DONDZRO 10

Ku Txintxa-Txintxa Zritu

Amaproverbia 8:3, 4, 7

NKATSRAKANYU: Tlhamuxela timhaka hi ku khanya u tlhela u khumba timbilu hi ku txintxa-txintxa mpfumawulu, u pfa u tlakuxanyana zritu na u dzri yehlisa, nakone u pfa u tsrutsrumanyana na u nana kutsrongo.

MAYENTXELA YA KONE:

Txintxa-txintxa mpfumawulu. Tlakuxa zritu akuva u gongondzrela tinhla ta lisima ni ku khumba vayingiseti timbilu. Yentxa leswi fanaka loko u dondzra ndzrimana ya kukazri leyi vulavulaka hi yavanyiso. Yehlisa zritu akuva vayingiseti va pfulisisa tindleve, kumbe akuva u komba leswaku lwa khanelaka awa txhava kumbe a kazratekile.

U nga tlakuxe zritu ka kunyingi lakakuva vayingiseti va titwa ingiki vo khwaveliwa. Tivonele ku yentxa vayingiseti va tsrhika ku yingiseta mhaka va hlamala wene hi ku twala ingiki wo tlanga.
Pfana u tlakuxanyana zritu na u dzri yehlisa. Loko swi nga soliwi ka lidzrimi dzrenu, tlakuxanyana zritu ku komba ku hiseka kumbe ntxhumu wa wukulu swinene kumbe mbangu wa kule ngopfu. Vulavulela hansi ku komba ku vaviseka kumbe ku hlatiyela.
Pfana u tsrutsrumanyana na u nana kutsrongo. Vulavula hi ku tsrutsruma ku komba manyawu. Nananyana loko u hlaya tinhla ta lisima.

Akuva u nga siyi vayingiseti vaku a mpfhukeni, u nga tsrutsrume kumbe u nana swa kola ni kola. U nga vulavule hi ku kahlula lakakuva mazritu ma nga ha twali.