Nugume wiyegereje ishirahamwe rya Yehova

UMWIGISHWA YAKOBO yanditse ati: “Mwiyegereze Imana, na yo izobiyegereza.” (Yak. 4:8) Emwe, naho tudatunganye, Yehova ntari hejuru cane canke kure cane ku buryo atokwumva amasengesho tumutura. (Ivyak. 17:27) None twokwiyegereza Yehova gute? Twomwiyegereza mu kwunga ubucuti somambike na we, bumwe mu buryo bwo kubigira bukaba ari kumutura isengesho n’ubwira. (Zab. 39:12) Twotsimbataza kandi ubucuti dufitaniye n’Imana biciye ku kwiga Ijambo ryayo Bibiliya. Muri ubwo buryo, turamenya Yehova Imana, umugambi wiwe hamwe n’ivyo atwitezeko. (2 Tim. 3:16, 17) Ivyo biratuma tumukunda kandi tugatinya gukora ibintu bitamuhimbara.​—Zab. 25:14.

² Ariko rero, ntidushobora kwiyegereza Yehova tudaciye ku Mwana wiwe Yezu. (Yoh. 17:3; Rom. 5:10) Nta wundi muntu n’umwe yodufasha kumenya Yehova kuruta uko Yezu yabigize. Yari azi neza Se wiwe ku buryo yavuze ati: “Nta wuzi Umwana uwo ari we, atari Se; kandi nta wuzi Se uwo ari we atari Umwana, be n’uwo Umwana agomba kumuhishurira.” (Luka 10:22) Ku bw’ivyo, igihe twiga inkuru zo mu Njili kugira tumenye ukuntu Yezu yiyumvira n’ukuntu yiyumva, ni nk’aho tuba turiko turiga ukuntu Yehova yiyumvira n’ukuntu yiyumva. Ivyo biradufasha kurushiriza kwiyegereza Imana yacu.

³ Tuyobowe n’Umwana w’Imana, turakomeza ubucuti dufitaniye na Yehova mu kuguma twiyegereje igice kiboneka c’ishirahamwe ryiwe kitwigisha gukora ivyo agomba. Nk’uko biboneka muri Matayo 24:45-47, Databuja Yezu Kristu yaragenye “umushumba w’umwizigirwa kandi w’ubwenge” ngo aronse inzu y’abizera “ibifungurwa . . . ku gihe kibereye.” Muri iki gihe, uwo mushumba araturonsa umukimba w’ibifungurwa vyo mu buryo bw’impwemu. Biciye kuri iryo shirahamwe, Yehova araduhanura gusoma Ijambo ryiwe buri musi, kwitaba amakoraniro tudahorereza no kugira uruhara ruboneka mu gikorwa co kwamamaza “inkuru nziza y’ubwami.” (Mat. 24:14; 28:19, 20; Yos. 1:8; Zab. 1:1-3) Ntitwipfuza kwigera tubona uwo mushumba w’umwizigirwa mu buryo butabereye. Dukwiye kwihatira kuguma hafi y’igice kiboneka c’ishirahamwe rya Yehova kandi tukemera ubuyobozi kiduha. Ivyo bizotuma turushiriza kwiyegereza Imana yacu Yehova kandi bizodukomeza vyongere bidukingire, naho twoba turi mu bigeragezo.

IGITUMA IBIGERAGEZO BIGUMA VYONGEREKANA

⁴ Ushobora kuba umaze imyaka myinshi mu kuri. Nimba ari ukwo, nta gukeka ko uzi ico ari co kwihanganira ibintu bigerageza ukudahemuka kwawe. Ariko naho ata gihe kinini coba kihaciye umenye Yehova kandi wifatanya n’abasavyi biwe, urazi ko Shetani aguma arwanya uwo wese ayobokera ubusegaba bwa Yehova. (2 Tim. 3:12) Rero, waba umaze kwihanganira ibintu bike canke vyinshi, nta mvo n’imwe yotuma ugira ubwoba canke ucika intege. Yehova asezerana ko azogukomeza be n’uko azoguha impera mu kukurokora maze akaguha ubuzima budahera.​—Heb. 13:5, 6; Ivyah. 2:10.

⁵ Twese vyoshika tugahura n’ibigeragezo muri iyi misi ya nyuma y’isi ya Shetani. Kuva Ubwami bw’Imana bushinzwe mu 1914, Shetani nta burenganzira agifise bwo kuja mw’ijuru. Yarakororewe kw’isi, aho we n’amadayimoni yiwe badashobora kurenga. Amagorwa menshi tubona kw’isi, harimwo n’uruhamo rukomeye rushikira abasavyi ba Yehova bamwiyeguriye, biva kw’ishavu ryinshi Shetani afise kandi ni ikimenyamenya c’uko ubutegetsi bwiwe bubi buri mu kurangira.​—Ivyah. 12:1-12.

⁶ Shetani ishavu riraniga kubera yacishijwe bugufi kandi arazi ko asigaranye igihe gito. Afadikanije n’amadayimoni yiwe, arakora yivuye inyuma kugira ahagarike igikorwa co kwamamaza Ubwami yongere ahungabanye ubumwe bw’abasavyi ba Yehova. Ivyo bituma tuja mu ntambara yo mu buryo bw’impwemu. Bibiliya ivuga ko ari “intambara yo kunigana, atari ukunigana n’abantu b’amaraso n’inyama, ahubwo [ku]nigana n’intwaro, n’ubukuru, n’abatware b’iyi si y’umwiza, n’ibinyankomezi vy’impwemu vy’ibibisha mu bibanza vyo mw’ijuru.” Nimba dushaka gutahukana intsinzi turi ku ruhande rwa Yehova, dutegerezwa kwumirako muri urwo rugamba kandi tukazigama umwambaro wacu w’ibirwanisho vyo mu buryo bw’impwemu. Dutegerezwa “guhagarara [du]shikamye imbere y’amayeri” ya Shetani. (Ef. 6:10-17) Ivyo bisaba ko twihangana.

NUTSIMBATAZE UKWIHANGANA

⁷ Ukwihangana ni “ubushobozi bwo kurinda ingorane canke imibabaro.” Mu buryo bw’impwemu, ukwihangana kwerekeza ku gushikama mu gukora ibibereye igihe turi mu ngorane, igihe turwanijwe, igihe duhamwe canke igihe duhanganye n’ikindi kintu cotuma duhemukira Imana. Abakirisu babwirizwa gutsimbataza ukwihangana. Ivyo bifata igihe. Uko dutera imbere mu vy’impwemu ni ko ubushobozi bwacu bwo kwihangana bwongerekana. Twihanganiye ibigeragezo bitobito bidushikira kuva tugitangura kuba abakirisu, turakomera kandi tugashobora kuzokwihanganira ibigeragezo bikomeye biraririye kudushikira. (Luka 16:10) Ntitworindira ko dushikirwa n’ibigeragezo bikomeye ngo abe ari ho twiyemeza gushikama mu kwizera. Tubwirizwa kugira uwo mwiyemezo imbere y’uko bidushikira. Intumwa Petero yarerekanye ko dutegerezwa gutsimbataza ukwihangana hamwe n’izindi kamere zishimwa n’Imana. Yavuze ati: “Namwe nimugire ico mushubijeyo mu kwihata mwivuye inyuma: muronse ukwizera kwanyu ingeso nziza, ingeso nziza zanyu muzironse ubumenyi, ubumenyi bwanyu muburonse ukwigumya, ukwigumya kwanyu mukuronse ukwihangana, ukwihangana kwanyu mukuronse ukwihebera Imana, ukwihebera Imana kwanyu mukuronse ukwiyumvamwo abavukanyi, ukwiyumvamwo abavukanyi mukuronse urukundo.”​—2 Pet. 1:5-7; 1 Tim. 6:11.

⁸ Amajambo Yakobo yanditse aratwereka ko bihambaye gutsimbataza ukwihangana. Yagize ati: “Mubibone nk’akanyamuneza gusa, bene wacu, igihe muhuye n’ibigeragezo bitari bimwe, muzi yuko ako gaciro kagejejwe k’ukwizera kwanyu kazana ukwihangana. Mugabo ukwihangana nikunonosore igikorwa cakwo, kugira mube abanonosoye kandi mutagira agahonzi muri vyose, mudahajije mu kintu na kimwe.” (Yak. 1:2-4) Yakobo avuga ko dukwiye kwemera ibigeragezo kandi tukabinezerererwa kuko bidufasha gutsimbataza ukwihangana. Woba ubona ibintu muri ubwo buryo? Yakobo aca yerekana ko ukwihangana kuryohora kamere yacu ya gikirisu kandi kugatuma twemerwa n’Imana. Egome, ukwihangana kwacu kurakomera buri musi uko duhura n’ibigeragezo tukabitsinda. Ukwihangana na kwo kuraheza kugatuma dutsimbataza izindi kamere dukeneye.

⁹ Ukwihangana kwacu kurahimbara Yehova; kuzotuma aduha impembo y’ubuzima budahera. Yakobo yongeye kuvuga ati: “Hahiriwe umuntu aguma yihanganiye ikigeragezo, kuko niyashimwa azoronka rwa rugori rw’ubuzima Yehova yasezeranira ababandanya kumukunda.” (Yak. 1:12) Egome, kwihangana bizotuma turonka ubuzima budahera. Tudafise ukwihangana ntitwoguma mu kuri. Hamwe twokwemera gutwarwa n’imikazo yo muri iyi si, twoca dusubira mw’isi. Tudafise ukwihangana, ntitwogumana impwemu ya Yehova kandi ntitwokwama icamwa cayo mu buzima bwacu.

¹⁰ Nimba dushaka kuguma twihangana muri ibi bihe bigoye, dutegerezwa kubona imibabaro mu buryo bubereye. Niwibuke ko Yakobo yanditse ati: “Mubibone nk’akanyamuneza gusa.” Ivyo vyoshobora kuba urugamba, kuko hari igihe bisaba ko twihanganira imibabaro yo ku mubiri canke intuntu. Ariko wibuke ko utihanganye wohava ubura ubuzima muri kazoza. Inkuru y’ivyashikiye intumwa iradufasha kubona ukuntu dushobora guhimbarwa igihe turi mu mibabaro. Iyo nkuru tuyisanga mu gitabu c’Ivyakozwe, aho dusoma duti: “Barengutsa intumwa, barazitonagura, bazitegeka kureka kuvuga zishimikije izina rya Yezu, hanyuma barazireka ziragenda. Abo rero baragenda bava imbere y’Inama Nkuru, banezerewe kubera ko bari babonywe ko babereye guteterezwa ku bw’iryo zina.” (Ivyak. 5:40, 41) Intumwa zaratahura yuko imibabaro zarimwo cari ikimenyamenya c’uko zigamburuka itegeko rya Yezu be n’uko Yehova azishima. Haciye imyaka, Petero yaravuze ibijanye n’agaciro ko kubabazwa duhorwa ubugororotsi igihe yandika ikete ryiwe rya mbere ahumekewe n’Imana.​—1 Pet. 4:12-16.

¹¹ Akandi karorero ni aka Paulo na Silasi. Igihe bariko bararangura igikorwa cabo c’ubumisiyonari i Filipi, barafashwe maze bagirizwa ko bariko baragumura igisagara be n’uko bariko barakwiragiza imigenzo itemewe n’amategeko. Barakubiswe barashaya baca batabwa mw’ibohero. Bibiliya iratubwira ivyabaye igihe bari mw’ibohero, ata n’uwitaho inguma zabo. Igira iti: “Nko mu gicugu Paulo na Silasi bariko barasenga bongera bashemeza Imana mu kuririmba; egome, imbohe zarabumva.” (Ivyak. 16:16-25) Paulo na mugenziwe ntibabona gusa ko imibabaro barimwo bahorwa Kristu ari ikimenyamenya c’uko ari intahemuka imbere y’Imana n’abantu, ahubwo babona ko ari akandi karyo ko gushinga intahe ku boba bipfuza kwumviriza inkuru nziza. Baripfuza ko n’abandi bantu borokoka. Muri iryo joro nyene, umurinzi w’ibohero hamwe n’abo mu rugo rwiwe barumvirije inkuru nziza maze bacika abigishwa. (Ivyak. 16:26-34) Paulo na Silasi barizigiye Yehova, ububasha bwiwe be n’uko yari yiteguriye kubafata mu mugongo mu mibabaro barimwo. Yehova ntiyabahemukiye.

¹² No muri iki gihe, Yehova yaraduhaye ibikenewe vyose bidufasha kwihangana igihe turi mu bigeragezo. Ashaka ko twihangana. Yaraduhaye Ijambo ryiwe ryahumetswe rituronsa ubumenyi butagira amakosa bwerekeye umugambi wiwe. Ivyo birakomeza ukwizera kwacu. Turafise akaryo ko kwifatanya n’abo dusangiye ukwizera be n’ako kumurangurira umurimo mweranda. Turafise n’agateka ko gukomeza ubucuti somambike dufitaniye na Yehova biciye kw’isengesho. Aratwumviriza igihe tumushemeza be n’igihe tumusaba dushimitse ngo adufashe kuguma tudahumanye imbere yiwe. (Flp. 4:13) Ico tutokwirengagiza ni inguvu dukura mu kuguma tuzirikana ku cizigiro twashizwe imbere.​—Mat. 24:13; Heb. 6:18; Ivyah. 21:1-4.

NIWIHANGANIRE IBIGERAGEZO BITANDUKANYE

¹³ Ibigeragezo bidushikira muri iki gihe birasa cane n’ivyashikiye abigishwa ba Yezu Kristu bo mu ntango. Mu bihe vya none, Ivyabona vya Yehova baratutswe bongera barakubagurwa n’abantu bafise amakuru atari yo ku biberekeye. Nk’uko vyari mu gihe c’intumwa, uruhamo rudushikira ahanini ruterwa n’abanyamadini b’ishaka rirenze urugero kubera yuko Ijambo ry’Imana rishira ahabona inyigisho zabo z’ikinyoma n’ibikorwa vyabo bigayitse. (Ivyak. 17:5-9, 13) Rimwe na rimwe, abasavyi ba Yehova bararonse agahengwe kubera baburaniye uburenganzira bahabwa n’amategeko y’igihugu. (Ivyak. 22:25; 25:11) Ariko rero, birashika kandi abategetsi bakabuza igikorwa cacu barondera ko gihagarara. (Zab. 2:1-3) Igihe bigenze gutyo, turigana akarorero k’intumwa tubigiranye umutima rugabo, igihe zavuga ziti: “Dutegerezwa kugamburukira Imana nka yo mutware aho kugamburukira abantu.”​—Ivyak. 5:29.

¹⁴ Kubera yuko agatima ko kwiratira igihugu kaguma kongerekana mw’isi, abamamaji b’inkuru nziza barashikirwa n’imikazo myinshi yotuma baheba igikorwa bashinzwe n’Imana. Abasavyi b’Imana bose barafata nkama ingabisho dusanga mu Vyahishuwe 14:9-12 ku bijanye no gusenga “ca gikoko be n’ishusho yaco.” Turatahura insobanuro y’amajambo ya Yohani agira ati: “Aho ni ho hakenewe ukwihangana ku beranda, abubahiriza amabwirizwa y’Imana n’ukwizera kwa Yezu.”

¹⁵ Intambara, imigumuko y’abaharanira amahinduka, uruhamo rw’imbonankubone n’ukubuzwa kw’igikorwa cacu vyoshobora gutuma udashobora kurangura ku mugaragaro imirimo ijanye n’ugusenga. Vyoshobora kwanka ko ishengero rigira amakoraniro, uguhanahana amakuru n’ibiro vy’ishami ntibishoboke, kugenderwa n’umucungezi w’umuzunguruko bigahagarara, n’ibisohokayandikiro ntibishike. None wokora iki ibintu nk’ivyo bibaye?

¹⁶ Inyishu ni iyi: nukore ivyo ushoboye vyose bivanye n’ingene ibintu vyifashe. Urashobora kuguma wiyigisha. Akenshi amakoraniro arashobora kubera mu migwi mitomito ku muhana w’umuntu. Ku makoraniro mwoshobora gukoresha ibisohokayandikiro mwize kera hamwe na Bibiliya. Ntuhagarike umutima canke ngo ute umutwe. Akenshi Inama Nyobozi irarondera ukuntu ihanahana amakuru mu maguru masha n’abavukanyi bahagarikiye igikorwa.

¹⁷ Naho woba uri ahantu ata muvukanyi n’umwe mushobora kuvugana, uribuka ko ata wushobora kugutandukanya na Yehova n’Umwana wiwe Yezu Kristu. Icizigiro cawe kirashobora kuguma gikomeye. Yehova aguma yumviriza amasengesho yawe, kandi arashobora kugukomeza biciye ku mpwemu yiwe. Numusabe akuyobore. Uribuka ko uri umusavyi wa Yehova ukaba n’umwigishwa wa Yezu Kristu. Ku bw’ivyo, ntugishe akaryo kose uronse ko kwamamaza. Yehova azohezagira utwigoro ugira, kandi hari aho wosanga mu gihe gitoyi n’abandi bakwiyunzeko mu gusenga kw’ukuri.​—Ivyak. 4:13-31; 5:27-42; Flp. 1:27-30; 4:6, 7; 2 Tim. 4:16-18.

¹⁸ Ariko nivyashika ugahangana n’urupfu nk’uko vyashikiye intumwa n’abandi, urizigira “ya Mana izura abapfuye.” (2 Kor. 1:8-10) Icizigiro c’izuka kirashobora kugufasha kwihanganira uruhamo urwo ari rwo rwose, naho rwoba rukaze gute. (Luka 21:19) Kristu Yezu yaradusigiye akarorero; yari azi ko agumye ari intahemuka mu bigeragezo vyokomeje abandi bigatuma na bo nyene bihangana. Na wewe urashobora gukomeza abavukanyi bawe mu buryo nk’ubwo nyene.​—Yoh. 16:33; Heb. 12:2, 3; 1 Pet. 2:21.

¹⁹ Uretse uruhamo canke kurwanywa, woshobora gushikirwa n’izindi ngorane zigusaba kwihangana. Nk’akarorero, hari abacika intege kubera yuko abantu bo mu cibare cabo batanegwa inkuru nziza. Abandi usanga bafise indwara canke intuntu, canke ugasanga barababazwa n’uko hari ibintu batagishoboye kurangura kubera amagara make. Intumwa Paulo na we nyene yarihanganiye ingorane yamubuza kurangura igikorwa ciwe canke igatuma rimwe na rimwe bitamworohera. (2 Kor. 12:7) Vyongeye, umukirisu wo mu kinjana ca mbere w’i Filipi yitwa Epafurodito, ‘yaradendebukiwe kubera abagenzi biwe bumvise ko yari yarwaye.’ (Flp. 2:25-27) Utunenge twacu hamwe n’utw’abandi twoshobora gukwega ingorane zigoye cane kwihanganira. Twoshobora kudahuza kamere n’abandi bakirisu canke mbere n’abandi bo muryango iwacu. Ariko rero, twisunze impanuro zo mw’Ijambo rya Yehova, izo ngorane turashobora kuzihanganira kandi tukazitsinda.​—Ezk. 2:3-5; 1 Kor. 9:27; 13:8; Kol. 3:12-14; 1 Pet. 4:8.

NIWIYEMEZE KUGUMA URI INTAHEMUKA

²⁰ Dutegerezwa kwumira ku wo Yehova yagenye ngo abe Umutwe w’ishengero, ari we Yezu Kristu. (Kol. 2:18, 19) Turakeneye gusenyera ku mugozi umwe na wa “mushumba w’umwizigirwa kandi w’ubwenge” hamwe n’abacungezi bagenywe. (Heb. 13:7, 17) Tugumye twisunga indinganizo za gitewokrasi kandi tugasenyera ku mugozi umwe n’abatuja imbere, tuzoshobora gukora ivyo Yehova agomba. Turakeneye kwungukira bimwe bishitse ku gateka ko gutura isengesho. Uribuka yuko n’impome z’ibohero canke agasho ka wenyene bidashobora kutubuza kuganira na Data wa twese wo mw’ijuru munyarukundo canke kuguma twunze ubumwe n’abakirisu bagenzi bacu.

²¹ Tubigiranye umwiyemezo n’ukwihangana, nimuze turangure twivuye inyuma igikorwa twashinzwe co kwamamaza, dukomere kw’ibanga mu gikorwa Yezu Kristu yashinze abigishwa biwe aho amariye kuzuka. Yababwiye ati: “Nimugende rero muhindure abantu bo mu mahanga yose abigishwa, mubabatiza mw’izina rya Data n’iry’Umwana n’iry’impwemu nyeranda, mubigisha kwubahiriza ibintu vyose nabategetse.” (Mat. 28:19, 20) Nimuze twihangane nka Yezu. Ese twoguma duhanze amaso icizigiro c’Ubwami n’ubuzima budahera. (Heb. 12:2) Kubera yuko turi abigishwa ba Kristu babatijwe, turafise agateka ko kugira uruhara mw’iranguka ry’ubuhanuzi bwa Yezu bujanye n’“insozero y’ivy’isi.” Yavuze ati: “Iyi nkuru nziza y’ubwami izokwamamazwa mw’isi yose ngo bibe intahe ku mahanga yose; maze iherezo rizoca riza.” (Mat. 24:3, 14) Nitwakora ico gikorwa n’umutima wacu wose muri iki gihe, tuzohimbarwa no kuronka ubuzima budahera mw’isi nshasha igororotse ya Yehova.