DONDZRO 4

Ku Nhingenisa Matsralwa Ha Hombe

Mattheo 22:41-45

NKATSRAKANYU: Lulamisela miyanakanyu ya vayingiseti na u nga si na dondzra tsralwa.

Yanakanya hi leswaku ha yini u dondzra tsralwa. Nhingenisa tsralwa hi ndlela leyi taka kokela vayingiseti ku kuma yinhla leyi u djulaka ku yi kandzrakanya ka ndzrimana ya kone.

Twisisa mongo. Loko u nhingenisa a tsralwa u tlhela u boxa lweyi a vulavulaka kumbe lweyi a tsraliki buku dzra Bibele, tiyiseka leswaku u hlaya swone.
Tsrhaha Bibele akuva u tiseketela ha dzrone. Loko u bula ni vhanu lava pfumelaka ka Xikwembu Nkulukumba, yentxa leswaku vayingiseti va vona Bibele swanga Zritu dzra Xikwembu Nkulukumba, xileswo u kombisa leswaku hi dzrone xihlovo lexikulu xa wutlhazri.
Yentxa vayingiseti va nyonxela ku dondzra tsralwa. Hamba xivutiso lexi taka hlamuliwa hi tsralwa, yandlala mhaka leyi taka ntlhantlhiwa hi tsralwa, kumbe nsinya wa nawu lowu a tsralwa dzri taka pfuna vayingiseti ku wu twisisa.

Yanakanya hi leswi vayingiseti kutani va swi tivaka hi mhaka leyi u khanelaka ha yone ni tsralwa ledzri u dzri dondzraka. Nambi ko va tsralwa ledzri tolovelekiki, dzri nhingenise hi ndlela leyi nyonxisaka u tlhela u pfuna vayingiseti ku dzri twisisa ku yampswa kumbe hi ndlela yin’wana ya nyiwana.