BIBLIYOTEKA Dzra Watchtower Ka Internet
Dzra Watchtower Ka Internet
BIBLIYOTEKA
Xironga
  • BIBELE
  • SWIPALUXIWA
  • MINTLHANGANU
  • w25 Mayu matl. 2-7
  • Yetisela Xikombiso Xa Tintsrumi Ta Ku Dumbeka

A ku na video ka leswi u swi hlawuliki

Dzrivalelo, ku ni leswi hoxekiki akuva video dzri txhaya.

  • Yetisela Xikombiso Xa Tintsrumi Ta Ku Dumbeka
  • Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2025
  • Swinhlokwanamhaka
  • Leswi Yelanaka Na Dzrone
  • KU TITSRONGAHATA KA TINTSRUMI
  • TINTSRUMI TA VA ZRANDZRA VHANU
  • TINTSRUMI TA TIYISELA
  • TINTSRUMI TI PFUNISA KUVA BANDLA DZRI TSRHAMA NA DZRI BASILE
  • Swivutiso Swa Vadondzri
    Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2024
Xihondzro Xa Ku Zrindzra Xi Zrezraka Mfumu Wa Yehovha (Nhlayu Ya Xidondzro)—2025
w25 Mayu matl. 2-7

NHLOKOMHAKA YA XIDONDZRO 19

LISIMU 6 Matilo Ma Hlaya Ku Phatima Ka Yehovha

Yetisela Xikombiso Xa Tintsrumi Ta Ku Dumbeka

‘Nkhensani Yehovha, n’wine swizrun’wa swakwe.’—AMAPS. 103:20.

NKONGOMETO

Leswi hi swi dondzraka ka tintsrumi ta ku dumbeka.

1-2. a) He kwini ku hambana loku nga kone makazri kwezru ni tintsrumi? b) He kwini ku fana loku nga kone makazri kwezru ni tintsrumi?

SWANGA vhanu va Yehovha, hi xiyenge xa ndangu lowu nga ni lizrandzru lowu mu gandzrelaka. Ndangu lowu wu patsra vamakwezru va misava hinkwayu kun’we ni tintsrumi ta ntsrandzravahlayi. (Dan. 7:9, 10) Loko hi yanakanya hi tintsrumi, hi yanakanya ngopfu hi ndlela leyi ti hambaniki ha yone na hine. Hi xikombiso, a tintsrumi ti kone ku sukela khale na hine hi nga si va kone. (Yb. 38:4, 7) Ti ni ntamu, ti xwengile nakone ti lulamile ku hi tlula hikusa a hi hetisekanga.—Luk. 9:26.

2 Nambileswi ku nga ni ku hambana ka kukazri ka hine ni tintsrumi, ku ni lomu hi fanaka kone na tone. Hi xikombiso, ku fana ni tintsrumi, na hine hi nga swi kota ku yetisela matsrhamela ya ku xonga ya Yehovha. Hi ni ntsrhunxeko wa ku tihlawulela nakone mun’wana ni mun’wana wezru a ni vito ni wumhunu bya kukazri ku fana ni tintsrumi. Handle ka leswo, hi ni swiyavelo swa ku hambanahambana a ntizrweni wa Yehovha. Nakone ku fana ni tintsrumi hi fanela ku gandzrela Yehovha Mutumbuluxi wezru.—1 Pet. 1:12.

3. Hi nga dondzra yini ka xikombiso lexinene xa tintsrumi?

3 Leswi hi nga ni swinyingi hi fanaka ha swone ni tintsrumi, xikombiso xa tone lexinene xi nga hi kutxa ni ku hi dondzrisa mintxhumu ya lisima. Ka xidondzro lexi, hi ta vona leswi hi nga swi yetiselaka ka ku titsrongahata ka tintsrumi, lizrandzru ledzri ti nga na dzrone hi vhanu, ku tiyisela ni ku tikazrata loku ti ku yentxaka akuva ti basisa bandla.

KU TITSRONGAHATA KA TINTSRUMI

4. a) Xana tintsrumi ti swi kombisa hi ndlela yini leswaku ta titsrongahata? b) Ha yini tintsrumi ti titsrongahata? (Amapsalma 89:7)

4 Tintsrumi ta ku dumbeka ta titsrongahata. Nambileswi ti nga ni mfambu, ntamu ni wutlhazri tone ti landzra nkongomiso wa Yehovha. (Amaps. 103:20) Nkama lowu ti hetisisaka swiyavelo leswi Yehovha a ti nyikiki swone, a ti tibyeli hi kola ka leswi ti swi yentxaka kumbe ku tizrisa ntamu lowu ti nga na wone akuva ti khuziwa. Ti hamba ntizro lowu ti nyikiwiki wone na ti nyonxile nambiloko mavito ya tone ma nga tiviwi.a (Gen. 32:24, 29; 2 Tih. 19:35) A ti pfumeli ku yamukela lidzrumu ledzri fanelaka Yehovha ntsena. Ha yini tintsrumi ti titsrongahata? Hikusa ti zrandzra Yehovha nakone ti mu hlonipha ngopfu swinene.—Dondzra Amapsalma 89:7.

5. Xana ntsrumi ya kukazri yi kombise leswaku ya titsrongahata loko yi kawuka Yohane hi ndlela yini? (Tlhela u vona ni mufoto.)

5 A hi kambisiseni xikombiso xa ku titsrongahata ka tintsrumi. Kolomu ka lembe dzra 96 N.Y., ntsrumi ya kukazri leyi vito dzra yone dzri kalaka dzri nga tiviwi yi kombe Yohane xivoniso lexi hlamalisaka. (Mpful. 1:1) Xana Yohane a yentxe yini loko a vone mintxhumu leyo ya ku hlamalisa? A zame ku gandzrela ntsrumi leyo. Kambe, hi ku kahlula ntsrumi leyo ya ku dumbeka yi mu yimisile yi gama yi ku: “Tivoneli! U nga yentxi leswo! Mine no va nandzra ntsena ku fana na wene ni vamakwenu . . . Gandzrela Xikwembu Nkulukumba!” (Mpful. 19:10) Ntsrumi leyi a yi titsrongahata hakunene! Ntsrumi leyi a yi nga djuli ku dzrumisiwa. Hi ku kahlula, yi byele Yohane leswaku a a fanela ku gandzrela Yehovha Xikwembu Nkulukumba. Kambe hi nkama wu li wun’we, a ntsrumi leyo a yi tivonanga na yi li ya lisima ku tlula Yohane. Nambileswi a ku li khale na ntsrumi leyo yi gandzrela Yehovha nakone a yi ni ntamu ngopfu ku tlula Yohane, a yi titsrongahata lakakuva yi byela mupostola Yohane leswaku a yo va nandzra ntsena ku fana na yene. Nambileswi swi vileliki ku va ntsrumi leyo yi kawuka Yohane, a yi swi yentxanga hi ndlela ya tihanyi kambe a matsrhan’wini ya leswo yi swi yentxe hi ndlela leyinene. Swi nga yentxeka yi swi twisisile leswaku Yohane a djule ku yi gandzrela hi leswi a hlamalisiwiki hi leswi a swi voniki.

Ntsrumi leyi kombelaka leswaku mupostola Yohane a nga yi khinsameli ni ku yi gandzrela.

Ntsrumi leyi kombisaka ku titsrongahata loko yi khanela ni ku kawuka Yohane (Vona yava 5)


6. Hi nga yetisela ku tistrongahata ka tintsrumi hi ndlela yini?

6 Hi nga yetisela ku titsrongahata ka tintsrumi hi ndlela yini? Ku fana ni tintsrumi, na hine hi djula ku hetisisa swiyavelo swezru na swi nga vileli kuva hi tibyela hi kola ka leswi hi swi yentxaka kumbe ku yentxa van’wana va hi vona na hi ni wuswikoti ku va tlula. (1 Kor. 4:7) Tlhantakubidzri, a hi fanelanga hi tivona na hi li va lisima ku tlula van’wana hi leswi ku nga khale na hi tizrela Yehovha kumbe hi ni swiyavelo leswi van’wana va kalaka va nga li na swone. Loko hi ya hi va ni wutiyanguleli, hi lani swi djulekaka ngopfu kone kuva hi titsrongahata. (Luk. 9:48) Hi djula ku tizrela van’wana ku fana ni tintsrumi. A hi swi djuli ku yentxa van’wana va yanakanya leswaku hi va lisima ngopfu ku va tlula.

7. Hi nga kombisa leswaku ha titsrongahata loko hi kawuka kumbe ku laya mhunu wa kukazri hi ndlela yini?

7 Hi nga tlhela hi kombisa leswaku ha titsrongahata loko hi kawuka kumbe ku laya makwezru wa kukazri kumbe n’wana. Minkama yin’wana swi nga ha djula kuva hi kongoma mhaka loko hi laya kumbe ku kawuka mhunu wa kukazri. Kambe ku fana ni leswi ntsrumi yi kawukiki Yohane hi ndlela leyinene, na hine hi nga ha va lava kongomiki kambe hi nga yentxi leswaku mhunu yelweyo a hela ntamu. Loko hi nga tivoni na hi li lava tlakukiki kumbe va lisima ku tlula van’wana, hi ta nyikela swilayu leswi seketeliwiki a Bibeleni nakone hi ta swi yentxa hi xitxhavu ni hi lizrandzru.—Kol. 4:6.

TINTSRUMI TA VA ZRANDZRA VHANU

8. a) Hi ku ya hi Luka 15:10, xana tintsrumi ti dzri kombisisa kuyini lizrandzru ledzri ti nga na dzrone hi vhanu? b) Xana tintsrumi ti hi pfunisa kuyini a ntizrweni wa ku zrezra? (Tlhela u vona ka kapa.)

8 A tintsrumi ta zron’weka hi vhanu. Ta va zrandzra vhanu. Ta nyonxa loko mudohi a tisola swidohweni swake kumbe loko mhunu lweyi a yimiki ku tizrela Yehovha a tlhela a mu tizrela, ni loko mhunu wa kukazri a dondzra ntiyiso a va a txintxa wutomi byake a tizrela Yehovha. (Dondzra Luka 15:10.) A tintsrumi ti tlhela ti hi pfuna a ntizrweni wa ku zrezra madzrungula ya Mfumu. (Mpful. 14:6) Nambileswi ti kalaka ti nga zrezreli vhanu hi ku kongoma, ti nga ha kongomisa muzrezri ka mhunu lweyi a djulaka ku dondzra hi Yehovha. I ntiyiso leswaku a hi nge hlayi leswaku tintsrumi ti hi kongomise ka mhunu wa kukazri hi ndlela muni. Kambe Yehovha a nga ha tizrisa tindlela ta ku hambanahambana, ta ku fana ni moya wake wa ku xwenga akuva wu pfuna vhanu lava djulaka ku dondzra mayelanu na yene kumbe ku kongomisa malandzra yake ka vhanu volavo. (Mint. 16:6, 7) Nambitanu, a tizrisa tintsrumi take akuva ti hi pfuna a ntizrweni wa ku zrezra. Kutani loko hi li ku zrezreni ka madzrungula lamanene, hi nga tiyiseka leswaku tintsrumi ti na hine akuva ti hi seketela.—Vona bokisi ledzri liki: “Swikhongoto Swavu Swi Hlamuliwile.”b

Vatekani lava fambaka na va khome xikarinyana xa mabuku a doropeni. Tintsrumi leti nga mpfhukeni ti kongomisa makwezru wa xisati akuva a xiyisisa n’hwanyana wa kukazri lweyi a kazratekiki a tsrhamisiki bankwini.

Vatekani lava mukaka kaya ntsrhaku ka loko va zrezre hi xikarinyana. Nkama lowu va mukaka, makwezru wa xisati a vona wansati wa kukazri lweyi a kazratekiki. Kutani makwezru lweyi a dzrimuka leswaku a tintsrumi ti nga hi kongomisa ka vhanu lava vilelaka mpfunu wa moya. Kutani a susumeteleka ku ya vulavula ni wansati lwiyani akuva a mu txhavelela (Vona yava 8)


Swikhongoto Swavu Swi Hlamuliwile

Swi nga yentxeka Yehovha a tizrise tintsrumi ka mimfambu leyi nga lani hansi akuva a hlamula swikhongoto swa vamakwezru.

  • Xin’hwanyatana xa kukazri xa 12 wa malembe a Peru, a xi li ku zrezreni hi telefoni ni mamana wa xone, hi loko xi fonela wansati wa kukazri lweyi a a khongotile ka Xikwembu Nkulukumba a kombela leswaku a zrumela mhunu akuva a ya mu pfuna. Wansati lweyo a swi xiyile leswaku kuva xin’hwanyatana lexiyani xi mu fonelile a ku li nhlamulo ya xikhongoto xake nakone a pfumelile ku fambiseliwa xidondzro xa Bibele. Ntsrhaku ka nkamanyana a sungule ku hlalela mintlhanganu.

  • Wansati wa kukazri wa le Romênia, a dondzre Bibele ku dzringana nkama wa kukazri a gama a yima. Ntsrhakunyana ka leswo, a ye tizra ka muti wa kukazri a Itália nakone a a swi djula ngopfu ku tlhela a fambiseliwa xidondzro xa Bibele. A a nga tivi Mboni ni yin’we ya Yehovha a Itália, xileswo a khongotile ka Yehovha a kombela mpfunu. Ntsrhakunyana ka leswo, lava a a tizra ka vone va mu kombele kuva a ya xitolo a ya va xavela mintxhumu. Va mu byele leswaku a a nga fanelanga ku bula ni n’winyi wa xitolo. Vone va te: “Yene i Mboni ya Yehovha nakone a tsrhamela ku bula hi Bibele ni hinkwavu lava yaka xava mintxhumu.” Nakunene leswi va mu basopisiki swone swi yentxekile, n’winyi wa xitolo a zrezrele wansati lwiyani, kutani a swi xiyile leswaku nakunene a ku li nhlamulo ya xikhongoto xake. A tlhele a sungula ku fambiseliwa xidondzro xa Bibele nakone a hambe ku txintxa a wuton’wini byake akuva a tizrela Yehovha. Hi kola ka xikombiso xake lexinene, mun’we ka vanake a sungule ku fambiseliwa xidondzro xa Bibele a va a sungula ku hlalela mintlhanganu.

  • Vatekani va kukazri lava nga Timboni va teke xiboho xa ku xavisa movha wavu. Loko vatekani lavan’wana lava nga liki Timboni va te va ta ta vona movha, vamakwezru lava va londzrovote mukhandlu lowo akuva va tlhamuxela vatekani lavayani a va nga li Timboni leswaku a va xavisa movha luwani hikusa a va teke xiboho xa ku hanya hi mintxhumu yitsrongo akuva va va ni nkama wunyingi wa ku pfuna vhanu akuva va dondzra Bibele. Ka vatekani lava a va djula ku xava movha a nuna a te: “Tolo kunene ni khongotile ka Xikwembu ni ku: ‘We Hosi, ni zrumelele mhunu akuva a ta ta ni pfuna. Ni titwa na ku kiyela ntxhumu nakone ni djula ku dondzra ntiyiso.’” A vone mukhandlu luwani na ku li nhlamulo ya xikhongoto xake. Yene ni nsati va sungule ku fambiseliwa xidondzro xa Bibele kun’we ni swin’hwanyatana swavu swibidzri. Ndangu hinkwawu kutani wu hlalela mintlhanganu ya bandla.

9. Xana hi nga yetisela lizrandzru ledzri tintsrumi ti nga na dzrone hi vhanu hi ndlela yini?

9 Hi nga yetisela lizrandzru ledzri tintsrumi ti nga na dzrone hi vhanu hi ndlela yini? Loko hi twa xitiviso xa leswaku makwezru wa kukazri a tlhelele bandleni ha nyonxa hi lani tintsrumi ti nyonxaka ha kone. Hi nga ha yentxa hinkwaswu leswi hi nga swi kotaka akuva makwezru lweyo a swi vona leswaku ha mu zrandzra ni leswaku hi nyonxile hi leswi a tlheliki a tizrela Yehovha. (Luk. 15:4-7; 2 Kor. 2:6-8) Hi nga tlhela hi yetisela tintsrumi hi ku va hi tizra hi nkhinkhi a ntizrweni wa nsimu. (Ekles. 11:6) Swanga hi leswi tintsrumi ti hi pfunaka loko hi li ku zrezreni ka madzrungula lamanene, na hine hi nga djuletela tindlela ta ku va hi pfuna vamakwezru ka ntizro wavu wa nsimu. Hi xikombiso, xana hi nga ha kunguhata ku huma nsimu ni lava va ha ka ku sungula ku zrezra kumbe lava ha liki vampshwa a nhlengeletanwini? Xana hi nga ha pfuna vamakwezru lava vabyaka kumbe lava kuliki hi ntanga akuva na vone va kumeka nsin’wini?

10. Hi nga dondzra yini ka mfambu wa Sara?

10 Xana hi nga kuyini loko swiyimu swi nga hi pfumeleli ku yentxa leswi yengetelekiki a ntizrweni wa Yehovha? Nambi swi li hi ndlela leyo, hi nga djuletela tindlela ta kuva hi tizra kun’we ni tintsrumi ka ntizro wa ku zrezra. Vona mfambu wa makwezru Sara,c wa le India. Ntsrhaku ka loko a tizre swanga phayona ku dzringana 20 wa malembe, Sara a sungule ku vabya lakakuva a nga gwenti nambi ku pfuka. Leswo swi mu kazrate ngopfu. Kambe, Sara a tlhele a sungula ku nyonxa hi leswi vamakwezru a bandleni a va mu pfuna ni leswi a a khomelela ka xiyimiso xake xa moya. Swi djule kuva a dondzra mazrezrela lamampshwa hi ku ya hi xiyimu xake. Leswi a a nga swi koti nambi hi ku tsrhama akuva a tsrala mapapela, a o zrezra ntsena hi ku tizrisa telefoni. A fonele timpinda take, nakone tone ti mu byele hi vhanu van’wana lava na vone a va djula ku dondzra Bibele. Ku ve wani mabindzru ya kone? Ndzreni ka tihwetinyana titsrongo, Sara kutani a a ni 70 wa swidondzro swa Bibele, leswi a a nga ha swi koti nambi ku swi fambisa! Kutani a yavelane swidondzro leswo ni vamakwezru van’wana a bandleni. Ku tala ka swidondzro swoleswo swa ya mintlhanganwini. Wa yi yanakanya ndlela leyi tintsrumi ti nyonxaka ha yone hi ku tizrisana ni vamakwezru va ku fana na Sara, lava yentxaka hinkwaswu leswi va nga swi kotaka a ntizrweni wa ku zrezra!

TINTSRUMI TA TIYISELA

11. Xana tintsrumi ta ku dumbeka ti kombise ku tiyisela hi ndlela yini?

11 Tintsrumi ta ku dumbeka i xikombiso lexinene xa ku tiyisela. Ti tiyiselela wubihi ni ku kala wululami hi malembe ni malembe. Ti vone Sathana kun’we ni tintsrumi tin’wana leti a ti tizrela Yehovha xikan’we na ti mu pfukela. (Gen. 3:1; 6:1, 2; Yud. 6) A Bibele dzri vulavula hi ntsrumi ya kukazri ya ku dumbeka leyi lwisaniki ni ntsrumi ya ku biha ku dzringana masiku manyingi. (Dan. 10:13) Handle ka leswo, ku sukela a minkameni ya Adamu na Evha, a tintsrumi ti vone vhanu vanyingi va hlawula ku kala va nga mu tizreli Yehovha. Nambiloko ku yentxeke hinkwaswu leswo, tintsrumi leti ta ku dumbeka, ti tama ti tizrela Yehovha hi nkhinkhi nakone na ti nyonxile. Ta swi tiva leswaku hi nkama wa kone, Xikwembu Nkulukumba a ta helisa wubihi hinkwabyu.

12. I yini lexi taka hi pfuna ku tiyisela?

12 Hi nga yetisela ku tiyisela ka tintsrumi hi ndlela yini? Ku fana ni tintsrumi, hi nga ha vona mintxhumu ya ku biha na yi yentxeka kumbe hi kanetiwa. Kambe, ha tiyiseka leswaku hi nkama wa kone Yehovha a ta helisa mintxhumu hinkwayu ya ku biha. Kutani, hi djula ku yetisela tintsrumi leta ku dumbeka hi ku va hi nga ‘godoli ku yentxa leswinene’. (Gal. 6:9) Nakone Xikwembu Nkulukumba a hi dumbisa leswaku a ta hi pfuna ku va hi tiyisela. (1 Kor. 10:13) Hi nga ha khongota ka Yehovha akuva a hi nyika moya wake wa ku xwenga lowu taka hi pfuna kuva hi lehisa mbilu ni kuva hi nyonxa. (Gal. 5:22; Kol. 1:11) Swi li yini loko u kanetiwa? Dumba Yehovha hi ku helela nakone u nga txhavi. Yehovha minkama hinkwayu a ta ku pfuna ni ku ku tiyisa.—Heb. 13:6.

TINTSRUMI TI PFUNISA KUVA BANDLA DZRI TSRHAMA NA DZRI BASILE

13. He xini xiyavelo xa ku hlawuleka lexi tintsrumi ti nga na xone ka masiku lawa ya wugamu? (Matewu 13:47-49)

13 Ka masiku lawa ya wugamu, Yehovha a nyike tintsrumi xiyavelo xa ku hlawuleka. (Dondzra Matewu 13:47-49.) Vhanu va ntsrandzravahlayi a misaveni hinkwayu va ma nyonxela madzrungula lamanene. Van’we ka vhanu volavo va hamba ku txintxa a wuton’wini byavu akuva va hanya hi ku ya hi minsinya ya milawu ya Yehovha ni ku mu tizrela hi ndlela leyi a yi djulaka, kasi van’wana a va yentxi ntxhumu. A tintsrumi ti yaveliwe kuva ti “hambanisa lava ku biha ka lava ku lulama”. Leswi swi hlaya leswaku ti yaveliwe ku pfunisa kuva bandla dzri tsrhama na dzri basile. Leswi a swi hlayi swone leswaku lava va yimiki ku hlengemela hi kola ka swivangelo swa kukazri a va nge he tlheleli bandleni nakone a swi hlayi swone leswaku a ku nge ti va ni swikazratu a bandleni. Nambitanu, hi nga tiyiseka leswaku a tintsrumi ti tizra hi nkhinkhi akuva bandla dzri tsrhama na dzri basile.

14-15. Xana hi nga ti yetisela hi ndlela yini tintsrumi a mhakeni ya ku zronʼwekela bandla ni ku dzri hlayisa akuva dzri tsrhama na dzri basile? (Tlhela u vona ni mifoto.)

14 Xana hi nga ti yetisela hi ndlela yini tintsrumi a mhakeni ya ku zronʼwekela bandla ni ku dzri hlayisa akuva dzri tsrhama na dzri basile? Hi kuva hi hamba xiyenge xezru xa ku hlayisa bandla akuva dzri tsrhama na dzri basile hi tlhelo dzra moya ni hi mahanyela. Hi yentxa leswo hi kuva hi hlawula vanghanu lava zrandzraka Yehovha ni ku fambela kule ni ntxhumu wun’wana ni wun’wana lowu nga ha honaka wunghanu byezru na Yehovha. Loko hi yentxa leswo, a bandla dzri ta tsrhama na dzri basile. (Amaps. 101:3) Hi nga ha tlhela hi pfuna vamakwezru akuva va tsrhama na va dumbekile ka Yehovha. Hi xikombiso, hi nga yentxa yini loko hi tiva leswaku makwezru wa kukazri a hambe xidoho lexikulu? Leswi hi mu zrandzraka, hi ta mu tsratsriya akuva a ya khanela ni vakulu hi mhaka leyo. Loko a nga swi yentxi leswo, hine hi ta ya byela vakulu. Hi djula leswaku makwezru lweyi a vabyaka hi tlhelo dzra moya a kuma mpfunu lowu a wu vilelaka hi ku kahlula!—Yak. 5:14, 15.

15 Lexi vavisaka hi leswaku van’wana va hamba swidoho leswikulu lakukava swi vilela kuva va susiwa bandleni. Loko leswo swi yentxeka hi “tsrhika ku titlhanganisa” na vone.d (1 Kor. 5:9-13) Malulamiselo lawa ma yentxa leswaku a bandla dzri tsrhama na dzri basile. Handle ka leswo, loko hi yima ku titlhanganisa ni vhanu lava susiwiki bandleni hi va na hi va komba timpswalu. Hi ndlela yini? Hikusa loko hi yingiseta xileleto xa Yehovha xa kuva hi nga titlhanganisi na vone, leswo swi ta va pfuna kuva va txintxa va va va tlhelela ka Yehovha. Loko va tlhelela, hine na Yehovha kun’we ni tintsrumi ha nyonxa.—Luk. 15:7.

Collage: 1. Vamakwezru va xisati va tsrhamiki ka banku a jaradi va khweva café. Loko mun’we a vulavula lwe mun’wana a lavisa tlhelweni. 2. Makwezru lweyi a a vulavula ni makwezru mun’wana wa xisati, hi ku famba ka nkama a vulavula ni vakulu vabidzri va bandla a Ndlwini ya Wugandzreli.

Hi fanela ku yentxa yini loko hi tiva leswaku makwezru a hambe xidoho lexikulu? (Vona yava 14)e


16. Hi nga yetisela tintsrumi hi tindlela tini?

16 I tovoko dzrikulu ku va Yehovha a hi pfumelele leswaku hi dondzra mayelanu ni tintsrumi ni ku va hi tizrisana na tone! Hi djula ku yetisela matsrhamela lawa ti nga na wone, ya ku fana ni ku titsrongahata, ku zrandzra vhanu, ku tiyisela ni ndlela leyi ti zron’wekaka ha yone ku hlayisa bandla akuva dzri tsrhama na dzri basile hi tlhelo dzra moya ni hi mahanyela. Loko na hine hi yetisela xikombiso xa tintsrumi leti ta ku dumbeka, hi ta va xiyenge xa ndangu wa vagandzreli va Yehovha hi lani ku nga helikiki.

HI NGA TI YETISELA HI NDLELA YINI TINTSRUMI KA . . .

  • ku titsrongahata?

  • lizrandzru ledzri ti nga na dzrone hi vhanu?

  • ndlela leyi ti zron’wekaka ha yone hi ku hlayisa bandla akuva dzri tsrhama na dzri basile?

LISIMU 123 Titsrongahate Ka Nawu Wa Yehovha

a Ku ni tintsrumi ta ntsrandzravahlayi, kambe a Bibele dzro hlaya mavito ya tintsrumi tibidzri ntsena, ku nga Mikayele na Gabriyele.—Dan. 12:1; Luk. 1:19.

b Akuva u kuma leswi yengetelekiki, yana ka Biblioteka on-line da Tore de Vigia hansi ka mhaka leyi liki “Anjos” ka xinhlokwanamhaka lexi liki: “Orientação angélica (exemplos).”

c Mavito man’wana ma txintxiwile.

d Hi lani swi tlhamuxeliwiki ha kone ka Xib’iko Xa Wubidzri Lexi Pfaka Hi Ka Huvo Leyi Zrangelaka Xa 2024, loko mhunu lweyi a susiwiki bandleni a ta mintlhanganwini, muzrezri mun’wana ni mun’wana a nga tizrisa lipfalu dzrake ledzri dondzrisiwiki hi Bibele akuva a tihlawulela leswaku a ta mu losa kumbe ku mu hoyozela mhunu lweyo.

e MINTLHAMUXELO YA MIFOTO: Makwezru wa xisati a tsratsriyaka munghanu wake akuva a ya khanela ni vakulu. Kambe ntsrhaku ka nkamanyana, loko makwezru lweyi a xiye leswaku a munghanu wake a nga yanga a ya khanela ni vakulu, yene hi wuswake a ye khanela navu.

    Mabuku Ya Xizronga - (2003-2025)
    Huma
    Nghena
    • Xironga
    • Zrumela
    • Tihlawulele
    • Copyright © 2025 Watch Tower Bible and Tract Society of Pennsylvania
    • Milawu Ya Matizrisela
    • Nawu Wa Xihundla
    • Seta Swa Xihundla
    • JW.ORG
    • Nghena
    Zrumela