4 KU DZRIVALELANA

LESWI TLHAMUXELAKA SWONE

Ku dzrivalela swi hlaya ku dzrivala mhaka leyi ku kwatisiki hi ku helela ni ku va u nga bekelani xiviti. Ku dzrivalela a swi hlayi swone leswaku u teka mhaka ya kone yi nge ya ntxhumu kumbe ku yi tsrhika yi khaluta.

NSINYA WA NAWU WA BIBELE: ‘N’wi byatsrhana ni ku dzrivalelana milandzru, loko mun’we e ni mhaka leyi mun’we a holovelaka mun’wana ha yone’.​—Ba-le-Kolosa 3:13.

“Loko u zrandzra mhunu, u tsrhika swihoxo swake swi khaluta kutani u vona leswinene leswi a dzringisaka ku swi yentxa.”​—Aaron

HA YINI SWI LI SWA LISIMA

Ku bekelana xiviti swi nga ku vangela mavabyi ni ku ku hetela ku nyonxa nakone swi nga tlhela swi hona wukati byenu.

“Siku dzrimbeni nuna wanga a kombele ku dzrivaleliwa hi leswi a ni kwatisiki swinene. A swi ni kazratela ku mu dzrivalela. Ni game ni mu dzrivalela kambe ni tisolile hi leswi ni nga hlwela ku mu dzrivalela. Leswo swi yentxe leswaku hi tsruvelana.”​—Julia.

LESWI U NGA SWI YENTXAKA

TIKAMBELE

Loko nkataku a ku kwatisile hi leswi a nga swi hlaya kumbe ku swi yentxa, tivutise leswi:

• ‘Xana ni ni wunyenyeti?’

• ‘Xana mhaka leyi i yikulu lakakuva yi djula a buya a kombela ku dzrivaleliwa kumbe ni nga yi tsrhika yi khaluta?’

BULISANA NI NKATAKU

• Swi hi tekela nkama wa ku gama kwini akuva hi dzrivalelana?

• Hi nga yentxa yini akuva hi hantla hi dzrivalelana?

MAVONELA

• Loko nkataku a ku kwatisile, u nga mu khomi hi ndlela ya ku biha.

• Dzringisa ku twisisa leswi a swi yentxiki hi ku dzrimuka leswaku ‘hinkwezru ha hoxa’.​—Yakob 3:2.

“Swa nabyala ku dzrivalelana loko hinkwenu mi hoxile, kambe a swi nabyali loko ku hoxe mun’we. Loko u dzrivalela swi kombisa leswaku wa titsrongahata.”​—Kimberly.

NSINYA WA NAWU WA BIBELE: “Hantla u lulamisa timhaka.”​—Matewu 5:25.