DONDZRO 11

Ku Hiseka

Ba-le-Roma 12:11

NKATSRAKANYU: Kutxa u tlhela u khumba vayingiseti timbilu hi ku vulavula hi ku hiseka.

Zranga hi ku khumbeka mbilu. Loko wa ha lulamisela wukaneli byaku, yanakanyisisa swinene hi lisima dzra leswi u djulaka ku swi hlaya. Tivisisa mhaka swinene lakakuva u kota ni ku yi tlhamuxela hi mbilu.
Yanakanya hi vayingiseti vaku. Yanakanyisisa hi ndlela leyi leswi u taka swi dondzrela vhanu kumbe leswi u taka va dondzrisa swone swi taka va pfuna ha yone. Djuletela tindlela ta ku tlhasisela vayingiseti mhaka ya kone hi yentxela ledzri taka kulisa ku tlangela kwavu.
Yentxa wukaneli byaku byi hanya. Vulavula hi nkhinkhi. Tsrhika mavoko ni wuso swi khanela, swi hlaya ndlela leyi u titwaka ha yone na swi pfela mbilwini.

Tivonele leswaku u nga hingalati vayingiseti hi ku tizrisa xikombiso xo xa xin’we xa mizri swi za swi va xihena. Yentxa leswaku swikombiso swaku swa mizri swi va ni ntlhamuxelo. Kombisa ku hiseka ngopfu-ngopfu loko u dondzrisa tinhla ta lisima ni loko u kutxa vayingiseti ku yentxa xa kukazri. U nga kazralise vayingiseti hi ku va lwa hisekaka ku tlula mpimu ka wukaneli byaku hinkwabyu.