3 KU HLONIPHANA

LESWI TLHAMUXELAKA SWONE

Vatekani lava hloniphanaka, va kombana lizrandzru nambiloko va nga pfumelelani ka swa kukazri. Buku ledzri liki Ten Lessons to Transform Your Marriage dzri li: “Vatekani volavo, loko va nga pfumelelani ka mhaka ya kukazri, va tikazratela ku yi lulamisa hi ndlela leyinene”. “Va ya mahlweni va bula hi leswi swi va holovisaka. Va yingisetana hi xitxhavu loko mumbeni a beka mavonela yake kutani hi wugamu va tlhasela ka xiboho lexi va pfumelelanaka ka xone.”

NSINYA WA NAWU WA BIBELE: ‘A lizrandzru . .  . a li tidjuleli swa lone.’​—1 Ba-le-Korinte 13:4, 5.

“Ku kombisa leswaku na mu hlonipha nsati wanga, ni tlhangela hinkwaswu a swi yentxaka nakone a ni djuli ku mu vavisa kumbe ku hona wukati byezru.”​—Micah.

HA YINI SWI LI SWA LISIMA

Vatekani lava nga hloniphaniki, loko va bula va kambana swihoxo, va phatlulana, ni ku teka mumbeni a nga li wa lisima. Vakambisisi va hlaya leswaku leswo swi nga yentxa kuva vatekani volavo va gama hi ku dlaya wukati.

“Ku tlhavana hi mazritu hi ndlela ya ku gega, ku xandzra nsati waku, kumbe ku mu yentxa xihlekiso, swi ta mu yentxa a nga tidumbi, a nga ku dumbi nakone swi nga hona wukati byenu.”​—Brian.

LESWI U NGA SWI YENTXAKA

TIKAMBELE

Pimisa hi leswi u swi hlayiki ni leswi u swi yentxiki vhiki ledzri. U gama u tivutisa leswi:

• ‘Xana ni mu sole kangani nkatanga nakone ni mu kulungele kangani?’

• ‘Ni swi kombise hi ndlela yini leswaku na mu hlonipha nkatanga?’

BULA NI NKATAKU

• I yini leswi u nga swi yentxaka leswaku mi hloniphana?

• He swini swiyentxo leswi yentxaka mi nga hloniphani?

KUMBEXANA YENTXA LESWI

• Tsrala mintxhumu yizrazru leyi u nyonxelaka ku hloniphiwa ka yone. Nkataku na yene a a yentxe swoleswo. Txintxanani leswi mi swi tsraliki kutani mi yampswisa lomu swi djulekaka.

• Longoloxa wumhunu lebyi u byi zrandzraka ka nkataku. U gama u mu byela ndlela leyi u byi tlangelaka ha yone wumhunu lebyo.

“Ni swi kombisa hi swiyentxo leswaku na mu hlonipha nuna wanga ni leswaku ni djula a nyonxa. A swi djuli ni mu yentxela mintxhumu ya yikulu; ntsena ku mu yentxela mintxhumu yitsrongo nkama ni nkama swi nga komba leswaku na mu hlonipha swinene.”​—Megan.

Xa lisima swinene, a hi leswaku wene wa mu hlonipha nkataku kumbe ihim kambe mhaka hi leswaku xana a titwa na a kombiwa xitxhavu?

NSINYA WA NAWU WA BIBELE: “Yambalani lilondzro la wumbilu, a wunene, a ku titsrongahata, a ku nabyala, a ku tiyisela.”​—Ba-le-Kolosa 3:12.