Adamu Na Evha A Va Mu Yingisetanga Xikwembu Nkulukumba

Siku dzrin’wana na Evha a li wuswake, ku humelele nyoka yi ku: ‘I ntiyiso leswaku Xikwembu Nkulukumba a nga mi pfumeleli kuva mi da mihandzru hinkwayu?’ Evha a ku: ‘Hi nga da mihandzru ya minsinya hinkwayu kambe ku ni wun’we wa ku a hi fanelanga hi da mihandzru ya wone. Hikusa loko ho da mihandzru ya nsinya lowo, hi ta fa.’ Kutani a nyoka yi mu byela yi ku: ‘Im-him, a mi nge ti fa. Ku hlaya ntiyiso loko mo da mihandzru leyo, mi ta fana na Xikwembu Nkulukumba.’ Xana leswi nyoka yi swi hlayiki a a li ntiyiso? Im-him, a a li madzrimi. Kambe Evha a ma kholwile madzrimi wolawo. Evha a tame a lavisisa handzru luwani a va a navela ku wu da. Hiloko Evha a da handzru lowo a gama a nyika Adamu leswaku na yene a da. Adamu a a swi tiva leswaku loko va nga mu yingiseti Xikwembu Nkulukumba a va ta fa. Nambitanu a dile handzru lowo, lowu a wu tsimbisiwa.

Ntsrhaku ka nkamanyana, Yehovha a vulavule na Adamu na Evha. A va vutisa leswaku ha yini va de handzru luwani. Evha a hlaye leswaku a nyoka hi yone a yi ni nandzru, kasi Adamu a hlaye leswaku Evha hi yene a a ni nandzru. Adamu na Evha a va mu yingisetanga Xikwembu Nkulukumba. Xileswo, Xikwembu Nkulukumba a va hlongolile a xizrambeni xa Edeni, a va a beka tintsrumi ni xipada lexi pfuzraka a nyangweni. Kutani a va nge he ti swi kota ku tlhela va nghena a xizrambeni lexo ni siku ni dzrin’we.

Kutani ku yentxeke yini hi nyoka leyi vulavuliki na Evha? Hi lani u swi tivaka ha kone a tinyoka a ti khaneli. Ku hlaya ntiyiso, ku ve Sathana lweyi a yentxiki kuva nyoka yi khanela akuva yi kanganyisa Evha. Xana wa swi tiva leswaku i mani Sathana? I ntsrumi ya ku biha. Nakone yi tlhela yi vitaniwa hi vito ledzri liki Diyavulosi. Yehovha a hlaye leswaku na yene Sathana a a ta khatisiwa. A nkameni lowu taka, Yehovha a ta helisa Sathana hi ku helela. Xileswo, Sathana a nge he tlheli a kanganyisa vhanu akuva va yentxa mintxhumu ya ku biha.