Numenye Ingene Ukwiye Kwishura

IBIBAZO bimwebimwe bimeze nk’itutuza ry’ikizinu. Igihimba kinini kuruta kiba cihishije mw’ivu. Ijambo ryihishije inyuma ni ryo kenshi riba rihambaye kuruta ikibazo ubwaco.

N’igihe nyenekubaza aba ashashaye kuronka inyishu, ukumenya kwawe ingene ukwiye kwishura bishobora gusaba ko umenya ivyo uvuga uko bingana n’aho wohera ico kibazo. (Yoh. 16:12) Mu bihe bimwebimwe, nk’uko Yezu yavyeretse intumwa ziwe, umuntu ashobora kubaza amakuru adafitiye uburenganzira, canke atogira ico amumariye vy’ukuri.—Ivyak. 1:6, 7.

Ivyanditswe biduhanura biti: “Imvugo zanyu zamane ubuntu bg’Imana, zirunzwe umunyu, kugira ngo mumenye ingene mukwiye kwishura umuntu wese.” (Kol. 4:6) Rero imbere y’uko twishura, turakeneye kurimbura atari gusa ico tugiye kuvuga, mugabo ukuntu tugiye kukivuga.

Nutegere Ico Nyene Kubaza Yiyumvira

Abasadukayo baragerageje gutegesha Yezu ikibazo cerekeye izuka ry’umugore yari yarabiriwe incuro nka zingahe. Ariko rero, Yezu yari azi yuko mu vy’ukuri batemera izuka. Nuko rero, mu gusubizayo yishuye ikibazo cabo mu buryo bubogora ivyiyumviro vyabo bitari vyo; ari vyo ico kibazo cari gishimikiyeko. Akoresheje ukuzirikana kwa ruhasha hamwe n’inkuru bari bazi yo mu Vyanditswe, Yezu yaradomye urutoke ku kintu bataribwigere barimbura—ikimenyamenya gitomoye c’uko Imana igiye koko kuzozura abapfuye. Inyishu yatanze yarajoreje abamurwanya gushika aho batinya gusubira kumubaza ikibazo.—Luka 20:27-40.

Kugira umenye ukuntu ukwiye kwishura, utegerezwa na wewe nyene gutegera ivyiyumviro vy’abakubaza ibibazo hamwe n’ibibaraje ishinga. Nk’akarorero, umunyeshure mwigana canke umuntu mukorana ku kazi ashobora kukubaza igituma udahimbaza Noweli. Ni kuki abibajije? Yoba vy’ukuri yitwararitse igituma, canke yoba gusa yibaza nimba urekuriwe kuryoherwa? Kugira ngo ubimenye, ushobora gukenera kubaza icavyuye ico kibazo. Heza rero wishure ufatiye aho. Woshobora kandi gukoresha ako karyo kugira werekane ingene gukurikiza ubuyobozi bwa Bibiliya bidukingira iyo mice y’umusi mukuru yanigiye abantu mu menshi ikababera n’umuzigo.

Dufate yuko utumiwe ngo uje kuvuga ivyerekeye Ivyabona vya Yehova imbere y’umugwi w’abanyeshure. Inyuma y’insiguro yawe, bashobora kubaza ibibazo. Nimba nya bibazo bisa n’ibivuye ku mutima kandi bitazigura, inyishu zoroshe kandi zidomako zishobora kuba ari zo nziza kuruta. Nimba nya bibazo bigaragaza ko hari ukwinubana mu kibano, hari aho wosanga ugize ikintu kirushiriza kuba ciza utangurije inyishu zawe amajambo magufimagufi y’igishobora gusena ivyiyumviro vy’abantu kuri ivyo bibazo hamwe n’igituma Ivyabona vya Yehova bahitamwo kureka Bibiliya ikaba ari yo ibashingira urupimo. Kenshi biraba ngirakamaro kubona mwene ivyo bibazo nk’ibintu biraje ishinga abantu, atari nk’ibihari—naho nyene bishobora kuba vyashikirijwe muri ubwo buryo. Inyishu utanga rero irakuronsa akaryo ko kwagura iciyumviro abakwumviriza bafise, ikabaha amakuru y’imvaho, kandi ikabasigurira ishimikiro ryo mu Vyanditswe ry’ivyo twemera.

Mbega uzobigenza gute igihe umukoresha adashaka kuguha akaruhuko ngo witabe ihwaniro? Ubwa mbere, nurimbure ibintu ufatiye ku kuntu we abibona. Mbega umubwiye ko wokora amasaha y’inyongera ku wundi mwanya vyoba vyofasha? Umusiguriye yuko inyigisho zitangirwa ku mahwaniro zidufasha kuba inzirabugunge, abakozi b’abizigirwa, hari ico vyohindura? Werekanye yuko utirengagiza inyungu ziwe, kumbure azokurekera ivyo abona ko bikubereye ibihambaye mu buzima. Mugabo bite mu gihe ashaka ko ukora ibintu biranga ubugunge? Ukwanka gutomoye kurimwo n’iciyumviro co mu Vyanditswe kwoshobora kwerekana impagararo yawe. Mugabo ubona kumbure hari ikindi ciza coshikwako hamwe wobanza kuzirikana hamwe na we yuko umuntu ashaka kubesha ngo amushikire ku co ashaka canke kumwibira yoshobora no kumubesha canke akamwiba?

Ku rundi ruhande, kumbure uri umunyeshure adashaka kugira uruhara mu mirimo imwimwe yo kw’ishure inyuranye n’Ivyanditswe. Niwibuke yuko umwigisha kumbure adasangiye nawe ivyiyumviro, kandi kugumiza ibintu bitunganye mw’isomero ni ibanga ajejwe. Urugamba ruba ruguhanze ni (1) kwerekana ko wubahiriza ibimuraje ishinga, (2) gusigura impagararo yawe mu rupfasoni, be no (3) gushikama ku vyo uzi ko bizohimbara Yehova. Kugira ngo bigende neza kuruta, hashobora kuba hadakenewe gusa ijambo ryoroheje, ritazigura ry’ivyo wemera. (Imig. 15:28) Nimba ukiri muto, nta nkeka so wawe canke nyoko wawe bazogufasha gutegura ico wovuga.

Rimwe na rimwe, ushobora gusabwa n’umuntu mukuru ngo wiregure ibirego warezwe. Umupolisi, umukuru mu ntwaro, canke umucamanza boshobora kugusaba kwishura ibibazo vyerekeye ukugamburuka itegeko rinaka, ngo uvuge impagararo yawe ya gikirisu y’ukutagira aho uhengamiye, canke inyifato ufise ku vyo kuja mu birori vy’ukwiratira igihugu. Ukwiye none kwishura gute? Bibiliya ihanura ko ukwiye kwishurana “ubugwaneza, [u]tinya.” (1 Pet. 3:15) Niwibaze kandi igituma ivyo bibazo biraje abantu ishinga, hanyuma mu rupfasoni wemange ico kibazo. Hanyuma? Intumwa Paulo yarerekeje ku biri mu mategeko y’Abaroma bikingira uburenganzira bw’umuntu. Na wewe woshobora kudoma urutoke ku biri mu mategeko bikora mu rubanza urimwo. (Ivyak. 22:25-29) Kumbure inkuru z’imvaho zerekeye impagararo yafatwa n’Abakirisu ba kare be n’iyifatwa n’Ivyabona vya Yehova kw’isi yose vyoshobora gutuma uwo mukuru abona ibintu mu bundi buryo. Canke woshobora kudoma urutoke ku kuntu ukwemera ubukuru bw’Imana mu vy’ukuri bituma abantu barushiriza kugamburuka ubutisubirako amategeko y’abantu abereye. (Rom. 13:1-14) Uri imbere y’abantu nk’abo, kwerekana imvo zo mu Vyanditswe zishigikira impagararo yawe vyoshobora kwakirwa neza.

Uko Nyene Kubaza Abona Ivyanditswe

Igihe uhitamwo uburyo wishura, ushobora kandi gukenera kurimbura uko nyene kubaza abona Ivyanditswe Vyeranda. Yezu ivyo yarabigize igihe yariko yishura ikibazo Abasadukayo babajije ku vyerekeye izuka. Kubera yari azi ko bemera gusa ibitabu vyanditswe na Musa, Yezu yazirikanye ku nkuru yari muri Pentateki (ibitabu bitanu vya mbere vya Musa), atangura amajambo yiwe mu kuvuga ati: “Arikw abāpfuye ko bazuka na Mose ya[ra]bimenyekanishije.” (Luka 20:37) Ushobora na wewe gusanga vyoba ngirakamaro usubiyemwo uduce twa Bibiliya uwukwumviriza yemera kandi asanzwe azi.

Bite none mu gihe uwukwumviriza atabona Bibiliya nk’iyifise ubukuru? Raba ico intumwa Paulo yagize mu nsiguro yashikirije kuri Areyopago, nk’uko vyanditswe mu Vyakozwe 17:22-31. Yarabwiye ukuri kwo mu Vyanditswe atarinze gushoka asubiramwo ivyo muri Bibiliya. Aho bikenewe, ushobora kubigenza nk’ukwo nyene. Mu bibanza bimwebimwe ushobora kugiranira ibiyago nka bingahe n’umuntu imbere y’uko ushoka werekeza kuri Bibiliya. Igihe rero winjijemwo Bibiliya, ushobora gusanga ubaye inkerebutsi mu kubanza gutanga imvo nkeyi zituma bikwiriye kurimburwa, aho kuvuga ushikamye yuko ari Ijambo ry’Imana. Ariko rero, intumbero yawe ikwiye kuba ugushinga intahe itomoye ku vyerekeye umugambi w’Imana, maze mu nyuma ukareka umwe akwumviriza akibonera ico Bibiliya ivuga. Bibiliya irashwirura cane kuruta ikindi kintu cose ubwacu twoshobora kuvuga.—Heb. 4:12.

“Zamane Ubuntu”

Ese ukuntu bibereye ko abasavyi ba Yehova, we ubwiwe akaba yuzuye ubuntu, babwirwa kureka ngo imvugo zabo “zamane ubuntu . . . , zirunzwe umunyu”! (Kol. 4:6; Kuv. 34:6) Ivyo bisigura yuko dukwiye kuvugana umutima mwiza, no mu gihe vyoba bisa n’uko uwo tubwira atabikwiriye. Imvugo yacu ikwiye kuba iy’akanovera, idakankama canke ngo ibe iya gihuruduka.

Abantu benshi bari mu mukazo udasanzwe, kandi ku musi ku musi barabwirwa amajambo ababaza. Igihe tugendeye mwene abo bantu, bashobora kuvuga badukankamira. None twobigenza gute? Bibiliya ivuga iti: “Ukwishura kwiyoroheje guhwama uburake.” Mwene iyo nyishu irashobora kandi kworosha umuntu afise iciyumviro kirwanya icacu. (Imig. 15:1; 25:15) Ku bantu bama bakankamirwa imisi yose, inyifato canke ijwi biranga umutima mwiza bishobora kubakwegera ku buryo bumviriza inkuru nziza tuzanye.

Nta co turondera mu guhazuka n’abatubaha ukuri. Ahubwo, icipfuzo cacu ni ugufasha abadukundiye kwiyumvira, dukoresheje Ivyanditswe. Tutaravye ibintu duhwana na vyo, tugumiza mu muzirikanyi yuko dukwiye kwishurana umutima mwiza be n’ukujijuka kw’uko imihango y’agaciro Imana yatanze ari iyo kwizigirwa.—1 Tes. 1:5.

Ingingo Ubwawe Wifatira be n’Ibiraba Ijwi ryo mu Mutima

Igihe umutohoji wa Bibiliya canke uwo dusangiye ukwizera abajije ico akwiye gukora igihe ibintu vyifashe ukunaka, ukwiye kwishura ute? Ushobora kuba uzi ico wewe ubwawe wogira. Mugabo umuntu wese ni we ategerezwa kwibarizwa ingingo yifatira mu buzima. (Gal. 6:5) Intumwa Paulo yarasiguye yuko yaremesheje ‘kwumvira ku bw’ukwizera’ mu bantu yigisha. (Rom. 16:26) Ako ni akarorero keza twokurikira. Umuntu afata ingingo kugira ngo gusa ahimbare uwumwigisha Bibiliya canke uwundi muntu, aba ariko arakorera abantu, ntaba abayeho ku bw’ukwizera. (Gal. 1:10) Nuko rero, inyishu yoroheje, idomako, ishobora kuba atari yo ishimisha nyene kubaza.

None woshobora gute kwishura mu buryo bujanye n’inyobozo za Bibiliya? Ushobora gukwegera ivyiyumviro ku ngingo ngenderwako za Bibiliya zibereye no ku turorero turi mu nkuru ya Bibiliya. Mu bihe bimwebimwe, woshobora kumwereka uburyo yogira ubushakashatsi kugira yitorere nya ngingo ngenderwako na nya turorero. Woshobora no kuganira na we kuri nya ngingo ngenderwako no ku gaciro ka nya turorero, mugabo ata kuvyerekeza ku bihejeje gushika. Nubaze nya muntu nimba azibonamwo ikintu coshobora kumufasha gufata ingingo iranga ubukerebutsi. Numuremeshe kurimbura ingendo yoba ihimbara Yehova yishimikije izo ngingo ngenderwako n’utwo turorero. Gutyo uba uriko uramufasha ‘kumenyereza ububasha bwiwe bwo gutegera bwo gutandukanya iciza n’ikibi.’—Heb. 5:14, NW.

Gutanga Insasanuro ku Makoraniro y’Ishengero

Amakoraniro y’ishengero rya gikirisu kenshi araduha uturyo two kumenyesha icese ukwizera kwacu. Uburyo bumwe ivyo tubigiramwo, ni mu gutanga insasanuro mu kwishura ibibazo. None dukwiye kuzitanga gute? Twozitangana icipfuzo co guhezagira, canke kuvuga neza, Yehova. Ico ni co umwanditsi wa Zaburi Dawidi yagira igihe yaba ari “mu makoraniro.” (Zab. 26:12) Dukwiye kandi gutanga insasanuro mu buryo buremesha abo dusangiye ukwizera, tukaboherereza ku “rukundo no ku bikorwa vyiza” (NW) nk’uko intumwa Paulo yahimirije. (Heb. 10:23-25) Gutohoza ivyigwa hakiri kare birashobora kudufasha kubishikako.

Igihe usabwe gutanga insasanuro, amajambo yawe nuyagumize yoroheje, atomoye kandi ari magufi. Ntuvuge ibiri mu ngingo vyose; vuga iciyumviro kimwe gusa. Utanze igihimba kimwe gusa c’inyishu, ivyo bizotuma abandi baronka akaryo ko gutanga insasanuro z’inyongera. Biraba nzanakunguko canecane kugira ico tuvuze ku vyanditswe vyatanzwe mu mayagwa. Igihe ugira ivyo, niwihate gukwegera ivyiyumviro ku gahimba ka nya gisomwa kerekeye iciyumviro kiriko kirarimburwa. Niwige gutanga insasanuro mu majambo yawe bwite aho gusoma ivyo mu ngingo. Ntuvurugwe n’uko insasanuro utanze itavugitse neza cane. Ivyo rimwe na rimwe birashikira umuntu wese atanga insasanuro.

Biribonekeza yuko kumenya ingene dukwiye kwishura bidasaba gusa kumenya inyishu ubwayo. Bisaba ugutegera. Mugabo ese ukuntu bimara akanyota igihe utanga insasanuro ikuvuye ku mutima kandi ikora abandi ku mutima!—Imig. 15:23.