A Gwarda Wa Djele A Ndzruluka Mukriste

Ka doropa dzra Filipiya a ku hanya n’hwanyana wa kukazri lweyi a a ni demona. Demona ledzro a dzri mu yentxa a pfhumbata mintxhumu leyi kalaka yi nga si yentxeka nakone a vatholi vake a va ganya mali ya yinyingi hi mhaka ya leswo. Loko Pawulo na Silasi va tlhasa ka doropa dzra Filipiya, n’hwanyana lweyo a a tsrhamela ku va landzrelela ku dzringana masiku manyingi, na a huwelela a ku: “Vavanuna lava i malandzra ya Xikwembu Nkulukumba lweyi a tlakukiki ngopfu.” Hiloko Pawulo a kawuka demona a ku: ‘Hi vito dzra Yesu, huma kwake!’ Kutani a demona dzri tekela ku huma ka n’hwanyana lweyo.

Loko vatholi va n’hwanyana lweyo va vona leswaku a va nge he ti kuma mali hi mhaka ya Pawulo, va hlundzruka ngopfu swinene. Kutani va khoma Pawulo na Silasi va va kokovisela va va yisa a wuhosini, va tlhasa va ku: ‘Vavanuna lava a va wu yingiseti nawu nakone va vanga mpfilumpfilu wa wukulu a doropeni.’ Kutani a tihosi ti leleta leswaku va biwa ngopfu swinene va tlhela va pfaleliwa a djele. Xileswo, a gwarda wa kukazri a teka Pawulo na Silasi a ya va pfalela ka mbangu lowu a wu tlhoteke ngopfu swinene wu tlhela wu mphuma hi ntamu, a gama a va tsrimba milenge ka swigodo.

A makazri ka wusiku Pawulo na Silasi va yimbelela tinsimu ta ku dzrumisa Yehovha, hi nkama wolowo a swib’otxhwa a swi va yingela. Kutani ku suketana ku va ni ku tsrekatsreka lokukulu ka misava loku yentxiki leswaku a djele hinkwadzru dzri tsrekatsreka, ku pfulekela ni swipfalu hinkwaswu swa djele ma va matxhini lawa a ma tsrimbe swib’otxhwa ma tlhantlhekela. Kutani loko gwarda wa djele a vona leswaku a swipfalu swi pfulekile a djula ku tidlaya, hikusa a a pimisa leswaku a swib’otxhwa swi tsrutsrumile.

Kambe Pawulo a huwelela a ku: “U nga tidlayi, hikusa hinkwezru hi kone la!” Hiloko gwarda lweyo a tsrutsruma a tlhasa a khinsama mahlweni ka Pawulo na Silasi a va vutisa a ku: “Vakulukumba, ni fanela ku yentxa yini akuva ni huluxiwa?” Kutani va mu hlamula va ku: “Pfumela ka Hosi Yesu, kutani u ta huluxiwa, wene ni ndangu waku.” Xileswo Pawulo na Silasi va mu zrezrela, kutani yene ni va ndangu wake hinkwavu va ndzruluka vakriste.