Leswi Nga Pfunaka Vavasati Lava Khomiwaka Hi Ndlela Ya Ku Biha

Ka pajina dzra jw.org ku ni nhlokomhaka leyi liki: “Vuhlayiseki Bya Vavasati—Leswi Bibele Yi Swi Vulaka.” A wugan’wini bya pajina ledzro ku ni link ledzri nga ku pfunaka ku xixa nhlokomhaka leyo. Hi ku landzrela u nga ha gandlisa papela ledzro u va u dzri hindzrelela dzri hamba mune wa mapajina. Makwezru wa kukazri wa le Estados Unidos lweyi a vitaniwaka Stacy, a li: “Ni gandlise makopiya ya kukazri ya nhlokomhaka leyo. Kutani mine ni makwezru mun’wana wa xisati hi teke makopiya lawo hi famba na wone ka mbangu lowu ku yamukeliwaka vavasati lava khomiwaka hi ndlela ya ku biha ka nsimu leyi a bandla dzrezru dzri kumekaka kone.”

Mun’we wa vatizri va mbangu lowo a vutise makwezru Stacy leswaku a nga siya makopiya lawa ma yengetelekiki akuva a phakela vavasati lava tsrhamaka a mbangwini luwani. Bindzru dzra kone, ku tlhele ku phakeliwa 40 wa mapapela lawo ni 30 wa makartawu ya jw.org. Siku dzrimbeni, a adminixtradori wa mbangu lowo a kombele kuva vavasati lavayani va kombiwa ndlela leyi xidondzro xa Bibele xi fambisiwaka ha yone.

Makwezru Stacy ni vamakwezru van’wana vabidzri va xisati ve ni mabindzru ka mbangu wun’wana lomu ku yamukeliwaka vavasati lava khomiwaka hi ndlela ya ku biha. Kone va ye nyikela ntlhanu wa makopiya ya xipapelana lexo va tlhela va kombela kuva va va heketela makopiya mambeni. Kutani mun’we wa vatizri a te: “A xipapelana lexi xi ta va pfuna vavasati lava nga lani, hi leswi nakunene a hi swi vilela.” Loko va tlhele va ya siku dzrimbeni, vavasati vanyingi va tlhanganile akuva va vona ndlela leyi xidondzro xa Bibele xi fambisiwaka ha yone nakone vavasati vabidzri va hlaye leswaku a va navela ku ya mintlhanganwini a Ndlwini Ya Wugandzreli a ku heleni ka vhiki ledzri a dzri ta landzrela.

Makwezru Stacy a li: “Swi nyonxise ngopfu ku vona ndlela leyi vhanu lavayani va yamukeliki ha yone papela ledzriyani! Ntsrhaku ka loko papela ledzro dzri gandlisiwile ni ku tlhela dzri hindzreleliwa, dzri navetisa ngopfu swinene nakone i ndlela ya hombe ya ku byela ntlawa lowu wa vavasati hi ku kongoma dzrungula dzra Mfumu. Swi hi khumbe ngopfu loko hi vona ndlela leyi vhanu va yanguliki ha yone loko va yamukele dzrungula ledzri, nakone hi swi lavisele ngopfu ku vona ndlela leyi Yehovha a taka tovokisa minzamu yezru ha yone ya ku tama hi pfuna vavasati lava akuva va yamukela madzrungula lamanene.