Twarahumanuwe ngo Tube Abantu Bakora Ibikorwa Vyiza

“Twiyuhagire ubuhumane bgose bg’umubiri n’ubg’umutima, kuba abera tugushikishe kwubaha Imana.”​—2 AB’I KORINTO 7:1.

1. Yehova asaba iki abamusenga?

“NI NDE azodūga umusozi w’Uhoraho? Ni nde azohagarara ahēra hiwe?” Umwami Dawidi wo muri Isirayeli ya kera yarabajije ico kibazo kivyura ukwiyumvira cerekeye uburyo bwo gusenga bwemerwa na Yehova. Yaciye atanga inyishu agira ati: “N’ūfise amaboko akeye n’umutima utanduye, atigeze kwerekeza umushaha wiwe ku vy’ukubesha, ntarahire ibinyoma.” (Zaburi 24:3, 4) Kugira ngo umuntu yemerwe na Yehova, na we akaba agizwe n’ubweranda ubwabwo, ategerezwa kuba adahumanye kandi ari mweranda. Imbere y’aho, Yehova yari yaribukije ishengero rya Isirayeli ati: “Ni mwiyeze rero, mube abera, kuko nanje nd’uwera.”​—Abalewi 11:44, 45; 19:2.

2. Paulo na Yakobo bashimitse gute ku kamaro k’ukudahumana mu gusenga kw’ukuri?

² Haciye ibinjana, intumwa Paulo yarandikiye Abakirisu bagenziwe bo mu gisagara c’i Korinto cari carononekaye mu vy’inyifato runtu ati: “Nuko bakundwa, ko dufise ivyo vyasezeranywe, twiyuhagire ubuhumane bgose bg’umubiri n’ubg’umutima, kuba abera tugushikishe kwubaha Imana.” (2 Ab’i Korinto 7:1) Ivyo birongera kugaragaza y’uko kugira ngo umuntu agiranire n’Imana ubucuti yongere aronke imihezagiro yasezeranye, ategerezwa kuba adahumanye akaba atanduye kandi atyoroye ku mubiri no mu vy’impwemu. N’igihe umwigishwa Yakobo yandika ku biraba ugusenga kwemerwa n’Imana, yavuze ati: “Idini itunganye itagira agasembga imbere y’Imana Data wa twese, n’ukurāba impfuvyi n’abapfakazi mu marushwa yabo, no kwirinda ngo ntiwanduzwe n’ivy’isi.”​—Yakobo 1:27.

3. Kugira ngo ugusenga kwacu kwemerwe n’Imana, ni ibiki dutegerezwa kudafata minenegwe?

³ Kubera yuko kudahumana, kuba mweranda no kutandura ari ibintu bihambaye mu gusenga kw’ukuri, umuntu wese yipfuza kwemerwa n’Imana akwiye kudafata minenegwe ivyerekeye gushitsa ivyo bisabwa. Ariko rero, kubera yuko abantu ukudahumana bagufata bakongera bakakwiyumvira mu buryo butandukanye cane, turakeneye gutahura uko Yehova abona ikintu kidahumanye kandi cemewe, vyongeye tugakurikiza ukwo kuntu abibona. Ku bijanye n’ivyo, turakeneye kumenya ico Imana isaba abayisenga be n’ico yakoze kugira ngo ibafashe gucika abadahumanye bakongera bakaguma gutyo maze bakemerwa na yo.​—Zaburi 119:9; Daniyeli 12:10.

Abantu Badahumanye ku bw’Ugusenga kw’Ukuri

4. Sigura ukuntu Bibiliya ivuga ibijanye n’ukudahumana.

⁴ Ku bantu benshi, kudahumana bisobanura gusa kwitandukanya n’umwanda canke kutandura. Ariko rero, muri Bibiliya iciyumviro co kuba uwudahumanye giserurwa n’amajambo atari make y’Igiheburayo n’Ikigiriki atadondora gusa isuku ry’umubiri, ariko kenshi adondora ukudahumana mu vy’inyifato runtu no mu vy’impwemu. Ni co gituma intohozamajambo imwe yerekeye Bibiliya ivuga iti: “‘Kudahumana’ canke ‘guhumana’ ni amajambo akoreshwa gake ku bijanye n’ibintu bisanzwe vy’intungamagara, mugabo kenshi akoreshwa mu bibazo bijanye n’idini. Ku bw’ivyo, ingingo ngenderwako y’‘ukudahumana’ iragira ico ikoze ku mice nka yose y’ubuzima.”

5. Ivyagezwe vya Musa vyatanga amabwirizwa yerekeye ukudahumana mu buzima bw’Abisirayeli ku rugero rungana iki?

⁵ Kukaba nkako, Ivyagezwe vya Musa vyarimwo n’amabwirizwa be n’amategeko bigenga imice nka yose y’ubuzima bw’Abisirayeli, agatomora ikintu kidahumanye kandi cemewe n’igihumanye kitemewe. Nk’akarorero, mu Balewi ikigabane ca 11 gushika ku ca 15, tuhasanga amabwirizwa adondagurwa ido n’ido yerekeye ukudahumana n’uguhumana. Ibikoko bimwebimwe vyari bihumanye, gutyo Abisirayeli bategerezwa kutabifungura. Ivuka ry’umwana ryatuma umugore ahumana mu kiringo kinaka. Indwara zimwezimwe z’urukoba, canecane imibembe, be n’igihe hari ibintu vyaba vyisutse biva mu gihimba c’irondoka c’umugabo canke c’umugore, na vyo vyaratuma uwo muntu aba uwuhumanye. Ivyagezwe vyaratomora kandi icategerezwa gukorwa mu bihe habaye uguhumana. Nk’akarorero, mu Guharūra 5:2, tuhasoma duti: “Barira Abisirayeli, bakūre aho mushagaje umunyamibembe n’ūfise igisokoro n’ūhumanijwe no gukora ku muvyimba, uw’ari we wese.”

6. Ni iyihe mvo yatumye ivyagezwe vyerekeye ukudahumana bitangwa?

⁶ Nta nkeka ko ivyo vyagezwe be n’ibindi vyatanzwe na Yehova, vyarimwo inyigisho zerekeye ubuvuzi n’ukuntu umubiri wacu umeze biteye imbere cane kuruta aho ubuhinga bwageza muri ico gihe, gutyo abantu bakazungukirako igihe bazikurikije. Yamara rero, ivyo vyagezwe ntivyatanzwe nk’icegeranyo c’amategeko y’intungamagara gusa canke ngo kibe inyobozo mu vy’ubuvuzi. Vyari mu bigize ugusenga kw’ukuri. Kubona ivyo Vyagezwe vyaraba n’ubuzima bwa misi yose bw’abantu, ni ukuvuga gufungura, kwibaruka, umubano w’ababiranye n’ibindi, birashimika ku ciyumviro c’uko Yehova, kubera yari Imana yabo, yari afise uburenganzira bwo kubashingira ivyari bibereye n’ibitari bibereye mu mice yose y’ubuzima bwabo, bakaba bari barabweguriye Yehova baherejeko.​—Gusubira mu Vyagezwe 7:6; Zaburi 135:4.

7. Ihanga rya Isirayeli iyo ryitondera Ivyagezwe, ryari kuronka iyihe mihezagiro?

⁷ Isezerano ry’Ivyagezwe ryarakingira kandi Abisirayeli ingeso zonona z’amahanga yari abakikije. Mu kwitondera Ivyagezwe badahemuka, harimwo n’ibisabwa vyari vyerekeye kuguma badahumanye mu nyonga za Yehova, Abisirayeli bobaye babereye gusukurira Imana yabo maze bagahezagirwa na yo. Kuri ivyo, Yehova yabwiye iryo hanga ati: “Ni mwamwumvira vy’ukuri, mukitondera isezerano ryiwe, muzomubera inyegu yiharije, yitoranirije mu mahanga yose: uti Kukw isi yose ar’iyiwe; kandi muzomubera ubgami, ubgoko bg’abaherezi, ihanga ryera.”​—Kuvayo 19:5, 6; Gusubira mu Vyagezwe 26:19.

8. Ni kuki Abakirisu muri iki gihe bakwiye gutega yompi ibivugwa mu Vyagezwe vyerekeye ukudahumana?

⁸ Kubera yuko Yehova yashize ivyo bintu mu Vyagezwe kugira ngo acishe ubwenge Abisirayeli ku kuntu bocika abadahumanye, aberanda n’abemewe na we, ntibikwiye none ko Abakirisu muri iki gihe barimbura bitonze ukuntu bashitsa ivyo bintu? Naho nyene Abakirisu bataganzwa n’Ivyagezwe nk’uko Paulo yabisiguye, bategerezwa kugumiza mu muzirikanyi yuko ibintu vyose vyanditswe mu Vyagezwe “vyar’igitūtu c’ivyari birāriye kuzoza, arik’umutumba ubgawo n’uwa Kristo.” (Ab’i Kolosayi 2:17; Abaheburayo 10:1) Niba Yehova Imana, we avuga ngo “[n]ta ho mpinduka,” muri ico gihe yabona ko kudahumana no kutandura ari ikintu gihambaye mu gusenga kw’ukuri, na twe muri iki gihe dutegerezwa kudafata minenegwe ikibazo c’ukudahumana ku mubiri, mu vy’inyifato runtu no mu vy’impwemu niba dushaka ko atwemera kandi aduhezagira.​—Malaki 3:6; Abaroma 15:4; 1 Ab’i Korinto 10:11, 31.

Isuku ry’Umubiri Riradushimagiza

9, 10. (a) Ni kuki isuku ry’umubiri rihambaye ku Mukirisu? (b) Ni ayahe majambo akunda kuvugwa ku biraba amahwaniro y’Ivyabona vya Yehova?

⁹ Isuku ry’umubiri ryoba rikiri ikintu gihambaye mu gusenga kw’ukuri? Naho isuku ry’umubiri ryonyene ridashobora gutuma umuntu aba uwusenga Imana mu kuri, nta nkeka ko bibereye yuko abasenga mu kuri baba abanyesuku ku mubiri uko ivyabo bibibashoboza kwose. Canecane muri iki gihe aho abantu benshi bitwararika buhoro kuguma basukuye ku mubiri, basukura ivyambarwa canke aho baba, ababigira kenshi usanga abantu babakikije baca bababona. Ivyo birashobora kuvamwo ikintu ciza, nk’uko Paulo yabwiye Abakirisu b’Abanyakorinto ati: “Ntitugira ico tuzana gitsitaza mu kintu na kimwe, kugira ngo kugabura ivy’Imana kwacu ntikugawe. Ariko twishimagiza muri vyose nk’abakozi b’Imana.”​—2 Ab’i Korinto 6:3, 4.

¹⁰ Akatari gake Ivyabona vya Yehova barakejwe n’abajejwe intwaro kubera yuko mu buryo bigenza no mu tumenyero twabo ari abanyesuku, abanyarutonde n’abubaha, bikabonekera canecane ku mahwaniro maninimanini yabo. Nk’akarorero, ku biraba ihwaniro rimwe ryabereye mu ntara ya Savona yo mu Butaliyano, hari ikinyamakuru kimwe (La Stampa) cavuze ibi bikurikira: “Igihe umuntu ariko aragendagenda muri ivyo bibanza, ikintu aca abona ni isuku be n’urutonde rw’abantu babikoresha.” Inyuma y’ihwaniro rimwe ry’Ivyabona ryabereye ku kibuga c’inkino c’i São Paulo muri Berezile, hari uwujejwe ico kibuga c’inkino yabwiye umuhagarikizi w’umugwi w’abasukura ico kibuga ati: “Guhera ubu, dushaka ko iki kibuga kiza kirasukurwa nk’uko Ivyabona vya Yehova bagisukuye.” Hari uwundi wo mu bajejwe ico kibuga nyene yavuze ati: “Igihe Ivyabona vya Yehova bashaka gukotesha iki kibuga, ikituraza ishinga gusa ni amatariki bagishakirako. Nta kindi kintu kiduhagarika umutima.”

11, 12. (a) Ni ingingo ngenderwako ya Bibiliya iyihe dukwiye kugumiza mu muzirikanyi ku biraba isuku ry’umwumwe wese? (b) Ni ibibazo ibihe bishobora kubazwa ku biraba utumenyero twacu n’uburyo bwacu bwo kubaho?

¹¹ Niba isuku n’urutonde birangwa mu bibanza dusengeramwo bishobora gutuma Imana dusenga ishemezwa, nta wokeka ko kugaragaza izo kamere mu buzima bwacu bwite na vyo bihambaye nk’uko nyene. Ariko rero, turashobora kwumva yuko mu bwigobeko bw’amazu yacu dufise uburenganzira bwo kuharekerana no kugira ibintu uko twishakiye. Ikindi, ku biraba inyambaro n’uburyo bwo kwitunganya, nta gukeka ko dufise uburenganzira bwo guhitamwo ico twumva kitworoheye kandi kiduhimbaye! Yamara rero, ku rugero runini, uwo mwidegemvyo uri n’aho ugarukira. Niwibuke yuko igihe Paulo yariko aravuga ibiraba ivyo umuntu ahitamwo gufungura, yagabishije Abakirisu bagenziwe ati: “Mwiyubare, kugira ng’ubgo bushobozi bganyu bgoye kuba igitsitaza c’abadakomeye na gato.” Yaciye ashikiriza ingingo ngenderwako y’agaciro igira iti: “Vyose turavyemererwa, arikw ibitugirira ikimazi si vyose. Vyose turavyemererwa, arikw ivyubaka si vyose.” (1 Ab’i Korinto 8:9; 10:23) Iyo mpanuro ya Paulo itwerekeye gute mu bijanye n’isuku?

¹² Birumvikana ko abantu bakwiye kwitega yuko umusuku w’Imana aba umunyesuku n’umunyarutonde mu buzima bwiwe. Ni co gituma dukwiye kuraba neza yuko inzu yacu no mu micungararo hayo hataboneka mu buryo bishobora gutuma abantu bagira amakenga ku co tuvuga ko turi, ni ukuvuga abasuku b’Ijambo ry’Imana. Ni icabona nyabaki inzu yacu itanga kuri twebwe no ku vyo twemera? Yoba yerekana ko twipfuza koko kuba mw’isi nshasha y’ubugororotsi irangwa isuku n’urutonde, ari yo twama turata neza ku bandi? (2 Petero 3:13) Muri ubwo buryo nyene, uko ubwacu tuboneka ku mubiri, haba mu gihe c’ukwisamaza canke mu busuku, kurashobora gutuma abantu barushiriza kwakira ubutumwa twamamaza canke kubukengera. Nk’akarorero, raba aya majambo umwanditsi umwe w’ikinyamakuru co muri Megizike yavuze: “Vy’ukuri, mu bagize Ivyabona vya Yehova urwaruka ni rwo rwinshi, kandi icibonekeza muri bo ni uburyo bimosha, isuku be n’inyambaro ibereye.” Ese ingene ari umunezero kugira urwaruka nk’urwo muri twebwe!

13. Dushobora gukora iki kugira ngo turabe neza ko mu mice yose y’ubuzima bwacu bwa misi yose tuguma turi abanyesuku n’abanyarutonde?

¹³ Ego niko, kuraba neza ko umubiri wacu, ivyo dutunze be n’inzu yacu vyama nantaryo bisukuye kandi birangwa urutonde, kubivuga biroroshe kuruta kubikora. Igikenewe si ibikoresho bidasanzwe kandi bizimvye, ariko ni ugutegekanya ibintu neza no kugira akigoro kadahorereza. Hategerezwa gutegekanywa umwanya wo gusukura umubiri wacu, kumesura impuzu zacu, gusukura inzu yacu, umuduga wacu n’ibindi. Kugira vyinshi ducurumbamwo mu busuku, mu kwitaba amakoraniro, mu kwiyigisha, ivyo bikaza vyiyongera ku kwitwararika ibindi bintu tujejwe mu buzima bwa misi yose, si icitwazo cotuma tudakenera kuguma dusukuye, gutyo tukemerwa mu nyonga z’Imana n’abantu. Ingingo ngenderwako izwi cane ivuga yuko “ikintu cose cashingiwe igihe caco,” irakora no kuri uyu muce w’ubuzima bwacu.​—Umusiguzi 3:1.

Umutima Utanduye

14. Ni kuki dushobora kuvuga yuko ukudahumana mu vy’inyifato runtu no mu vy’impwemu bihambaye kuruta n’isuku ry’umubiri?

¹⁴ Nk’uko bihambaye kwitwararika isuku ry’umubiri, kwitwararika ukudahumana mu vy’ukwigenza runtu no mu vy’impwemu vyovyo birahambaye kuruta. Dushitse kuri ico ciyumviro mu kwibuka yuko ihanga rya Isirayeli Yehova ataritaye arihoye ko ari abanyamwanda ku mubiri, mugabo ko yabahoye kuba barononekaye mu vy’inyifato runtu no mu vy’impwemu. Biciye ku muhanuzi Yesaya, Yehova yababwiye yuko bivuye ku kubera bari “ihanga rikora icaha, ubgoko buremerewe n’ukugabitanya,” ibimazi bashikana be n’imboneko z’ukwezi n’amasabato bubahiriza, emwe mbere n’amasengesho batura vyamubereye umuzigo. Bari bakwiye gukora iki kugira ngo basubire gutoneshwa n’Imana? Yehova yavuze ati: “Ni mwiyuhagire, mwitunganye, mukūreh’ibibi vyo mu bikorwa vyanyu bive mu nyonga zanje; mureke gukora ibibi.”​—Yesaya 1:4, 11-16.

15, 16. Yezu yavuze ko ari igiki gihumanya umuntu, kandi dushobora gute kwungukira ku majambo ya Yezu?

¹⁵ Kugira ngo turushirize gutahura akamaro k’ukudahumana mu vy’inyifato runtu no mu vy’impwemu, nimuze turimbure ico Yezu yavuze igihe Abafarizayo bavuga yuko abigishwa biwe bari bahumanye kubera batakaravye imbere yo gufungura. Yezu yaragoroye ibintu mu kuvuga ati: “Ikija mu kanwa si co gihumanya umuntu; arikw ikiva mu kanwa ni co kimuhumanya.” Yezu yaciye asigura ati: “Ibiva mu kanwa biba biturutse mu mutima, ni vyo bimuhumanya. Kuko mu mutima havamw’ivyiyumviro bibi: ubgicanyi, ubusambanyi, ubushakanyi, ubgivyi, kwagiriza abandi ibinyoma, ibitutsi. Ivyo vyose ni vyo bihumanya umuntu. Ariko kurisha intoke zidakaravye si vyo bimuhumanya.”​—Matayo 15:11, 18-20.

¹⁶ Dushobora kwigira iki ku majambo ya Yezu? Yezu yariko adoma urutoke ku vy’uko ibikorwa vy’ububisha, vy’ubuhumbu kandi bihumanye bihera mu mutima uhengamiye ku bubisha, ku buhumbu no ku guhumana. Nk’uko umwigishwa Yakobo yabivuze, “umuntu wese ageragezwa, iy’akwezwe n’ivyo yifuza bikamusuka.” (Yakobo 1:14, 15) Rero, niba tudashaka kugwa mu vyaha bituntuza Yezu yadondoye, dutegerezwa kurandurana n’imizi impengamiro izo ari zo zose zo gukora ivyo bintu kandi tukazamirira kure y’imitima yacu. Ivyo bisobanura ko dukwiye kwiyubara ku vyo dusoma, ku vyo turaba no ku vyo twumviriza. Mu bihe vya none, inzego zijejwe ivyo kwinezereza n’uguhaya ibidandazwa, zitwaje uburenganzira bwo kuvuga ico umuntu yiyumvira n’uko abahingura utugenegene bafise uburenganzira bwo gukora ivyo bishakiye, ziriko rirahingura ibintu injojo, ibivuga amajambo n’ivyerekana amashusho agaburira uyu mubiri wacu wononekaye ivyo ucambirwa. Dukwiye kwiyemeza kutareka ngo muri ivyo vyiyumviro hagire na kimwe gishinga imizi mu mitima yacu. Iciyumviro nyamukuru ni uko, kugira duhimbare Imana twongere twemerwe na yo, dutegerezwa kwama nantaryo twiyubara kugira ngo tuzigame umutima udahumanye kandi utanduye.​—Imigani 4:23.

Twahumanuwe ngo Dukore Ibikorwa Vyiza

17. Ni kuki Yehova yahumanuye abasavyi biwe?

¹⁷ Nta nkeka ko ari umuhezagiro n’uburinzi kubona yuko, tubifashijwemwo na Yehova, dushobora kuba abantu bahumanuwe mu nyonga ziwe. (2 Ab’i Korinto 6:14-18) Yamara rero, turatahura yuko Yehova yahumanuye abasavyi biwe ku bw’umugambi munaka. Paulo yabwiye Tito yuko Kirisitu Yezu “yatwiguze kugira ngw aducungure, adukūrekw ivyo twagabitanije vyose, kandi yihumanurire ubgoko ngo babe icibare ciwe, barwane ishaka ry’ibikorwa vyiza.” (Tito 2:14) Kubera yuko turi abantu bahumanuwe, dukwiye kugira umwete wo gukora ibihe bikorwa?

18. Dushobora gute kugaragaza yuko dufitiye umwete ibikorwa vyiza?

¹⁸ Ubwa mbere na mbere, dukwiye kwihatira kwamamaza ku mugaragaro inkuru nziza y’Ubwami bw’Imana. (Matayo 24:14) Tubigize, tuba dushikirije abantu bo mu mihingo yose icizigiro co kubaho ibihe bidahera kw’isi itazogiramwo ubutosekare bw’uburyo na bumwe. (2 Petero 3:13) Ibikorwa vyiza dukora birimwo kandi n’ukugaragaza ivyamwa vy’impwemu y’Imana mu buzima bwacu bwa misi yose, gutyo tukaninahaza Data wa twese wo mw’ijuru. (Ab’i Galatiya 5:22, 23; 1 Petero 2:12) Ikindi, ntitwibagira abatari mu kuri bashobora gusinzikazwa n’ivyago vy’ivyaduka canke amakuba ashikira abantu. Tugumiza mu muzirikanyi inkeburo ya Paulo igira iti: “Nuko rero, iyo turonse uburyo, tugirire bose neza, cane-cane ab’inzu y’abizera.” (Ab’i Galatiya 6:10) Ivyo bikorwa vyose, bikoranywe umutima utyoroye n’imvo nziza, birahimbara Imana.​—1 Timoteyo 1:5.

19. Ni iyihe mihezagiro iturindiriye mu gihe twobandanya kuba abadahumanye ku mubiri, mu vy’inyifato runtu no mu vy’impwemu?

¹⁹ Twebwe abasuku b’Isumbavyose, turashira ku mutima amajambo ya Paulo yagira ati: “Nuko bene Data, ndabahanūra kubg’imbabazi z’Imana, ngo mutange imibiri yanyu ibe ibimazi bizima vyera, bihimbara Imana, ni kwo kuyikorera kwanyu kwogira ikimazi.” (Abaroma 12:1) Nimuze tubandanye gukenguruka agateka ko guhumanurwa na Yehova, maze dukore uko dushoboye kwose kugira ngo tugume dutyoroye ku rugero rwo hejuru ku mubiri, mu vy’inyifato runtu no mu vy’impwemu. Nitwabigira, ntibizotuma gusa twiyubahiriza kandi dushira akanyota ubu, mugabo bizonatuma tugira icizigiro co kubona ukuntu “ivya mbere,” ari vyo runkwekwe rw’ibintu rwa none rubi kandi rwanduye, bigenda amazimayongo igihe Imana ‘izohindura ibintu vyose bisha.’​—Ivyahishuriwe 21:4, 5.

Woba Uvyibuka?

• Ni kubera iki Abisirayeli bahawe vya vyagezwe vyinshi vyerekeye isuku?

• Ni mu buryo ki isuku ry’umubiri rituma abantu barushiriza gukwegerwa n’ubutumwa twamamaza?

• Ni kuki kudahumana mu vy’inyifato runtu no mu vy’impwemu binahambaye kuruta isuku ryo ku mubiri?

• Dushobora gute kwerekana yuko turi abantu bafise “ishaka ry’ibikorwa vyiza”?

[Amafoto ku rup. 29]

Isuku ry’umubiri riratuma ubutumwa twamamaza burushiriza gukwegera abantu

[Ifoto ku rup. 30]

Yezu yaragabishije yuko ivyiyumviro bibi bishikana ku bikorwa bibi

[Amafoto ku rup. 31]

Kubera Ivyabona vya Yehova ari abantu bahumanuwe, baragira umwete wo gukora ibikorwa vyiza