Nutsimbataze Ukugamburuka Uko Umuhero Wegereza

“Uwo [Shilo] ni we amahanga azo[gamburuk]ira.”​—ITANGURIRO 49:10.

1. (a) Muri kahise, kugamburukira Yehova akenshi vyamye bisigura ibiki? (b) Ni ubuhanuzi ubuhe bwerekeye ukugamburuka Yakobo yashikirije?

KUGAMBURUKIRA Yehova akenshi vyamye bisigura ukugamburukira abamuserukira. Muri abo harabayemwo abamarayika, basogokuruza, abacamanza, abaherezi, abahanuzi be n’abami. Intebe y’ubwami y’abami ba Isirayeli yiswe mbere intebe y’ubwami ya Yehova. (1 Ngoma 29:23) Ariko ikibabaje, abenshi mu bategetsi ba Isirayeli baragambarariye Imana, bikwegera ivyago, babikwegera n’abo batwara. Mugabo Yehova ntiyaretse intahemuka ziwe ngo bagume batagira icizigiro; yarabiruye mu kubaha umuhango w’uko yoshizeho Umwami atarya igiturire, uwo abagororotsi bohimbawe no kugamburukira. (Yesaya 9:6, 7) Umwe sogokuruza Yakobo, ari ku mpfiro yarabuye ivyerekeye uwo mutegetsi wo muri kazoza, avuga ati: “Icumu ry’ubugabe ntirizova kuri Yuda, inkoni yo kuganza ntizova hagati y’ibirenge vyiwe, [Shilo] nyene vyo ataraza: uwo ni we amahanga azo[gamburuk]ira.”​—Itanguriro 49:10.

2. “Shilo” bisobanura iki, kandi ubutegetsi bwiwe bwa cami bwogarukiye he?

² “Shilo” ni ijambo ry’Igiheburayo risobanura “Nyenevyo,” canke “Uwo vyegukira.” Vyemere, Shilo yorazwe uburenganzira bwose bwo guteka, nk’uko bugereranywa n’icumu ry’ubugabe, be n’ububasha bwo gutegeka nk’uko bugereranywa n’inkoni yo kuganza. Vyongeye, ubutware bwiwe bwa cami ntibwogarukiye gusa ku bakomoka kuri Yakobo, ariko ku “mahanga” yose. Ivyo birahuye n’umuhango Yehova yahaye Aburahamu, ati: “Uru[but]o rwawe . . . ruzokwegukira amarembo y’abansi barwo; kandi mu ru[but]o rwawe ni ho amahanga yose yo mw isi azo[kwi]hē[sh]a umugisha.” (Itanguriro 22:17, 18) Yehova yaremeje akaranga k’urwo ‘rubuto’ mu 29 G.C., igihe yasiga Yezu w’i Nazareti impwemu yera.​—Luka 3:21-23, 34; Ab’i Galatiya 3:16.

Ubwami Yezu Yaronse Ubwa Mbere

3. Ni ubutegetsi ubuhe Yezu yaronse igihe yaduga mw’ijuru?

³ Igihe Yezu yaduga mw’ijuru, ntiyaciye ubwo nyene ategeka abantu bo kw’isi. (Zaburi 110:1) Ariko rero, yararonse “ubgami” be n’abatwarwa bamugamburukira. Intumwa Paulo yarerekanye ubwo bwami ubwo ari bwo igihe yandika ati: “[Imana] yadukijije [twebwe Abakirisu basizwe impwemu] ububasha bg’umwiza, [i]twimurira mu bgami bg’Umwana wa[yo i]kunda.” (Ab’i Kolosayi 1:13, ni twe tubihiritse.) Ukwo gukizwa kwatanguye kuri Pentekoti yo mu 33 G.C., igihe impwemu yera yasukwa ku bayoboke ba Yezu b’abizerwa.​—Ivyakozwe 2:1-4; 1 Petero 2:9.

4. Ni mu buhe buryo butandukanye abigishwa ba Yezu bo mu ntango berekanye ko bagamburuka, kandi uko bagize umugwi Yezu abita gute?

⁴ Kubera ko abo bigishwa basizwe impwemu bari “intumwa mu gishingo ca Kristo,” baratanguye gukorakoranya babigiranye ukugamburuka abandi bantu bocitse “[aba]sangiye ubgoko” na bo muri ubwo bwami bwo mu vy’impwemu. (2 Ab’i Korinto 5:20; Abanyefeso 2:19; Ivyakozwe 1:8) Vyongeye, abo basizwe botegerejwe kuguma “[ba]tungan[ij]we rwose hamwe, [ba]hūje umutima n’inama,” kugira bemerwe n’Umwami wabo Yezu Kirisitu. (1 Ab’i Korinto 1:10) Uko ari umugwi, bagize “umushumba w’umwizerwa kandi w’incabwenge,” canke umugwi w’umubwiriza w’umwizerwa.​—Matayo 24:45, NW; Luka 12:42.

Barahezagiwe Kubera Ukugamburukira “Umubgiriza” w’Imana

5. Kuva mu bihe vya kera, Yehova yamye yigisha abasavyi biwe gute?

⁵ Yehova yamye nantaryo aronsa abasavyi biwe abigisha. Nk’akarorero, Abayuda bamaze kuva i Babiloni, Ezira hamwe n’abandi bagabo bakwije ibisabwa batari bake ntibasomeye gusa abantu Ivyagezwe vy’Imana, ‘barasiguye’ ivyo vyagezwe, ‘barabibasobanurira kugira ngo batahure’ Ijambo ry’Imana.​—Nehemiya 8:8.

6, 7. Umugwi wa wa mushumba watanze gute imfungurwa z’ivy’impwemu ku gihe biciye ku Nama Nyobozi yiwe, kandi ni kubera iki kuyobokera umugwi wa nya mushumba bibereye?

⁶ Mu kinjana ca mbere, igihe ikibazo c’ugukebwa cavyuka mu 49 G.C., inama nyobozi y’uwo mugwi w’umushumba wo mu ntango yararimbuye nya kibazo ibishize no mw’isengesho, maze ishika ku ciyumviro gihuye n’Ivyanditswe. Igihe batangaza ingingo bari bafashe biciye mw’ikete, amashengero yaragamburutse ubuyobozi bwari bwatanzwe hanyuma bararonka umuhezagiro w’Imana utagira uko ungana. (Ivyakozwe 15:6-15, 22-29; 16:4, 5) Cokimwe no mu bihe vya none, umushumba w’umwizerwa abicishije ku Nama Nyobozi yiwe, yaratomoye ibibazo bihambaye nk’ukutagira aho Abakirisu bahengamiye, ubweranda bw’amaraso be n’ikoreshwa ry’ibiyayura umutwe be n’itabi. (Yesaya 2:4; Ivyakozwe 21:25; 2 Ab’i Korinto 7:1) Yehova yarahezagiye abasavyi biwe kubera bagamburutse Ijambo ryiwe bakongera bakagamburukira wa mushumba w’umwizerwa.

⁷ Mu kugamburukira umugwi wa wa mushumba, abasavyi b’Imana baragaragaza kandi ko bayobokera Shebuja, ari we Yezu Kirisitu. Ukuyoboka nk’ukwo kwaragize iyindi nsobanuro mu bihe vya none kubera ubukuru bwa Yezu bwaguwe nk’uko vyari vyarabuwe mu buhanuzi Yakobo yavuze ari ku mpfiro.

Shilo Acika Umutegetsi w’Isi Abikwiriye

8. Ubukuru bwa Kirisitu bwaguwe gute kandi ryari?

⁸ Ubuhanuzi bwa Yakobo bwarabuye yuko Shilo yotegetse ko “amahanga [agamburuka].” Biratomoye ko ubutegetsi bwa Kirisitu butogarukiye kuri Isirayeli yo mu vy’impwemu. Bwobaye burimwo n’iki? Ivyahishuriwe 11:15 hishura hati: “Ubgami bg’isi buhindutse ubg’Umwami wacu n’ubga Kristo wiwe, kand’azohora ahangamye ibihe bitazoshira.” (Ni twe tubihiritse.) Bibiliya ihishura yuko Yezu yaronse ubwo bukuru “ibihe ndwi” menyeshakazoza birangiye, ni ukuvuga “ibihe [vyashinzwe] vy’abanyamahanga,” mu 1914.a (Daniyeli 4:16, 17; Luka 21:24) Muri uwo mwaka, ni ho “ukuhaba” (NW) kutaboneka kwa Kirisitu ari Umwami Mesiya kwatangura, hatangura n’igihe ciwe co “[ku]ganza hagati y’abansi b[i]we.”​—Matayo 24:3; Zaburi 110:2.

9. Ni igiki Yezu yakoze igihe yaronka Ubwami, kandi ivyo vyagize ingaruka iyihe idaca yibonekeza ku muryango w’abantu, na canecane ku bigishwa biwe?

⁹ Ikintu Yezu yabanje gukora amaze kuronka ububasha bw’ubwami kwari ‘ukuraririza kw’isi’ wa mugambarazi karuhariwe Shetani, ari kumwe n’amadayimoni yiwe. Kuva ubwo, ivyo biremwa vy’impwemu vy’ibibisha vyarateje ivyago bitari bwigere biboneka umuryango w’abantu, udasize inyuma ivyo gutuma haba ibintu bituma ukugamburukira Yehova kuba urugamba. (Ivyahishuriwe 12:7-12; 2 Timoteyo 3:1-5) Kukaba nkako, abo Shetani atera canecane mu ntambara yiwe yo mu vy’impwemu ni abasizwe ba Yehova, “bitondera ivyagezwe n’Imana kandi bafise ibishingira Yesu intahe” be na bagenzi babo bo mu “zindi ntama.”​—Ivyahishuriwe 12:17; Yohana 10:16.

10. Ni iranguka ry’ubuhanuzi bwa Bibiliya ubuhe ryemeza ko intambara Shetani azorwana n’Abakirisu b’ukuri ata co izovamwo?

¹⁰ Ariko rero, Shetani agenewe kunanirwa kubera ko uwu ari “[u]musi w’Umukama,” (UB) kandi akaba ata kintu na kimwe gishobora kubuza Yezu ‘gusozera intsinzi yiwe.’ (Ivyahishuriwe 1:10; 6:2, NW) Nk’akarorero, azoraba neza yuko Abisirayeli bo mu vy’impwemu 144.000 bashizweko ikimenyetso ca nyuma. Azokingira kandi “ishengero ryinshi, ata woshobora kuriharūra, bo mu mahanga yose n’imiryango yose n’amoko yose n’indimi zose.” (Ivyahishuriwe 7:1-4, 9, 14-16) Ariko rero, mu buryo buhushanye n’abagenzi babo basizwe, bo bazocika abatwarwa ba Yezu bagamburuka bo kw’isi. (Daniyeli 7:13, 14) Kuba bari kw’isi muri kino gihe biramaze gutanga ikimenyamenya ntaharirizwa c’uko Shilo mu vy’ukuri ari Umutegetsi azoganza “Ubgami bg’isi.”​—Ivyahishuriwe 11:15.

Iki Ni co Gihe c’‘Ukugamburuka Ubutumwa Bgiza’

11, 12. (a) Ni bande gusa bazorokoka iherezo ry’uru runkwekwe rw’ibintu? (b) Ni ingeso izihe zitsimbatara mu binjirwamwo n’“impwemu y’iyi si”?

¹¹ Abantu bose bashaka ubuzima budahera bategerezwa kwiga kugamburuka, kubera yuko Bibiliya ivuga mu buryo butomoye yuko “abatāmenye Imana n’aba[tagamburutse] ubutumwa bgiza bg’Umwami wacu Yesu” batazorokoka umusi w’uguhora w’Imana. (2 Ab’i Tesalonike 1:8) Ariko rero, ibintu vy’ububisha biriho muri kino gihe be n’agatima k’ukugarariza amategeko n’ingingo ngenderwako vya Bibiliya kari muri vyo, biratuma kugamburuka inkuru nziza biba urugamba.

¹² Bibiliya idondora ako gatima ko kugarariza Imana ko ari “impwemu y’iyi si.” (1 Ab’i Korinto 2:12) Mu gusigura ingaruka iyo mpwemu igira ku bantu, intumwa Paulo yandikiye Abakirisu bo mu kinjana ca mbere bo muri Efeso avuga ati: “[Kera mwagenda] nk’ukw ivy’iyi si bigenda, mwumvira umwami w’abaganza ikirēre, ni we mpwemu ikorera mu bantu b’intabarirwa. Kandi natwe twese twahora muri bo kera mu kwifuza kw’imibiri yacu, tugakora ivy’imibiri n’imitima vyacu bigomba, kandi mu kameremere kacu twar’abo kurakirwa, nk’abandi bose.”​—Abanyefeso 2:2, 3.

13. Abakirisu bashobora gute kunanira impwemu y’iyi si mu buryo kirumara, kandi ni ingaruka izihe zirimwo akunguko bahakura?

¹³ Igishimishije, Abakirisu b’i Efeso ntibagumye ari abaja b’iyo mpwemu y’ukugambarara. Ahubwo, bacitse abana bagamburuka b’Imana mu kworohera impwemu yayo hanyuma bakimbura ivyamwa vyayo vyinshi kandi vyiza. (Ab’i Galatiya 5:22, 23) Cokimwe no muri kino gihe, impwemu y’Imana, ya nguvu y’ububasha buhebuje kw’isi no mw’ijuru, iriko irafasha abantu amamiliyoni gucika abagamburukira Yehova, bigatuma bashobora kugira “ivyizigiro vyuzuye gushitsa kw iherezo.”​—Abaheburayo 6:11; Zekariya 4:6.

14. Yezu yagabishije gute Abakirisu bose babaho mu misi y’iherezo ku vyerekeye ibintu bitomoye vyogerageje ukugamburuka kwabo?

¹⁴ Nugumize kandi mu muzirikanyi yuko dufatwa mu mugongo na Shilo mu buryo bw’ububasha, we, afatanije na Se batazoreka umwansi n’umwe, yaba idayimoni n’imwe canke umuntu n’umwe, ngo ageragereshe ukugamburuka kwacu ibiruta ivyo dushobora kwihanganira. (1 Ab’i Korinto 10:13) Nkako, kugira ngo Yezu adufashe mu ntambara yacu yo mu vy’impwemu, yaradondaguye ingorane zitari nke zitomoye twohanganye muri ino misi y’iherezo. Ivyo yabigize abicishije mu makete ndwi, ayo yahaye intumwa Yohani biciye mu kwerekwa. (Ivyahishuriwe 1:10, 11) Ico tutokeka coco, yarimwo impanuro ihambaye ku Bakirisu bo muri ico gihe, mugabo ishirwa mu ngiro ryayo nyamukuru rikaba riba ku “musi w’Umukama,” ni ukuvuga kuva mu 1914. Ese rero ukuntu bikwiriye ko twitwararika ubwo butumwa!b

Niwirinde ivy’Ukutanegwa Ibintu, Ubushegabo, Ugukunda Amaronko

15. Ni kubera iki dutegerezwa kwirinda ingorane yacumukuje ishengero ry’i Efeso, kandi ivyo dushobora kubigira gute? (2 Petero 1:5-8)

¹⁵ Ikete rya mbere rya Yezu ryarungikiwe ishengero ry’i Efeso. Yezu amaze gukeza iryo ishengero kubera ukwihangana kwaryo, yavuze ati: “Ariko mfise ico nkugayako, yuko waretse urukundo rwawe rwa mbere.” (Ivyahishuriwe 2:1-4) Muri kino gihe, Abakirisu bamwebamwe bahora ari abanyamwete baratakaje nk’ukwo nyene urukundo rukomeye bahora bakunda Imana. Ugutakaza urukundo nk’ukwo kurashobora gutuma ubucuti umuntu afitaniye n’Imana bugoyagoya, kandi bitegerezwa kugororwa mu buryo bwihutirwa. Urukundo nk’urwo rushobora kugarukanwa gute? Mu kwiga Bibiliya, kwitaba amakoraniro, gusenga no kuzirikana, ivyo vyose bikagirwa ubudahorereza. (1 Yohana 5:3) Ikizwi coco, ni uko ivyo bisaba “[gu]shiruk[a] umwete,” mugabo mu vy’ukuri birabereye. (2 Petero 1:5-8) Niba wisuzumye ata buryarya bigahishura yuko urukundo rwawe rwatimvye, nuce rero ukosora ukwo kuntu ibintu vyifashe udatebaganye, mu kugamburuka inkeburo ya Yezu igira iti: “Ni wibuke aho wavuye ukagwa; wihane, ukore ibikorwa nk’ivya mbere.”​—Ivyahishuriwe 2:5.

16. Ni utwosho utuhe two mu buryo bw’impwemu turimwo ingeramizi twari mw’ishengero ry’i Perugamo n’iry’i Tuwatira, kandi ni kubera iki amajambo ya Yezu abereye muri kino gihe?

¹⁶ Abakirisu b’i Perugamo n’i Tuwatira barakejwe kubera ukudahemuka kwabo, ukwihangana kwabo be n’umwete wabo. (Ivyahishuriwe 2:12, 13, 18, 19) Yamara, barohejwe n’abantu bamwebamwe bagaragaje agatima k’ububisha ka Balamu na Yezebeli, abagize akosho konona muri Isirayeli ya kera biciye ku bushegabo n’ugusenga Bayali. (Guharūra 31:16; 1 Abami 16:30, 31; Ivyahishuriwe 2:14, 16, 20-23) Mugabo tuvuge iki mu gihe cacu, ari co “musi w’Umukama”? Utwosho tubi nk’utwo twoba twigaragaza? Egome, kubera ko mu vy’ukuri ubushegabo ari bwo bukunda gutuma haba ugucibwa mu basavyi b’Imana. Ese rero ukuntu bihambaye ko twirinda kwifatanya n’abantu bose, baba abo mw’ishengero canke abatari mw’ishengero bagira akosho konona mu vy’ukwigenza runtu! (1 Ab’i Korinto 5:9-11; 15:33) Abagomba kuba abatwarwa ba Shilo bagamburuka bazokwirinda kandi ukwisamaza kudahuje n’ingingo mfatirwako ziri hejuru hamwe n’ivyerekana ubushegabo biri mu bitabu be n’ivyo kuri Internet.​—Amosi 5:15; Matayo 5:28, 29.

17. Ukuntu ab’i Sarudi n’i Lawodikiya babona ibintu be n’inyifato bari bafise vyari bimeze gute ubigereranije n’ukuntu Yezu yabona uko bari bamerewe mu vy’impwemu?

¹⁷ Ukuyemwo abantu bakeyi gusa, ishengero ry’i Sarudi nta na kimwe ryakejwemwo. ‘Ryavugwa’ canke ryasa n’uko ari rizima, ariko ukutanegwa ivy’impwemu kwari kwarashinze imizi ku buryo bw’uko kuri Yezu ryari “[ryar]apfuye.” Kugamburuka inkuru nziza vyagirwa mu buryo bwo guheza umwuga. Ese ukuntu ico ari icagirizi! (Ivyahishuriwe 3:1-3) Ishengero ry’i Lawodikiya ryari rimerewe nk’ukwo nyene. Ryariratira amatungo y’ivy’umubiri, rikavuga ngo “Nd’umukire,” yamara kuri Kirisitu ryari ‘ritindi, ryarafutanye, ari ryoro, rihumye, rigenda amenya.’​—Ivyahishuriwe 3:14-17.

18. Umuntu ashobora gute kwirinda kuba akazuyazi mu buryo bw’impwemu mu nyonga z’Imana?

¹⁸ Muri kino gihe, bamwebamwe bahora ari Abakirisu b’abizerwa na bo nyene baraguye mu vy’ukugambarara nk’ukwo. Kumbure bararetse agatima k’isi karanyoha ukubona ko ibintu vyihutirwa, gutyo batsimbataza inyifato yo kuba akazuyazi mu buryo bw’impwemu ku vyerekeye kwiga Bibiliya, isengesho, amakoraniro ya gikirisu be n’ubusuku. (2 Petero 3:3, 4, 11, 12) Ese ukuntu bihambaye ko abantu nk’abo bagamburukira Kirisitu mu gukoresha amatungo y’ivy’impwemu, emwe, ‘bakagura kuri [Kirisitu] izahabu yakūweko inkamba n’umuriro’! (Ivyahishuriwe 3:18) Amatungo nyakuri nk’ayo arimwo kuba ‘umutunzi ku bikorwa vyiza, kuba umunyabuntu akunda gutanga.’ Mu gukoresha ayo matungo nyayo y’agaciro, tuba ‘twibikiye ubutunzi buzoba itanguriro ryiza mu gihe kizoza, kugira ngo ducakire ubuzima nyakuri.’​—1 Timoteyo 6:17-19.

Barakejwe Kubera Ukugamburuka Kwabo

19. Yezu yakeje yongera akebura gute Abakirisu b’i Simuruna n’i Filadelufiya?

¹⁹ Ishengero ry’i Simuruna n’iry’i Filadelufiya ni uburorero bwibonekeje mu vy’ukugamburuka, kubera yuko amakete Yezu yayarungikiye ata kintu co kuyagayako carimwo. Yabwiye ab’i Simuruna ati: “Ndazi amarushwa yawe n’ubgoro bgawe (yamar’ur’umutunzi).” (Ivyahishuriwe 2:9) Ese ingene bari batandukanye n’ab’i Lawodikiya, abiratira amatungo y’isi, ariko mu vy’ukuri bari abakene! Birumvikana ko Shetani atahimbarwa no kubona umuntu n’umwe agaragaza ubwizerwe n’ukugamburukira Kirisitu. Ni co gituma Yezu yagabishije ati: “Ntutinye ivy’ugira ubabazwe. Eh’uwo Murwanizi agira ashire bamwe muri mwebge mw ibohero kugira ngo mugeragezwe, kandi muzogira amarushwa imisi cumi. Wame uyoboka gushitsa ku gupfa, nanje nzoguha igitsibo c’ubu[zima].” (Ivyahishuriwe 2:10) Mu buryo nk’ubwo nyene, Yezu yarakeje ab’i Filadelufiya, avuga ati: “Witondeye ijambo ryanje, [canke, warangamburukiye] ntiwihakanye izina ryanje. Ngira nze vuba: wumire ku co ufise, ntihagire ūgutwara igitsibo cawe.”​—Ivyahishuriwe 3:8, 11.

20. Abantu amamiliyoni muri kino gihe bitondeye gute ijambo rya Yezu, kandi bavyitondeye naho ibintu vyari vyifashe gute?

²⁰ Mu “musi w’Umukama,” uwatanguye mu 1914, amasigarira y’abizerwa be na bagenzi babo bo mu zindi ntama, ubu baharurwa mu mamiliyoni, na bo nyene baritondeye ijambo rya Yezu mu kugira uruhara n’umwete mu busuku be no mu kuguma bumiye ku kutadohoka kwabo. Nka kumwe kw’abavukanyi babo bo mu kinjana ca mbere, bamwebamwe baracumukuye bazira ukugamburukira Kirisitu, mbere baranatabwa mu mabohero no mu makambi y’itunatuniro. Abandi bitondeye ijambo rya Yezu mu kuguma bafise ‘ijisho riremuruye,’ n’aho ivy’ubutunzi be n’umwina ari vyo vyari bibakikuje. (Matayo 6:22, 23) Vyemere, ahantu hose be no mu bihe vyose, Abakirisu b’ukuri barabandanya gutuma umutima wa Yehova unezerwa biciye ku kugamburuka kwabo.​—Imigani 27:11.

21. (a) Ni ibanga ryo mu vy’impwemu irihe umugwi wa wa mushumba uzobandanya kurangura? (b) Dushobora kwerekana gute ko dushaka vy’ukuri kugamburukira Shilo?

²¹ Uko twegereza ya marushwa ahambaye, “wa mushumba w’umwizerwa kandi w’incabwenge” (NW) aguma yiyemeje kudaheba kugamburukira Shebuja, ari we Kirisitu. Ivyo birimwo gutegurira abo mu rugo rw’Imana imfungurwa z’ivy’impwemu ku gihe. Nimuze rero tubandanye gukenguruka ishirahamwe rya gitewokarasi rya Yehova ryiza igitangaza, dukenguruke n’ivyo rituronsa. Muri ubwo buryo, tuzoba tugaragaje ko tuyobokera Shilo, uwuzoha impera y’ubuzima budahera abatwarwa biwe bagamburuka.​—Matayo 24:45-47; 25:40; Yohana 5:22-24.

[Utujambo tw’epfo]

Woba Uvyibuka?

• Ni uruhara uruhe Yezu yategerezwa kurangura nk’uko vyabuwe mu buhanuzi bwa Yakobo igihe yari ku mpfiro?

• Tuzi gute ko Yezu ari we Shilo, kandi ni impwemu iyihe dutegerezwa kwirinda?

• Ni impanuro iyihe ihuje n’igihe cacu iri mu makete yarungikiwe ya mashengero ndwi yo mu Vyahishuriwe?

• Ni mu buhe buryo butandukanye dushobora kwigana abo mw’ishengero ry’i Simuruna n’iry’i Filadelufiya ha kera?

[Amafoto ku rup. 18]

Yehova arahezagira abasavyi biwe kubera bagamburukira wa “mubgiriza” w’umwizerwa

[Ifoto ku rup. 19]

Akosho ka Shetani karatuma kugamburukira Imana biba urugamba

[Amafoto ku rup. 21]

Ubucuti bukomeye tugiriranira na Yehova buradufasha kuba abantu bamugamburukira