Tubandanye gukora iciza

“Mushishikare . . . gukora iciza.”​—LUKA 6:35.

1, 2. Ni kubera iki gukorera abandi iciza bitama vyoroshe?

GUKORERA abandi iciza ushobora gusanga ari urugamba. Abo tugaragariza urukundo boshobora kutadusubiriza mu ndumane. Naho nyene turonderera ineza abantu mu kwihatira kubabwira “inkuru nziza y’ubuninahazwa ya ya Mana ihimbawe” be n’iy’Umwana wayo, boshobora kutabinerwa canke ntibabikenguruke. (1 Tim. 1:11) Abandi baragaragaza ko ari “abansi b’igiti co gusinzikarizwako ca Kristu” buzuye urwanko. (Flp. 3:18) None twebwe abakirisu, dukwiye kubafata gute?

² Yezu Kristu yabwiye abigishwa biwe ati: “Mushishikare gukunda abansi banyu no gukora iciza.” (Luka 6:35) Nimuze ubu na ho turimbure twitonze iyo mpanuro duhabwa. Vyongeye, turaza kwungukira ku bindi vyiyumviro Yezu yashikirije ku bijanye n’ugukorera abandi iciza.

‘Mukunde abansi banyu’

3. (a) Mu majambo yawe bwite, nuvuge muri make amajambo ya Yezu dusanga muri Matayo 5:43-45. (b) Indongozi z’idini ry’Abayuda zo mu kinjana ca mbere zari zatsimbataje ukubona ibintu mu buryo ubuhe ku bijanye n’Abayuda be n’abatari Abayuda?

³ Muri ya Nsiguro rurangiranwa yo ku Musozi Yezu yashikiriza, yabwiye abariko bamwumviriza gukunda abansi babo no gusabira ababahama. (Soma Matayo 5:43-45.) Abari ngaho ico gihe bari Abayuda, bano bakaba bari bazi neza itegeko ry’Imana rigira riti: “Ntihaze hagire uwihōra, cank’ūbīkira inzigo abo mu bgoko bgabo; ariko mukunde bagenzi banyu nk’uko mwikunda.” (Lew. 19:18) Indongozi z’idini ry’Abayuda zo mu kinjana ca mbere zabona ko kuvuga ngo “abo mu bgoko bgabo” canke ngo “bagenzi banyu” vyerekeza ku Bayuda gusa. Rya Tegeko rya Musa ryasaba yuko Abisirayeli baguma bitandukanije n’ayandi mahanga, ariko bo baratsimbataje iciyumviro c’uko ngo abatari Abayuda bose bari abansi, ni ukuvuga abantu bo kwanka urunuka.

4. Abigishwa ba Yezu bategerezwa gufata gute abansi babo?

⁴ Igitandukanye n’ivyo, Yezu yavuze ati: “Mushishikare gukunda abansi banyu no gusabira ababahama.” (Mat. 5:44) Abigishwa biwe bategerezwa gufatana urukundo ababanka bose. Nk’uko umwanditsi w’Injili Luka yavyanditse, Yezu yavuze ati: “Ndababwiye mwebwe muriko murumviriza: Mushishikare gukunda abansi banyu, kugirira neza ababanka, guhezagira ababavuma, gusabira ababatuka.” (Luka 6:27, 28) Nka kurya nyene abantu bo mu kinjana ca mbere bafashe nka nkama ayo majambo ya Yezu, na twebwe ‘turagirira neza abatwanka’ mu kutagera ingere ku yindi, ariko tukabakorera ibiranga ubuntu. ‘Turahezagira abatuvuma’ mu kubavugisha n’umutima mwiza. Vyongeye, ‘turasabira abaduhama’ mu kutugirira nabi ku mubiri canke babicishije mu bundi buryo butandukanye bwo ‘kudutuka.’ Mwene ayo masengesho dutura aba ari ayo gusaba mu buryo buranga urukundo ko abo baduhama bohindura umutima, maze bagakora ivyotuma Yehova abatonesha.

5, 6. Ni kubera iki dukwiye gukunda abansi bacu?

⁵ Ni kubera iki none dukwiye gukunda abansi bacu? Yezu yavuze ati: “Kugira mwerekane ko muri abana ba so ari mw’ijuru.” (Mat. 5:45) Dukurikije iyo mpanuro, turaba “abana” b’Imana mu buryo bw’uko twigana Yehova, we “atuma izuba rirasira ababi n’abeza, agatuma n’imvura igwira abagororotse n’abatagororotse.” Nk’uko inkuru ya Luka ibitomora, Imana “[ira]girira ubuntu intashima n’abanyakibi.”​—Luka 6:35.

⁶ Mu gushimika ku kuntu vyari bihambaye ko abigishwa biwe ‘bashishikara gukunda abansi babo,’ Yezu yavuze ati: “Nimwakunda ababakunda, ni impembo nki muzoba mufise? None abatozakori bo ntibagira nk’ivyo nyene? Kandi nimwaramutsa abavukanyi banyu gusa, ikidasanzwe muba mukoze ni igiki? None abanyamahanga bo ntibagira nk’ivyo nyene?” (Mat. 5:46, 47) Hamwe twokunda abadukunda gusa, nta “mpembo” n’imwe iva ku Mana ivyo vyotuzanira canke ngo bitume idutonesha. Mbere n’abatozakori, abo wasanga muri rusangi batarabwa ryiza, na bo nyene barakunda ababakunda.​—Luka 5:30; 7:34.

7. Ni kubera iki turamukije “abavukanyi” bacu gusa kitoba ari ikintu kidasanzwe?

⁷ Abayuda bari bamenyereye gukoresha ijambo “amahoro” mu kuramukanya. (Abac. 19:20; Yoh. 20:19) Ivyo vyagaragaza ko uwo baba baramukije bamwipfuriza kugira amagara meza, gutunga no gutunganirwa. Nticoba ari ikintu “kidasanzwe” turamukije gusa abo tubona ko ari “abavukanyi” bacu. Nk’uko Yezu yavyerekanye, ikintu nk’ico n’“abanyamahanga” barakigira.

8. Yezu yariko aremesha abamwumviriza gukora iki igihe yavuga ati: ‘Mutegerezwa kuba abatunganye’?

⁸ Icaha abigishwa ba Kristu barazwe catumye bidashoboka ko baba abatagira akanenge n’abatunganye. (Rom. 5:12) Yamara, Yezu yasozereye ico gice c’insiguro yiwe mu kuvuga ati: “Mutegerezwa rero kuba abatunganye, nk’uko So wo mw’ijuru atunganye.” (Mat. 5:48) Gutyo rero, yariko aremesha abamwumviriza kwigana ‘Se wabo wo mw’ijuru’ Yehova mu kuryohora urukundo rwabo, ni ukuvuga bakarugira urwuzuye mu gukunda abansi babo. Ikintu nk’ico ni co na twebwe twitezweko.

Ni kubera iki dukwiye guharira abandi?

9. Imvugo ngo “uduhebere imyenda yacu” isobanura iki?

⁹ Igihe duhariye uwaducumuyeko tubigiranye imbabazi, tuba turiko turabandanya gukora iciza. Nkako, rya sengesho ry’akarorero Yezu yigishije ririmwo amajambo agira ati: “Uduhebere imyenda yacu nk’uko natwe twayihebeye abayidufitiye.” (Mat. 6:12) Ariko ntiwumve, ivyo ntivyerekeza ku guhebera abandi imyenda y’ivy’amahera. Injili ya Luka irerekana ko mu kuvuga “imyenda”, Yezu yari afise mu muzirikanyi ibicumuro, kuko iyo Njili ivuga iti: “Utubabarire ibicumuro vyacu, kuko natwe ubwacu tubabarira umuntu wese adufitiye umwenda.”​—Luka 11:4.

10. Ku bijanye n’ukubabarira abandi, dushobora gute kwigana Imana?

¹⁰ Turakwiye kwigana Imana yo iharira ata gahigihigi abacumuzi bigaya. Intumwa Paulo yanditse ati: “Mucike abanyabuntu kuri bagenzi banyu, mugire impuhwe z’ikibabarwe, mubabariranira ata gahigihigi nk’uko Imana na yo yabababariye ata gahigihigi biciye kuri Kristu.” (Ef. 4:32) Umwanditsi wa Zaburi Dawidi yaririmvye ati: “Uhoraho yuzuye imbabazi, n’umunyabuntu, ateba kuraka, agira ikigongwe cinshi. . . . Ntiyatugiriye ibihwanye n’ivyaha vyacu, ntiyadushubirije mu nkōko ibihwanye n’ibigabitanyo vyacu. . . . Nk’ukw i burasirazuba hitanguye i burengerazuba, uko ni ko yashize kure ibicumuro vyacu. Nk’uko se w’abana abagirira akagongwe, ni k’Uhoraho akagirira abamwubaha. Kukw azi iremwa ryacu, yibuka ko tur’umukungugu.”​—Zab. 103:8-14.

11. Imana ibabarira bande?

¹¹ Imana ishobora kubabarira abantu igihe gusa na bo baba bababariye ababacumuyeko. (Mrk. 11:25) Mu gushimika kuri ico ciyumviro, Yezu yongeyeko ati: “Kuko nimwababarira abantu amakosa yabo, na So wo mw’ijuru azobababarira; ariko nimutababarira abantu amakosa yabo, na So ntazobababarira amakosa yanyu.” (Mat. 6:14, 15) Emwe, Imana ibabarira gusa abababarira abandi ata gahigihigi! Vyongeye, uburyo bumwe bwo kubandanya dukora iciza ni ugukurikiza iyi mpanuro Paulo yatanze igira iti: “Nk’uko na Yehova yabababariye ata gahigihigi, namwe nyene mugenze mutyo.”​—Kol. 3:13.

“Nimureke guca urubanza”

12. Ni impanuro iyihe Yezu yatanze ku bijanye n’ugucira abandi urubanza?

¹² Hari ubundi buryo bwo gukora iciza bwavuzwe muri ya Nsiguro yo ku Musozi igihe Yezu yabwira abigishwa biwe kureka gucira abandi urubanza, maze aca arakoresha ikigereranyo gikomeye kugira ngo ashimike kuri ico ciyumviro. (Soma Matayo 7:1-5.) Reka turimbure ico Yezu yashaka kuvuga igihe yagira ati: “Nimureke guca urubanza.”

13. Abariko bumviriza Yezu bashobora gute ‘kuguma barekura’?

¹³ Injili ya Matayo irasubiramwo amajambo Yezu yavuze iti: “Nimureke guca urubanza kugira ngo ntimuzocirwe urubanza.” (Mat. 7:1) Luka na we avuga ko Yezu yagize ati: “Mureke guca urubanza, namwe ntimuzogenda muciriwe urubanza; kandi mureke gutsindisha, namwe ntimuzogenda mutsindishijwe. Mugume murekura, namwe muzorekurwa.” (Luka 6:37) Abafarizayo bo mu kinjana ca mbere barakavya mu vyo gucira abandi urubanza, ivyo bakabigira mu kwumira ku migenzo idashingiye ku Vyanditswe. Uwo ari we wese mu bariko bumviriza Yezu yahora acira abandi urubanza, yabwirizwa ‘kureka guca urubanza.’ Aho guca urubanza, yategerezwa ‘kuguma arekura’, ni ukuvuga akababarira abandi amakosa bamukorera. Nk’uko twamaze kubibona, intumwa Paulo yaratanze impanuro isa n’iyo ku bijanye no kubabarira abandi.

14. Mu kubabarira abandi, abigishwa ba Yezu botumye abantu bakora iki?

¹⁴ Mu kubabarira abandi, abigishwa ba Yezu botumye abantu bagira agatima ko kubabariranira. Yezu yavuze ati: “Urubanza muca [ni] rwo namwe muzocirwa; kandi ingero mugeresha ni yo namwe bazobagereshereza.” (Mat. 7:2) Bivanye n’ingene dufata abandi, ico tubiba ni co duheza tugashwabura.​—Gal. 6:7.

15. Yezu yerekanye gute ko ari bibi kwama umuntu anebagura abandi?

¹⁵ Uribuka ko kugira ngo Yezu yerekane ingene ari bibi kwama umuntu anebagura abandi, yabajije ati: “Kubera iki none uraba akatsi kari mu jisho ry’umuvukanyi wawe, mugabo nturimbure ikigiga kiri mu jisho ryawe? Canke ushobora gute kubwira umuvukanyi wawe ngo: ‘Tega ngukure akatsi mu jisho ryawe’, kandi mu jisho ryawe bwite hariyo ikigiga?” (Mat. 7:3, 4) Umuntu afise impengamiro yo kunebagura abandi aritwararika cane n’akanenge ide kari mu “jisho” ry’umuvukanyi wiwe. Uwo muntu anebagurana ni nk’aho aba ariko aravuga ko umuvukanyi wiwe adatahura neza ibintu kandi ko atabibona mu buryo bubereye. Naho koba ari agakosa gatoyi nka kurya kw’akatsi, uwo muntu anebagurana aca yitanganiza ‘gukura nya katsi.’ Arirarika n’uburyarya n’akantu arondera ngo gufasha uwo muvukanyi kubona ibintu mu buryo butomoye kuruta.

16. Ni kubera iki bishobora kuvugwa yuko Abafarizayo bari bafise “ikigiga” mu jisho ryabo?

¹⁶ Indongozi z’idini ry’Abayuda ni zo canecane wasanga ari karuhariwe mu vyo kunebagura abandi. Reka tubitangire akarorero: Igihe umugabo umwe w’impumyi yari yahumuwe na Kristu yatangaza ko Yezu ategerezwa kuba yavuye ku Mana, Abafarizayo bamwishuye n’ishavu n’akantu bati: “Wewe uko wakabaye wavukiye mu bicumuro, none uriko wigisha twebwe?” (Yoh. 9:30-34) Ku bijanye n’ukutabona neza ibintu vyo mu vy’impwemu be n’ubushobozi bwo kubona ibintu mu buryo bubereye, Abafarizayo bari bafise “ikigiga” mu jisho ryabo bwite bakaba n’impumyi ruhebwa. Ku bw’ivyo, Yezu yaciye avuga ati: “Wa mwiyorobetsi we! Banza ukure nya kigiga mu jisho ryawe bwite, maze uzoheza ubone neza ingene ukura akatsi mu jisho ry’umuvukanyi wawe.” (Mat. 7:5; Luka 6:42) Niba twiyemeje gukora iciza no gufata neza abandi, ntituzoba abantu bakavya mu kubanebagura, ngo twame nantaryo turondera akatsi k’ikigereranyo mu jisho ry’umuvukanyi wacu. Ahubwo riho, tuzokwemera ko turi abanyagasembwa kandi ko ku bw’ivyo dukwiye kwirinda gucira urubanza abo dusangiye ukwizera no kubanebagura.

Ingene dukwiye gufata abandi

17. Twisunze ibivugwa muri Matayo 7:12, dukwiye gufata abandi gute?

¹⁷ Muri ya Nsiguro yo ku Musozi, Yezu yarerekanye ko Imana igaragariza abasavyi bayo agatima nk’aka sebibondo mu kwishura amasengesho bayitura. (Soma Matayo 7:7-12.) Birahambaye cane kuba Yezu yaratanze iyi ngingo igenga ukuntu dukwiye kwigenza, ati: “Ibintu vyose rero mushaka ko abantu babagirira, namwe nyene mutegerezwa kubibagirira.” (Mat. 7:12) Igihe dufata abantu muri ubwo buryo, ni ho honyene dushobora kugaragaza ko turi abayoboke b’ukuri ba Yezu Kristu.

18. Rya “Tegeko” ryerekanye gute ko dukwiye gufata abandi nk’uko dushaka ko na bo badufata?

¹⁸ Yezu ahejeje kuvuga yuko dukwiye gufata abandi nk’uko dushaka ko na bo badufata, yaciye yongerako ati: “Ico ni co Itegeko n’Abahanuzi bisobanura.” Igihe dufashe abantu muri ubwo buryo Yezu yatomoye neza, tuba turiko dukora duhuza n’intumbero ya rya “Tegeko”, rino rikaba ari ivyanditswe bigize igitabu ca Bibiliya c’Itanguriro gushika ku bigize igitabu co Gusubira mu vyagezwe. Uretse ko ivyo bitabu bihishura umugambi wa Yehova wo gushiraho urubuto rwokuyeho ikibi, birimwo kandi rya Tegeko Imana yaha ihanga rya Isirayeli ibicishije kuri Musa mu 1513 B.G.C. (Ita. 3:15) Mu bindi bintu vyari muri iryo Tegeko, haravugwamwo mu buryo butomoye ko Abisirayeli bategerezwa kutarenganya, kutagira nkunzi no gukorera iciza aboro be n’abanyamahanga baba muri ico gihugu.​—Lew. 19:9, 10, 15, 34.

19. “Abahanuzi” berekana gute ko dukwiye gukora iciza?

¹⁹ Mu kuvuga “Abahanuzi,” Yezu yari afise ku muzirikanyi ibitabu vy’ubuhanuzi vyo mu Vyanditswe vy’igiheburayo. Ivyo bitabu birimwo ubuhanuzi bwerekeye Mesiya bwarangukiye kuri Kristu ubwiwe. Ivyo vyanditswe birerekana kandi ko Imana ihezagira abasavyi bayo igihe bakoze ibigororotse mu nyonga zayo kandi bagafata abandi mu buryo bubereye. Nk’akarorero, ubuhanuzi bwa Yesaya bwarahaye Abisirayeli iyi mpanuro igira iti: “Uku ni k’Uhoraho agize, ati Nimwitondere ibiroranye, mukore ivy’ukugororoka. . . . Hahirwa umuntu akora ivyo, n’umwana w’umuntu abibangiriza, . . . akarinda ukuboko kwiwe ntigukore icaha na kimwe.” (Yes. 56:1, 2) Emwe, Imana yiteze ko abasavyi bayo babandanya bakora iciza!

Twame nantaryo dukorera iciza abandi

20, 21. Amasinzi yakiriye gute ya Nsiguro ya Yezu yo ku Musozi, kandi ni kubera iki ukwiye kuyizirikanako?

²⁰ Twarimbuye gusa bikeyi mu vyiyumviro vyinshi bihambaye cane Yezu yashikirije muri ya Nsiguro yiwe yo ku Musozi idasanzwe. Naho ari ukwo, turashobora kubona bitagoranye ukuntu abumvise ivyo yavuze bavyakiriye ico gihe. Iyo nkuru yahumetswe ivuga iti: “Hanyuma Yezu arangije ayo majambo, amasinzi ajorezwa n’uburyo yigisha; kuko yabigisha nk’uwufise ubukuru, atari nka ba banditsi babo.”​—Mat. 7:28, 29.

²¹ Yezu Kristu yaragaragaje mu buryo budaharirizwa ko ari we ‘Mujanama w’igitangaza’ yari yaravuzwe imbere y’igihe. (Yes. 9:6) Ya Nsiguro yo ku Musozi ni akarorero ruheta k’ubumenyi bwa Yezu bugaragaza ukuntu Se wiwe wo mw’ijuru abona ibintu. Ikigeretse kuri ivyo vyiyumviro twarimbuye, iyo nsiguro iravuga vyinshi ku bijanye n’ubuhirwe nyakuri, ukuntu twokwirinda ubushegabo, uburyo bwo gukora ibigororotse, ico dutegerezwa gukora kugira ngo twironkere kazoza gatekanye kandi gateye umunezero, ikavuga n’ibindi vyinshi. Ubona gute usubiye gusoma witonze kandi ubijanisha n’isengesho ibivugwa muri Matayo ikigabane ca 5 gushika ku ca 7? Nuzirikane ku mpanuro nziza igitangaza Yezu yatanze ziri muri ivyo vyanditswe. Nukurikize mu buzima bwawe ivyo Kristu yavuze muri ya Nsiguro yiwe yo ku Musozi. Gutyo rero, uzorushiriza kuba uwushoboye guhimbara Yehova, gufata abandi mu buryo bubereye no kubandanya ukora iciza.

Wokwishura gute?

• Dukwiye gufata gute abansi bacu?

• Ni kubera iki dukwiye kubabarira abandi?

• Yezu yavuze iki ku bijanye n’ugucira abandi urubanza?

• Twisunze ibivugwa muri Matayo 7:12, dukwiye gufata gute abandi?

[Iciyumviro ku rup. 10]

Woba uzi igituma Yezu yavuze ati: “Nimureke guca urubanza”?

[Ifoto ku rup. 8]

Ni kubera iki dukwiye gusabira abaduhama?

[Ifoto ku rup. 10]

Woba wama nantaryo ufata abandi nk’uko na we wipfuza ko bagufata?