Ka nhlengeletanu yezru a ku na vafundhisa lava hakeliwaka mali. A matsrhan’wini ya leswo, ku ni valaviseli lava fanelekaka, lava hlawuliwaka akuva va “byisa bandla dzra Xikwembu Nkulukumba” hi lani a swi li ha kone ka bandla dzra Wukriste dzra ku sungula. (Amintiṛo 20:28, NM) Vakulu lava i vavanuna lava nga ni wumoya, lava zrangelaka bandla ni ku dzri byisa, “ku nga li hi ku sindzrisiwa, kambe hi ku swi zrandzra a mahlweni ka Xikwembu Nkulukumba; ku nga li hi ku zrandzra mali ya ku kanganyisa, kambe hi moya wa ku hiseka”. (1 Petros 5:1-3, NM) Xana va yentxa ntizro wini ku hi pfuna?

Va zron’weka ha hine mfuzri va hi sizrelela. Vakulu lava va kongomisa va tlhela va pfuna bandla ku sizreleleka hi le moyeni. Swanga hi leswi vakulu va swi tivaka leswaku Xikwembu Nkulukumba a va nyike ntizro wa lisima, a va fumi vhanu vakwe, kambe va tizrisana na vone leswaku va titwa ha hombe va tlhela va tsrhava. (2 Ba-le-Korinte 1:24) Swanga hi leswi mubyisi a zron’wekaka hi tihamba takwe ha yin’we-yin’we, vakulu na vone va dzringisa ku tiva xizro ha xin’we-xin’we xa bandla.​—Amaproverbia 27:23.

Va hi dondzrisa ku yentxa ku zrandza ka Xikwembu Nkulukumba. Vhiki ni vhiki, vakulu va zrangela mintlhanganu ya bandla akuva va tiyisa lipfumelo dzrezru. (Amintiṛo 15:32) Vavanuna lava, va tinyiketeliki, va zrangela ka ntizro wa ku zrezra, hi ku tizra na hine ni ku hi dondzrisa ka swiyenge hinkwaswu swa ntizro wa nsimu.

Va kutxa mun’wana ni mun’wana. Akuva va hi pfuna leswaku hi tiyisa wuxaka byezru na Yehovha, vakulu va hi yendzrela makaya kwezru kumbe va bula na hine a Ndlwini ya Mfumu leswaku va hi pfuna ni ku hi txhavelela hi ku tizrisa Matsralwa.​—Yakob 5:14, 15.

Ku tlhantekela ka ntizro lowu va wu yentxaka a bandleni, vakulu va titizrela akuva va tihanyisa nakone va ni mindangu leyi va fanelaka ku yi lavisela. Vamakwezru lava va tizra swinene, kutani hi fanela ku va hlonipha.​—1 Ba-le-Thesalonika 5:12, 13.

• Xana hi yini mintizro ya vakulu a bandleni?

• Xana vakulu va kombisa ku zron’weka ha mun’we-mun’we wezru hi tindlela tini?

Bibele dzri khanela hi mintlawa yibidzri ya vavanuna va Vakriste lava nga ni mintsrhwalu ya mfanelo ndzreni ka bandla, ku nga “valaviseli ni malandzra ya wutizreli”. (Ba-le-Filipi 1:1, NM) Hakanyingi, ku ni vamakwezru va ku hlawanyana lava tizrelaka bandla dzrin’wana ni dzrin’wana. Xana hi yini mintizro leyi malandzra ya wutizreli ma hi yentxelaka yone ke?

Ma pfuneta huvo ya vakulu. Malandzra ya wutizreli i vavanuna lava nga ni wumoya, lava dumbekaka va tlhela va tikazrata. Van’we ka wone i vampswha, kasi van’wana i vakulu hi ntanga. Va yentxa mintizro ya lisima ndzreni ka bandla, kambe leyi ngopfu-ngopfu yi nga ya mavoko ku pfunisa matizrela ya nhlengeletanu. Leswi swi pfuna vakulu kuva va talela ka ntizro wa ku dondzrisa ni ku byisa.

Ma yentxa mintizro leyi pfunaka. Van’we ka lava nga malandzra ya wutizreli va tizra swanga vapfunisi akuva va hoyozela hinkwavu lava taka mintlhanganwini. Vambeni va nyikiwa ku tizra ka mitxhini ya mpfumawulu, ka mabuku, ka tinkonta ta bandla ni ku nyika swizro swa bandla mbangu wa ku tizrela ka wone nsimu. Mfuzri va pfunisa ku bekisa Yindlu ya Mfumu. Vakulu va nga ha va kombela kuva va pfuna swiduhwati. Hi ku yentxa ntizro wini na wini lowu ma nyikiwaka wone, malandzra ya wutizreli ma kota ku hloniphiwa hi hinkwavu a bandleni.​—1 Timoteo 3:13.

Ma beka xikombiso lexinene swanga vavanuna va Wukriste. Malandzra ya wutizreli ma hlawuliwa hi leswi ma nga xiswone hi tlhelo dzra moya. Loko ma hetisisa swiyenge mintlhanganwini, ma hi tiyisa lipfumelo. Hi ku zrangela ntizrweni wa ku zrezra, ma yentxa leswaku na hine hi va ni nkhinkhi. Hi ku tizrisana ha hombe ni vakulu, ma yentxa leswaku ku va ni ku nyonxa ni ntwananu a bandleni. (Ba-le-Efesa 4:16) Hi ku famba ka nkama, na wone ma nga tizra swanga vakulu.

• Xana malandzra ya wutizreli i vavanuna va muxaka muni?

• Xana malandzra ya wutizreli ma dzri pfunisa kuyini bandla kuva dzri tizra ha hombe?

Matsralwa ya Xigriki ya Wukriste ma tala ku vulavula ha Barnaba na muapostola Pawulo. Vavanuna lava va tizre swanga valaviseli lava famba-fambaka, va yendzrela mabandla ya ku sungula. Ha yini? A va zron’weka hakunene hi ku tsrhamiseka ka vamakwavu va moya. Pawulo a te a djula ku ‘tlhela a yendzrela vamakwavu’ ku vona leswaku vo yini. A a tibekisele ku famba makilometro ya ku tala akuva a ya va tiyisa. (Amintiṛo 15:36) Loku hi kone ku xuva loku valaviseli vezru lava famba-fambaka va nga na kone namunhla.

Va tela ku ta hi tiyisa nhlana. Mulaviseli wa muganga mun’wana ni mun’wana a tlhanganisa kolomu ka 20 wa mabandla, lani a hetaka vhiki ni bandla dzrin’wana ni dzrin’wana kabidzri hi lembe. Hi nga pfuneka swinene hi mfambu wa vamakwezru lava ni wa vasati vavu, loko va tekile. Va tikazratela ku tiva lavatsrongo ni lavakulu, nakone va nyonxela ku famba na hine a ntizrweni wa nsimu ni le ka swidondzro swezru swa Bibele. Valaviseli lava va hamba mayendzro ya wubyisi ni vakulu, va tlhela va nyikela wukaneli lebyi tiyisanaka nhlana a mintlhanganwini ni le tinhlengeletanwini akuva va hi tiyisa.​—Amintiṛo 15:35.

Va nyonxela ku tiva xiyimu xa hinkwezru. Valaviseli va miganga va swi zrandzra ngopfu ku tiva xiyimu xa moya xa mabandla. Va tlhangana ni vakulu ni malandzra ya wutizreli akuva va kambela nhluvuku lowu viki kone ni ku va pfuna hi mavonela akuva va hetisisa mintsrhwalu yavu ya mfanelo. Va pfuna maphayona akuva ma humelela ntizrweni wa wone, nakone va zrandzra ku tivana ni lava va ha ku sungulaka ku hlengeletana na hine ni ku twa ta ku kula kwavu hi tlhelo dzra moya. Mun’wana ni mun’wana wa vamakwezru lava a tinyikela hi ku swi zrandzra swanga ‘nakulozri, a tizrelaka [hine]’. (2 Ba-le-Korinte 8:23) Hi fanela ku yetisa lipfumelo dzravu ni ku tinyiketela kwavu ka Xikwembu Nkulukumba.​—Ba-Heberu 13:7.

• Ha yini valaviseli va miganga va yendzrela mabandla?

• U nga pfunekisa kuyini loko va hi yendzrela?

Loko ku humelela mhangu, Timboni ta Yehovha hi xikahlula ti lulamisela xipfuno akuva ti lamulela vamakwavu lava kumiwiki ha yone. Minzamu leyo yi komba leswaku ha zrandzrana hi xihlayelamfuzri. (Yohan 13:34, 35; 1 Yohan 3:17, 18) Xana hi pfunana hi tindlela tini?

Hi hanana hi mali. Loko ku ve ni ndlala leyikulu a Yudeya, Vakriste va ku sungula a Antiyoka va zrumele xipfuno xa mali ku lamulela vamakwavu va moya. (Amintiṛo 11:27-30) Hi ku fanana, loko hi twa leswaku vamakwezru a mbangwini wa kukazri wa misava va kumana ni swikazratu, hi zrumela swihanano hi ku tizrisa bandla dzrezru akuva hi pfuna lava vilelaka hi le nyameni.​—2 Ba-le-Korinte 8:13-15.

Hi pfunana hi swiyentxo. Vakulu lava nga ka mbangu lowu biwiki hi mhangu va djuletela xizro ni xizro xa bandla akuva va tiva ha wuswavu leswaku hinkwavu va hulukile nakone va hlayisekile. Ku nga bekiwa huvo ya xipfuno akuva yi hlela ku phakeliwa ka swakuda, mati ya ku nwa, mpahla, ka ku yetlela ni mpfuno wa wudahi. Timboni tinyingi leti nga ni wuswikoti lebyi djulekaka ti tinyikela kuva ti famba hi mali ya tone ku ya hlengela a ntizrweni wa xipfuno kumbe ku ya lulamisa tiyindlu leti honekiki ni Tiyindlu tezru ta Mfumu. Wumun’we lebyi hi nga nabyu swanga nhlengeletanu ni wuswikoti lebyi hi nga nabyu bya ku tizra xikan’we hi swone swi hi pfunaka ku kahlula hi kumana leswaku hi tizra hi minkama ya ku bindzra. Swipfuno swezru swi ya ka ‘va yindlu ya wupfumeli’, kambe ha va pfuna vambenyana loko swi koteka, nambi va li va wukhongoti byin’wana.​—Ba-le-Galatia 6:10.

Hi pfunana hi tlhelo dzra moya hi tlhela hi txhavelelana. Lava kumiwiki hi mhangu lexi va xi djulaka ngopfu-ngopfu i ku txhaveleliwa. Ka minkama ya ku tanu, hi kuma ntamu ka Yehovha, ‘Xikwembu Nkulukumba wa ku miyeta hinkwaku’. (2 Ba-le-Korinte 1:3, 4) Hi mbilu ya ku swi djula hi txhavelelana ni lava nga ku dzrileni hi swidumbiso swa Bibele, hi va tiyisa timbilu ka leswaku Mfumu wa Xikwembu Nkulukumba ku nga li khale wu ta helisa makhombo hinkwawu lama vangaka ku vaviseka ni ku xaniseka.​—Apfuletelo 21:4.

• Ha yini Timboni ti kota ku kahlula ti pfunana loko ku humelela timhangu?

• Hi va txhavelelisa kuyini hi tlhelo dzra moya lava hulukiki mhangu?

A mahlweninyana ka ku fa kwakwe, Yesu a bule ni mune wa vadondzrisiwa vakwe hi tlhelo, ku nga Petro, Yakobe, Yohane na Andreya. Loko Yesu a profeta hi xikombiso xa wukone byakwe a masikwini ya wugamu, a tlakuxe xivutiso lexi xa lisima: ‘Hi mani ke a nandzra lwe wa ku dumbeka ni ku tlhazriha, lweyi a hosi yakwe yi mu bekiki henhla ka ndangu wakwe, akuva a wu yavela swakuda hi [nkama lowu] fanekelaka na?’ (Mattheo 24:3, 45; Marka 13:3, 4) Yesu a a dumbisa vadondzrisiwa vakwe leswaku swanga “hosi” yavu, a a ta beka lava a va ta lulamiselela valandzreli vakwe swakuda swa moya nkama ni nkama a nkameni wa wugamu. Xana hi vamani lava a va ta yentxa tlhelo dzra nandzra lweyi?

I ntlawa lowutsrongo wa valandzreli va Yesu lava totiwiki. “Nandzra” ka ha li ntxhumu wun’we ni Huvo Leyi Zrangelaka ya Timboni ta Yehovha. A phamela vagandzreli-kulobye va Yehovha swakuda swa moya leswi tlhasaka hi nkama wa kone. Hi tiye hi yene nandzra lweyi wa ku dumbeka akuva a tama a hi ‘yavela swakuda hi nkama lowu fanekelaka’.​—Luka 12:42.

A lavisela ndangu wa Xikwembu Nkulukumba. (1 Timoteo 3:15) Yesu a nyike nandzra ntsrhwalu wa mfanelo lowukulu wa ku lavisela ntizro wa xiyenge xa la misaveni xa nhlengeletanu ya Yehovha​—ku nga ku lavisela mintxhumu leyi vonekaka, ku zrangela ntizro wa ku zrezra ni ku hi dondzrisa hi ku tizrisa mabandla yezru. Xileswo, akuva a hi nyika leswi hi swi vilelaka hi nkama wa kone, ‘nandzra wa ku dumbeka ni wa ku tlhazriha’ a phamela swakuda swa moya hi ku tizrisa mabuku lawa hi ma tizrisaka ntizrweni wezru wa nsimu, ni hi ku tizrisa minongonoko leyi kombisiwaka mintlhanganwini yezru ni le tinhlengeletanwini.

Nandzra lweyi awa dumbeka ka xihlayelamfuzri xa Bibele ni ka ntizro wakwe wa ku zrezra madzrungula lamanene, nakone a tlhazrihile ka ndlela leyi a bekisaka ha yone hi wutlhazri timhaka ta Kriste la misaveni. (Amintiṛo 10:42) Yehovha a tovokisa ntizro wa nandzra lweyi hi ku wu yentxa wu kula ni ku humexa swakuda swa swinyingi swa moya.​—Ezaya 60:22; 65:13.

• I mani lweyi a bekiwiki ha Yesu akuva a disa vadondzrisiwa vakwe hi hi tlhelo dzra moya?

• Hi tini tindlela leti nandzra lweyi a nga wa ku dumbeka ni wa ku tlhazriha ha tone?

Ka dzana dzra ku sungula, ntlawa lowutsrongo wa ‘vapostola ni vakulu’ lava a va li Yerusalema a wu tizra swanga huvo leyi zrangelaka akuva yi yentxa swiboho swa lisima hi vito dzra bandla hinkwadzru dzra Vakriste lava totiwiki. (Amintiṛo 15:2) Va kote ku yima hi zritu dzrin’we ka swiboho leswi va swi yentxiki hi leswi a va kambisisa leswi Matsralwa ma swi hlayaka ni ku pfumelela moya lowa ku xwenga wa Xikwembu Nkulukumba wu va kongomisa. (Amintiṛo 15:25) Yentxela ledzro dzra ha landzriwa ni namunhla.

Yi tizrisiwa hi Xikwembu Nkulukumba ku hetisisa nkongometo wakwe. Vamakwezru lava totiwiki lava nga swizro swa Huvo Leyi Zrangelaka va dzri zrandzra swinene Zritu dzra Xikwembu Nkulukumba nakone va ni malembe ya ku tala na va tamele timhaka ta mayentxela ya mintxhumu ni timhaka ta moya. Va tlhangana vhiki ni vhiki akuva va kambisisa swivilelo swa vamakwezru a misaveni hinkwayu. Swanga hi le dzaneni dzra ku sungula, swileleto leswi seketeliwaka a Bibeleni swa nyikeliwa, a nga va hi ku tizrisa mapapela kumbe hi ku tizrisa valaviseli va miganga ni van’wana. Leswi swi yentxa leswaku vhanu va Xikwembu Nkulukumba va va ni miyanakanyu yin’we ni swiyentxo leswi fanaka. (Amintiṛo 16:4, 5) Huvo Leyi Zrangelaka yi lavisela ku lulamiseliwa ka swakuda swa moya, yi kutxa ku tsrutsrumisiwa ka ntizro wa ku zrezra Mfumu, yi tlhela yi lavisela ku bekiwa ka vavanuna lava nga ni mintsrhwalu ya mfanelo.

Yi landzra kongomiso wa moya wa Xikwembu Nkulukumba. Huvo Leyi Zrangelaka yi lavisela ku kongomisiwa hi Hosi ya Wuyaku Hinkwabyu, Yehovha, ni Nhloko ya bandla, Yesu. (1 Ba-le-Korinte 11:3; Ba-le-Efesa 5:23) Lava va nga ka huvo leyi a va tivoni na va li vazrangeli va vhanu va Xikwembu Nkulukumba. Vone, kun’we ni Vakriste hinkwavu lava totiwiki, ‘va landzrelela Hambana [Yesu] hinkwaku lomu yi yaka kone’. (Apfuletelo 14:4) Huvo Leyi Zrangelaka ya tlangela loko hi yi hambela swikhongoto.

• I vamani lava a va vumba Huvo Leyi Zrangelaka ka dzana dzra ku sungula?

• Xana Huvo Leyi Zrangelaka namunhla yi wu djulisa kuyini nkongomiso wa Xikwembu Nkulukumba?

Betele i zritu dzra Xiheberu ledzri tlhamuxelaka leswaku ‘Yindlu ya Xikwembu Nkulukumba’. (Genesis 28:17, 19) Vito ledzri dzra fanela akuva dzri tlhamuxela miyaku ya Timboni ta Yehovha a misaveni hinkwayu leyi tizriseliwaka ku lulamisela ni ku seketela ntizro wa ku zrezra. Huvo Leyi Zrangelaka yi tizra a ntsindzra wa misava hinkwayu le Nova Iorque, Estados Unidos, nakone ku sukela ka mbangu wolowo yi vonelela ntizro lowu yentxiwaka ka mazrwavi lama nga matikweni manyingi. Ntlawa lowu tizraka a mbangwini lowu wu tiviwa swanga ndangu wa Betele. Swanga ndangu, va tsrhama va tlhela va tizra kun’we, va da kun’we, mfuzri va dondzra Bibele kun’we hi wumun’we.​—Amapsalma 133:1.

I mbangu wa ku hlawuleka lani swizro swa ndangu swi tizraka hi ku tinyiketela. Ka muti wun’wana ni wun’wana wa Betele, ku ni Vakriste vaxinuna ni vaxisati lava tihitaka a ku yentxeni ka ku zrandzra ka Xikwembu Nkulukumba ni ku tizrela timhaka ta Mfumu nkama hinkwawu. (Mattheo 6:33) A ku na lweyi a holeliwaka, kambe hinkwavu va nyikiwa mbangu wa ku yetlela, swakuda ni xipfuno xa malinyana akuva va hakela madixpeza yavu. Mun’wana ni mun’wana a nyikiwa ntizro, ku nga va a xikiritori, ka ku sweka kumbe ka ku dela kone. Vambeni va tizra ka ku gandlisa kumbe ka ku enkadernara mabuku, ka ku bekisa muti, ka ku hlampswa mpahla, ka ku lungisa, kumbe swin’wana.

I mbangu lowu ku yentxiwaka mintizro ya ku seketela ntizro wa ku zrezra Mfumu. Nkongometo lowukulu wa Betele i ku yentxa leswaku a xihlayelamfuzri xa Bibele xi kumeka ka vhanu va ku tala. Xibukwana lexi i xikombiso xa swone. Xi tsraliwe hansi ka wulaviseli bya Huvo Leyi Zrangelaka, xi gama xi zrumeliwa hi makomputadori ka madzana-dzana ya mintlawa ya vandzruluteli a misaveni hinkwayu, xi gandlisiwa ka mitxhini leyi tsrutsrumaka swinene ka mabetele ya ku siyana-siyana, xi va xi zrumeliwa ka mabandla ya ku tlula 110.000 wa wone. Ka mintizro hinkwayu leyi yentxiwaka, mindangu ya Betele yi nyikela nseketelo lowu djulekaka ka ntizro wa xihatla lexikulu ku tlula hinkwayu​—ku nga ntizro wa ku zrezra madzrungula lamanene.​—Marka 13:10.

• I vamani lava tizraka a Betele, nakone hi wani malulamiselo lawa va yentxeliwaka wone?

• Hi wini ntizro wa xihatla lowu seketeliwaka hi Betele dzrin’wana ni dzrin’wana?

Swizro swa ndangu wa Betele swi tizra ka swiyavelo swa ku siyana-siyana, swi vonelela ntizro wa ku zrezra ka tiko dzrin’we kumbe ku tlula. Vambeni va nga ha yaveliwa ku tizra ka mintlawa ya wundzruluteli, ka ku gandlisa marevhixta, ka ku enkadernara mabuku, ka ku bekisa mabuku, ka ku hamba ma-awudiyu ni mavhidiyu, kumbe ku vonelela timhaka tin’wana ta le mbangwini wolowo.

Xihubyana xa Zrwavi xi lavisela ntizro. Huvo Leyi Zrangelaka yi zrwexa Xihubyana xa Zrwavi lexi vumbiwaka hi vakulu vazrazru kumbe ku tlula lava va fanelekaka ntizro wa ku lavisela zrwavi dzrin’wana ni dzrin’wana. Xihubyana lexi xi nyikela wudzrunguli ka Huvo Leyi Zrangelaka mayelanu ni ku kula ka ntizro wa tiko dzrin’wana ni dzrin’wana, ledzri nga hansi ka wulaviseli bya xone ni swikazratu leswi nga txhukaka swi humelela. Wudzrunguli byolebyo byi pfuna Huvo Leyi Zrangelaka ku vona leswaku hi tini timhaka leti ku nga vulavuliwaka ha tone ka mabuku, mintlhanganu ni tinhlengeletanu ta miganga leti taka. Vayimeli va Huvo Leyi Zrangelaka va zrumeliwa nkama ni nkama ku yendzrela mazrwavi ni ku nyikela minkongomiso ka Xihubyana xa Zrwavi mayelanu ni ku hetisisa swiyavelo swavu. (Amaproverbia 11:14) Ku lulamiseliwa nongonoko wa ku hlawuleka lowu patsraka wukaneli lebyi nyikeliwaka hi muyimeli wa ntsindzra ku kutxa lava tsrhamaka ka nsimu ya zrwavi.

Ku nyikeliwa mpfuno a mabandleni ya kolanu. Vamakwezru lava nga ni ntsrhwalu wa mfanelo a zrwavini va pfumelela ku vumbiwa ka mabandla mampswha. Nangweso vamakwezru lava va kongomisa ntizro wa maphayona, vazrumiwa ni valaviseli va miganga lava tizraka ka nsimu ya zrwavi. Va lulamisela tinhlengeletanu ta miganga ni ta swifundza, va zrangela ntizro wa ku yaka Tiyindlu ta Mfumu, va tlhela va vonelela ku zrumeliwa ka mabuku a mabandleni ku yangula swivilelo swavu. Hinkwaswu leswi yentxiwaka a zrwavini swi ni nkongometo wa ku hetisisa ntizro wa ku zrezra hi ndlela leyi tsrhamisekiki.—1 Ba-le-Korinte 14:33, 40.

• Swihubyana swa Zrwavi swi yi pfunisa kuyini Huvo Leyi Zrangelaka?

• Hi yini mintizro leyi yentxiwaka a zrwavini?

Akuva hi kota ku zrezra ‘madzrungula lamanene’ hi ndlela leyinene, ka ‘matiko hinkwawu, tinxaka, tindzrimi ni vhanu hinkwavu’, hi gandlisa mabuku hi tindzrimi leti tlulaka 900. (Apfuletelo 14:6) Xana hi swi kotisa kuyini ku yentxa ntizro lowa ku kulisa xileswi? Hi swi kota hi ku pfuniwa hi ntlawa wa vatsrali ni vandzruluteli lava humaka misaveni hinkwayu lava tizraka hi ku tihita​—lava hinkwavu ka vone va nga Timboni ta Yehovha.

Ku sungula, mabuku ma tsraliwa hi Xinghiza. Huvo leyi Zrangelaka yi vonelela Ndzrawulo ya ku Tsrala leyi kumekaka a ntsindzra wezru. Ndzrawulo leyi yi vonelela swiyavelo swa vatsrali lava kumekaka a ntsindzra ni le ka mazrwavi man’wana. Leswi ku nga ni vatsrali lava humaka ka mimbangu ya ku siyana-siyana, swi yentxa leswaku mabuku yezru ma khanela hi timhaka leti khumbaka vhanu va tinxaka hinkwatu, leswi yentxaka leswaku mabuku lawa ma nyonxisa vhanu va matiko hinkwawu.

Dzrungula ledzri tsraliwiki dzri zrumeliwa ka vandzruluteli. Ntsrhaku ka loko dzrungula ledzri tsraliwiki dzri basisiwile dzri va dzri pasa, dzri zrumeliwa hi makomputadori ka vandzruluteli a misaveni hinkwayu, lava va dzri ndzrulutelaka, va dzri kambela va tlhela va dzri basisa. Va tikazratela ku hlawula ‘leswi tsraliwiki hi ku lulama, mazritu ya xihlayelamfuzri’, lama taka humexa mongo lowu fanaka ni wa Xinghiza hi lidzrimi dzravu.​—Eklesiasta 12:10.

Makomputadori ma kahlulisa ntizro. Komputadori a dzri sivi lweyi a tsralaka ni lweyi a ndzrulutelaka. Kambe ntizro wavu wu nga kahlulisiwa hi ku tizrisa komputadori ni switizro swa dzrone. Timboni ta Yehovha ti khandhe progarama ledzri vitaniwaka Sistema de Editoração Eletrónica Multilíngue [MEPS], lani dzrungula dzri nga nghenisiwaka kone hi tindzrimi ta ku tala, dzri patsriwa ni mifoto leyi fambelanaka, dzri gama dzri lulamiseliwa ku gandlisiwa.

Ha yini hi yentxa minzamu leyi hinkwayu, nambi ka tindzrimi leti khaneliwaka hi vhanu vatsrongo? Hi yentxa leswo hikuva ku zrandzra ka Yehovha i kuva ‘vhanu hinkwavu va huluxiwa va tlhasa ku tiveni ka xihlayelamfuzri’.​—1 Timoteo 2:3, 4.

• Xana mabuku yezru ma tsralisiwa kuyini?

• Ha yini hi ndzrulutela mabuku yezru hi tindzrimi tinyingi?

Nhlengeletanu yezru yi humexa yi tlhela yi phakela mabibele ya ntsrandzra-vahlayi ni mabuku mambeni lembe ni lembe hi mahala. Hi yaka hi tlhela hi hlayisa Tiyindlu ta Mfumu ni swikiritori swa zrwavi. Hi hlayisa makhulu-khulu ya vatizri va Betele ni vazrumiwa, hi tlhela hi lulamisela xipfuno loko ku li ni timhangu. Kutani u nga ha tivutisa leswi: ‘Xana yi pfa hi kwini mali ya ku yentxa hinkwaswu leswi?’

A hi hakelisi mali mfuzri a hi humexi swa wukhume, nakone a hi fambisi xiparatwana xa minhlengo. Nambi leswi ku seketela ntizro wezru wa ku zrezra swi koxaka timali ta ku tala, a hi kombeli mali. Ku tlula dzana dzra malembe lama khalutiki, revhixta dzra wubidzri dzra Xihondzro Xa Ku Zrindzra ledzri nga humexiwa dzri hlaye leswaku hi kholwa leswaku Yehovha hi yene museketeli wezru nakone “a hi nge ti kombela kumbe ku tsratsriya vhanu kuva va hi seketela ni siku ni dzrin’we”​—nakone a hi ngi sama hi kombela mhunu!​—Mattheo 10:8.

Mintizro yezru yi seketeliwa hi swihanano swa ku swi zrandzra. Vanyingi va wu tlangela ntizro wezru wa ku dondzrisa Bibele nakone va nyikela mali ya ku wu seketela. Timboni hi ntshima ti nyonxela ku nyikela nkama wa tone, ntamu, mali ni mintxhumu yin’wana a ku yentxeni ka ku zrandzra ka Xikwembu Nkulukumba a misaveni hinkwayu. (1 Makronika 29:9) A Tindlwini ta Mfumu ni le tinhlengeletanwini tezru, ku ni mabokisi ya swihanano lani lava va swi navelaka va nga petaka kone swihanano swavu. Ndlela yimbeni ya ku zrumela swihanano i ku tizrisa pajina dzrezru dzra jw.org. Yinyingi ka mali leyi talaka ku kumiwa yi hananiwa hi swisiwana, swa ku fana ni mufelwa lwe wa xisiwana lweyi Yesu a mu dzrumisiki swinene, lweyi a nga peta swimalinyana swibidzri wukosini bya tempele. (Luka 21:1-4) Xileswo, mun’wana ni mun’wana a nga swi kota ku ‘tibekela leswi a swi hlengeletiki’ akuva a hanana ‘swanga heswi a pimisisiki xiswone a mbilwini yakwe’.​—1 Ba-le-Korinte 16:2; 2 Ba-le-Korinte 9:7.

Ha dumba ha kan’we leswaku Yehovha a ta ya mahlweni a susumetela timbilu ta lava djulaka ku ‘mu dzrumisa hi leswi va nga naswu’ hi ku seketela ntizro wa Mfumu, akuva ku zrandzra kwakwe ku hetisisiwa.​—Amaproverbia 3:9.

• I yini lexi yentxaka leswaku nhlengeletanu yezru yi hambana ni wukhongoti byin’wana?

• Xana swihanano swa ku swi zrandzra swi tizrisiwa hi ndlela yini?

Swanga hi leswi vito “Yindlu ya Mfumu” dzri hlayaka ha kone, ndondzro leyikulu ngopfu ya Bibele leyi ku dondzriwaka ha yone a mbangwini lowo i Mfumu wa Xikwembu Nkulukumba, ku nga nhloko-mhaka leyi Yesu a a dondzrisa ha yone.​—Luka 8:1.

Yindlu ya Mfumu i ntsindzra wa wugandzreli bya xihlayelamfuzri a mugangeni. Ntizro wa ku zrezra madzrungula lamanene ya Mfumu wu sungulela mutini lowo. (Mattheo 24:14) Tiyindlu ta Mfumu ta siyana hi makulela ni mayakela ya kone, kambe hinkwatu i tiyindlu ta ku kala ti nga yakeliwanga ku hlamalisa vhanu. Ku tala ka tone ti tizrisiwa hi mabandla ya ku hlawa. A malembeni lama khalutiki, hi yake makume-kume ya madzana ya Tiyindlu timpswha ta Mfumu (ntlhanu hi siku hi ku pimanisa) akuva hi ta longoloka ni ku yandzra loku ku viki kone a mabandleni yezru. Xana swi kotekisa kuyini leswi?​—Mattheo 19:26.

Ti yakiwa hi mali leyi nyikeliwiki ka nkwama wun’we. Timali leti nyikeliwaka ti zrumeliwa xikiritori xa zrwavi akuva mali yi kumeka ka mabandla lama djulaka ku yaka kumbe ku pfuxeta Yindlu ya Mfumu.

Ti yakiwa hi vatizri va ku tinyikela hi mahala lava humaka swiyin’wini swa ku siyana-siyana. A matikweni manyingi ku bekisiwi Mintlawa Ya Ku Yaka Tiyindlu Ta Mfumu. Mintlawa ya vatizri va ku yaka, ni vambeni lava tinyikelaka, yi zruzra ka bandla dzrin’we yi ya ka dzrin’wana a ndzreni ka tiko dzrin’we, ku ya tlhasa ni le mimbangwini ya le kule swinene, ku ya pfuna mabandla ya kone ku yaka Tiyindlu ta wone ta Mfumu. A matikweni manyingi, Timboni leti nga ni wuswikoti ti nyikiwe swiyavelo swa ku lavisela ku yakiwa ni ku pfuxetiwa ka Tiyindlu ta Mfumu ndzreni ka muganga wa kukazri lowu ti nga nyikiwa wone. Nambi leswi vayaki vanyingi lava nga ni wuswikoti va tinyikelaka ndzreni ka muganga wa kukazri ku tizrela ku yakeni, swizro swa bandla dzra kone hi swone wunyigi bya vatizri va ku tinyikela hi mahala. Moya wa Yehovha ni minzamu ya vhanu vakwe leyi yentxiwaka hi hika hinkwadzru hi swone leswi yentxaka kuva hinkwaswu leswi swi koteka.​—Amapsalma 127:1; Ba-le-Kolosa 3:23.

• Ha yini mimbangu yezru ya wugandzreli yi vitaniwa Tiyindlu ta Mfumu?

• Swi kotekisa kuyini ku yaka Tiyindlu ta Mfumu a misaveni hinkwayu?

Yin’wana ni yin’wana ya Tiyindlu ta Mfumu ta Timboni ta Yehovha yi tamele vito ledzri xwengiki dzra Xikwembu Nkulukumba. Xileswo, ku beka xiyandla ku yentxeni ka leswaku yindlu yi tsrhama na yi basile, yi xonga yi tlhela yi lungisiwa ha hombe, hi swi vona swi li ndjombo ni xiyenge xa lisima xa wugandzreli byezru lebyi xwengiki. Hinkwezru hi nga hlengela.

Tinyikele ntsrhaku ka ntlhanganu akuva u basisa. Ntsrhaku ka ntlhanganu wun’wana ni wun’wana, vamakwezru vaxinuna ni vaxisati va nyonxela ku basisa Yindlu ya Mfumu akuva yi sala na yi tsrhamisekile. Kan’we hi vhiki, ku yentxiwa wubasisi bya ku hlwelanyana. Mun’we ka vakulu kumbe malandzra ya wutizreli a zrangela ntizro wa kone, hakanyingi na a landzrela nxaxameto wa mintxhumu leyi fanelaka ku yentxiwa. Hi ku ya hi xivilelo, vamakwezru va tinyikela akuva va kukula, va khuxa kumbe va sula hansi hi mutxhini, va suselela ntsrhuzri, va folisa switsrhamu, va hlampswa va tlhela va txhela muzri a swikoti, va hlampswa majanela ni swivonivoni, va diba nsila, kumbe va basisa handle ni ku hlayisa kintazri. Kan’we kumbe ku tlula hi lembe, ku bekiwa siku dzra wubasisi lebyikulu. Loko hi patsra vanezru ka mintizro yin’wana, hi va dondzrisa ku hlonipha mbangu wezru wa wugandzreli.​—Eklesiasta 5:1.

Beka xiyandla ku lungiseni loku djulekaka. Lembe ni lembe, Yindlu ya Mfumu yi kambeliwa a ndzreni ni le handle hi wuyenti. Hi ku landzra xikambelo lexo, ku yentxiwa ntizro wa ku hlayisa yindlu nkama ni nkama akuva yi tsrhama na yi nge na ka ku honeka, leswi pfunaka kuva mali yi nga tizrisiwi hi futa. (2 Makronika 24:13; 34:10) Yindlu ya Mfumu leyi tsrhamaka hi ku hlayisiwa i mbangu lowu fanekelaka, lowu hi gandzrelaka Xikwembu xezru. Hi ku beka xiyandla ntizrweni lowu, hi komba leswaku ha mu zrandzra Yehovha nakone hi bekela lisima mbangu wezru wa wugandzreli. (Amapsalma 122:1) Leswi swi tlhela swi yentxa leswaku vhanu va muganga va yi hlonipha.​—2 Ba-le-Korinte 6:3.

• Ha yini hi nga fanelanga ku va ni futa hi mbangu wezru wa wugandzreli?

• Hi wani malulamiselo lama yentxiwaka akuva Yindlu ya Mfumu yi tsrhama na yi basile?

Xana wa swi navela ku yentxa wukambisisi bya kukazri akuva u yengetela wutivi byaku hi Bibele? Xana swi kone leswi u djulaka ku swi tiva hi ndzrimana ya kukazri kumbe mhunu, mbangu kumbe ntxhumu wa kukazri lowu ku khaneliwaka ha wone a Bibeleni? Kumbe, xana u sama u tivutisa leswaku Zritu dzra Xikwembu Nkulukumba dzri nga ku pfuna ka xivilelo xa kukazri lexi u nga na xone? Loko swi li tanu, yana a bibliyoteka dzra Yindlu ya Mfumu.

Dzri ni switizro swa ku kambisisa ha swone. Swi nga yentxeka u nga li na wone mabuku hinkwawu ya Timboni ta Yehovha lawa ma seketeliwiki a Bibeleni hi lidzrimi dzraku. Kambe bibliyoteka dzra Yindlu ya Mfumu dzri ni ntalo wa mabuku ya swoswinyana. Dzri nga ha tlhela dzri va ni mandzrulutelela ya ku siyana-siyana ya Bibele, xitlhamuxela-mazritu ni mabuku man’wana ya ku tlhamuxela ha hombe. U ntsrhunxekile ku tizrisa bibliyoteka a mahlweni ni le ntsrhaku ka mintlhanganu. Loko ku li ni komputadori, swi nga yentxeka dzri li ni Watchtower Library. Ledzri i progarama ledzri nga ni nongonoko lowukulu wa mabuku yezru. Nakone i xitizro xa ku nabyala ku xi tizrisa, lexi u nga djuletelaka ha xone nhloko-mhaka, zritu kumbe ndzrimana ya Bibele.

Dzri pfuna swidondzrana ka Ntlhanganu wa Wutomi ni Wutizreli. U nga kota ku tizrisa bibliyoteka dzra Yindlu ya Mfumu ha hombe loko u lulamisela swiyavelo swaku. Mulaviseli wa Ntlhanganu wa Wutomi ni Wutizreli hi yene lweyi a laviselaka bibliyoteka. Hi yene lweyi a fanelaka ku yentxa hinkwaswu akuva ku kumeka mabuku ya swoswinyana ni kuva ma longoloxiwa ha hombe. Yene kumbe lweyi a dondzraka na wene Bibele a nga ku komba leswaku u nga swi kumisa kuyini leswi u djulaka ku swi dondzra. Nambi swi li tanu, a nga kone lweyi a pfumeleliwaka ku susa buku a huma nadzru ka Yindlu ya Mfumu. Handle ka leswo, hi djula ku tamela mabuku ha hombe ni ku kala hi nga ma tsrala-tsrali.

Bibele dzri tlhamuxela leswaku akuva ‘hi kuma wutivi bya Xikwembu Nkulukumba’, hi fanela hi tiyimisela ku byi ‘djulisisa ku fana ni wukosi lebyi fihliwiki’. (Amaproverbia 2:1-5) Bibliyoteka dzra Yindlu ya Mfumu dzri nga ku pfuna ku sungula ku djulisisa koloko.

• Hi swini switizro swa ku kambisisa ha swone leswi nga kone ka bibliyoteka dzra Yindlu ya Mfumu?

• I mani lweyi a nga ku pfunaka ku tizrisa bibliyoteka ha hombe?

Yesu Kriste a byele valandzreli vakwe aku: ‘A ku vaninga kwenu a ku vaningise xiswoswo a mahlweni ka vhanu, va ta kota ku vona mintizro yenu leya ku xonga, va ta twalisa Tatana wenu lweyi a nga matilweni.’ (Mattheo 5:16) Akuva hi yentxa leswo, hi tizrisa ha hombe teknolojiya ya xinan’waka, ku patsra ni Internet. Pajina dzrezru dzra Internet, jw.org, hi xone xihlovo xa nawu ka internet lexi nyikelaka madzrungula mayelanu ni tindondzro ni mintizro ya Timboni ta Yehovha. Ku na yini ka Pajina dzroledzro dzra Internet?

Tinhlamulo ta Bibele ka swivutiso leswi talaka ku hambiwa. U nga kuma tinhlamulo ta swivutiso leswa lisima ngopfu leswi vhanu va samaka va swi hamba. Hi xikombiso, swipapelana leswi liki Xana Ku Xaniseka Ku Ta Hela Siku Dzrin’wana? na Xana Vafi Va Nga Tlhela Va Hanya Hakunene? swi kumeka ka internet hi tindzrimi leti tlulaka 700. U nga tlhela u kuma Tradução do Novo Mundo hi ku tlula 150 wa tindzrimi ni swipfuno swa ku hlawa swa ku dondzra Bibele, ku patsra ni buku ledzri liki I Yini Leswi Hi Nga Swi Dondzraka A Bibeleni? ni marevhixa ya swoswinyana ya Xihondzro Xa Ku Zrindzra ni Despertai! (Pfukani!) Ku tala ka mabuku lawa ma nga dondzriwa kumbe ma yingisetiwa ka internet kumbe ma kopiyariwa hi mayentxela lama tolovelekiki ya ku fana na MP3, PDF, kumbe EPUB. U nga kota nambi ku gandlisa matluka ma nga li mangani akuva u hanana mhunu lwa nyonxelaka hi lidzrimi dzrakwe! Mabuku ya ku hambiwa hi mavhidiyu ma kumeka hi tindzrimi ta ku tala ta ku tizrisa mavoko. U nga kopiyara ku dondzriwa ka Bibele swanga drama, madrama ya Bibele ni wunanga bya ku xonga akuva u tihungatela ha byone.

Wudzrunguli bya xihlayelamfuzri mayelanu ni Timboni ta Yehovha. Ku tlhela ku paluxiwa madzrungula ya swoswinyana ni mavhidiyu mayelanu ni ntizro wezru wa misava hinkwayu, swiyentxakalu leswi khumbaka Timboni ta Yehovha ni mintizro yezru ya ku pfuna lava humeleliwiki hi makhombo. U nga kuma switiviso swa tinhlengeletanu letikulu leti taka yentxiwa ni ndlela ya ku khanela ni swikiritori swezru swa mazrwavi.

Hi mayentxela lawa, hi yentxa livaningu dzra xihlayelamfuzri dzri phatima ku ya tlhasa mimbangwini ya le kule swinene ya misava. Vhanu va tiko-nkulu dzrin’wana ni dzrin’wana, ku patsra na Antárctica, va pfuneka. Hi khongota kuva “zritu dzra Yehovha dzri tama dzri hangalaka hi ku kahlula” a misaveni hinkwayu, leswaku ku dzrumisiwa Xikwembu Nkulukumba.​—2 Ba-le-Thesalonika 3:1, NM.

• Xana jw.org dzri pfunisa xikuyini vhanu lava yengetelekiki ku dondzra xihlayelamfudzri wa Bibele?

• I yini leswi u navelaka ku swi londzrovota ha hombe ka pajina dzrezru dzra Internet?