Ikigabane ca Cumi n’Umunani
“S’Ab’Isi”
1. (a) Imbere y’urupfu rwiwe, ni igiki Yezu yasavye Imana ku bw’abigishwa biwe? (b) Ni kuki ‘kutaba uw’isi’ bihambaye rwose?
MW’IJORO rya buca yicwa, Yezu yarasabiye abigishwa biwe. Kubera ko yari azi yuko Shetani yobashizeko umukazo munini bidasanzwe, Yezu yabwiye Se ati: “Singusaba ng’ubakūre mw isi, ariko ng’ubarinde wa Mubi. S’ab’isi, nk’uko nanje ntar’uw’isi.” (Yohana 17:15, 16) Ni kuki kwitandukanya n’isi bihambaye rwose? Ni kubera ko Shetani ari we mutware w’iyi si. Abakirisu ntiboshima gucika ab’isi iri mu minwe yiwe.—Luka 4:5-8; Yohana 14:30; 1 Yohana 5:19.
2. Ni mu buryo ubuhe Yezu atari uw’isi?
2 Kutaba uw’isi ntivyasigura yuko Yezu ata rukundo yari afitiye abandi. Ahubwo nyabuna, yarakijije abarwaye, arazura abapfuye, yongera arigisha abantu ivyerekeye Ubwami bw’Imana. Mbere yaratanze ubuzima bwiwe ku bw’abantu. Mugabo ntiyakunda inyifato n’ibintu bidashimwa n’Imana vyagirwa n’abagaragaza agatima k’isi ya Shetani. Ni co gituma yatuburiye ku bintu nk’ibi: ivyipfuzo vy’ubushegabo, kubaho umuntu yiruka inyuma y’amaronko, hamwe n’uguhahamira ubukuru. (Matayo 5:27, 28; 6:19-21; Luka 20:46, 47) Ntibitangaje rero kuba Yezu yaranirinze politike z’isi. Naho nyene yari Umuyuda, ntiyagize uruhande ajako mu matati y’ivya politike yari hagati y’Abaroma n’Abayuda.
‘Ubwami Bwanje Si Ubwo Muri Iyi Si’
3. (a) Ni ibiki indongozi z’idini y’Abayuda zagirije Yezu imbere ya Pilato, kandi kuki? (b) Ni igiki cerekana yuko Yezu atari anezwe ivyo kuba umwami kw’isi?
3 Rimbura ivyabaye igihe indongozi z’idini y’Abayuda zafatisha Yezu hanyuma akajanwa kwa Ponsiyo Pilato, uno akaba yari buramatari w’Uburoma. Mu vy’ukuri, izo ndogozi zari zahagaritswe umutima n’uko Yezu yari yashize uburyarya bwazo ku kabarore. Kugira ngo batume uwo buramatari afatira ingingo Yezu, bamwagirije bavuga bati: “Uyu twamubonye agomesha ubgoko bgacu, ababuza gutanga ikori rya Kayisari, yivuga ngo ni Kristo, Umwami.” (Luka 23:2) Birumvikana yuko ico cari ikinyoma, kuko umwaka umwe imbere yaho, igihe abantu bashaka kwimika Yezu, yiyankiye. (Yohana 6:15) Yari azi ko yobaye Umwami wo mw’ijuru muri kazoza. (Luka 19:11, 12) Vyongeye, ntiyokwimitswe n’abantu, ariko yokwimitswe na Yehova.
4. Yezu yifata gute ku vyo kuriha amakori?
4 Imisi itatu gusa imbere y’uko Yezu afatwa, Abafarizayo baragerageje kuraba yuko Yezu yovuga ikintu comukurikirana ku vyerekeye ukuriha amakori. Mugabo yavuze ati: “Ni munyereke idenariyo [ikingorongoro c’Abaroma]; igishushanyo n’ivyanditswe kuri yo n’ivya nde?” Bamubwiye bati “N’ivya Kayisari,” yishura ati: “Ivya Kayisari ni mubihe Kayisari, ivy’Imana mubihe Imana.”—Luka 20:20-25.
5. (a) Ni icigwa ikihe Yezu yahaye abigishwa biwe igihe yafatwa? (b) Yezu yasiguye gute imvo y’ivyo yari yakoze? (c) Ukwo gusambishwa kwavuyemwo iki?
5 Ariko ntiwumve, Yezu ntiyigishije ukugarariza abakuru bo muri iyi si. Igihe abasoda hamwe n’abandi bagabo baza gufata Yezu, Petero yasokoye inkota hanyuma ayikubita umwe muri abo bagabo, amuca ugutwi. Mugabo Yezu yavuze ati: “Subiza inkota yawe ahayo; kukw ababanguye inkota bose bazokwicwa n’inkota.” (Matayo 26:51, 52) Bukeye Yezu ivyo yakora yarabisiguriye Pilato, mu kuvuga ati: “Ubgami bganje s’ubgo mur’iyi si; iyaba ubgami bganje bgar’ubgo mur’iyi si, abagendanyi banje baba bārwanye, ngo simpabge Abayuda.” (Yohana 18:36) Pilato yariyemereye yuko ‘ata caha abona’ kuri Yezu. Mugabo kubera ukugondozwa n’ako kagwi k’inkozi z’ikibi, Pilato yaramanikishije Yezu.—Luka 23:13-15; Yohana 19:12-16.
Abigishwa Bakurikira Uburongozi bwa Yezu
6. Abakirisu bo mu ntango berekanye gute yuko birinda agatima k’isi mugabo bagakunda abantu?
6 Abigishwa ba Yezu baratahuye rero ico ukutaba uw’isi vyasaba. Vyasobanura kuzibukira agatima k’isi n’ivyo igira biranga ukutibanga Imana, muri ivyo hakaba harimwo vya bintu vy’ukwinezereza vyari vyuzuyemwo ubukazi vyabera ku bibuga Abaroma bagiriramwo inkino n’ibirori. Kubera bataja muri ivyo, abigishwa bitwa abanka abantu. Mugabo aho kwanka abantu, bobo barakora bagatama mu gufasha abandi ngo bungukire ku vyo Imana yatunganije kugira ngo haboneke ubukiriro.
7. (a) Kubera ko abigishwa bo mu ntango batari ab’isi, ni ibiki vyabashikiye? (b) Babona gute abategetsi b’intwaro hamwe n’ivyo kuriha amakori, kandi kuki?
7 Abayoboke ba Yezu barahamwe nk’uko na we nyene yari yarahamwe, kenshi bagahamwa n’abakuru b’intwaro babwiwe ibitari vyo. Yamara, nko mu 56 G.C., intumwa Paulo yarandikiye Abakirisu b’i Roma, abahimiriza ‘kugamburukira abaganza [abakuru b’intwaro], kuko ata kuganza kutava ku Mana.’ Si ukuvuga yuko Yehova ari we ashiraho intwaro zo mw’isi, ahubwo arazireka zikabaho gushika aho Ubwami bwiwe buzoganziriza isi yose ari bwonyene. Birabereye rero kuba Paulo yahanuye Abakirisu kwubaha abakuru bo muri iyi si no kuriha amakori.—Abaroma 13:1-7; Tito 3:1, 2.
8. (a) Abakirisu babwirizwa kugamburukira abakuru ba rutura kugeza hehe? (b) Abakirisu bo mu ntango bakurikiye gute akarorero ka Yezu?
8 Ariko rero, ukugamburukira abakuru b’intwaro kubwirizwa kuba ukugeze, si muri vyose. Igihe amategeko ya Yehova n’ay’umuntu bihushanye, abasavyi ba Yehova babwirizwa kugamburuka amategeko yiwe. Raba ivyo igitabu kimwe (On the Road to Civilization—A World History) kivuga ku Bakirisu bo mu ntango: “Abakirisu baranka kuja mu bikorwa bimwebimwe vyasabwa abavukagihugu b’Abaroma. Abakirisu . . . bumva ko baramutse binjiye mu gisirikare boba barengeye akarimbi ukwizera kwabo. Ntibaja ku giti c’ivya politike. Ntibasenga umwami w’abami.” Igihe sentare nkuru y’Abayuda ‘yihaniza’ abo bigishwa kwamamaza inkuru nziza, bishuye bati: “Igikwiye n’ukwumvira Imana kuyirutisha abantu.”—Ivyakozwe 5:27-29.
9. (a) Ni kuki Abakirisu b’i Yeruzalemu babigenjeje kurya mu 66 G.C.? (b) Ni mu buryo ki ivyo ari icitegererezo c’agaciro?
9 Ku biraba amatati yo mu vya politike n’ayo mu vya gisirikare, abo bigishwa baguma batagira aho bahengamiye na gato. Mu 66 G.C., Abayuda b’i Yudaya baragumutse barwanya Kayisari. Ingabo z’Abaroma ntizatevye guca zikikuza Yeruzalemu. None Abakirisu bo muri ico gisagara bakoze iki? Baributse impanuro Yezu yari yarabahaye yo gusohoka bakava muri ico gisagara. Igihe Abaroma bari barasubiye inyuma, Abakirisu barahunze mu kujabuka Uruzi Yorodani bagenda mu misozi y’i Pela. (Luka 21:20-24) Ukutagira aho bahengamiye kwarabereye icitegererezo Abakirisu b’abizerwa mu nyuma.
Abakirisu Babwirizwa Kutagira Aho Bahengamira Muri Iyi Misi y’Iherezo
10. (a) Ivyabona vya Yehova baguma bikorera igikorwa ikihe, kandi kuki? (b) Baguma batagira aho bahengamira ku vyerekeye ibiki?
10 Mbega amakuru ya kahise yoba yerekana ko muri iyi misi y’iherezo hari umugwi wakurikiranye ivyo kutagira aho uhengamiye na gato, mu kwigana Abakirisu bo mu ntango? Egome, Ivyabona vya Yehova ni ko babigenza. Muri ico kiringo cose, bagumye bamamaza yuko Ubwami bw’Imana ari bwo buryo bwonyene bwo kuzana amahoro aramba, ugusagamba kuramba n’ubuhirwe buramba, ku bakunda ukugororoka. (Matayo 24:14) Mugabo ku biraba amatati aba hagati y’amahanga, bagumye batagira aho bahengamiye na gato.
11. (a) Ukuba Ivyabona batagira aho bahengamiye binyuranye gute n’ivyo abakuru b’amadini bagira? (b) Ivyabona vya Yehova babona gute ivyo abandi bagira mu vya politike?
11 Mu buryo buhushanye rwose na bo, abakuru b’amadini y’iyi si baragiye cane mu vya politike. Mu bihugu bimwebimwe, baragize iyamamaza rishigikira abashaka kwitoza, canke ribarwanya. Bamwe mu bakuru b’idini usanga mbere bafise ibiti mu vya politike. Abandi na bo baza baraja mu matwi abanyapolitike kugira baze baremera imigambi abo bakuru b’amadini baba bemeje ngo iranguke. Ariko rero, Ivyabona vya Yehova ntibisuka muri politike. Eka mbere ntibagerageza kubuza abandi kuja mu mugambwe kanaka, guharanira igiti kanaka c’ivya politike, canke kuja mu matora. Yezu yavuze ko abigishwa biwe batobaye ab’isi, ari na co gituma Ivyabona vya Yehova ata ruhara na rumwe bagira mu vya politike.
12. Ni ibiki vyabaye kubera ko amadini y’iyi si ari n’aho ahengamiye?
12 Nk’uko Yezu yari yarabibuye, ibihugu vyaragiye mu ndwano kenshi. Mbere n’imigwi isangiye igihugu ihora irwana. (Matayo 24:3, 6, 7) Indongozi z’amadini usanga hafi imisi yose zamye zishigikira igihugu ngo kirwanye ikindi, canke umugwi w’abarwana ngo urwanye uwundi, zigahimiriza abayoboke bazo ngo na bo nyene bagire kuno. None vyavuyemwo iki? Abasangiye idini usanga bamarana mu ntambara, kubera gusa ko badasangiye ubwenegihugu canke ubwoko. Ivyo birahushanye n’ivyo Imana igomba.—1 Yohana 3:10-12; 4:8, 20.
13. Ivyabaye vyerekana iki ku vyerekeye ukuba Ivyabona vya Yehova batagira aho bahengamira?
13 Ariko rero, Ivyabona vya Yehova bamye batagira aho bahengamiye na gato mu matati yose. Umunara w’Inderetsi (mu Congereza) wo ku wa 1 Munyonyo 1939 wavuze uti: “Abari ku ruhande rw’Umukama bose bazoguma batagira aho bahengamiye ku bihugu biri mu ntambara.” Ivyabona vya Yehova mu bihugu vyose, be no mu kuntu ibintu biba vyifashe kwose, babandanya kugumana iyo mpagararo. Ntibareka amapolitike y’isi be n’intambara bitera amacakubiri ngo bisambure ikivukano mpuzamakungu cabo. ‘Inkota zabo bazivunjamwo amasuka, n’amacumu bakayavunjamwo inkero.’ Kubera ko batagira aho bahengamira, ntibaciga kurwana.—Yesaya 2:3, 4; 2 Ab’i Korinto 10:3, 4.
14. Kubera ko Ivyabona vya Yehova baguma bitandukanije n’isi, ni ibiki vyababayeko?
14 Imwe mu ngaruka y’ukutagira aho duhengamira ni iyihe? Yezu yavuze ati: “Kuko mutar’ab’isi, . . . ni co gituma isi ibanka.” (Yohana 15:19) Abenshi mu Vyabona vya Yehova baratawe mu mvuto kubera ko ari abasavyi b’Imana. Bamwe baratotejwe, n’ukwicwa baricwa, bisa n’ivyaba ku Bakirisu bo mu kinjana ca mbere. Ivyo ni kubera ko Shetani, we “kimana c’iyi si,” arwanya abasavyi ba Yehova, na bo bakaba atari ab’isi.—2 Abakorenti 4:4, UB; Ivyahishuriwe 12:12.
15. (a) Mbega amahanga yose ariko atera agana ku ki, kandi Ivyabona vya Yehova biyubara ngo birinde iki? (b) Ni kuki ukwitandukanya n’isi ari ikintu gikomeye cane?
15 Abasavyi ba Yehova barahimbawe kubona atari ab’isi, kuko ibihugu vy’iyi si vyose biriko bigenda bigana umuhero wavyo kuri Harumagedoni. (Daniyeli 2:44; Ivyahishuriwe 16:14, 16; 19:11-21) Tuzokwirinda ico cago kubera ko tuguma twitaramuye muri iyi si. Kubera yuko tugize igisata c’abantu bunze ubumwe kw’isi yose, ntiduhemuka ku Bwami bw’Imana bwo mw’ijuru. Ego ni ko, kutaba ab’isi bituma twikwegera agatwengo n’uruhamo. Mugabo vuba cane, ivyo bizohera, kuko isi y’ubu irongowe na Shetani izoba yasanganguwe ubutagisubira kubaho. Ku rundi ruhande, abasukurira Yehova bazokwiberaho ibihe bidahera mw’isi nshasha yiwe igororotse, barongowe n’Ubwami bw’Imana.—2 Petero 3:10-13; 1 Yohana 2:15-17.
Ikiganiro c’Isubiramwo
• Yezu yerekanye gute ico bisigura ‘kutaba uw’isi’?
• Abakirisu bo mu ntango bifata gute ku vyerekeye (a) agatima k’isi, (b) abategetsi b’isi be (c) n’ukuriha amakori?
• Ni mu buryo ubuhe Ivyabona vya Yehova bo mu bihe vya none batanze ikimenyamenya c’uko batagira aho bahengamiye?
[Ifoto ku rup. 165]
Yezu yarasiguye yuko we hamwe n’abayoboke biwe ‘batari ab’isi’