Ikigabane ca 35

Insiguro Yabaye Rurangiranwa Kuruta Zose

NI KIMWE mu bintu vy’intibagirwa mu nkuru y’ivya Bibiliya: Yezu yicaye ku nkike y’umusozi, ashikiriza Insiguro yiwe rurangiranwa yo ku Musozi. Nya hantu ni hafi y’Ikiyaga c’i Galilaya, kumbure hafi y’i Kaperinawumu. Inyuma y’aho Yezu amariye ijoro ryose asenga, ubu ahejeje gutoranya 12 mu bigishwa biwe ngo babe intumwa. Maze, azanana na bo bose, amanuka aho hantu haringaniye ha nya musozi.

Ubu wokwiyumvira ko Yezu arushe cane, akaba yoshima gusinzira gatoyi. Ariko haje amasinzi y’abantu, bamwe bakaba bagize urugendo kuva i Yudaya n’i Yeruzalemu, nko ku birometero biri hagati y’100 n’110. Abandi baje bava mu bisagara vy’i Tiro n’i Sidoni mu buraruko, ku nkengera y’ikiyaga. Baje kwumviriza Yezu no gukizwa indwara zabo. Hariho mbere n’abantu badurumbanywa n’amadayimoni, ari yo bamarayika b’ababisha ba Shetani.

Yezu amanutse, abantu barwaye baramwegera ngo bamukoreko, na we arabakiza bose. Mu nyuma, Yezu bisa n’uko aduga mu kibanza gikirurutse ku musozi. Ngaho aricara maze atangura kwigisha ya masinzi yandagaye imbere yiwe, ha hantu haringaniye. Kandi vyiyumvire! Ubu mu bahari bose nta n’umwe arimwo arwaye indwara ikomeye!

Abantu barashashaye kwumviriza uwo mwigisha ashoboye gukora ivyo bitangaro vy’akajoreza. Ariko rero Yezu ashikiriza insiguro yiwe canecane kugira ngo igire ico yunguye abigishwa biwe, kumbure bakaba ari bo bagandagaje hafi cane yiwe. Ariko kugira ngo natwe dushobore kugira ico tuhungukiye, Matayo na Luka bompi baranditse iyo nsiguro.

Inkuru ishikirizwa na Matayo kuri iyo nsiguro, ni nk’iya Luka incuro zine. Vyongeye, hari ibihimba vy’ivyo Matayo yanditse Luka ashikiriza nkaho vyoba vyavuzwe na Yezu ikindi gihe mu kiringo c’igikorwa ciwe, nk’uko ushobora kuvyibonera ugereranije Matayo 6:9-13 na Luka 11:1-4, be n’iyo ugereranije Matayo 6:25-34 na Luka 12:22-31. Yamara ivyo ntibikwiye kudutangaza. Yezu biribonekeza ko yigishije ibintu bimwe incuro zitari nke, Luka na we agahitamwo kwandika zimwe muri izo nyigisho nk’izashikirijwe ibintu vyifashe ukundi.

Igituma iyo nsiguro ya Yezu iba iy’agaciro si uko ibintu vy’impwemu biri muri yo bigera ibwina gusa, ariko ni uko ukwo kuri agushikiriza mu buryo bworoshe kandi butomoye. Mu kwigisha afatira ku bintu bisanzwe bishika, agakoresha ibintu abantu basanzwe bazi, bigatuma ivyiyumviro vyiwe bitahurwa neza n’abariko barondera ubuzima burushirije kuba bwiza mu buryo Imana ishaka.

Ni Bande vy’Ukuri Bahiriwe?

Umuntu wese arashaka guhirwa. Kubera ko Yezu ivyo abizi, atangura Insiguro yiwe yo ku Musozi mu kudondora abahiriwe vy’ukuri abo ari bo. Nk’uko dushobora kuvyiyumvira, abantu isinzi bamuteze amatwi ntibiteba guca bikwegera ubwenge bwabo. Mugabo kandi kuri benshi amajambo atangura ategerezwa kuba asa n’ayivuguruza.

Yezu yerekeza ivyo avuga ku bigishwa biwe, agatangura uku: “Hahirwa mwebge aboro; kuk’ubgami bg’Imana ar’ubganyu. Hahirwa mwebge mushonje none, kuko muzohāzwa. Hahirwa mwebge murira none, kuko muzotwenga. Muzoba muhiriwe abantu ni babanka . . . Uwo musi muze munezerwe mwitere hejuru, kukw impēra yanyu ari nyinshi mw ijuru.”

Iyo ni inkuru ishikirizwa na Luka y’intangamarara ya nya nsiguro Yezu yashikirije. Ariko turavye uko Matayo yavyanditse, Yezu avuga kandi yuko abatekereza, abagira imbabazi, ab’imitima itanduye be n’abanyamahoro, ari abahirwe. Yezu avuga ko abo bahiriwe kubera ko bazoragwa isi, bazogirirwa ikigongwe, bazobona Imana, n’uko bazokwitwa abana b’Imana.

Ariko rero, ico Yezu ashaka kuvuga mu vyerekeye uguhirwa, si ukuba uwupfa kuza aramwenyagura canke umunyarweze, nk’iyo umuntu ariko arijajurira. Ubuhirwe nyakuri ni ubushika kure kurusha aho, hakaba harimwo iciyumviro c’ukubumbwa n’ivyo ufise, ukwumva ko ushize akanyota kandi unyuzwe mu buzima.

Urumva rero ko nk’uko Yezu avyerekana, abahiriwe vy’ukuri ni abantu bemera icese yuko bakeneye ivy’impwemu, bakababazwa n’uko ari abacumuzi, hanyuma bagashika ku kumenya Imana no kuyikorera. Maze, naho boba bankwa canke bagahamwa bazira ugukora ivyo Imana igomba, barahiriwe kuko bazi ko bariko bagira ibihimbara Imana, kandi bakaba bazoronka impera yayo y’ubuzima budahera.

Ariko rero, benshi mu bumviriza Yezu, kimwe n’abantu bamwebamwe muri iki gihe, biyumvira yuko ugutunga n’ukwinezereza ari vyo bintu bituma umuntu agira ubuhirwe. Yezu we si ukwo abizi. Avuga ibintu binyuranye n’ivyo benshi mu bamuteze amatwi bibaza, akagira ati:

“Muzobona ibara, mwebge abatunzi; kuko muhejeje gutunganirwa. Muzobona ibara, mwebge muhāze none; kuko muzosonza. Muzobona ibara, mwebge mutwenga none; kuko muzoboroga murira. Muzobona ibara, ah’abantu bose bazobashemagiza; kukw ari ko ba sekuruza babo bāshemagije abīgira abavugishwa n’Imana.”

None Yezu aho ashaka kuvuga iki? Ni kubera iki ukugira amatungo, ugukurikirana ibihimbaro umuntu yitwengera, hamwe n’ukuba rurangiranwa mu bantu bikwega ibara? Ni kubera ko igihe umuntu afise ivyo bintu kandi akavyitako cane usanga ugukorera Imana akwigizayo mu buzima bwiwe, kandi ari kwo kwonyene kuzana ubuhirwe nyakuri. Ico gihe nyene, Yezu ntiyashatse kuvuga yuko kuba mworo gusa, gusonza hamwe n’ukuba nyamarira ari vyo bituma umuntu aba umuhirwe. Ariko kenshi usanga abantu mwene abo badafise aho bikora bumvira inyigisho za Yezu, gutyo bigatuma baronka umuhezagiro w’ubuhirwe nyakuri.

Ubukwirikira, Yezu yerekeza ku bigishwa biwe avuga ati: “Mur’umunyu w’isi.” Nkako nyene, ntashaka kuvuga ko abigishwa biwe ari umunyu bwunyu. Ahubwo, umunyu ni ikintu kizigama. Haba hariho ikirundo cawo hampande y’igicaniro ku rusengero rwa Yehova, abaherezi bahakorera bakaba barawukoresha mu kurunga ibimazi.

Abigishwa ba Yezu ni “umunyu w’isi” mu buryo bw’uko bashobora gutuma abantu bakingirwa. Si ivy’imbeshere, ubutumwa bashikiriza buzozigama ubuzima bw’abo bose babwakira! Buzotuma abantu mwene abo mu buzima bwabo bagira kamere z’ukutaba mahindagu, z’ukudahemuka n’ukuba abizerwa, bubakingire ugutituka ukwo ari kwo kwose kwo mu buryo bw’impwemu no mu vy’ukwigenza runtu.

Yezu abwira abigishwa biwe ati: “Mur’umuco w’isi.” Itara ntiryubikwako igisimbo, ahubwo barishira ku gitereko caryo, ari na ho Yezu avuga ati: “Abe ari k’umuco wanyu ubonesha imbere y’abantu.” Abigishwa ba Yezu ivyo babigira mu gushinga intahe ku mugaragaro, hamwe no mu gukora ari uburorero ntangamuco mu migenzo ijanye n’ingingo ngenderwako za Bibiliya.

Ingingo Ikirurutse Abayoboke ba Yezu Bakwiye Kugenderako

Indongozi z’idini babona Yezu nk’umugarariji w’Ivyagezwe vy’Imana, kandi baherutse mbere no kuja inama yo kumwica. Yezu rero uko abandanya gushikiriza Insiguro yiwe ku Musozi, asigura ati: “Ntimugire ngo naje gusenyura ivyagezwe cank’amajambo y’abavugishwa n’Imana. Sinaje kubisenyura, naje kubishitsa.”

Yezu arasonera Ivyagezwe vy’Imana bimwe bihebuje, kandi araremesha abandi kubisonera nk’ukwo. Kukaba nkako, avuga ati: “Ūzorenga ibgirizwa na rimwe ryo mu yoroshe hanyuma y’ayandi, akigisha abantu ngo bagire bartyo, mu bgami bgo mw ijuru azokwitwa muto hanyuma y’abandi,” ni ukuvuga yuko umuntu mwene uwo atokwinjiye mu Bwami na gato.

Ah’ukwiyobagiza Ivyagezwe vy’Imana, Yezu aranegura mbere inyifato zituma umuntu abirenga. Yezu amaze kuvuga yuko Ivyagezwe bivuga biti “Ntukice,” yongerako ati: “Ariko jeho ndababgira yuk’umuntu wese azorakira mugenzi we azoba ashikiwe no gutsindwa n’urubanza.”

Kubera ko ukubandanya kurakira umugenzi ari ikintu gikomeye cane, kumbure kikaba conashikana ku kumugandagura, Yezu arakoresha akarorero agasigura urugero umuntu akwiye gushikako kugira ngo ashikire amahoro. Abwiriza ati: “Ni wajana ishikanwa [ry’ikimazi] ryawe ku gicaniro, ukahībukira ko har’ico upfa na mugenzawe, usige ishikanwa ryawe imbere y’igicaniro, ubanze ugende wikiranure na mugenzawe, uce ugaruka, ushikane ishikanwa ryawe.”

Akwegera ivyiyumviro vy’abamwumviriza kw’ibwirizwa rigira indwi ryo muri ya Mabwirizwa Cumi, akabandanya ati: “Mwarumvise ko vyāvuzwe, ngo Ntugasambane.” Ariko rero, Yezu ariyamiriza mbere n’agatima kaguma karebaganira ku busambanyi. Agira ati: “Ndababgira yuk’umuntu wese [“aguma araba umugore ku buryo amugirira igihababu,” NW], aba amaze gusambana na we mu mutima wiwe.”

Yezu ngaha ntariko avuga gusa iciyumviro c’ubushegabo kiza igihe gito mu muntu, ahubwo avuga ‘ukuguma umuntu araba.’ Mwene ukwo kuguma umuntu araba kuravyura icipfuzo kirimwo igihababu, ugasanga nka hamwe akaryo koboneka vyovamwo ubusambanyi. Umuntu yokwirinda gute ngo ivyo ntibishike? Yezu aratanga akarorero k’ukungene hakenewe gufatwa ingingo zikomeye cane, mu kuvuga ati: “Ijisho ryawe ry’i buryo ni ryagutsitaza, urinogore, urite kure: . . . N’ukuboko kwawe kw’i buryo ni kwagutsitaza, uguce igikonjo, ugite kure.”

Abantu usanga kenshi bemera guheba ukuguru canke ukuboko kurwaye kugira ngo bakize ubuzima bwabo. Ariko nk’uko Yezu abivuga, ni nkenerwa mbere kuruta yuko umuntu ‘ata kure’ ikintu cose, naho coba ari ikintu c’agaciro nk’ijisho canke igikonjo, kugira yirinde ivyiyumviro canke ibikorwa biranga ubushegabo. Ahandiho, nk’uko Yezu asigura, abantu mwene abo bazotabwa muri Gehinomu (irundiro ry’umwavu ryaka umuriro ryari iruhande ya Yeruzalemu), hakaba hagereranya isangangurwa ry’ibihe bidahera.

Yezu kandi aravuga ivy’ukugene umuntu yobigenza ari kumwe n’abagirira abandi nabi canke bakabababaza. Yezu atanga iyi mpanuro: “Ntimurwanye umunyakibi: ūgukubise urushi mu musaya w’i buryo umuhindukirize n’uwundi.” Yezu ntashaka kuvuga yuko umuntu adakwiye kwikingira canke gukingira urugo rwiwe igihe rutewe. Urushi ntirukubitwa ngo rukomeretse umuntu ku mubiri, ahubwo ni ukumutuka. Ico Yezu ariko aravuga ngaha rero ni uko mu gihe hagize umuntu agerageza gusomborotsa indwano canke umuhazuko, haba mu gukubita uwundi urushi bushi canke mu kumucumitisha amajambo y’ukumutuka, kumusubiriza mu ndumane vyoba ari bibi.

Yezu amaze gukwegera ivyiyumviro vy’abantu ku cagezwe c’Imana cerekeye gukunda uwundi, avuga icese ati: “Ariko jeho ndababgire: Mukunde abansi banyu, musabire ababahama.” Mu kubaronsa impamvu ihambaye yotuma babigenza gutyo, yongerako ati: “Kugira ngo mube abana ba So wo mw ijuru, kukw atuma izuba ryiwe rirasira ababi n’abeza.”

Yezu asozera ico gihimba c’insiguro yiwe mu gukebura ati: “Mwebge ni mube agahore, nk’uko So wo mw ijuru ar’agahore.” Yezu ntashaka kuvuga ko abantu bashobora kuba agahore mu buryo batogira agasembwa. Ahubwo barashobora kwagura urukundo rwabo bagakunda n’abansi babo, mu kwigana Imana. Inkuru Luka ashikiriza ihuye n’iyo irerekana amajambo Yezu yavuze, ati: “[“Mugume mugira,” NW] imbabazi, nk’uko So wo mw ijuru agira imbabazi.”

Ugusenga be n’Ukwizigira Imana

Yezu ariko arashishikara insiguro yiwe, aratsindisha uburyarya bw’abantu barata ivyo bita ngo ni ukuyobokera Imana kwabo. Avuga ati: “Ni wagira ubuntu, ntuz’uvugishe inzamba imbere yawe, nk’ukw indyarya zikora.”

Yezu arabandanya ati: “Iyo musenga ntimukabe nka za ndyarya, kuko bakunda gusenga bahagaze mu masinagogi no mu mayirabiri, ngo biyerekane imbere y’abantu.” Ahubwo, abategeka ati: “Iy’usenga, uje haruguru mu nzu yawe, wugare urugi, usenge So aba mu mpisho.” Yezu ubwiwe yaratuye amasengesho imbere y’abantu, ugaca wumva rero ko mwene ayo masengesho atari yo ariko ariyamiriza. Ico ariko arabuza ni amasengesho avugwa kugira atangaze abayumviriza kandi agatuma bayashimagiza.

Yezu mu nyuma ahanura ati: “Igihe musenga, ntimukavuge amajambo amwe muza murayasubiramwo, nk’uko abanyamahanga bagira.” (NW) Yezu ntashaka kuvuga yuko ugusubiramwo ubwavyo ari bibi. Igihe kimwe, we ubwiwe yarakoresheje yisubiriza “amajambo amwe” igihe yariko arasenga. Mugabo ico yanka ni ukuvuga amungane yafashwe ku mutwe ‘ukaza urayasubiramwo,’ kumwe kwa ba bandi baza barakorakora intete z’ishapule mu gusubiramwo ibisabisho vyabo ku mutwe.

Kugira Yezu afashe abamwumviriza mu vy’ugusenga, atanga isengesho ry’akarorero ririmwo intakambo indwi. Zitatu za mbere ni iz’ukwemera icese mu buryo bukwiriye ukugaba n’ukuganza kw’Imana n’imigambi yayo. Ni ugusaba ko izina ry’Imana ryezwa, ko Ubwami bwayo buza, n’uko ivyo igomba bikorwa. Zine zisigaye na zo ni ivyo umuntu ubwiwe yisabira, bikaba ari ivy’ugusaba ivyo kurya vy’umusi, uguharirwa ivyaha, ukutoshwa nabi birenze ivyo umuntu yokwihanganira, n’ugukizwa wa mubi.

Mu kubandanya, Yezu avuga ivyerekeye umutego w’ukwitwararika amaronko y’ivy’umubiri mu buryo burenze urugero. Ahimiriza ati: “Ntimukīrundanirize ubutunzi mw isi, ah’inyenzi n’ingese bibumara, n’ibisuma bikīmba bikabgiba.” Si uko ubutunzi mwene ubwo bubora vyonyene, ahubwo kandi nta gaciro bugira ku Mana.

Ni co gituma Yezu avuga ati: “Ariko mwirundanirize ubutunzi mw ijuru.” Ivyo wobigira mu gushira umurimo urangurira Imana mu kibanza ca mbere mu buzima bwawe. Nta muntu ashobora gutwara agaciro twoba twarihesheje gutyo ku Mana canke impera ihambaye iva kuri ko. Maze Yezu yongerako ati: “Ah’ubutunzi bgawe buri, [ni] ho umutima wawe uzoba.”

Yezu mu gusubira kuvuga ivy’umutego w’ugukunda amaronko, atanga aka karorero: “Itara ry’umubiri n’ijisho. Ijisho ryawe iy’ari ryiza, umubiri wawe wose uba uri n’umuco. Arikw ijisho ryawe iy’ari ribi, umubiri wawe wose uba uri n’umwiza.” Ijisho rikora neza ribera umubiri nk’itara ryakiye ahantu h’umwiza. Ariko kugira ngo ijisho ribone neza, ritegerezwa kuba ritaremerewe, ni ukuvuga ko ritegerezwa kuba rihanze ikintu kimwe. Ijisho rikebaguzwa rituma umuntu abona ibintu ukutariko, agashira ivy’amaronko imbere y’umurimo w’Imana, ingaruka yavyo ikaba iy’uko ‘umubiri wose’ uja mu mwiza.

Ico kibazo Yezu acumvikanisha kuruta mu gukoresha aka karorero gakomeye: “Nta wusaba abami babiri: kuko yokwanka umwe, agakunda uwundi, canke yoguma kur’umwe, akagaya wa wundi. Ntimushobora gusaba Imana n’Itunga.”

Yezu ahejeje gutanga iyo mpanuro, akura amazinda abamwumviriza yuko badakwiriye kwirirwa baraganyiriza ku vyo bakeneye vy’umubiri niba bashira umurimo w’Imana mu kibanza ca mbere. Avuga ati: “Ni murābe ibiguruka vyo mu kirēre, ntibibiba, ntibishwabura, kandi ntivyimburira mu bigega, ariko So wo mw ijuru arabitunga.” Maze abaza ati: “Mbega mwebge ntimubiruta cane?”

Ubukwirikira, Yezu yerekeza ku mashurwe yo mw’ishamba, avuga yuko “na Salomo mu bgiza bgiwe bgose atar’ashajije nka rimwe mur’ayo.” Arabandanya ati: “Non’Imana ko yambika ivyatsi vyo ku misozi irtyo, . . . mbega ntizorushiriza kubambika, mwebge ab’ukwizera guke mwe?” Yezu rero asozera ati: “Nuko ntimukiganyire, ngo Tuzorya iki? canke Tuzonywa iki? canke Tuzokwambara iki? . . . Ariko So wo mw ijuru arazi kw ivyo vyose mubikena. Ariko mubanze mwitwaririke ubgami bg’Imana n’ukugororoka kwayo, ni ho ivyo vyose muzovyongerwa.”

Inzira Igana ku Buzima

Inzira igana ku buzima ni iy’ukwisunga inyigisho za Yezu. Ariko ivyo ntivyoroshe kugira. Abafarizayo nk’akarorero, bari bahengamiye ku guhinyura abandi bimwe bibabaje, kandi umengo abatari bake barabigana. Nuko, Yezu abandanya Insiguro yiwe yo ku Musozi, mu gutanga iyi nkeburo: “Ntimugahinyurire mu mitima yanyu, namwe mukazohinyurwa. Kuko, uko muhinyura abandi, ari ko muzohinyurwa namwe.”

Gukurikira ubuyobozi bw’abo Bafarizayo banegura birenze urugero, birimwo ingeramizi. Nk’uko bivugwa mu nkuru ishikirizwa na Luka, iyo ngeramizi Yezu ayitangira akarorero mu kuvuga ati: “Impumyi yoshobora kujana iyindi mpumyi? Zompi ntizogwa mu cobo?”

Kuba uwunegura abandi birenze urugero, gukuza udukosa twabo no kudufatirako, ni ukubagirira nabi bikomeye. Yezu abaza rero ati: “Woshobora ute kubgira mugenzawe, uti Zana ngutosore akabango kari mu jisho ryawe; nawe ubgawe nturābe [ikigiga k]iri mu jisho ryawe? Wa ndyarya we, banza witosore [ikigiga k]iri mu jisho ryawe, uheze ubone neza gutosora akabango kari mu jisho rya mugenzawe.”

Ivyo ntibishaka kuvuga yuko abigishwa ba Yezu badakwiye gukoresha ubukerebutsi ku vyerekeye abandi bantu, kuko avuga ati: “Ivyera vy’Imana ntimukabihe imbga, kand’imaragarita zanyu ntimuziterere ingurube.” Ukuri kwo mw’Ijambo ry’Imana ni kweranda. Kumeze nk’imaragarita z’ikigereranyo. Ariko iyo hagize abantu bameze nk’imbwa canke ingurube badashima ukwo kuri kw’agaciro, abigishwa ba Yezu bakwiye kureka abo bantu hanyuma bakarondera abavyakira neza kuruta.

Naho Yezu yavuze ivyerekeye isengesho imbere yaho muri ya Nsiguro yiwe yo ku Musozi, ubu na ho ashimikira ku vy’uko dukeneye gushishikara gusenga. Ahimiriza ati: ‘[“Nimugume,” NW] musaba, muzohabwa.’ Mu gutanga akarorero k’ukuntu Imana igabirije gutanga, Yezu abaza ati: “Har’umuntu muri mwebge, umwana wiwe yomusaba umutsima, akamuha ibuye? . . . None mwebge, ko muzi guha abana banyu ingabire nziza muri babi, mbega So wo mw ijuru ntazorushiriza rwose guha ivyiza abamusavye?”

Ubukurikira Yezu atanga icabaye itegeko rurangiranwa mu vy’ukuntu twigenza, rikunda kwitwa Itegeko ry’Agakura. Avuga ati: “Ivyo mugomba kw abantu babagirira vyose mube ari ko mubagirira namwe.” Kubaho wisunga iryo tegeko birimwo ibikorwa ukora mu kugirira ineza abandi, ukabafata nk’uko ushaka ko bagufata.

Ivy’uko inzira ijana mu buzima itoroshe, birahishurwa n’itegeko Yezu atanga, ati: “Muce mw irembo ripfunganye; kukw irembo ryagutse, n’inzira y’igihamo, ari vyo bijana abantu mu mahonero, kand’abahaca ni benshi. Arikw irembo ripfunganye, n’inzira ntoya, ni vyo bija mu bu[zima], kand’abahabona ni bake.”

Kubera ko umuntu yohakwa cane kuzimizwa, Yezu atuburira ati: “Mwirinde abīgira abavugishwa n’Imana; baza kuri mwebge bambaye nk’intama; arikw imbere ar’amabingira y’inkazi.” Nk’uko Yezu abivuga, kurya nyene ibiti vyiza n’ibiti bibi bishobora kumenyerwa ku vyamwa vyavyo, abahanuzi b’ikinyoma bashobora kumenyerwa ku kuntu bigenza no ku nyigisho zabo.

Yezu abandanya asigura yuko ivyo umuntu avuga atari vyo vyonyene bimugira umwigishwa wiwe, ariko ko ari ivyo akora. Hari abantu bavuga yuko Yezu ari Umwami wabo, mugabo niba batariko bakora ivyo Se agomba, Yezu avuga ati: “Nzobajinjibur[a], nti Nta ho nigeze mbamenya; mviraho, mwa bakora ibizira mwe.”

Amaherezo, Yezu asozera insiguro yiwe mu buryo bw’intibagirwa. Avuga ati: “Uwumva ayo majambo yanje wese, akayakora, asa n’umuntu w’ubgenge yubatse inzu yiwe ku rutare. Isegenya iragwa, inkukūra iratwaza, igihuhuta kirahuhuta, bisūrira kuri nya nzu, ntiyagwa, kuko yar’imase ku rutare.”

Ku rundi ruhande Yezu amenyesha ati: “Uwumva ayo majambo yanje wese, ntayakore, asa n’umuntu w’imburabgenge, yubatse inzu yiwe ku musenyi. Isegenya iragwa, inkukūra iratwaza, igihuhuta kirahuhuta, bisūrira kuri nya nzu, irasenyuka, kand’isenyerana ryayo riba irikomeye.”

Yezu arangije insiguro yiwe, ya masinzi arajorezwa cane n’uburyo yigisha, kuko abigisha nk’umuntu afise ububasha, atari nk’indongozi zabo z’idini. Luka 6:12-23; Matayo 5:1-12; Luka 6:24-26; Matayo 5:13-48; 6:1-34; 26:36-45; 7:1-29; Luka 6:27-49.

▪ Yezu ari hehe igihe ashikiriza insiguro yiwe y’intibagirwa kuruta zose, ni bande bahari, kandi ni ibiki vyabaye imbere y’uko ayishikiriza?

▪ Ni kuki bidatangaje kuba Luka yandika inyigisho zimwezimwe z’iyo nsiguro nk’aho zoba zashikirijwe ibintu vyifashe ukundi?

▪ Ni igiki gituma iyo nsiguro ya Yezu iba iy’agaciro cane gutyo?

▪ Abahiriwe vy’ukuri ni bande, kandi bahiriwe kubera iki?

▪ Ababona ibara ni bande, kandi ni kubera iki?

▪ Ni mu buryo ubuhe abigishwa ba Yezu ari “umunyu w’isi” n’ “umuco w’isi”?

▪ Yezu yerekana ate ko yubaha cane Ivyagezwe vy’Imana?

▪ Ni inyigisho iyihe Yezu atanga kugira ngo umuntu arandurane n’imizi ivyotuma yica canke agasambana?

▪ Yezu ashaka kuvuga iki igihe avuga ivy’uguhindukiza irindi tama?

▪ Dushobora dute kuba agahore nk’uko Imana ari agahore?

▪ Ni inyigisho nki Yezu atanga ku vy’isengesho?

▪ Ni kuki ubutunzi bwo mw’ijuru ari bwo bw’agaciro kuruta, kandi umuntu aburonka gute?

▪ Ni uburorero ubuhe butanzwe bwo gufasha umuntu ngo yirinde ugukunda amaronko?

▪ Ni kubera iki Yezu avuga yuko umuntu adakwiye kwirirwa araganyiriza?

▪ Yezu avuga iki ku vyerekeye uguhinyura abandi; yamara yerekana gute yuko abigishwa biwe bakeneye gukoresha ubukerebutsi ku biraba abantu?

▪ Yezu yongera kuvuga iki ku biraba ugusenga, kandi ni itegeko irihe atanga ku kuntu umuntu akwiye kwigenza?

▪ Yezu yerekana ate yuko inzira igana mu buzima itobaye iyoroshe, n’uko twohakwa kuzimizwa?

▪ Yezu asozera ate insiguro yiwe, kandi igira ingaruka iyihe?