Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru
7-13 KA DEZEMBRU
WUKOSI BYI NGA BIBELENI | LEVITIKA 10-11
“Lizrandzru Dzrezru Ha Yehovha Dzri Fanela Ku Va Ledzri Tiyiki Ku Tlula Dzra Maxaka”
Perspicaz vol-2 p. 371 § 3
Leswi Ngeke Nawini
Ndzrilo Ni Magandzrelo Lama Ngeke Nawini. Ka Levitika 10:2, a zritu dzra Xiheberu ledzri liki zar (za·rahʹ; hi ku kongoma i ntxhumu lowu kalaka wu nga tolovelekanga) dzri tizriseliwa ku tlhamuxela ndzrilo ‘lowu ngeke nawini lowu Xikwembu Nkulukumba a a nga va leletanga wone’ kambe Nadabi na Abihu, vana va Aroni va wu nyikelile ka Yehovha, leswi yentxiki leswaku Yehovha a va helisa hi ndzrilo. (Lv 10:2; Tin 3:4; 26:61) Xileswo, Yehovha a vulavule na Aroni a ku: ‘U nga nwi vhinyu ni swa ku nwa leswa ntamu, wene, ni vana vaku, loko n’wi nhingena tendeni dzra nhlengeletanu, n’wi nge ti fa; a xi ve xiyimiso lexa ku ka xi nga heli a tinxakeni tenu: akuva n’wi tsravukanisa leswa ku hlawuleka ni swa vhanu, leswa ku ka swi nga basanga ni swa ku basa; ni ku va n’wi dondzrisa vana va Israyele a swiyimu hinkwaswu leswi Yehovha a vulavulaliki navu swone ha Moxe.’ (Lv 10:8-11) Swi tikomba na Nadabi na Abihu a va popswile, leswi yentxeki va nyikela ndzrilo lowu a va nga fanelanga va wu nyikela. Swi nga ha yentxeka ndzrilo lowo a wu nge nawini hi ku ya hi swiyimu, mbangu kumbe manyikelela ya kone kumbexana ku ve muzri wa lisuna lowu hambaniki ni lowu a va leletiwe wone hi ku ya hi buku dzra Eksoda 30:34, 35. Xiyimu lexi a va li ka xone xa ku popswa, a xi yentxanga leswaku va nga kumi nandzru wa xidoho.
Sentinela 15/07/2011 pp. 31-32 § 16
Xana U Nhingenile A Ku Wiseni Ka Xikwembu Nkulukumba?
Aroni, makwavu wa Moxe, a a li ka xiyimu xa ku kazrata hi kola ka van’we va vanakwe, Nadabi na Abihu. Pimisa hi leswi a titwisiki xiswone loko a vona vanakwe va hamba gandzrelo ledzri a dzri nga yamukeleki ka Yehovha, kutani Yehovha a va dlaya. A swi nga ha ti koteka kuva Aroni a khanela na vone. Kambe ku humelele swin’wana. Yehovha a byele Aroni ni vanakwe lavan’wana va ku dumbeka a ku: ‘N’wi nga fukumuleni tinhloko tenu, nambi ka ku va ku handzrula minkhantxhu yenu [hikola ka gome]; nwi nge ti fa, a mahlundzru yakwe [Yehovha] ma nge ti wela nhlengeletanu hinkwayu.’ (Lv 10:1-6) Lani hi kuma dondzro leyi ye ke dla a livaleni. Lizrandzru dzrezru ha Yehovha dzri fanela ku va dzrikulu swinene ku tlula lizrandzru ledzri hi nga nadzru hi maxaka yezru lama nga dumbekikiki ka Yehovha.
Djulisisa Tindzralama Ta Moya
Sentinela 15/11/2014 p. 17 § 18
Hi Fanela Ku Xwenga Mahanyelweni Yezru Hinkwawu
Akuva hi va lava xwengiki, hi fanela ku kambisisa ha hombe leswi Matsralwa ma swi hlayaka kutani hi yentxa leswi Xikwembu Nkulukumba a swi yimeliki ka hine. Yanakanya hi Nadabi na Abihu vana va Aroni, lava dlayiwiki hi kola ka ku hisa gandzrelo ‘hi ndzrilo lowa ku ka a nga va leletanga wone,’ kumbexana na va popswile. (Lv 10:1, 2) Xiya leswi Xikwembu Nkulukumba a swi byeliki Aroni. (Dondzra Levitika 10:8-11.) Xana tindzrimana leti ti hlaya leswaku a hi fanelanga ku nwa byala loko hi nga si ya mintlhanganwini ya wukriste? Yanakanya hi tinhla leti: A hi le hansi ka Nawu. (Ro 10:4) Matikweni man’wana, vapfumelikulozri va nwa byala hi ku dzringanisela loko va li ku deni na va nga si ya mintlhanganwini. Hi nkama wa Paska ku tizrisiwe 4 wa swinwelo swa vhinyu. Loko Yesu a simeka Xidzrimuxo, a nyike vapostola vakwe vhinyu akuva va nwa. Vhinyu ledzri a dzri yimela ngati yakwe. (Mt 26:27) Bibele dzri sola ku nwa ku tlula mpimu ni ku popswa. (1Ko 6:10; 1 Tm 3:8) Lipfalu dzra vakriste vanyingi dzri va byela ku ka va nga nwi byala ni byitsrongo na va nga si hamba ntizro wun’wana ni wun’wana wa ku xwenga. Nambitanu, swiyimu swa hambana hi ku ya hi matiko, nakone xa lisima hi leswaku vakriste va swi kota ku ‘hambanisa ntxhumu wa ku xwenga ka lowu nyamiki,’ akuva va ta tsrhama na va xwengile nakone va nyonxisa Xikwembu Nkulukumba.
Perspicaz vol-1 p. 135 § 4
Swihazri
Ku yilisiwa ku da swakuda swa kukazri a ko tizra ntsena ka lava a va li hansi ka Nawu wa Moxe, hikusa Levitika 11:8 yi li: ‘Swi na ni ntima ku n’wine’, leswi liki, ka va-Israyele. A Nawu lowo, wu helisiwile hi kola ka lifu dzra gandzrelo dzra Yesu Kriste, kutani vhanu a va ntsrhunxekile. Nakone vhanu hinkwavu a va ta tivona na va li hansi ka lulamiselo ledzri nyikiwiki Nowa ntsrhaku ka Ndhambhi.—Kl 2:13-17; Gn 9:3,4
14-20 KA DEZEMBRU
WUKOSI BYI NGA BIBELENI | LEVITIKA 12-13
“Hi Nga Dondzra Yini Ka Milawu Leyi A Yi Nyikiwa Lava Nhlokonho?”
Sentinela para o Público No 12018 p. 7
Xana Wu Khaluteliwe Hi Nkama Kumbe Wa Ha Pfuna Ni Namunhla?
• Ku tsravuxa vhanu lava vabyaka ka van’wana.
Nawu lowu Xikwembu Nkulukumba a wu nyikiki Moxe a wu hlaya leswaku lava nga ni nhlokonho a va fanela ku tsrhama kule ni lavan’wana. Kambe, hi kola ka ku va ku ve ni mintungu yinyingi vadotori va dondzre ku tizrisa nawu lowu ntsrhaku ka malembe manyingi na wu tsraliwile Bibeleni, nakone va ha pfumela leswaku nawu lowu wa ha tizra ni namunhla.—Levitika tindzrima 13 ni 14.
Sentinela para o Público No 42016 p. 9 § 1
A Wu Swi Tiva?
Va-Yuda va khale a va txhava wuvabyi bya nhlokonho lebyi a byi tolovelekile a minkameni yavu. Mavabyi lawo ya ku txhavisa a ma hlasela minsiha ya mhunu kutani ma mu siya na a limalile. Mavabyi lawo a ma nga daheki. Hi kola ka leswo, lava nga ni nhlokonho a va tsravukanisiwa ni vhanu van’wana lava ngeke na wone nakone a va sindzriseka ku byela van’wana hi ta mavabyi yavu.—Levitika 13:45, 46.
Perspicaz vol-2 p. 690 § 10
Nhlokonho
Ka mpahla ni ka tiyindlu. Nhlokonho a yi tlulela mpahla leyi hambiwiki hi linyu kumbe ntxhumu lowu hambiwiki hi xikhumba. Ntungu lowu swi nga yentxeka a wu ta hela hi ku hlampswa mintxhumu yoleyo, nakone a ku ni malulamiselo ya ku yi beka kule mintxhumu yoleyo. Kambe loko ntungu lowu wa lihlaza kumbe wa libungu a wa ha tama wu va kone, nhlokonho a yi humelela, nakone ntxhumu lowu nga ni ntungu lowo a wu fanela ku hisiwa. (Lv 13:47-59) Loko ka khumbi dzra yindlu ku voneka swikhele swa lihlaza kumbe swa libungu, a muprista a a fanela ku pfala yindlu leyo ku nga nhingeni mhunu. Loko swi sindzrisa a ku fanela ku susiwa mazribye lama kumiwiki hi ntungu ni ku khwaya ndzreni ka yindlu. Mazribye ni mbompfi lowa ku bama ni leswi khwayiwiki a swi fanela ku txukumetiwa mbangwini lowu nyamiki a handle ka doropa. Loko ntungu wu tlhela wu humelela ndlwini, yindlu leyo a yi tekiwa na yi nyamile nakone a yi mbundzrumuxiwa. Leswi tizrisiwiki ku yaka yindlu leyo a swi txukumetiwa mbangwini lowu nga basangakiki. Kambe loko yindlu leyo yi kumeka na yi nge he na ntungu, a ku ni malulamiselo ya ku wu basisa. (Lv 14:33-57) Ku hlayiwa leswaku nhlokonho leyi a yi tlulela mpahla ni tiyindlu a a li muxaka wa kukazri wa nkuzre, nambitasu a ku na lexi tiyisaka mhaka leyo.
Djulisisa Tindzralama Ta Moya
Sentinela 15/05/2004 p. 23 § 2
Nkatsrakanyu Wa Buku Dzra Levitika
12:2, 5—Ha yini ku pswala n’wana a swi yentxa wansati a va ni “ntima” kumbe a nyamile? Swizro swa mbeleko swi hambeliwe ku humexa wutomi bya mhunu lwa hetisekiki. Nambitanu, hi mhaka ya xidoho lexi hi xi kumiki swanga pfindla, n’wana a pswaliwa na a nga hetisekanga nakone a tlhela a va ni xidoho. Nkamanyana lowu wa ku goma wa ‘ku nyama’ lowu a wu fambisana ni ku pswala n’wana, ku va wansati a va ka masiku yakwe ni ku humexa mbewu ya xinuna, a wu yentxa ku va hinkwavu va dzrimuka xidoho lexi va xi kumiki. (Levitika 15:16-24; Amapsalma 51:5; Ba-le-Roma 5:12) Milawu ya ku tibasisa loku a ku vileleka, a yi ta pfuna va-Israyele akuva va swi vona leswaku va vilela xitizrulo, lexi a xi ta helisa xidoho ka vhanu xi va yentxa va tlhela va hetiseka. Hi mhaka ya leswo, Nawu wu ve ‘mudondzrisi [wavu] ku va yisa ka Kriste’.—Ba-le-Galatia 3:24.
Sentinela para o Público No 12018 p. 7
Xana Wu Khaluteliwe Hi Nkama Kumbe Wa Ha Pfuna Ni Namunhla?
• Nkama wa ku soka.
Nawu wa Xikwembu Nkulukumba a wu hlaya leswaku n’wana wa djaha a a fanela ku sokisiwa hi siku dzra wu 8. (Levitika 12:3) Ka swivanana leswa ha ka ku pswaliwa, ku twisisiwa leswaku ntsrhaku ka 7 wa masiku a ngati ya swi kota ku hatla yi nyima loko swe tivavisa. A minkameni ya ku tsraliwa ka Bibele, lani a timhaka ta wudahu a ti nge si na hluvuka, a ku sokisa n’wana hi siku dzra wu 8 a a li wutlhazri.
21-27 KA DEZEMBRU
WUKOSI BYI NGA BIBELENI | LEVITIKA 14-15
“Wugandzreli Bya Ku Xwenga Byi Djula Vhanu Lava Basiki”
Perspicaz vol-1 p. 305 § 5
Ku hlamba
Va-Israyele a va ni swivangelo swinyingi swa ku va va tibasisa hi ku landzra xihena lexi a xi li kone. Swiyimu leswi landzrelaka swi kombisa leswi a swi yentxa mhunu a va ni “ntima” kumbe a nga basanga: Lweyi a hanyiki ka mavabyi yakwe ya nhlokonho, lweyi a a khumba mintxhumu leyi khumbiwiki hi mhunu lwa nga ni ‘tsrhundzrwana’, wanuna lweyi a a humexa mbewu yakwe ya xinuna, wansati lweyi a ha ka ku vona masiku yakwe kumbe a huma ngati ni lweyi a a famba tinkuku, kutani lava a va kumeka ka swiyimu leswi a va fanela ku tibasisa. (Lv 14:8, 9; 15:4-27) Loko mhunu a nhingena tendeni ledzri nga ni ntsrumbu kumbe a wu khumba, a a va ni “ntima” nakone a a fanela ku basisiwa hi mati ya wubasisi. Lweyi a a nga landzri xileleto lexo, a a fanela ku hlongoliwa a makazri ka nhlengeletanu hikusa a nyamisi wuhlawuleko bya Yehovha’. (Tin 19:20) Nakunene, a ku hlamba loko, ku tizrisiwa hi ndlela ya ku fanekisela akuva ku kombisa xiyimu xa ku basa a mahlweni ka Yehovha. (Ps 26:6; 73:13; Eza 1:16; Ez 16:9) Ku hlamba hi zritu dzra ntiyiso dzra Yehovha, ledzri fanekiseliwaka hi mati, swi ni ntamu wa ku basisa.—Ef 5:26.
Perspicaz vol-2 p. 805 § 5
Masiku ya wansati
Wansati a a voniwa na a nga basanga hi nkama lowu a huma ngati, kumbe a huma ngati hi ‘masiku manyingi handle ka nkama wakwe wa wheti’, hikusa a nyamisa mintxhumu leyi a a yi tsrhamela kumbe ku yetlela ka yone ku patsra ni vhanu lava a va khumba mintxhumu yoleyo. Loko a yima ku huma ngati, a ku ta nkontiwa 7 wa masiku, kutani ntsrhaku ka wone a ta va a basile. Hi siku dzra wu 8, wansati lweyo a a teka swivambalana swibidzri kumbe mapfinyana mabidzri ya matuva a ma yisa ka muprista akuva a hamba magandzrelo ka Yehovha, gandzrelo dzra dzrivalelo ni gandzrelo dzra ku hisiwa.—Lv 15:19-30, Bibele Dra Kuxwenga; veja LIMPO, LIMPEZA.
Perspicaz vol-2 p. 724 § 9
Mbangu Wa Ku Xwenga
Tende dzra nhlengeletanu ledzri ntsrhaku dzri viki Tempele. Swiyenge hinkwaswu, ku patsra ni pangu dzra tabernakele ni pangu dzra tempele, a a li mbangu wa ku xwenga. (Eks 38:24; 2Mk 29:5; Min 21:28) Mintxhumu leyi a yi tsrhama pangwini a a li aletari dzra switlhavelo ni basiya dzra nsuku. Mintxhumu leyi a yi xwengile. A ko va ntsena lava a va basile hi ku ya hi nawu a va ta nhingena nkama wini ni wini ka pangu dzra tabernakele. Hi ndlela leyi fanaka, ka pangu dzra tempele a ku nga nhingeni mhunu lweyi a a nga basanga. Hi xikombiso, wansati lwa nyamiki, a a nga fanelanga a khumba ntxhumu lexi xwengiki nambi ku nhingena a mbangwini wa ku xwenga. (Lv 12:2-4) Swi le livaleni leswaku va-Israyele a va ntxhimisa tabernakele loko va tsrhama na va nga basanga. (Lv 15:31) Lava a va nyikela magandzrelo akuva va basisiwa ka nhlokonho, a va tisa switlhavelo swavu kambe a va swi siya a nyangweni dzra pangu dzra tabernakele. (Lv 14:11) Mun’wana ni mun’wana lweyi a a hlengemela ka mhamba ya ku zrula na a nga basanga a tabernakeleni kumbe a tempeleni, a a ta dlayiwa.—Lv 7:20, 21.
Djulisisa Tindzralama Ta Moya
Perspicaz vol-3 p. 149 § 11
Ndleve
A ku simekiweni ka wuprista a Israyele, Moxe a leletiwe ku teka ngati ya hambana a yi tota wugan’wini bya ndleve ya xinene, nenge wa xinene ni voko dzra xinene swa Aroni, a tlhela a yentxa hi la ku fanaka ni le ka vana va Aroni. Leswo a swi kombisa leswaku hinkwaswu leswi a va ta swi twa, leswi a va ta swi yentxa ni ndlela leyi a va ta famba ha yone a swi fanela ku yelana ni leswi a swi yentxeka kolanu. (Lv 8:22-24) Hi lani ku fanaka, loko ku basisiwa lwe wa nhlokonho, a Nawu a wu hlaya leswaku a muprista a fanela ku teka ngati ya hambana ya ku dzriha nadzru ni mafuzra, a tota wugan’wini bya ndleve ya lwe wa nhlokonho. (Le 14:14, 17, 25, 28) Xiyentxo xa ku dja ku fana ni lexi hi nga xi vona ka lulamiselo ledzri a dzri yentxiwa ka mhunu lwe a a navela ku tama a va xikazrawa ku dzringana nkama wa ku leha. Ka xiyimu lexo, a xikazrawa a xi yisiwa a mhandzrini ya xipfalu kutani n’winyi wa xone a xi tsrunya ndleve hi lisungunu. Xiyentxo lexo, lexi a xi yentxiwa ka xizro xa ku yingela a xi komba leswaku xikazrawa xi tiyimisele ku tama xi yingiseta n’winyi wa xone.—Eks 21:5, 6.
Despertai! 1/2006 p. 14, bokisi
Nkuzre—I Munghanu Tlhelo I Nala!
XANA BIBELE DZRA VULAVULA HI NKUZRE?
Bibele dzri vulavula hi ‘ntungu wa nhlokonho a ndlwini,’ leswi hlayaka leswaku ka yindlu hi ntshima. (Levitika 14:34-48) Ku pimisiwa leswaku mavabyi lawa, lawa mfuzri ma vitaniwaka ‘nhlokonho leyi dlayaka,’ a a li nkuzre wa kukazri, kambe a hi tiyiseki ha swone. Swi nge na mhaka leswaku a a li yini, Nawu wa Xikwembu Nkulukumba a wu hlaya leswaku a vinyi va tiyindlu a va fanela ku susa mazribye lawa a ma kumiwile hi ntungu lowo a ndlwini. Nakone a va fanela ku khwaya yindlu hinkwayu a ndzreni ka yone va humesa hinkwaswu leswi swi nyamiki, va ya swi txukumeta ‘a mbangwini lowu nga ni ntima’ kumbe wu kalaka wu nga basanga. Loko mavabyi lawa ma nghena, yindlu hinkwayu a yi tekiwa yi nyamile, a yi hahluliwa, yi ya txukumetiwa. Hinkwaswu leswi, a swi kombisa leswaku Yehovha a ni lizrandzru ledzrikulu hi vhanu vakwe ni leswaku a djula ku va va tsrhama na ve vatomi.
28 KA DEZEMBRU–3 KA JANERU
WUKOSI BYI NGA BIBELENI | LEVITIKA 16-17
“Hi Nga Dondzra Yini Ka Siku Dzra Ku Dzrivaleliwa?”
Xihondzro Xa Ku Zrindzra 11/2019 p. 21 § 4
Tindondzro Leti Hi Pfunekaka Ha Tone A Bukwini Dzra Levitika
Dondzra Levitika 16:12, 13. Yanakanya hi leswi a swi humelela hi Siku dzra Dzrivaleliwo: Muprista lwenkulu a a nhingena a tendeni dzra nhlengeletanu. Lowu a wu li nkama wa ku sungula lowu a a fanela ku nhingena Mbangwini wa ku Xwengisisa hi siku ledzro. A vokweni dzrin’we, a a tamele xibya lexi taliki hi mizri ya ku nun’hwela, kasi hi ledzrimbeni, a a tamele nhlembeto ya gole leyi taliki hi makhala lama pfuzraka. A a tlhasa a yima mahlweni ka xisizrelo lexi a xi funeketa nyangwa ya Mbangu wa ku Xwengisisa. Hi xitxhavu lexikulu, a a nhingena Mbangwini wa ku Xwengisisa, a ya yima mahlweni ka areka dzra xipfumelelanu. Hi ndlela ya ku fanekisela, a a yime mahlweni ka Yehovha Xikwembu Nkulukumba hi ntshima! Kutani, hi wunyaminyami, muprista a a txhulula mizri ya ku nun’hwela leya ku xwenga a makhaleni lama pfuzraka, yindlu yi sala na yi ku mpfiim.* A ntsrhaku, a a ta tlhela a nhingena Mbangwini wa ku Xwengisisa ni ngati ya magandzrelo ya swidoho. Xiya leswaku a a hisa mizri ya ku nun’whela na a nga si nyikela ngati ya magandzrelo ya swidoho.
Xihondzro Xa Ku Zrindzra 11/2019 p. 21 § 5
Tindondzro Leti Hi Pfunekaka Ha Tone A Bukwini Dzra Levitika
Xana hi nga dondzra yini ka ku tizrisiwa ka mizri ya ku nun’hwela hi Siku dzra Dzrivaleliwo? Bibele dzri komba leswaku swikhongoto leswi yamukelekaka swa vagandzreli lava dumbekaka va Yehovha swi fana ni mizri ya ku nun’hwela. (Ps 141:2; Mpf 5:8) Dzrimuka leswaku muprista lwenkulu a a yisa mizri ya ku nun’hwela mahlweni ka Yehovha hi xitxhavu lexikulu. Hi laha ku fanaka, loko hi tsrhindzrekelela Yehovha hi xikhongoto, hi swi yentxa hi xitxhavu lexikulu. Hi tlangela hi mbilu leswi Mutumbuluxi wa wuyaku hinkwabyu a hi pfumelela ku mu tsrhindzrekelela hi kumeka kusuhi naye, swanga hi leswi ntsrongwana a yentxisaka xiswone ka tatana wakwe. (Yk 4:8) A hi yamukela swanga vanghanu vakwe! (Ps 25:14) Ndjombo leyo hi yi tlangela ngopfu swinene lakakuva a hi swi djuli ku mu khunguvanyisa ni siku ni dzrin’we.
Xihondzro Xa Ku Zrindzra 11/2019 p. 21 § 6
Tindondzro Leti Hi Pfunekaka Ha Tone A Bukwini Dzra Levitika
Dzrimuka leswaku muprista lwenkulu a a fanela ku hisa mizri ya ku nun’hwela na a nga si nyikela switlhavelo. Hi ndlela leyo, a a tiyiseka leswaku Xikwembu Nkulukumba a a ta tsrhava hi yene loko a nyikela switlhavelo. Xana hi nga dondzra yini ka leswo? Na a ha li la misaveni, swi djule leswaku Yesu a yentxa ntxhumu wa lisima na a nga si nyikela wutomi byakwe byi va gandzrelo. Ntxhumu lowo a wu ni lisima dzrikulu swinene ku tlula ku lulamisela ku huluxiwa ka vhanu hi ntshima. Xana a wu li yini ntxhumu lowo? Swi djule leswaku a lulamisela ndlela ya kuva Yehovha a yamukela xitlhavelo xakwe hi ku yingiseta Yehovha hi ku dumbeka a wuton’wini byakwe hinkwabyu. Hi yentxela ledzro, Yesu a a ta kombisa leswaku ku yentxa mintxhumu hi ndlela ya Yehovha hi yone ndlela leyinene ya mahanyela. Yesu a a ta lwela wuhosi bya Tatana wakwe—kumbe a kombisa leswaku mafumela yakwe i manene nakone ma lulamile.
Djulisisa Tindzralama Ta Moya
Pespicaz vol-1 p. 284 § 2
Azazel
Hi lani mupostola Pawulo a hlayiki ha kone, akuva Yesu a nyikele wutomi byakwe lebyi hetisekiki hi nkonta ya swidoho swezru a yentxe leswi a swi nga koteki hi ‘ngati ya tinkuzi ni ya swiphongo’. (Hb 10:4, 11, 12) A ve swanga ‘hambana ya dzrivaleliwo’ a byatsrhe ‘mavabyi yezru’, ni ku va a tlhaviwa hi kola ka milandzru yezru. (Eza 53:4, 5; Mt 8:17; 1Pe 2:24) A ‘byatsrhe’ swihono swa hinkwavu lava kombisaka lipfumelo ka gandzrelo dzra xitizrulo. A kombise lulamiselo dzra Xikwembu Nkulukumba dzra ku helisa xidoho hi ku helela. Xileswo a mbuti ya “Azazel” yi yimela xitlhavelo xa Yesu Kriste.
Sentinela 15/11/2014 p. 10 § 10
Ha Yini Hi Fanela Ku Va Lava Ku Xwenga?
Dondzra Levitika 17:10. Yehovha a byele va-Israyele leswaku va nga di ‘ngati yini ni yini’. Vakriste na vone va fanela ku fambela kule ni ngati ya xihazri kumbe ya mhunu. (Min 15:28, 29) Mhaka ya ku va wuso bya Xikwembu Nkulukumba byi hi ‘honokelela’ ni ku va a hi hlongola bandleni dzrakwe ya hi txhavisa. Ha mu zrandzra Xikwembu Nkulukumba nakone hi djula ku mu yingiseta. Nambiloko wutomi byezru byo va khombyeni, hi tiyimiselile ku va hi nga pfumeli loko lava nga mu tivikiki Yehovha nakone va nge na mhaka ni ku mu yingiseta va hi sindzrisa kuva hi nga mu yingiseti. Ha swi tiva leswaku hi ta poyiliwa hi mhaka ya ku yala ngati, kambe hine hi hlawula ku yingiseta Xikwembu Nkulukumba. (Yuda 17, 18) I yini lexi taka hi pfuna ku “tiya” hi nga di ngati kumbe ku va hi nga pfumeli ku txheliwa kumbe ku yi nyikela?—Dt 12:23.