‘ Hlayisa Wumun’we Bya Moya’
LOKO a vulavula ni vakriste va le Efesa, mupostola Pawulo a te: “Mi tikazratela ku hlayisa wumun’we lebyi moya wu byi nyikelaka, mi tlhela mi hanya hi ku zrula.”—Efe. 4:2, 3.
A “wumun’we” lebyi hi tikholisaka ha byone i bya “moya”, leswi liki a wumun’we i yin’we ya mihandzru ya moya wa Xikwembu Nkulukumba. Kutani hi lani Pawulo a hlayiki ha kone, hi fanela ku tama hi hlayisa wumun’we byezru. Kambe byi fanela ku hlayisiwa hi vamani? Mukriste mun’wana ni mun’wana a fanela ku hetisisa xiyenge xake ka ku ‘hlayisa wumun’we bya moya’.
Hi xikombiso, a hi nge mhunu wa kukazri a ku nyike movha wa nyiwana. I mani lweyi a nga ni mfanelo ya ku tama a wu bekisa? A nhlamulo yi le livaleni. A u nge mu nyiki nandzru lweyi a ku nyikiki movha loko wo honeka hi leswi wene u kalaka u nga wu hlayisanga.
Hi lani ku fanaka, nambileswi wumun’we byezru bya wukriste a nga xihanano xa Xikwembu Nkulukumba, mun’wana ni mun’wana wezru a ni wutiyanguleli bya ku hlayisa wumun’we lebyo. Loko hi nga hanyisani hi ku zrula ni makwezru wa kukazri, hi fanela ku tivutisa leswi: ‘Xana ni yentxa hinkwaswu leswi ni nga swi kotaka akuva ni hlayisa wumun’we bya moya a bandleni?’
YENTXA HINKWASWU LESWI U NGA SWI KOTAKA AKUVA U HLAYISA WUMUN’WE
Hi lani Pawulo a hlayiki ha kone, minkama yin’wana swi ta djula kuva hi tikazrata akuva hi hlayisa wumun’we byezru bya moya, ngopfungopfu loko makwezru wa kukazri a hi khunguvanyisile. Xana akuva hi hlayisa wumun’we swi djula kuva minkama hinkwayu hi tsrhindzrekelela mhunu lweyi a hi khunguvanyisiki hi va hi mu byela mhaka ya kone? A hi ka swiyimu hinkwaswu. Tivutisi leswi: ‘Xana loko ni tsrhindzrekelela makwezru ni ya vulavula na yene hi mhaka leyi, ni ta yentxa leswaku ku va ni ku zrula kumbe ni to ya ni kulisa mhaka?’ A nga va wutlhazri ku swi tsrhika swi khaluta kumbe ku mu dzrivalela.—Amapr. 19:11; Mar. 11:25.
Tivutisi leswi: ‘Xana loko ni tsrhindzrekelela makwezru ni ya vulavula na yene hi mhaka leyi, ni ta yentxa leswaku ku va ni ku zrula kumbe ni to ya ni kulisa mhaka?’
Hi lani mupostola Pawulo a hlayiki ha kone, hi fanela ku tama hi “byatsrhanana hi lizrandzru”. (Efe. 4:2) Buku dzra kukazri dzri hlaya leswaku leswo swi nga tlhamuxela ku “hanyisana na vone swi nge na mhaka ni matsrhamela yavu”, leswi liki ha pfumela leswaku vamakwezru a va hetisekanga, na vone va yentxa swihoxo ku fana na hine. I ntiyiso leswaku hi zama ku yentxa hinkwaswu leswi hi nga swi kotaka akuva hi “yambala wumhunu lebyimpshwa”. (Efe. 4:23, 24) Nambitanu a nga kone lweyi a nga yambalaka wumhunu lebyo hi ndlela leyi hetisekiki. (Rom. 3:23) Loko hi va ni leswo a miyanakanywini, swi ta ya swi hi nabyalela ku lehisa mbilu ni ku dzrivalela vamakwezru hi va hi ndlela leyo hi ‘hlayisa wumun’we bya moya’.
Hi ta kota ku ‘hlayisa wumun’we bya moya’ a bandleni loko hi dzrivalelana hi tlhela hi dzrivala mintxhumu leyi van’wana va hi yentxelaka yone nambiloko yi hi khunguvanyisa. A zritu dzra Xigriki ledzri ndzruluteliwiki ledzri liki “wumun’we”, ka Vaefesa 4:3 ni ka Vakolosa 2:19, dzri ndzruluteliwe dzri va “minsiha”. A minsiha i mintxhumu leyi tiyiki yi kotaka ku tlhanganisa mazrambu. Hi lani ku fanaka, a ku zrula ni lizrandzru ledzri hi nga nadzru hi vamakwezru swi hi pfuna ku tama hi va kusuhi na vone nambiloko minkama yin’wana hi nga swi zrandzri leswi va hi yentxelaka swone.
Xileswo, loko makwezru wa kukazri a bandleni a ku khunguvanyisa kumbe a ku hlundzrukisa, a matsrhan’wini ya kuva u lavisa swihoxo kumbe ku tsrhamela ku mu sola, zama ku vona mintxhumu leyinene kwake. (Kol. 3:12) Swanga hi leswi hinkwezru hi kalaka hi nga hetisekanga, minkama yin’wana ha va khunguvanyisa vamakwezru, ku va ni leswo a miyanakanywini swi ta hi pfuna ku ‘hlayisa wumun’we bya moya’.