sungule ku fuma matilweni, a swi nyonxisa ngopfu swinene ku zrezrela van’wana madzrungula lamanene. Leswo handle ka ku ganaganeka swi hi kutxe kuva hi yentxa leswi yengetelekiki a ntizrweni wa ku zrezra. Nakone swi hi pfune ku vona ndlela leyi Yehovha a a kongomisa vhanu vake ha yone ka swiyentxakalu swa nkama lowu taka.”

WUTIYANGULELI BYA KU NYIKELA WUMBONI MAYELANU NA YEHOVHA

Namunhla, Timboni ta Yehovha ti ma tiva ha hombe mazritu ya Ezaya 43:10 lawa ma liki: “‘Hi n’wine timboni tanga, ku hlaya Yehovha, n’wine ni nandzra wanga lweyi ndzri mu hlawuliki.’” Nambitanu, na ku nge si tlhasa 1925, a ndzrimana leyo a ku nga khaneliwi ngopfu ha yone ka mabuku yezru. Kambe leswo a swi li kusuhi ni ku txintxa. Hi 1925, a buku dzra Ezaya 43:10 ni 12 dzri tsraliwe ka 11 wa marevhixta ya Xihondzro Xa Ku Zrindzra!

A ku heleni ka Agoxto wa 1925, a swidondzri swa Bibele swa le Estados Unidos swi tlhanganile akuva swi hlalela kongresu a Indianápolis, a Indiana. Ka xiyimiso xa kongresu, a ku ni dzrungula dzra ku hoyozela dzra Rutherford ledzri a dzri ku: “Hi lani ka kongresu ledzri akuva hi tiyisiwa hi Hosi xileswo hi ta tlhela nsin’wini na hi pfuxetiwe mintamu na hi lulamele ku va Timboni take.” Ka 8 wa masiku ya kongresu ledzro, lava a va li kone va kutxiwe ku londzrovota mikhandlu leyi a yi va pfulekela akuva va nyikela wumboni mayelanu na Yehovha.

Hi Mugqivela wa 29 ka Agoxto makwezru Rutherford a beke wukaneli lebyi a byi ni nhlokomhaka leyi a yi ku: “Uma Chamada a Nação.” Ka wukaneli lebyo a khanele hi lisima dzra ntizro wa ku zrezra, a te: “Yehovha a byela tiko dzrake a ku . . . : ‘N’wi timboni tanga . . . Xikwembu Nkulukumba hi mine.’” Nakone hi ku kongoma a va nyike nkongomiso, hi zritu dzra ku tlakuka a ku: “‘Tlakuxelani matiko mudjeka [mfungo].’ A ku na mfumu wun’wana a misaveni lowu tlakuxelaka matiko mfungo loko ku nga li [tiko dzrake], ledzri dzri nga ni moya wa Hosi nakone dzri nga Timboni take.”—Eza. 43:12; 62:10.

Ntsrhaku ka wukaneli lebyo, makwezru Rutherford a dondzre papela ledzri a dzri ni nhlokomhaka leyi liki: “Dzrungula Mayelanu Ni Dumbo.” Lava a va li kone va pfumelelane ni dzrungula ledzro ledzri a dzri ku: A Mfumu wa Xikwembu Nkulukumba hi wone ntsena dumbo dzra ku va hi yamukela “matovoko ya ku fana ni ku zrula, kuva swi hi fambela ha hombe, lihanyu ledzrinene, wutomi, ntsrhunxeko ni ku nyonxa loku nga helikiki”. Ntsrhaku a papela ledzro dzri hambiwe xipapelana lexi ndzruluteliwiki hi tindzrimi ta ku hambanahambana. Ku hangalasiwe 40.000.000 wa makopiya ya xipapelana lexo.

Swidondzri swa Bibele swi teke malembe ya kukazri na swi nge si na dzri tizrisa vito ledzri liki Timboni ta Yehovha. Kambe a swi ya swi byi tiva wutiyanguleli lebyi a swi li na byone bya ku nyikela wumboni mayelanu na Yehovha.

LESWI SWI VA KUTXIKI KU TLHELELA KA LAVA KOMBISIKI KU NYONXELA

A nkama lowu nhlayu ya swidondzro swa Bibele a yi ya yi yengeteleka a misaveni hinkwayu, ku yengeteleke xivileleko xa ku tlhelela ka lava kombisiki ku nyonxela madzrungula lamanene. Ntsrhaku ka tsima dzra ku nyikela xipapelana lexi a xi ku Dzrungula Mayelanu Ni Dumbo, a Xib’ikoa xi nyikele nkongomiso lowu a wu ku: “Tlhelani mi ya pfuxela lava yamukeliki a kopiya dzra xipapelana lexi liki Dzrungula Mayelanu Ni Dumbo.”

A Xib’iko xa Janeru wa 1925 xi hlaye leswi mayelanu ni xidondzri xa kukazri xa Bibele xa doropa dzra Plano, a Texas: “Hi hlamalisiwe hi leswaku a nsimu leyi a hi ni makhambi manyingi na hi tizrela ka yone a yi yampswa ku tlula nsimu leyimpshwa. Ka 10 wa malembe lawa ma khalutiki, a doropa dzritsrongo dzra nsimu yezru dzri tizriwe hinkwadzru ntlhanu wa makhambi. . . . Swoswinyana, makwezru wa xisati lweyi a vitaniwaka Hendrix ni mamana wanga va tlhele va yendzrela doropa ledzriyani nakone va nyikele mabuku manyingi ngopfu swinene.”

Nakone phayona dzra nkama hinkwawu dzra le Panamá dzri tsrale leswi: “Vhanu vanyingi lava va ni hlongoliki a mitini yavu va txintxe mavonela yavu ntsrhaku ka loko ni va yendzrelile hi khambi dzra wubidzri kumbe dzra wuzrazru. Ka lembe ledzri khalutiki ni hete nkama wunyingi na ni zrezra, ni tlhelele lava ni va yendzreliki nakone ni ve ni mimfambu ya ku nyonxisa ni van’we kwavu.”

LESWI A HI SWI LAVISELA A NKAMENI LOWU TAKA

Ka papela dzra lembe ledzri a dzri ya ka maphayona hinkwawu, makwezru Rutherford a songe mintizro hinkwayu leyi yentxiwiki ka lembe hinkwadzru ni ku tlhela a vulavula hi mintizro hinkwayu leyi a va ta va na yone a nkameni lowu taka. Yene a te: “Vamakwezru, ka lembe ledzri khalutiki mi ve ni mikhandlu ya ku txhavelela vhanu vanyingi lava a va xukuvalile. Ku patsreka ka ntizro lowu swi mi tisela ku nyonxa. . . . Vamakwezru, lembe ledzri taka mi ta va ni mikhandlu yinyingi ya ku nyikela wumboni mayelanu na Xikwembu Nkulukumba ni Mfumu wake ni wa ku tivisa matiko. . . . Hinkwezru hi ta tama hi tlakuxa mazritu hi dzrumisa Xikwembu Nkulukumba tlhelo Hosi yezru.”

A ku heleni ka lembe dzra 1925, vamakwezru a va hamba makungu ya ku yengetela Betele dzra Brooklyn. A lembe dzra 1926 a ku ta va lembe ledzri a ku ta sunguliwa ntizro lowukulu wa ku yaka lowu nhlengeletanu yezru a yi ngi ngi sama yi wu yentxa ku ta tlhasela lanu.