Mintlhamuxelo Ya Xibukwana Xa Wutomi Ni Wutizreli Byezru

1-7 KA ABRILI

WUKOSI BYI NGA BIBELENI | 1 BA-LE-KORINTE 7-9

‘Ku Tsrhama Na U Nga Txhatanga—I Nyiko’

Sentinela 15/01/2011 pp. 17-18 § 3

Yi Tizrise Ha Hombe Nyiko Yaku Ya Ku Tsrhama U Nga Txhatanga

Hakanyingi, lwa a nga txhatangakiki a ni nkama wunyingi nakone a ntsrhunxekile ku tlula lwa txhatiki. (1Ko 7:32-35) Xiyimu lexo xi mu nyika mukhandlu wa ku yandzrisa ntizro wakwe, a kombisa lizrandzru ka vambeni ni ku ya mahlweni a tsrhindzrekela ka Yehovha. Na swi li xitasu, vakriste vanyingi va nyonxele mabindzru lama nga kone hi ku ka va nga txhati nakone va ti bohele ku ‘tsrhamisa xiswoswo’, ku dzringana nkama wa kukazri. Van’wana swi nga ha yentxeka va nga kunguhatanga ku tsrhama na va nga txhatanga, kambe, loko swiyimu swavu swi txintxile, va yanakanyisise hi xikhongoto, kutani va xiye leswaku hi ku pfuniwa hi Yehovha na vone a va ta swi kota. Xileswo, va pfumelele xiyimu ximpswha xa ku tsrhama na va nga txhatanga.​—1Ko 7:37, 38.

Sentinela 15/07/2008 p. 27 § 1

Tinhla Ta Lisima Ta Mapapela Ya Ba-Le-Korinte

7:33, 34​—I yini ‘swa misava’ leswi wanuna kumbe wansati lava txhatiki va nga swi yanakanyaka? Pawulo a a khanela hi mintxhumu ya misava, leyi vakriste lava txhatiki va fanelaka ku zron’weka ha yone. Mintxhumu leyi yi patsra swakuda, mpahla ni ka ku tsrhama kone, kambe a swi patsri mintxhumu ya ku biha ya misava leyi, leyi vakriste va yi tingawulaka.​—1 Yohan 2:15-17.

Sentinela 15/10/1996 pp. 12-13 § 14

Ku Tsrhama U Nga Txhatanga​—Ndlela Ya Ku Tizra Na U Nga Hingeletiwi

Mukriste lwa nga txhatangakiki, lwa tizrisaka nyiko leyo ku yentxa mintxhumu leyi bindzrulisaka yene, a nga yentxi leswi nga ‘swinene’ ku tlula lwa txhatiki. A tama a nga txhatanga ku nga li ‘hi nkonta ya mfumu wa matilu’, kambe hi swivangelo swakwe swa ximhunu. (Mattheo 19:12) Wanuna kumbe wansati lava nga txhatangakiki va fanela ku ‘yanakanya swa Hosi’ ni ku yanakanya leswi va nga ‘tsrhavisisaka Hosi xiswone’ ni ku ‘namazrela Hosini va nga dzrivatiwi ha ntxhumu’. Leswi swi hlaya leswaku va tizrela Yehovha na Yesu Kriste hi ku helela. Hi ku yentxa leswo, wanuna kumbe wansati lava nga txhatangakiki va yentxa leswi nga ‘swinene’ ku tlula vakriste lava txhatiki.

Djulisisa Tindzralama Ta Moya

Amar a Deus p. 251

Dondzra swin’wana

Minkama yimbeni, vakriste van’wana va hambana ni vankatavu, nambi loko ku nga yentxekanga wumbuye. (1 Ba-le-Korinte 7:11) La hansi, ku kombisiwe swiyimu leswi nga yentxaka vakriste va hambana:

• Loko nuna a yala ku wundla ndangu, ku tlhasela la kakuva ndangu wu tsrhama na wu txonile wu pfumala swakuda.​—1 Timoteo 5:8.

• Loko nuna kumbe nsati va banana la kakuva va peta wutomi byavu a ngozini.​—Ba-le-Galatiya 5:19-21.

• Loko nuna kumbe nsati a sivela mun’wana ku tizrela Yehovha. Leswo swi peta ngozini wunghanu bya mhunu lweyo na Yehovha hi ku helela.​—Amintiṛo 5:29.

Sentinela 15/07/2000 p. 31 § 2

Vana Lwa Tengiki A Misaveni Leya Ku Biha

Vampswha a va fanelanga va tsrutsrumela ku txhata loko va twa nyanyuku wa swa tinkuku. A mutxhatu wu djula ku tiyimisela, nakone swi djula na u wupfile akuva u zrwala wutiyanguleli lebyi. (Genesis 2:24) Swa swinene i ku yima ku ko ku ‘khaluta nkama wa wumpswha’​—ku nga nkama lowu ku navela swa tinkuku ku nga kukulu nakone ku nga khumbaka swiboho swaku. (1 Ba-le-Korinte 7:36) I wuphukuphuku ni xidoho ku va mhunu lwa kuliki, lwa navelaka ku txhata, a ya nghenela timhaka ta tinkuku leti nga basangakiki a tiyimelela hi ku hlaya leswaku a ku na lwa fanelekaka kuva a txhata na yene!

8-14 KA ABRILI

WUKOSI BYI NGA BIBELE | 1 BA-LE-KORINTE 10-13

“Yehovha Awa Dumbeka”

Sentinela 02/2017 pp. 29-30

Swivutiso Swa Vadondzri

Mupostola Pawulo a tsrale leswaku Yehovha ‘a nga ta pfumela leswaku u dzringiwa hi ku tlula leswi u nga swi kotaka’. (1 Ba-le-Korinte 10:13) Xana leswo swi tlhamuxela leswaku Yehovha awa swi tiva na swi nga si na yentxaka leswi mhunu a nga swi tiyiselelaka, kutani a hi hlawulela mindzringo leyi hi taka langusana na yone?

▪ Yanakanya hi xiyimu lexi landzrelaka. Makwezru wa kukazri lweyi a n’wanakwe a tisungiki a tivutisa leswi: ‘A nga va leswaku Yehovha a vone leswaku mine ni nsati wanga hi ta swi kota ku tiyiselela ku tisunga ka n’wanezru? Xana Xikwembu Nkulukumba a pfumelele leswaku ndzringo lowu wu hi wela? Xana hi ni xivangelo xa ku pfumela leswaku Yehovha a lawula leswi humelelaka wuton’wini byezru?

Ku twisisa hi wuyenti mazritu ya Pawulo lama kumekaka ka 1 Ba-le-Korinte swi hi pfuna ku twisisa leswaku a ku na swivangelo swa le Matsralwini swa ku pfumela leswaku Yehovha a kunguhata mindzringo leyi hi nga yi tiyiselaka kutani a hi langela leyi nga hi welaka. A hi kambisiseni mune wa swivangelo leswi hi yentxaka hi tlhasela wugamu lebyi.

Xa ku sungula, Yehovha a nyike vhanu a ntsrhunxeko wa ku tihlawulela. A djula leswaku hi tilangela leswi hi taka swi yentxa hi wutomi byezru. (Dt 30:19, 20; Yš 24:15) Loko hi hlawula leswinene hi nga yimela leswaku Yehovha a hi kongomisa a wuton’wini byezru. (Pr 16:9) Kambe loko hi hlawula ndlela ya ku biha hi ta lavisana ni ntsrhovelo wa kone. (Ga 6:7) Loko a li leswaku Yehovha a hi hlawulela mindzringo leyi taka hi wela, xana a hi ta hlaya leswaku hi ni ntsrunxeko wa ku tihlawulela?

Xa wubidzri, Yehovha a nga hi vhikeli ka ‘nkama ni humelelo’ kumbe xiyentxakalu lexi nga zrindzreliwangakiki. (Ekl 9:11) Timhangu letikulu​—leti nga honaka ngopfu—​ti nga ha hi humelela hi leswi hi nga ka mbangu kumbe nkama lowu nga liki wunene. Yesu a khanele hi mhangu leyi dlayiki 18 wa vhanu hikola ka ku weliwa hi xihondzro. Leswi a swi hlayiki swi komba leswaku a a nga li ku zrandzra ka Xikwembu Nkulukumba. (Luka 13:1-5) Kutani, a swi twali ku hlaya leswaku Xikwembu Nkulukumba a kunguhata ka ha li mahlweni leswaku i mani a taka hanya kumbe ku fa na swi nga zrindzreliwanga.

Xa wuzrazru, mun’wana ni mun’wana wezru awa patsreka a mhakeni ya wudumbeki. Dzrimuka leswaku Sathana a dzrele wudumbeki byezru. A hlaye leswaku a ku na nandzra ni mun’we wa Yehovha lwa taka tsrhama na a dumbekile loko a kumana ni swikazratu. (Yob 1:9-11; 2:4; Mpf 12:10) Kutani yanakanya loko Yehovha a o hi sivela ku kumana ni swikazratu hi ku vona leswaku a hi nge swi koti ku langusana na swone. Loko a o yentxa leswo a a ta va na a seketela leswi Sathana a swi hlayiki, leswaku hi ta tizrela Yehovha ntsena loko swi hi fambela ha hombe.

Xa wumune, a swi vileli ku va Yehovha a tiva hinkwaswu leswi taka hi humelela. Loko Xikwembu Nkulukumba a o hi langela swikazratu, a swi ta djula leswaku a tiva hinkwaswu hi wumundzruku byezru. Kambe mhaka leyi a yi kone Bibeleni. I ntiyiso leswaku Xikwembu Nkulukumba a ni wuswikoti bya ku tiva wumundzruku. (Eza 46:10) Kambe Bibele dzri komba leswaku hi dzrini lani a taka yentxa leswo. (Gn 18:20, 21; 22:12) Yene a tizrisa wuswikoti byakwe bya ku tiva wumundzruku na a hlonipha ntsrhunxeko wezru wa ku tihlawulela. A hi swone leswi hi nga swi yimelaka ka Nkulukumba lwa hloniphaka ntsrunxeko wezru wa ku tihlawulela ni lwa dzringaniselaka ka hinkwaswu a swi yentxaka?​—Dt 32:4; 2Ko 3:17.

Kutani, hi nga ma twisisa hi ndlela yini mazritu ya Pawulo lama liki: ‘Xikwembu Nkulukumba. . .lwa nga tiki pfumela leswaku n’wi dzringiwa ku tlula leswi n’wi swi kotaka’? Ka ndzrimana leyi, Pawulo a hlaya leswi Yehovha a swi yentxaka loko hi dzringiwa, ku nga li mahlweni ka ndzringo. Mazritu ya Pawulo ma hi tiyisekisa leswaku, a swi na mhaka leswaku hi kumana ni mindzringo yini, Yehovha nkama hinkwawu a ta hi pfuna loko hi mu dumba. (Ps 55:22) Mazritu lama nyoxisaka ma seketeliwi ka mintxhumu mibidzri leyi nga ntiyiso.

Wa ku sungula, mindzringo hi tlhanganaka na yone yi tolovelekile vhanwini. Leswi swi hlaya leswaku van’wana na vone va kumane ni mindzringo leyi fanaka ni ya hine. Mindzringo leyo swa koteka ku yi tiyiselela, kambe akuva swi koteka hi fanela ku djula mpfuno wa Nkulukumba. (1Pe 5:8, 9) Mahlweninyana ka 1 Ba-le-Korinte 10:13, Pawulo a khanela hi swikazratu leswi va-Israyele va kumaniki naswone a huleni kumbe a mananga. (1Ko 10:6-11) Swikazratu leswiya a swi ta yentxekela mani na mani, nakone va-Israyele a va ta swi kota ku dumbeka. Ku dzringana minkama ya mune, Pawulo a hlaye leswaku ‘van’wana ku vone’ a va yingisetanga. Lexi vavisaka, va-Israyele vambeni va pfumelele ku navela ka ku biha hikusa a va nga ha dumbeli ka mpfuno wa Xikwembu Nkulukumba.

Xa wubidzri, ‘Xikwembu Nkulukumba awa dumbeka’. Ku sukela khale ka khaleni Xikwembu Nkulukumba a kombise lizrandzru dzra ku dumbeka ka ‘lava mu zrandzraka va bekisaka swileleto swakwe’. (Dt 7:9) Matimu wolawo, ma tlhela ma kombisa leswaku minkama hinkwayu leswi a swi dumbisaka swa yentxeka. (Yš 23:14) Hi ndlela yoleyo, loko va kumana ni swikazratu, lava zrandzraka Yehovha ni ku mu yingiseta va nga tiyiseka leswaku a ta hetisisa swidumbiso swibidzri leswi landzrelaka: 1) yene a nge pfumeleli swikazratu swi bindzra la ku ka hi nga swi tiyiseleli, nakone 2) ‘a ta n’wi yentxela. . .a ndlela ya ku huma’ ku wone.

Xana Yehovha a hi nyikisa kuyini ndlela ya ku huma ka mindzringo? I ntiyiso leswaku, hi ku ya hi ku zrandzra ka Yehovha, a nga swi kota ku hi susela mindzringo. Kambe dzrimuka leswi Pawulo a swi hlayiki: ‘[Yehovha] a ta n’wi yentxela, kun’we ni ndzringo, a ndlela ya ku huma ku wone, n’wi ta kota ku wu byatsrha.’ Kutani, makhambi manyingi lawa ‘Yehovha a hi yentxelaka ndlela ya ku huma’ ka ndzringo i ku hi nyika mpfuno lowu hi wu vilelaka akuva hi wu tiyiselela. Vona leswi Yehovha a swi yentxisaka xiswone:

▪ Awa ‘hi miyeta a nhlomulweni wezru hinkwawu.’ (2Ko 1:3, 4) Yehovha a nga zrulisa miyanakanyu, mbilu ni matitwela yezru hi ku tizrisa Zritu dzrakwe, moya wakwe wa ku xwenga ni hi nkongomiso wa Bibele lowu pfaka ka xikazrawa xa ku dumbeka.​—Mt 24:45; Yh 14:16, Ro 15:4.

▪ A nga hi kongomisa hi ku tizrisa moya wakwe wa ku xwenga. (Yh 14:26) Loko hi kumana ni swikazratu, moya wa ku xwenga wu nga hi pfuna ku dzrimuka swikombiso swa Bibele ni misinya ya milawu ya Bibele leyi taka hi pfuna ku yentxa mintxhumu hi wutlhazri.

▪ A nga tizrisa tintsrumi akuva ti hi pfuna.​—Hb 1:14.

▪ A nga tizrisa vamakwezru akuva va hi seketela. Mazritu ni swiyentxo swavu swi nga va ‘vamiyeti’ vezru.​—Kl 4:11.

Kutani, hi ku kandzrakanya, hi nga ma twisisa hi ndlela yini mazritu ya Pawulo ka 1 Ba-le-Korinte 10:13? Yehovha a nga hlawuli mindzringo leyi hi nga kumanaka na yone. Kambe, loko mindzringo yi humelela, hi nga tiyiseka hi leswi: Loko hi dumba Yehovha, a nga ti pfumelela ndzringo ni wun’we wu hi bindzra lakakuva vhanu va nga wu koti ku wu tiyiselela. Nakone nkama hinkwawu a ta hi nyika ntamu wa kuva hi wu tiyiselela. Swi nyonxisa njhani ku tiva leswo!

Djulisisa Tindzralama Ta Moya

Sentinela 01/04/2004 p. 29

Swivutiso Swa Vadondzri

Ha yini 1 Ba-le-Korinte 10:8 yi ku 23.000 wa va-Israyele va file hi siku dzrin’we hi ku yentxa wumbuye na kasi Atinhlayo 25:9 yi vulavula hi 24.000?

Ku ni swivangelo swinyingi leswi nga tlhamuxelaka ku hambana ka tinhlayo ta tindzrimana leti bidzri. Xa ku nabyala xa kone i ku hlaya leswaku a nhlayo ya lava fiki yi kolomu ka 23.000 ni 24.000.

Kambisisa mhaka yin’wana. Mupostola Pawulo a tsrhahe wudzrunguli bya va-Israyele a Sittim swanga xidzrimuxo ka vakriste va le Korinte wa khale, doropa ledzri a dzri tiveka hi mahanyela lamamfani. A tsrale a ku: ‘Kambe hi nga yentxeni wumbuye, swanga hi van’wana ku vone va nga yentxa wumbuye; ka ti, hi siku dzrin’we, ku wa makume mabidzri na mazrazru ya makume ya madzana.’ Ku hlayiwa lava dlayiwiki ha Yehovha hi ku kongoma, hi kuva va yentxe wumbuye, Pawulo a hlaye 23.000 wa vone.​—1 Ba-le Korinte 10:8.

Atinhlayo dzrima 25, yi li ‘va-Israyele va tlhangana na Baal-Peor; a mahlundzru ya Yehovha ma pfuzrela Israyele’. Ntsrhaku Yehovha a lelete Moxe leswaku a dlaya ‘tihosana hinkwatu ta tiko’. Kutani Moxe, a zrume vatsremi leswaku va yingiseta nawu lowo. Hi wugamu, loko Feniyasi hi ku hangwesa a dlaya mu-Israyele lwa buyisiki wansati wa mu-Midiam a tendeni, a ‘ntungu wu hahateliwa’. A wudzrunguli byi hetelela hi ku hlaya leswi: ‘Lava nga fa hi ntungu afa ve madzana mabidzri ya madzana na mune wa makume ya madzana.’​—Atinhlayo 25:1-9.

A ntsrengo lowu nyikeliwaka ka buku dzra Atinhlayo swi le livaleni leswaku wu patsra ‘tihosana ta tiko’ leti dlayiwiki hi vatsremi, ni lava dlayiwiki ha Yehovha hi ku kongoma. Swi nga ha yentxeka tihosana leti dlayiwiki hi vatsremi ti dzringana khume dzra madzana, kutani swi yandzrisa nhlayu ku ya ka 24.000. Ku nga ha va tihosana kumbe vazrangeli lava yentxiki wumbuye, ku hlengemela ka nkhuvu na va swi tiva kumbe im-him, a va ni nandzru hikuva a va ‘tlhangane na Baal-Peor’.

Mayelanu ni zritu ‘tlhangana’, xitlamuxela mazritu xin’wana xi hlaya leswaku dzri nga ha tlhamuxela ku ‘namazrela mhunu wa kukazri’. A va-Israyele a va tinyiketelile ka Yehovha, kambe loko va ‘titlhanganise na Baal-Peor’, va tsrike ku tinyiketela kwavu ka Xikwembu Nkulukumba. Ntsrhaku ka 700 wa malembe, Yehovha hi ku tizrisa muprofeta Hošea a hlaye leswi mayelanu ni va-Israyele: ‘Kasi vone va ye a Baal-Peor, va tihlawule ku leswa tingana, va va va ndzruluka likasi swanga hi mbuye yavu.’ (Hošea 9:10) Hinkwavu lava yentxiki leswi va faneliwi hi yavanyiso ledzrikulu dzra Xikwembu Nkulukumba. Kutani Moxe a dzrimuxa vana va Israyele a ku: ‘A mahlu yenu ma vonile leswi Yehovha a yentxiki swone hi nkonta ya Baal-Peor; hikusa hinkwavu lava landzriki Baal-Peor, Yehovha, Xikwembu Nkulukumba waku, a va helisile a makazri kwenu.’​—Deuteronoma 4:3.

Sentinela 15/02/2015 p. 30

Swivutiso Swa Vadondzri

Xana makwezru waxisati a fanela ku tsrimba ntuzru kumbe ku yambala xilembe loko a fambisa xidondzro xa Bibele na a ni makwezru waxinuna?

▪ Ka ‘Swivutiso Swa Vadondzri’ ka Sentinela 15 ka Julhu wa 2002, ku hlayiwe leswaku makwezru waxisati a fanela ku tsrimba ntuzru kumbe ku yambala xilembe loko a fambisa xidondzro na ku ni makwezru waxinuna, a swi na mhaka kumbe a babatisiwile kumbe im-him. Ntsrhaku ka ku kambisisa mhaka leyi ha hombe, ku voniwe leswaku a ku fanela ku va ni ku txintxa a mhakeni leyi.

Makwezru waxisati lwa fambisaka xidondzro xa Bibele lexi khinyelaka, loko a li ni makwezru waxinuna a fanela ku tsrimba ntuzru kumbe ku yambala xilembe. Loko a yentxa leswo, a ta kombisa xihluwa ka lulamiselo dzra wunhloko a bandleni, lebyi bekiwiki ha Yehovha. A fanela ku tsrimba ntuzru kumbe ku yambala xilembe hikusa a yentxa ntizro lowu hi ntolovelo a wu ta yentxiwa hi makwezru waxinuna. (1Ko 11:5, 6, 10) Ndlela yin’wana i ku kombela makwezru waxinuna lweyi u nga na yene leswaku a fambisa xidondzro, loko a faneleka kumbe loko a lulamile ku yentxa leswo.

Hi tlhelo dzrin’wana, loko makwezru waxisati a fambisa xidondzro xa Bibele na a ni muzrezri wa xinuna lwa kalaka a nga babatisiwanga na a nga li nuna wakwe, a swi sindzrisi ku tsrimba ntuzru kumbe ku yambala xilembe. Nambitasu, a lipfalu dzra vamakwezru van’wana dzri va susumetela ku tsrimba ntuzru kumbe ku yambala xilembe nambi ka swiyimu leswo.

22-28 KA ABRILI

WUKOSI BYI NGA BIBELENI | 1 BA-LE-KORINTE 14-16

Sentinela 01/07/1998 p. 21 § 10

‘A Ku Fa Ku Ta Helisiwa A Vugan’wini’

A ‘wugamu’ i ku hela ka Mfumu wa Kriste wa khume dzra madzana ya malembe, loko Yesu, hi ku titsrongahata ni ku dumbeka, a ta nyikela Mfumu ka Xikwembu Nkulukumba ni Tatana wakwe. (Apfuletelo 20:4) A nkongometo wa Xikwembu Nkulukumba wa ku ‘tlhanganisa hinkwaswu, a swa le matilweni ni swa le misaveni, ku Kriste’ wu ta va wu hetisekile. (Ba-le-Efesa 1:9, 10) Xileswo, ku sungula, Kriste a ta va a helise ‘tihosi ta misava ni mabutsrhu ya tone’ leti lwaka ni ku zrandzra ka Xikwembu Nkulukumba. Leswo a swo hlaya ku helisiwa hi Armagedoni ntsena. (Apfuletelo 16:16; 19:11-21) Pawulo a te: ‘Hikusa swi fanela leswaku [Kriste] a fuma, a ku a beka valala hinkwavu a hansi ka milenge yakwe. Nala lwe a taka helisiwa a wugan’wini, hi ku fa.’ (1 Ba-le-Korinte 15:25, 26) Ina, mintsrhosi hinkwayu yi vangiwiki hi xidoho xa Adamu ni lifu swi ta va swi susiwile. Hi ku helela, Xikwembu Nkulukumba a ta va a helise ‘masizra’ hi ku pfuxa hinkwavu lava fiki.

Reino de Deus p. 237 § 21

A Mfumu Wu Ta Yentxa Ku Zrandzra Ka Xikwembu Nkulukumba La Misaveni

Kambe hi nga kuyini hi lifu​—ku nga ntxhumu lowu vangiwaka hi mavabyi, lama tisiwiki hi xidoho? Lifu i ‘nala lweyi a taka helisiwa a wugan’wini’, nala lweyi ku hlwela ni ku kahlula a taka hlasela vhanu hinkwavu lava ku kala ku hetiseka. (1Ko 15:26) Kambe xana lifu i nala lwa txhavisaka ka Yehovha? Vona leswi Ezaya a swi hlayiki: ‘A suvisa lifu hilaha ku nga helikiki; Hosi, Yehovha a ta hlangula minyembeti a wusweni bya hinkwavu.’ (Eza 25:8) Xana wa yanakanya leswi nkama lowo wu taka va xiswone? A misava yi nga ha li na swilahlo, mintimu nambi mi minyembeti! Ku hambana ni leswo​—ku ta va ni minyembeti ya ku nyonxa loko Yehovha a hetisisa xidumbiso xakwe xa ku hlamalisa xa ku pfuxa vafi! (Dondzra Ezaya 26:19.) Hi wugamu, swilondzra hinkwaswu swi vangiwiki hi lifu swi tava swi dahiwile.

Sentinela 15/09/2012 p. 12 § 17

Ku Zrula Ku Dzringana Khume Dzra Madzana Ya Malembe​—Ni Ku Tlula

A ku na ntlhamuxelo wa ku yampswa wa siku ledzrikulu ku tlula lowu: ‘Xikwembu Nkulukumba a va hinkwaswu ku hinkwavu.’ Swi hlaya yini leswo? Yanakanya hi nkama lowu a xizrambeni xa Edeni, loko vhanu lava hetisekiki, Adamu na Evha, a va li xiyenge xa ndangu wa ku zrula wa Yehovha. Yehovha, lwa Tlakukiki a Wuyakweni hinkwabyu, a a fuma swivumbiwa hinkwaswu hi ku kongoma, tintsrumi ni vhanu. A va ni ndjombo ya ku bula na yene, va mu gandzrela ni ku tovokisiwa ha yene. A a li ‘hinkwaswu ku hinkwavu’.

Djulisisa Tindzralama Ta Moya

Sentinela 01/09/2012 p. 9, bokisi

Xana Mupostola Pawulo A Tsrimbise Vavasati Ku Khanela?

Mupostola Pawulo a tsrale a ku: ‘A vavasati venu a va miyele tinhlengeletan’wini’. (1 Ba-le-Korinte 14:34) A a djula ku hlaya yini? Xana a o tsrongahata wutivi byavu? Im-him. Ku hlaya ntiyiso, hakanyingi a a vulavula hi kuva vavasati va dondzrisa. (2 Timoteo 1:5; Tito 2:3-5) Ka papela ledzri dzra va le Korinte, Pawulo a tsratsriye ku nga li ntsena vavasati, kambe ku hinkwavu a bandleni lava a va ni nyiko ya ku vulavula hi tindzrimi ni ku profeta akuva va ‘miyela’ loko mukriste mun’wana a khanela. (1 Ba-le-Korinte 14:26-30, 33) Swi nga yentxeka leswaku vakriste vambeni vaxisati a va nyonxe ngopfu hi kola ka lipfumelo dzravu ledzrimpswha lakakuva a va pfa va yimisa xikaneli akuva va hamba swivutiso. Leswaku ku tingawuliwa mpfilumpfilu leyo, Pawulo a va kutxe leswaku ‘va vutisa vanuna vavu a kaya’.​—1 Ba-le-Korinte 14:35.

Perspicaz vol.2 pp. 392-393

Mizri lowu nga bolikiki

Kun’we na Yesu a ku pfukeni kwakwe, va-da-pfindla na yene na vone va pfuxiwa, ku nga li ka wutomi lebyi nga helikiki swanga swivumbiwa swa moya ntsena, kambe ka ku kala va nga ha fi ni ku yamukela mizri lowu nga bolikiki. Swanga hi leswi va hanyiki, va tizreliki hi ku dumbeka va tlhela va fa hi mimizri ya nyama ya ku bola, swoswi va yamukela mimizri ya moya leyi nga bolikiki, swanga hi lani Pawulo a swi bekiki a livaleni ha kone ka buku dzra 1 Ba-le-Korinte 15:42-54. Hi kola ka leswo, mizri lowu nga fikiki, i dzrin’wana dzra matsrhamela lawa va ma yamukelaka, tsrhamela ledzri kalaka dzri nga heli nakone dzri nga honekikiki, hikusa mizri lowu nga bolikiki wu yelana ni mizri lowu Xikwembu Nkulukumba a va nyikaka wone, lowu ‘nga bolikiki mfuzri wu nga honekiki’. Hi kolanu swi tikomba i ngiki Xikwembu Nkulukumba a va nyike wuswikoti bya ku tipfuxeta, va nga vileli ntamu wun’wana, swanga hi lowu vileliwaka hi swivumbiwa swin’wana swa nyama ni swa moya. Lebyo i wumboni bya leswaku Xikwembu Nkulukumba wa va dumba. Ku va va nga vileli ntamu wolowo ni ku nga boli a swi va ntsrhunxi ku kongomisiwa hi Xikwembu Nkulukumba, vone ku fana ni muzrangeli wavu Yesu Kriste, va ya mahlweni va tibeka hansi ka ku zrandzra ka Tatana wavu ni le ka milawu yakwe.​—1Ko 15:23-28; vona Imortalidade; Alma.

29 KA ABRILI–5 KA MAYU

WUKOSI BYI NGA BIBELENI | 2 BA-LE-KORINTE 1-3

Sentinela 07/17 p. 13 § 4

‘Dzrilani Kun’we Ni Lava Dzrilaka’

Tatana wezru wa lilondzro na yene a same a luzekeliwa hi vhanu lava a va zrandzraka, va ku fana na Abrahamu, Isaki, Yakobe, Moxe na Hosi Davida. (Tin 12:6-8; Mt 22:31, 32; Min 13:22) Zritu dzra Xikwembu Nkulukumba dzri hi byela leswaku a ni ku xuva ka nkama lowu a taka tlhelisela a wuton’wini malandzra yakwe ya ku dumbeka. (Yob 14:14, 15) A navela ku ma vona na ma nyonxile swinene ma tlhela ma hanya wutomi bya ku pfumala mavabyi. Yanakanya hi n’wanakwe lwa mu zrandzraka ngopfu swinene​—lweyi ‘afa a mu tsrhavisa nkama hinkwawu’—​a fiki lifu dzra ku vavisa. (Pr 8:22, 30) A ku na mazritu lawa ma nga tlhamuxelaka ku vavisa loku Yehovha a ku twiki.​—Yh 5:20; 10:17.

Sentinela 07/17 p. 15 § 14

‘Dzrilani Kun’we Ni Lava Dzrilaka’

Swa twala ku hlaya leswaku a swi nabyali ku tiva mazritu u nga ma byelaka mhunu lwa feliwiki. Kambe Bibele dzri li: ‘mazritu ya lava ku tlhazriha i wutomi’. (Pr 12:18) Vanyingi va kume mazritu lama mbuwetelaka ya ku byela lava feliwiki ka xibukwana lexi liki Quando Morre Alguém Que Amamos. Minkama ya ku tala, mpfuno wukulu hi nga wu nyikelaka i ku ‘dzrila ni lava dzrilaka’. (Ro 12:15) Gaby lwa feliwiki hi nuna wakwe a li: ‘a minyembeti yi ndzruluke lidzrimi dzra mbilu yanga. Loko vanghanu vanga va dzrila na mine ni titwa na ni mbuweteleka. Ni titwa ni nge wuswanga’.

Djulisisa Tindzralama Ta Moya

Sentinela 04/16 p. 32

Swivutiso Swa Vadondzri

I yini ‘xizrangana’ ni ku ‘fungiwa’ loku mukriste lwa totiwiki a ku yamukelaka ka Xikwembu Nkulukumba?​—2Ko 1:21, 22

▪ Xizrangana: Hi ku ya hi buku dzrin’wana, zritu dzra Xigriki ledzri ndzruluteliwiki dzri va ‘xizrangana’ ka 2 Ba-le-Korinte 1:22 dzri fana ni mazritu lama tizrisiwaka hi lava va tizrelaka “timhaka ta nawu ni vamabindzru” ku tlhamuxela “ntxhumu lowu tiyisekisaka leswaku mali, kumbe xikweneti xi ta hakeliwa kumbe leswaku ntxhumu wolowo wu yentxa ntwananu wu tizra”. A mhakeni ya lava totiwiki, a hakelo dzravu ledzri heleliki dzri tlhamuxeliwa ka 2 Ba-le-Korinte 5:1-5 dzri patsra kuva va nyikiwa mizri lowu nga fikiki.​—1Ko 15:48-54.

Ka Xigriki xa swoswi, zritu dzra ku fana ni ‘xizrangana’ dzri tizrisiwa ku hlaya xitlan’wana xa ku buta. Ku yelana loku ku fanela swinene, hikusa lava totiwiki va ta va mutekiwa wa Kriste wa ku fananisa.​—2Ko 11:2; Mpf 21:2, 9.

▪ Fungiwa: A khale a ku funga a ku tizrisiwa swanga xitiyiso xa leswaku mhunu a a ni mfanelo ya ku va ni ntxhumu wa kukazri, ku kombekisa leswaku wa faneleka kumbe wa leswaku ntwananu wa kukazri wu yentxiwile. Ka vatotiwa, va ‘fungiwa’ hi moya wa ku xwenga wa Xikwembu Nkulukumba swanga vakwe. (Ef 1:13, 14) Kambe ku fungiwa loku a hi loku nga helikiki, kambe ku va loku heleliki loko mhunu a fa na a dumbekile ka Xikwembu Nkulukumba kumbe nkamanyana na ku nge si na sungula nhlomulo lowukulu.​—Ef 4:30; Mpf 7:2-4.

Sentinela 01/08/2010 p. 23

A WU SWI TIVA?

Xana mupostola Pawulo a a yanakanya yini loko a ku ‘ku hluleni’?

▪ Pawulo a tsrale a ku: ‘Xikwembu Nkulukumba, lwa hi fambisaka ku hluleni ha Kriste hi minkama hinkwayu, lwa twalisaka ha hine a ku nunhwela ka ku tiva kwakwe amimbangwini hinkwayu! Hikuva hine, ku Xikwembu Nkulukumba, hi ku nunhwela loku nandzrikaka ka Kriste, a makazri ka lava hulukaka ni le ku lava suvaka; ku lavo, hi ku nunhwela ka ku fa, ku va ku fa; ku lava hi nunhwelaka wutomi, byi va wutomi.’​—2 Ba-le-Korinte 2:14-16.

Mupostola Pawulo a a khanela hi swihena leswi va-Roma a va swi yentxa akuva va kulungela ndzruna leyikulu ya masotxha hi ku hlula valala va tiko. Ka swiyentxakalu leswo, a swib’otxhwa a swi humexiwa ka xitsrhungu, ni tihomu a ti humexiwa leswaku ti ya tlhaveliwa na ndzruna leyikulu ya masotxha kun’we ni khandzra dzra yone va li kazri va dzrumisiwa. Loko swi helile, a tihomu a ti dlayiwa nakone swi nga ha yentxeka leswaku swib’otxhwa swin’wana na swone a swi dlayiwa.

Zritu ‘ku nun’hwela loku nandzrikaka ka Kriste’ leswi hlayaka wutomi ni lifu ka van’wana, ‘swi nga ha yentxeka dzri seketeliwe ka swihena swa va-Roma swa ku hisa mimizri ya ku nun’hwela hi nkama lowu wa ku hlula’, hi ku ya hi Enciclopédia Biblica Padrão Internacional. “A nun’hwelo, lowu hlayaka ku hlula, a wu dzrimuxa ku dlayiwa loku swib’otxhwa swi nga ku yimelaka.”