Mintlhamuxelo Ya Xibukwana Xa Wutomi Ni Wutizreli Byezru

05-11 KA AGOXTO

WUKOSI BYI NGA BIBELENI | 2 TIMOTEO 1-4

“Xikwembu Nkulukumba A Nga Hi Nyikanga Moya Wa Wutoya”

Sentinela 15/05/2009 p. 15 § 9

Vampswha​—Kombisani Nhluvuku Wenu

Akuva a pfuna Timoteo, Pawulo a mu dzrimuxe leswi: ‘Hikusa Xikwembu Nkulukumba a nga hi nyikanga moya wa wutoya, wa kuva a wa ntamu, ni lizrandzru ni wutlhazri.’ (2Tm 1:7) ‘Wutlhazri’ byi patsra ku va ni wuswikoti bya ku yanakanyisisa ha hombe. Byi patsra wuswikoti bya ku vona mintxhumu hi la mi nga ha kone na ku nga li hi lana a hi navela mi va ha kone. A vampswha vambeni lava nga wupfangakiki va kombisa moya wa wutoya a miyanakanywini yavu va dzringisa ku tsrutsruma mintxhumu leyi va pfilunganyaka hi ku yetlela ngopfu, ni ku heta nkama wa ku tala va hlalela televhiszawu, va kukutlela byala ni ku dzraha timbangi, minkhuvu ya nkama ni nkama ni wuwoswani. A vakriste va tsratsriyiwa ku ‘dzrela wusandzri ni ku navela ka misava, hi hanya hi ku tikhoma ni ku lulama ni wukhongoti a nkameni wa swoswi.’​—Tito 2:12.

Sentinela 01/03/2003 p. 9 § 7

‘Vana Ni Xixixi Ni Ntamu!’

Loko Pawulo a tsralela Timotewu a te: ‘Hikusa Xikwembu Nkulukumba a nga hi nyikanga moya wa wutoya, wa kuva wa ntamu . . . Hileswo ke, u nga vi vana tingana hi wumboni bya Hosi yezru.’ (2 Timoteo 1:7, 8; Marka 8:38) Loko hi dondzra mazritu lawa, hi nga ha tivutisa leswi: ‘Ni ni tingana ta ku pfumela kwanga, kumbe ni ni xixixi? Na va byela vatizri-kulozri kumbe vadondzri-kulozri leswaku ni Mboni ya Yehovha, kumbe na swi tlhota? Ni ni tingana hi leswi ni hambaniki ni van’wana, kumbe na tibuma hi wuxaka lebyi ni nga nabyu na Yehovha?’ Loko mhunu a ni vonela ledzri hoxekiki mayelanu ni ku zrezra dzrungula ledzrinene, kumbe ku va lwa hambaniki ni van’wana, a fanela ku dzrimuka xileleto lexi Yehovha a xi byeliki Yoxuwa: ‘Vana ni xixixi ni ntamu.’ U nga dzrivali leswaku a vonela dzra vadondzri-kulozri kumbe vatizri-kulozri a hi dzrone dzri nga ni lisima kambe ko va ntsena vonela dzra Yehovha na Yesu Kriste.​—Ba-le-Galatia 1:10.

Djulisisa Tindzralama Ta Moya

Sentinela 07/2017 p. 10 § 13

Djulisisa Wukosi Lebyi Nga Bya Xihlayelamfuzri

Timotewu afa a li wanuna wa lipfumelo. Ntsrhaku ka ku vitana Timotewu ‘swanga hi nhenha leyinene ya Kriste Yesu’, Pawulo a mu byele leswi: ‘A ku na mhunu lwe, loko a ya yimpini, a tikazrataka hi mintxhumu ya wutomi lebyi, akuva a ta va lwenene ku lwa mu tlhomisiki.’ (2Tm 2:3, 4) Valandzreli va Yesu namunhla, ku patsra ni lava tlulaka 1 milhawu va nga vatizreli va nkama hinkwawu, va fana ni masotxha ya Kriste. Va yentxa hinkwaswu leswi va swi kotaka ku landzra xileleto xa Pawulo, nambi leswi misava yi va kombaka swinavetiso nkama hinkwawu. Va dzrimuka leswi Bibele dzri swi hlayaka: ‘Lwa volekaka i nandzra wa lwa a mu volekiki.’ (Pr 22:7) Sathana a nyonxela kuva hi tizrisa nkama ni ntamu wezru hi va swikazrawa swa xiyimo xa misava leyi. Swiboho swin’wana swi nga hi yentxa hi va swikazrawa hi malembe manyingi. Van’wana va txeneka mali yinyingi akuva va hakela univhersidadi, mimovha ya ku dula ngopfu, mutxhatu wa ku dula ngopfu leswi nga ha va tekelaka malembe ku swi hakela. A tava wutlhazri loko hi nabyalisa wutomi, hi ku pumba swa ku swi xava kutani hi hakela swikweneti, xileswo hi ta faneleka ku va swikazrawa swa Xikwembu Nkulukumba matsrhan’wini ya swikweneti.​—1Tm 6:10.

Sentinela 15/07/2014 p. 14 § 10

Vhanu va Yehovha ‘Va Tsravukana Ni Swihono’

Namunhla, a swi tolovelekanga kuva vhanu va Yehovha va kumana ni madukwa a ndzreni ka bandla. Hi leswo ke, loko hi kumana ni tindondzro leti nga pfumelelanikiki ni Bibele, hi fanela ku ti bakanya, swi nge na mhaka swaku ti pfa kwini. Ku ta va ku nga li wutlhazri loko hi talisa ku bula ni vhanu lava dukiki, hi ku kongoma, hi internet kumbe hi ndlela yin’wana. Nambi loko nkongometo wezru a li ku pfuna mhunu lweyo, swi tava na swi lwisana ni nkongomiso lowu nga Bibeleni ha ha ku wu dondzraka. Swanga vhanu va Yehovha ha byi tingawula, ina, ha byi bakanya wudukwa.

12-18 KA AGOXTO

WUKOSI BYI NGA BIBELENI | TITO 1–FILEMON

“Beka Vakulu”

Sentinela 15/11/2014 pp. 28-29

Swivutiso swa vadondzri

Nambi leswi matsralwa ma nga tlhamuxelikiki ndlela leyi a ku bekiwa valaviseli ha yone nkameni lowu khalutiki, hi ni swikombiso swa ndlela leyi a swi yentxisiwa xisowne. Loko va tlhelela kaya ntsrhaku ka liyendzro dzra ku sungula swanga vazrumiwa, Pawulo na Barnaba, ‘va hlawule vakulu a kezrekeni [bandleni] dzrin’wana ni dzrin’wana; va khongota navu hi ku titsrona swakuda, va va bekela ku Hosi, leyi va pfumeliki ku yone.’ (Min 14:23) Ntsrhaku ka malembe, Pawulo a tsralele Tito mutizri-kulobye, a ku: ‘Leswi ndzri nga ku siyela swone Kreta, hi leswaku u lulamisa leswi saliki, ni ku beka vakulu mitini hinkwayu, swanga hi leswi dzri nga ku leletisa xiswone.’ (Tito 1:5) Hi ku fanana, Timotewu lwa famba-fambiki makhambi ya ku tala na Pawulo, swi tikomba na yene a ve ni wutiyanguleli lebyi fanaka. (1Tm 5:22) Swe dla livaleni leswaku swiyavelo leswo a swi yentxiwa hi valaviseli lava famba-fambaka, ku nga li vapostola kumbe vakulu a Yerusalema.

Hi ku ya hi lulamiselo ledzri dzra Bibele, Huvo Leyi Zrangelaka ya Timboni Ta Yehovha yi lulamise ndlela leyi a ku bekiwa vakulu ni malandzra ya wutizreli ha yone. Ku sukela hi 1 ka Setembru wa 2014, a swiyavelo swi sungule ku yentxiwa hi ndlela leyi landzrelaka: Mulaviseli wa muganga afa a xiyisisa ha hombe leswi vakulu va mugangawakwe va swi hlayiki hi vamakwezru lava va pimisiki ha vone leswaku va va vakulu kumbe malandzra ya wutizreli. Loko a yendzrela mabandla, a a djula ku tiva ha hombe vamakwezru lava vakulu va pimisiki ha vone leswaku va va vakulu kumbe malandzra ya wutizreli, hi ku tizra navu nsin’wini loko swi koteka. Ntsrhaku ka ku vona leswi hlayiwiki ha vone ni huvo ya vakulu va bandla, mulaviseli wa muganga a ni wutiyanguleli bya ku beka kumbe ku yimisa vakulu ni malandzra ya ku wutizreli a mabandleni ya muganga wakwe. Hi ndlela leyo, hi landzrelelisisa hi kusuhi lulamiselo dzra dzaneni dzra ku sungula.

Hi wini ntizro wa lava nga kone ka lulamiselo ledzri? Nkama hinkwawu, ‘a nandzra lwe wa ku dumbeka ni ku tlhazriha’ a ni wutiyanguleli bya ku yavela swakuda ka ndangu wakwe. (Mt 24:45-47) Leswi swi patsra ku setxhisisa a matsralweni, hi ku pfuniwa hi moya lowa ku xwenga, akuva va kuma swileleto swi nga Bibeleni swa ndlela leyi mabandla ma fanelaka ku kongomisiwa ha yone a misaveni hinkwayu. A nandzra wa ku dumbeka a beka valaviseli va miganga ni swizro swa Xihubyana Xa Zrwavi. Kutani a nyikela nkongomiso wa ndlela leyi swileleto swi fanelaka ku tizra ha yone. Huvo ya vakulu yi ni wutiyanguleli bya ku kambisisa ha hombe leswaku vamakwezru lava va va hlawuliki va na byone tsrhamela ledzri djulekaka ku va ni wutiyanguleli a bandleni dzra Nkulukumba. Mulaviseli wa muganga mun’wana ni mun’wana a ni wutiyanguleli bya ku xiyisisa hahombe ni hi xikhongoto leswi vakulu va swi hlayaka kutani a beka vamakwezru lava fanelekaka kuva nkulu kumbe nandzra wa wutizreli.

Djulisisa Tindzralama Ta Moya

Sentinela 15/05/1989 p. 31 § 5

Swivutiso swa vadondzri

Yene afa a nga pfumelelani nakone ku dzreliwa ka lixaka loku a ku yentxeliwa va le Kreta. Hi nga tiyiseka hi leswo, hikusa Pawulo afa a swi tiva leswaku a Kreta a ku ni vakriste lavanene lava Xikwembu Nkulukumba a va yamukeliki ni ku va tota hi moya Wakwe wa ku xwenga. (Min 2:5, 11, 33) Afa ku ni vakriste lava afa va ta vumba mabandla ‘mitini hinkwayu’. Nambi leswi vakriste lavo a va nga hetisekanga, hi nga tiyiseka leswaku a va nga na madzrimi, a va nga di ngopfu kumbe ku va malolo; loko a va tsrhamisi xileswo, Yehovha inha a nga tamanga a va yamukela. (Ba-le-Filipi 3:18, 19; Apfuletelo 21:8) Hi lana swi nga ha kone namunhla a mimbangwini hinkwayu, swi nga ha yentxeka a Kreta afa ku li ni vhanu lavanene lava a va khunguvanyisiwa hi mahanyela ya ku biha ya vhanu lava a va va zrendzrelile, nakone afa va tibekisele ku yamukela dzrungula dzra wukriste.​—Ezekiel 9:4; dzringanisa ni Amintiṛo 13:48.

Sentinela 15/10/2008 p. 31 § 5

Nkatsrakanyu Wa Mapapela Ya Tito, Filemon ni Ba-Heberu

15, 16​—Ha yini Pawulo a nga kombelanga Filimoni ku ntsrhuxa Onesimos? Pawulo afa a djula ku khomelela ngopfu ka ntizro wakwe wa ku ‘zrezra ta mfumu wa Xikwembu Nkulukumba ni ku dondzrisa timhaka ta Hosi Yesu Kriste.’ Xileswo, a hlawule ku va a nga tipeti ka timhaka ta van’wana, ku fana ni lava nga wukazraweni.—Min 28:31.

19-25 KA AGOXTO

WUKOSI BYI NGA BIBELENI | BA-HEBERU 1-3

“Zrandzra Ku Lulama U Venga Wusomboloki”

Sentinela 15/02/2014 p. 5 § 8

Twalisa Kriste Hosi Ya Ku Phatima

Yehovha a beki N’wanakwe swanga Hosi ya Wumesiya a tilweni hi 1914. ‘A nhonga yakwe i nhonga ya wululami’, kutani a wululami a mfun’wini wakwe byi tiyile. A wuhosi bya mu fanela hikusa ‘Xikwembu Nkulukumba hi yene xiluvelo xakwe’. Leswi liki, Yehovha hi yene muvumbi wa Mfumu wakwe. Nakone, a xiluvelo xa Yesu xi ta va kone ‘hi minkama ya minkama’. Xana a wu tibumi hi ku tizrela Yehovha na u zrangeliwa hi Hosi leyi leyikulu, leyi bekiwiki hi Xikwembu Nkulukumba?

Sentinela 15/02/2014 pp. 4-5 § 7

Twalisa Kriste Hosi Ya Ku phatima

Dondzra Amapsalma 45:6, 7. Leswi Yesu a byi zrandzraka swinene wululami a tlhela a hambula xin’wana ni xin’wana xi nga ha tisaka xisandzru ka Tatana wakwe, Yehovha a mu tote ku va Hosi ya Mfumu wa Wumesiya. Yesu a totiwe ‘hi mafuzra ya ku nyonxa’, ku tlula ‘vanakuloni’ vakwe, a nga tihosi ta Yuda ta lixaka dzra Davida. Hi ndlela yini? Hi leswaku Yesu a totiwe hi Yehovha ha byakwe. Nakone, Yehovha a mu tote swanga Hosi ni Muprista Lwenkulu. (Ps 2:2; Hb 5:5, 6) Mfuzri a ku totiwa ka Yesu a ka vanga hi mafuzra kambe ka ve hi moya wa ku xwenga, ntlhantakubidzri a Mfumu wakwe a hi wa la misaveni i wa le matilweni.

Djulisisa Tindzralama Ta Moya

Pespicaz vol-2 p. 382 § 1

Xifaniso

Xana nkama hinkwawu Yesu a kombise wumhunu bya tatana wakwe hi la ku heleliki?

Yesu, n’wana wa mativula wa Xikwembu Nkulukumba lweyi ntrshaku a viki mhunu, i xifaniso xa Tatana wakwe. (2Ko 4:4) Nambi leswi N’wana lweyi a nga lwe Xikwembu Nkulukumba a vulavuliki naye loko a ku ‘a hi hambeni mhunu xifanisweni xezru’, ku fanana loku ku nga kone ka N’wana ni Tatana wakwe, Muvumbi, ku ve kone ku sukela ku vumbiweni kwakwe. (Gn 1:26; Yh 1:1-3; Kl 1:15, 16) Loko a ve la misaveni swanga mhunu lwa hetisekiki, a kombise wumhunu ni tshramela dzra Yehovha hi ndlela leyi heleliki ndzreni ka mpimu wa ximhunu. Kutani a swi twala loko a ku ‘lwa a ndzri voniki a vone Tatana.’ (Yh 14:9; 5:17, 19, 30, 36; 8:28, 38, 42) Nambitanu ku fanana loko, a ku kombise hi mpimu lowukulu loko a pfuxiwa hi le moyeni ni loko a nyikiwa ‘wuhosi hinkwabyu, a tilweni ni la misaveni’ hi Tatana wakwe, Yehovha Xikwembu. (1Pe 3:18; Mt 28:18) Leswi kutani Xikwembu Nkulukumba a tlakuxiki Yesu ‘henhla henhla ngopfu’, N’wana wa Xikwembu Nkulukumba swoswi a kombisa ku phatima ka Tatana wakwe hi ndlela leyikulu ku tlula leswi a a li xiswone na a nga si na siya kaya dzrakwe dzra le matilweni a ta la misaveni. (Flp 2:9; Hb 2:9). Swoswi i ‘xivumbeko xa ntshima ya [Xikwembu Nkulukumba]’.​—Hb 1:2-4.

Perspicaz vol-1 p. 491 § 1

Matilo

Mazritu ya Amapsalma 102:25, 26 ma vulavula hi Yehovha Xikwembu, kambe mupostola Pawulo a ma tsrhahe na a vulavula hi Yesu Kriste. Xivangelo hi leswaku N’wana lweyi wa ku va swakwe wa Xikwembu Nkulukumba a ve mupfuni wa Nkulukumba a ku tumbuluxeni ka wuyako hinkwabyu. Pawulo a hambanisa wukone bya N’wana ni bya ntumbuluku, lowu Xikwembu Nkulukumba, mutumbuluxi wa wone a nga ha wu ‘songaka ku fana ni kapulana’ a wu beka hi tlhelo.​—Hb 1:1, 2, 8, 10-12; dzringanisa 1Pe 2:3.

26 KA AGOXTO–1 KA SETEMBRU

WUKOSI BYI NGA BIBELENI | BA-HEBERU 4-6

“Khinyela Akuva U Nhingena A Ku Wiseni Ka Xikwembu Nkulukumba”

Sentinela 15/07/2011 pp. 24-25 §§ 3-5

Ku Wisa Ka Xikwembu Nkulukumba​—I yini?

Lana hi kuma miyanakanyu mibidzri leyi mi hi yentxaka hi tlhasela wugamu bya leswaku a siku dzra savata afa dzra ha li ku teni a dzaneni dzra ku sungula N.Y. Miyanakanyu ya ku sungula, xiyisisa mazritu ya Yesu ka vakaneti lava afaka va mu sola hi leswi a a daha hi Savata. Leswo a va swi teka ku li ntizro. A Hosi yi te ku vone: ‘Tatana wanga awa tizra ku tlhasa swoswi na mine ndzra tizra.’ (Yh 5:16, 17) A swi tlhamuxela yini leswo? Yesu afa a li kazri a hehliwa hi leswi a a tizra hi Savata. Yesu a te: ‘Tatana wanga awa tizra ku tlhasa swoswi’. Nakunene, Yesu afa a va byela leswi vahehli vakwe: ‘Mine ni Tatana wanga hi kazri hi yentxa ntizro wun’we. Leswi Tatana wanga a tamaka a tizra hi Savata dzrakwe dzra mili wa malembe, swa twala loko mine ni tizra nambi loko a li Savata.’ Kutani Yesu afa a djula ku va yentxa va twisisa leswaku, loko a vulavula hi misava, siku ledzrikulu dzra savata dzra ku wisa ka Nkulukumba, ku nga siku dzra wu 7, a dzri nga si na hela a masikwini yakwe.

Ya wubidzri hi yi kuma ka mupostola Pawulo. Loko a tsrhaha Genesis 2:2 mayelanu ni ku wisa ka Nkulukumba, hi ku huhutiwa, Pawulo a te: ‘Hikuva hine hi pfumeliki hi nhingena a ku wiseni’. (Hb 4:3, 4, 6, 9) Kutani a siku dzra wu 7 a dzra ha tsrustruma minkameni ya Pawulo. Siku ledzro a dzra ha taya mahlweni ku ya tlhasa kiwni?

Kuva hi yangula xivutiso lexo, hi fanela ku dzrimuka nkongometo wa siku dzra wu 7. Genesis 2:3 dzri tlhamuxela swaku he wini: ‘Xikwembu Nkulukumba a ku tovokisa siku dzra wuntlhanu na mambidzri a dzri hlawulekisa’. Siku ledzro dzri ‘xwengisiwile’​—dzri hlawulekisiwile, kumbe ku bekiwa hi tlhelo, hi Yehovha—​akuva a hetisisa nkongometo wakwe. Nkongometo lowo i wa leswaku a misava mi va kaya dzra la va ku yingiseta lava taka mi londzrisa kun’we ni hinkwaswu leswi hanyaka. (Gn 1:28) Hi ku zron’wekela nkongometo lowo Yehovha Xikwembu Nkulukumba na Yesu Kriste, ‘Hosi ya savata’ va ‘tizra ku tlhasa swoswi’. (Mt 12:8) Siku dzra Nkulukumba dzra ku wisa dzri ta ya mahlweni ku ya tlhasa loko a nkongometo wakwe lowu fambisanaka ni ku wisa wu hetisekile a ku heleni ka 1000 wa Malembe ya ku Fuma ka Kriste.

Sentinela 15/07/2011 p. 25 § 6

Ku Wisa Ka Xikwembu Nkulukumba​—I yini?

Xikwembu Nkulukumba a va tlhamuxele ha hombe Adamu na Evha nkongometo wakwe. Kambe vone a va wu seketelanga. Phela Adamu na Eva va ve vhanu va ku sungula ku kala ku yingiseta. Ntsrhaku kwavu ku ve ni vanyingi va tsrhamela ledzro. Nambi vahlawuliwa va Yehovha, tiko dzra Israyele, va landzrele ndlela leyo. Kutani a swi fanela leswi Pawulo a tsratsriyiki vakriste va le dzaneni dzra ku sungula leswaku na vone va nga wa ka ntlhamu wolowo. A tsrale leswi: ‘A hi khinyeleni ke, akuva hi nhingena a ku wuseni koloko, ku nga ti va na mun’wana lwa a taka wa a ku nga yingiseti loka ku tanu.’ (Hb 4:11) Xiya leswaku Pawulo a fanisa ku kala ku yingiseta ni ku nga nhingeni ku wiseni ka Nkulukumba. Swi ni ntlhamuxelo wini ka hine leswo? Loko hi pfukela nkongometo wa Nkulukumba hi ndlela ya kukazri, xana swi nga ha yentxeka hi tikuma hi li khombyeni dzra ku va hi nga nhigeni ku wiseni ka Nkulukumba? Nhlamulo ya xivutiso lexi i ya lisima swinene ka hine, kutani hi ta bula ha xone phambeni. Swoswi, a hi voneni swin’wana swa leswi hi taka swi dondzra mayelanu ni ku nhingena ku wiseni ka Nkulukumba hi ku kambisisa xikombiso xa ku biha xa va-Israyele.

Sentinela 15/07/2011 p. 28 §§ 16-17

Ku Wisa Ka Xikwembu Nkulukumba—I yini?

Van’we ka vakriste va namunhla va nga ha ku kho va bekisa Nawu wa Moxe akuva va kuma ku pona. Mazritu lama huhutiwiki ya Pawulo ku va le Efesa ma swi beka a livaleni: ‘Hikusa n’wi huluxiwile hi timpswalu, hi ku pfumela; leswo a swi pfi ku n’wine, i nyiko ya Xikwembu Nkulukumba. A swi hume mintizrweni a mhunu a nga titwalisa.’ (Ef 2:8, 9) Kutani ke, swi tlhamuxela yini kuva Vakriste va nhingena ku wiseni ka Nkulukumba? Yehovha a beki siku dzra wu 7​—siku dzrakwe dzra ku wisa—​ku hetisisa kongomento wakwe hi misava. Hi nga nhingena ku wiseni ka Yehovha, kumbe ku tipatsra na yene ku wiseni kwakwe, hi ku yingiseta ni ku titwananisa ni nkongometo wakwe hi lana nhlengeletanu yakwe yi hi pfuletelaka ha kone.

¹⁷ Hi tlhelo dzrin’wana, loko hi dzrela swilayu swa Bibele leswi pfaka ka nandzra wa ku dumbeka ni ku tlhazriha hi ku langa ku tifuma a swi ta hingeleta ku longoloka kwezru ni nkongometo wa Nkulukumba. Kutani leswo a swi ta beka khombyeni wuxaka bya ku zrula hi nga na byone na Yehovha. Ka nhloko-mhaka leyi landzrelaka, hi ta bula hi swiyimu swa kukazri leswi nga ha khumbaka vhanu va Nkulukumba, hi tlhela hi vona swaku swiboho leswi hi swi hambaka, swi kombisa ku yingiseta kumbe im-him, nakone swi nga kombisa leswaku hi ta nhigena ku wiseni ka Nkulukumba kumbe im-him.

Djulisisa Tindzralama Ta Moya

Sentinela 09/2016 p. 13

Swivutiso Swa Vadondzri

I yini ‘a zritu dzra Xikwembu Nkulukumba’ ledzri Ba-le-Heberu 4:12 yi hlayaka swaku ‘dzra hanya dzri ni ntamu’?

▪ A mongo wu kombisa leswaku Pawulo a a vulavula hi dzrungula kumbe ntlhamuxelo wa nkongometo wa Xikwembu Nkulukumba, hi lana hi swi kumaka ha kone a Bibeleni.

Ba-Heberu 4:12 yi tsrhahiwa swinene ka mabuku yezru ku kombisa swaku a Bibele dzri ni ntamu wa ku txintxa wutomi bya vhanu, nakone dzri tizrela swoswo. Nambitanu, swa pfuna ku kambisisa Ba-Heberu 4:12 hi wuyenti. Pawulo a a li kazri a kutxa Vakriste va va Heberu ku longoloka ni minkongometo ya Nkulukumba. Ntalu wa yone ku vulavuliwe ha yone ka matsralwa ya ku xwenga. Pawulo a tizrise xikombiso xa va-Israyele lava huluxiwiki a Egipita. Vone a va ni ku lavisela ka ku nhingena tikweni dzra xidumbiso ‘le dzra ntsrwamba ni wulombe’, lana afaka va ta kuma ku wisa ka xihlayelamfuzri.​—Eks 3:8; Dt 12:9, 10.

Lowo afa wu li nkongometo wa Nkulukumba. Kambe, va-Israyele va game va tlanyata timbilu va va va nga kombisi lipfumelo, kutani ntalu wavu va luzekeliwe hi ku kuma ku wisa. (Tin 14:30; Yš 14:6-10) Nambitanu Pawulo a yengesele a ku ‘xidumbiso xe he kone xa ku nhingena a ku wiseni kwakwe’. (Hb 3:16-19; 4:1) Swi tiyile swa ku ‘xidumbiso’ lexo i xiyenge xa nkongometo wa Nkulukumba. Ku fana ni va Kriste va va Heberu, hi nga dondzra ni ku longoloka ni nkongometo lowo. Pawulo a a tsrhahe Genesis 2:2 ni Amapsalma 95:11 akuva a hi yentxa hi dumba swaku a xidumbiso lexi i xa matsralwa.

Nakunene, swi fanela ku hi khumba leswi a ‘xidumbiso xe he ke kone xa ku nhingena a ku wiseni ka [Xikwembu Nkulukumba].’ Ha dumba leswaku ku lavisela loku seketeliwiki Bibeleni ka ku nhingena ku wiseni ka Nkulukumba i ka hakunene, nakone hi tibekisele kuva hi nhingena. Leswo a hi swi yentxi hi ku tikazratela ku bekisa Nawu wa Moxe kumbe ku kuma ku yamukeliwa ha Yehovha hi ku yentxa mintizro yin’wana. A matsrhan’wini ya leswo, hi lipfumelo hi tizrisana na Yehovha hi ku nyonxa nakone ha ha tama hi longoloka ni nkongometo wa Nkulukumba lowu pfuleteliwiki. Ntlhantakubidzri, hi la hi swi voniki ha kone, makhulukhulu ya vhanu misaveni hinkwayu va sungule ku dondzra Bibele ni ku dondzra hi ndlela leyi minkongometo ya Yehova mi kombisiwaka ha yone. Ntalu wavu va susumeteleka ku txintxa hanyela dzravu, ku kombisa lipfumelo, ni ku va vakriste lava babatisiwiki. Ndlela leyi va khumbekaka ha yone yi swi beka livaleni leswaku ‘a zritu dzra Xikwembu Nkulukumba dzra hanya dzri ni ntamu.’ Nkongometo wa Nkulukumba lowu pfuleteliwiki, hi la swi tsraliwiki ha kone Bibeleni, wu khumbe hanyela dzrezru nakone wu ta tama wu va ni ntamu wuton’wini byezru.

Perspicaz vol-2 p. 24 § 5

Dumbo

Dumbo ledzri dzra wutomi lebyi nga gamikikiki lebyi ‘yaveliwiki vitaniwo dzra le tilweni’ (Hb 3:1) dzri tiyile nakone i ntxhumu lowu hi nga wu dumbaka. Swi seketeliwa hi mintxhumu mibidzri leyi ku yone swi nga kotekikiki kuva Nkulukumba a hemba. Mintxhumu leyi i xidumbiso ni xitiyiso xakwe. Kutani a dumbo dzri le ka Kriste lweyi swoswi a nga tilweni nakone a ngeke na ku fa. Xileswo a dumbo ledzri ku vulavuliwa ha dzrone swanga ‘nsoma ya hika leyi dumbekaka, yi va yi tiya, yi nhingena ni ku le dzrin’wana tlhelo dzra xisizrelelo, lomu Yesu a nga nhingena hi nkonta yezru, leswi a nga yentxiwa muprisata lwenkulu hi mukhuva wa Melkizedeki.’​—Hb 6:17-20.