Yeremiya
37 Nuko umwami Zedekiya+ mwene Yosiya atangura kuganza mu kibanza ca Koniya*+ mwene Yehoyakimu, kuko Nebukadinezari* umwami wa Babiloni yari yamugize umwami w’Ubuyuda+. 2 Mugabo we n’abasuku biwe n’abanyagihugu ntibumvirije ivyo Yehova yavuze biciye ku muhanuzi Yeremiya.
3 Nuko umwami Zedekiya atuma Yehukali+ mwene Shelemiya na Zefaniya+ mwene Mayaseya umuherezi, ngo babwire umuhanuzi Yeremiya bati: «Ndakwinginze udusabire kuri Yehova Imana yacu.» 4 Yeremiya yaridegemvya mu bantu kuko batari bwamushire mw’ibohero+. 5 Ingabo za Farawo zariko ziraza zivuye mu Misiri+ maze Abakaludaya bari bugarije Yeruzalemu baravyumva, baca barakinjura bareka gutera Yeruzalemu+. 6 Maze Yehova abwira umuhanuzi Yeremiya ati: 7 «Ibi ni vyo Yehova Imana ya Isirayeli avuze: “Umwami w’Ubuyuda yabatumye kumbaza, genda mumubwire muti: ‘Umviriza! Ingabo za Farawo ziriko ziraza kubatabara, zizobwirizwa gusubira mu Misiri iyo zaje ziva+. 8 Kandi Abakaludaya bazogaruka barwanye iki gisagara bagifate maze bagiturire+.’ 9 Yehova avuze ati: ‘Ntimwihende muvuga ngo: “Abakaludaya bazogenda ata kabuza, bareke kudutera.” Nta ho bazoja. 10 Naho mwokwica ingabo zose z’Abakaludaya ziriko zirabarwanya hagasigara gusa abakomeretse, bova mu mahema yabo bakaza guturira iki gisagara+.’”»
11 Ingabo z’Abakaludaya zimaze gukinjura zikareka gutera Yeruzalemu kubera ingabo za Farawo+, 12 Yeremiya aca ava i Yeruzalemu aja mu karere ka Benyamini+ gutora umugabane wiwe mu b’iwabo. 13 Mugabo umuhanuzi Yeremiya ageze kw’irembo rya Benyamini, umukuru w’abarinzi yitwa Iriya mwene Shelemiya, Shelemiya mwene Hananiya, aca aramufata amubwira ati: «Uriko uja kwishikana ku Bakaludaya!» 14 Mugabo Yeremiya amubwira ati: «Oya si vyo! Singiye kwishikana ku Bakaludaya.» Ariko Iriya yanka kumwumviriza, aca afata Yeremiya amushira abatware. 15 Abatware bashavurira cane Yeremiya+, baramukubita maze bamupfungira*+ mu nzu y’umunyamabanga Yehonatani, kuko yari isigaye ari ibohero. 16 Yeremiya yashizwe mu gasho*, mu vyumba vyo mu kuzimu, agumayo imisi myinshi.
17 Nuko umwami Zedekiya amutumako, maze atangura kumubaza ibibazo mu mpisho mu nzu* iwe+. Amubaza ati: «Nta co Yehova yoba yakubwiye?» Yeremiya na we ati: «Kiriho.» Yongerako ati: «Uzotangwa ku mwami wa Babiloni+!»
18 Yeremiya abwira kandi umwami Zedekiya ati: «Ni igiki nagucumuyeko wewe n’abasuku bawe n’aba bantu, catumye munta mw’ibohero? 19 None bari hehe ba bahanuzi banyu bababwira ngo: “Umwami wa Babiloni ntazoza kubatera no gutera iki gihugu+”? 20 Ndakwinginze rero wumvirize databuja, mwami wanje! Ndakwinginze wumve ugutakamba kwanje. Ntunsubize mu nzu y’umunyamabanga Yehonatani+, kugira simpfireyo+.» 21 Umwami Zedekiya aca ategeka ko Yeremiya acungirwa mu kigo c’abarinzi+. Buri musi bamuha umukate w’umuzingi uvuye kw’ibarabara ry’abotsa imikate+, gushika imikate yose iheze mu gisagara+. Yeremiya aguma mu kigo c’abarinzi.