Yehova ni Umwungere wacu

“Uhoraho ni we mwungere wanje, sinzokena”.​—Zaburi 23:1.

1-3. Ni kubera iki bidatangaje kuba Dawidi yaragereranije Yehova n’umwungere?

HAMWE bogusaba kudondora ingene Yehova abungabunga abasavyi biwe, wovuga iki? Ni ikigereranyo ikihe wotanga cerekana ukuntu Yehova abungabunga abasavyi biwe b’intahemuka abigiranye ikibabarwe? Haraheze imyaka irenga 3.000 Dawidi umwanditsi wa Zaburi akaba n’umwami yanditse amajambo adondora Yehova mu buryo bw’agahore, mu gukoresha ikigereranyo akuye mu gikorwa yahora akora akiri muto.

² Dawidi yari yarabaye umwungere akiri umwana. Uca ubona rero ko yari azi ibijanye no kubungabunga intama. Yari azi neza yuko intama uziretse zonyene zica zizimira bitagoranye, maze zigatwarwa n’abambuzi canke ibikoko vyo mw’ishamba (1 Samweli 17:34-36). Intama zitari kumwe n’umwungere azitwararika, ntizomenya icanya zija kurishamwo. Nta gukeka ko Dawidi amaze kwiterera mu myaka, yibuka neza amasaha menshi yari yaramaze ayobora intama, azikingira yongera azigaburira.

³ Ntibitangaje kuba Dawidi yaributse igikorwa c’ubwungere igihe yahumekerwa kudondora ukuntu Yehova abungabunga abasavyi biwe. Zaburi ya 23, iyanditswe na Dawidi, itangura n’aya majambo agira ati: “Uhoraho ni we mwungere wanje, sinzokena”. Nimuze twihweze igituma ayo amajambo yanditse abereye. Hanyuma, tubifashijwemwo n’iyo Zaburi ya 23, turaza kubona uburyo butandukanye Yehova abungabungamwo abasavyi biwe nk’uko umwungere abungabunga intama ziwe.​—1 Petero 2:25.

Ikigereranyo kibereye

4, 5. Bibiliya idondora gute ukuntu intama zimeze?

⁴ Mu Vyanditswe harimwo amazina menshi adondora Yehova, mugabo izina “Umwungere” riri mu mazina yerekana ikibabarwe kuruta ayandi (Zaburi 80:1). Kugira ngo dutegere neza igituma bibereye ko Yehova yitwa Umwungere, vyoba ngirakamaro tumenye ibi bintu bibiri: ica mbere ni ukuntu intama zimeze. Ikigira kabiri na co ni ibikorwa umwungere mwiza yakora be na kamere yaba afise.

⁵ Akenshi Bibiliya iravuga ibiranga intama, ikerekana ko iyo umwungere wazo azigaragarije igishika zica zivyakira neza (2 Samweli 12:3), ko zitekereza (Yesaya 53:7), be n’uko zitazi kwirwanira (Mika 5:8). Umwanditsi umwe yamaze imyaka itari mike atunze intama, yanditse ati: “Intama ‘ntizishobora kwibungabunga’ nk’uko bamwe boba bavyibaza. Zisaba kuguma zitwararikwa no kubungabungwa cane kuruta ubundi bwoko bwose bw’ibitungwa”. Kugira ngo ivyo biremwa vy’intege nke bibandanye kubaho, birakeneye umwungere avyitwararika.​—Ezekiyeli 34:5.

6. Igitabu kimwe c’inyizamvugo y’ivya Bibiliya kidondora gute ibikorwa umwungere wo mu gihe ca kera yakora ku musi?

⁶ None umwungere wo mu gihe ca kera yakora ibikorwa ibihe ku musi? Igitabu kimwe c’inyizamvugo y’ivya Bibiliya gisigura giti: “Yarazinduka agaturutsa intama azikuye mu ruhongore, akazija imbere, akazijana aho ziza kurisha. Ashitseyo yaca amara umusi wose azicunze, akitwararika kuraba yuko ata n’imwe izimira. Hagize iyimuca mu ryahumye ikaja kure y’izindi, yarayirondera akobeje gushika ayitoye akayigarukana mu zindi. . . . Bwije yarazicura kugira zisubire mu ruhongore, agahagarara ku muryango akaza araziharura uko zica munsi y’inkoni kugira ngo yiyemeze neza yuko ata n’imwe yoba ibuze. . . . Akenshi yategerezwa kurarira urwo ruhongore kugira azikingire ibikoko vyo mw’ishamba vyoza kuzitera canke ibisuma vyokwomboka biriko bigerageza kuziba ku mayeri”a.

7. Ni kubera iki rimwe na rimwe vyaba bikenewe ko umwungere arushiriza kwihangana no kugira ikibabarwe?

⁷ Hari ibihe bimwebimwe wasanga intama zikenera ko umwungere arushiriza kuzihanganira no kuzigirira ikibabarwe, na canecane izaba zifise amezi be n’imyagazi (Itanguriro 33:13). Igitabu kimwe gisigura ivya Bibiliya kivuga giti: “Akenshi birakunda gushika akagazi kakavukira kure cane ku musozi. Umwungere aca agumiza ijisho kuri iyo ntama iba ihejeje kuvyara maze agaterura akagazi kavutse akagatwara mu ruhongore. Mu kiringo c’imisi mikeyi, ashobora kugatwara mu maboko canke mu mpuzu yarenza hejuru y’izindi gushika gashoboye gutambuka” (Yesaya 40:10, 11). Biribonekeza ko umwungere mwiza yaba akeneye kuba umuntu w’inguvu akaba n’umuntu w’ikibabarwe.

8. Ni imvo izihe Dawidi avuga zituma yizigira Yehova?

⁸ “Uhoraho ni we mwungere wanje”. Wumva ubwo atari uburyo bubereye bwo kudondora Data wa twese wo mw’ijuru? Uko turimbura Zaburi ya 23, turaza kubona ingene Imana itubungabunga ikoreshe inguvu be n’ikibabarwe nka kurya kw’umwungere. Ku murongo wa 1, Dawidi arerekana ukuntu yizigiye yuko Imana izotunganya ibikenewe vyose ku bw’intama zayo, ku buryo ata co ‘zizokena’. Mu mirongo ikurikira, Dawidi aravuga imvo zitatu zituma yizigira Yehova, izo na zo zikaba ari izi: Yehova arayobora intama ziwe, akazikingira akongera akazigaburira. Nimuze tuganire kuri izo mvo imwimwe ukwayo.

‘Aranyobora’

9. Dawidi adondora ahantu hatagira inkomanzi hameze gute, kandi intama zoshika gute ahantu nk’aho?

⁹ Ubwa mbere, Yehova arayobora abasavyi biwe. Dawidi yandika ati: “Amvyagiza mu canya c’ubgatsi butotahaye: andōngōrera i ruhande [“y’ibibanza vyo kuruhukiramwo binyweshwa n’amazi akwiye. Aruhura”, NW] umutima wanje. Anyobora mu nzira zo kugororoka kubg’izina ryiwe” (Zaburi 23:2, 3). Ca wiha ishusho y’umukuku uvyagiye ata nkomanzi ahantu hari umusesekara! Hano Dawidi ariko adondora ahantu harangwa agahimbare, ukuruhurirwa be n’umutekano. Ijambo ry’igiheburayo ryahinduwe ngo “icanya” rirashobora gusobanura “ahantu hahimbaye”. Mu gihe intama zitari kumwe n’uwuziyobora, ntizoshobora kumenya ahantu ho kuruhukira zivyagira ata nkomanzi. Umwungere wazo ategerezwa kuziyobora akazishikana mwene aho “hantu hahimbaye”.

10. Imana yerekana gute yuko itwizigiye?

¹⁰ None Yehova atuyobora gute muri iki gihe? Uburyo bumwe abigira ni mu kutwereka akarorero. Ijambo ryiwe riduhimiriza ‘kwigana Imana’ (Abanyefeso 5:1). Mu mirongo ikikuje ayo majambo haravugwamwo ukugiriranira imbabazi, uguharirana be n’urukundo (Abanyefeso 4:32; 5:2). Nta gukeka, Yehova aratanga akarorero keza cane kuruta ubundi bwose mu kugaragaza mwene izo kamere z’igikundiro. None yoba ariko adusaba ibintu bidashoboka igihe adusavye kumwigana? Ihibambewe! Ahubwo riho, iyo mpanuro yahumetswe yerekana neza yuko Yehova atwizigira. Uti gute? Twaremwe mw’ishusho y’Imana, ivyo bikaba bisobanura yuko twavukanye kamere zijanye n’ukwigenza runtu be n’ubushobozi bwo gutahura ibintu vy’impwemu (Itanguriro 1:26). Ku bw’ivyo, Yehova arazi yuko, naho turi abanyagasembwa, dufise ubushobozi bwo gutsimbataza kamere we ubwiwe agaragaza. Iyumvire ntuze kuba Imana yacu y’inyarukundo yizigira yuko dushobora kumera nka yo! Nitwakurikiza akarorero kayo, izotuyobora mu buryo bw’ikigereranyo idushikane mu ‘kibanza co kuruhukiramwo’ gihimbaye. Muri iyi si yuzuye ubukazi, ‘tuzokwibera mu mahoro’, twinovora amahoro ava ku kuba tuzi yuko twemerwa n’Imana.​—Zaburi 4:8; 29:11.

11. Yehova araba iki mu kuyobora intama ziwe, kandi ivyo bibonekera gute mu vyo adusaba?

¹¹ Yehova atuyobora abigiranye ikibabarwe n’ukwihangana. Umwungere araraba aho ubushobozi bw’intama ziwe bugera, maze akaziyobora ‘nk’uko ukugenda kwazo kuri’ (Itanguriro 33:14). Muri ubwo buryo nyene, Yehova ayobora intama ziwe ‘nk’uko ukugenda kwazo kuri’ ni ukuvuga akurikije uko zigenda. Araraba ubushobozi dufise be n’ukuntu ivyacu vyifashe. Kukaba nkako, arahindura intambuko, ntiyigere adusaba ivyo tudashoboye. Ico adusaba ni ukumukorera n’ubugingo bwacu bwose (Ab’i Kolosayi 3:23). Mugabo none, bite nka hamwe woba ugeze mu zabukuru maze ukaba utakibasha gukora nk’ivyo wahora ukora? Canke bite ho nka hamwe woba urwaye indwara ikomeye ituma udakora ibintu bimwebimwe? Ubwiza bw’ico kintu adusaba co kumukorera n’ubugingo bwacu bwose buhagaze ng’aho. Nta bantu babiri usanga bameze neza na neza kumwe. Gukorera Imana n’ubugingo bwawe bwose bisigura gukoresha inguvu zawe zose n’inkomezi zawe zose mu gikorwa c’Imana ku rugero rwose wewe ubwawe ushobora gushikanako. Naho amagara make yotuma tudakora cane nk’uko twahora, Yehova araha agaciro ukuntu tumusenga tubigiranye umutima wacu wose.​—Mariko 12:29, 30.

12. Ni akarorero akahe ko mu Vyagezwe vya Musa kerekana yuko Yehova ayobora intama ziwe ‘nk’uko ukugenda kwazo kuri’?

¹² Kugira ngo ubone yuko Yehova ayobora intama ziwe ‘nk’uko ukugenda kwazo kuri’, rimbura ibivugwa mu Vyagezwe vya Musa ku bijanye n’amashikanwa y’impongano amwamwe yatangwa. Yehova yashaka amashikanwa meza atanzwe bivuye ku mutima ukenguruka. Ariko kandi, amashikanwa yatangwa yavana n’ubushobozi bwa nyene kuyatanga. Ivyagezwe vyavuga biti: “Ni yaba atoshobora kuronka umwana w’intama, anzanire . . . intunguru zibiri canke ivyana vy’inuma bibiri”. Bite ho nimba n’utwo tunuma tubiri atashobora kuturonka? Yaca azana “ifu igogōretse” (Abalewi 5:7, 11). Ivyo birerekana yuko Imana itasaba ibirenze ivyo umuntu yaba ashoboye gutanga. Kubera yuko Imana idahinduka, twoshobora guhumurizwa no kumenya yuko itigera idusaba ibirenze ivyo dushoboye gutanga. Ahubwo riho, irahimbarwa no kwemera ivyo dushoboye gutanga (Malaki 3:6). Ese ingene ari umunezero ntangere kuyoborwa n’Umwungere atahura ibintu nk’uwo!

“Sinzogira ikibi ntinya; kuk’uri kumwe nanje”

13. Muri Zaburi 23:4, ni mu buryo ki Dawidi arushiriza kuvuga kigenzi, kandi ni kubera iki ivyo bidatangaje?

¹³ Dawidi aratanga imvo igira kabiri ituma yizigira Umwungere wiwe: Yehova arakingira intama ziwe. Dusoma duti: “Mbere naho noca mu mwonga w’igitūtu c’urupfu sinzogira ikibi ntinya; kuk’uri kumwe nanje: inyobozo yawe n’ubuhiri bgawe ni vyo bimpumuriza” (Zaburi 23:4). Urabona ko ubu Dawidi arushiriza kuvuga kigenzi, mu kuvuga abwira Yehova ubwiwe, nko mu gukoresha imvugo ngo “uri”. Ivyo ntibitangaje kubera yuko Dawidi ariko aravuga ingene Imana yamufashije kwihanganira ivyago. Dawidi yari yaraciye mu myonga myinshi y’umwiza, ni ukuvuga ibihe wasanga ubuzima bwiwe bwite buri mu kaga. Mugabo, ntiyigeze areka ngo ubwoba bumurengere, kubera ko yabona yuko Imana iri kumwe na we, yiteguriye gukoresha inkoni y’‘inyobozo n’ubuhiri’ vyayo mu kumukingira. Dawidi yarahumurizwa n’ukwo kwiyumvamwo yuko akingiwe, kandi nta nkeka yuko vyatuma arushiriza kwiyegereza Yehovab.

14. Bibiliya idukura amazinda gute ku bijanye n’ukuntu Yehova adukingira, ariko ni igiki ivyo bidasigura?

¹⁴ Yehova akingira gute intama ziwe muri iki gihe? Bibiliya iradukura amazinda yuko ata baturwanya na bamwe, yaba amadayimoni canke abantu, bazokwigera bashobora guherengeteza intama ziwe zo kw’isi. Yehova ntazokwigera areka ngo ivyo bishike (Yesaya 54:17; 2 Petero 2:9). Ariko ntiwumve, ivyo ntibisigura yuko uwo Mwungere wacu azoca adukingira ivyago vyose bidushikira. Dushikirwa n’ibigeragezo bishikira abantu bose muri rusangi, vyongeye turarwanywa nk’uko abakirisu bose b’ukuri barwanywa (2 Timoteyo 3:12; Yakobo 1:2). Hari ibihe wosanga ari nk’aho turiko “[tura]ca mu mwonga w’igitūtu c’urupfu”. Nk’akarorero, vyoshika tugahakwa gupfa bivuye ku ruhamo canke indwara zikomeye. Canke vyoshoboka yuko umuntu twakunda ahakwa gupfa, canke mbere ugasanga n’ugupfa arapfuye. Mu gihe turi mu bintu bisa n’umwiza w’umuzitanya, Umwungere wacu aba ari kumwe natwe, kandi azodukingira. Uti gute?

15, 16. (a) Ni mu buhe buryo Yehova adufasha kumenya uko tuvyifatamwo ku bijanye n’intambamyi twoshobora guhura? (b) Tanga akarorero kugira ngo werekane ingene Yehova adufasha mu bihe vy’ibigeragezo.

¹⁵ Yehova ntasezerana yuko azodutabara ku gitangaroc. Mugabo ico twomenya tudakeka ni iki: Yehova azodufasha gutsinda intambamyi izo ari zo zose twohura. Arashobora kuduha ubukerebutsi kugira ngo tumenye ingene tuvyifatamwo ‘mu bigeragezo bitari bimwe’ (Yakobo 1:2-5). Umwungere ntakoresha inkoni y’inyobozo yiwe canke ubuhiri bwiwe mu kwirukana gusa ibikoko bishaka gutwara intama ziwe, ariko aranayikoresha mu kuzigarura mu nzira ibereye. Yehova arashobora kumera nk’uwutugarura, kumbure abicishije ku wo dusangiye ugusenga, kugira ngo dukurikize impanuro zishingiye kuri Bibiliya zoshobora kugira ikintu kinini zihinduye ku kuntu ivyacu vyifashe. Ikigeretseko, Yehova arashobora kuduha inkomezi zo kwihangana (Ab’i Filipi 4:13). Abicishije ku mpwemu yera yiwe, yoshobora kuduha “ubushobozi buhebuje” (2 Ab’i Korinto 4:7). Impwemu y’Imana irashobora kudufasha kwihanganira ikigeragezo ca Shetani ico ari co cose (1 Ab’i Korinto 10:13). Wumva none bidahumuriza kumenya yuko Yehova yama yiteguriye kudufasha?

¹⁶ Ni vyo, naho twoba turi mu mwonga w’umwiza umeze gute, si ngombwa ngo tuwucemwo turi twenyene. Umwungere wacu aba ari kumwe natwe, akadufasha mu buryo kumbure tutoshoka tubona neza. Rimbura ivyashikiye umukurambere umwe w’umukirisu basanze arwaye ikivyimba co mu bwonko gishobora kumuhitana. Avuga ati: “Mvugishije ukuri, mu ntango naguma nibaza niba Yehova atari yanshavuriye, eka mbere nkibaza niba yarankunda. Mugabo nari nariyemeje kutava kuri Yehova. Ahubwo riho, naramwaturira ibindaje ishinga. Maze Yehova yaramfashije, akenshi akampumuriza abicishije ku bavukanyi n’abavukanyikazi banje. Benshi barambwira amakuru y’ingirakamaro yerekeye ukuntu bo ubwabo bashoboye kwihanganira indwara zikomeye. Amajambo bambwira atarimwo ukurenza urugero yaranyibukije yuko muri ivyo vyariko biranshikira ata kintu gishasha na kimwe carimwo. Ukuba baramfashije mu buryo ngirakimazi no kuba bamwebamwe barambaza mu buryo bukora ku mutima nimba hari ico bomfasha, vyaransubirije umutima mu nda biranyereka yuko ngihimbara Yehova. Ariko ntiwumve, ntegerezwa kubandanya kunyinyana n’indwara yanje, kandi sinzi ingene bizohava bigenda. Mugabo ndumva neza yuko Yehova ari kumwe nanje kandi ko azobandanya kumfasha muri ico kigeragezo”.

“Untegurira ameza”

17. Dawidi adondora gute Yehova muri Zaburi 23:5, kandi ni kubera iki ivyo bidahushanye na ca kigereranyo c’umwungere?

¹⁷ Ubu na ho Dawidi aravuga imvo igira gatatu ituma yizigira Umwungere wiwe: Yehova aragaburira intama ziwe kandi ivyo abigira mu kuziha umusesekara. Dawidi yandika ati: “Untegurira ameza mu maso y’abansi banje, wansīze amavuta mu mutwe; igikombe canje kirasēsekaye” (Zaburi 23:5). Muri uyu murongo, Dawidi adondora Umwungere wiwe nk’umwakiranyi w’inda nziza atanga ibifungurwa n’ibinyobwa vy’umusesekara. Ico kigereranyo ntigihushanye na ca kindi c’uko Yehova ari nk’umwungere abungabunga intama ziwe. Nakare umwungere mwiza ategerezwa kuba azi ahari uburagiriro butotahaye be n’ahari amazi yo gushōka akwiye ku buryo umukuku wiwe ‘ata co uzokena’.​—Zaburi 23:1, 2.

18. Ni igiki cerekana yuko Yehova ari umwakiranyi w’inda nziza?

¹⁸ Umwungere wacu yoba kandi ari umwakiranyi w’inda nziza? Cane nyene! Iyumvire honyene imfungurwa zo mu vy’impwemu nziza, nyinshi kandi zitandukanye twinovora muri iki gihe. Yehova abicishije kuri wa mugwi w’umushumba wo kwizigirwa w’ubwenge, yaraturonkeje ibitabu bidufasha, amaporogarama yigisha agirirwa ku makoraniro, ku materaniro no ku mahwaniro. Kimwe cose muri ivyo kiraturonsa ivyo dukeneye mu buryo bw’impwemu (Matayo 24:45-47). Nta gukeka, ibifungurwa vyo mu buryo bw’impwemu ntibikenye. Wa “mushumba wo kwizigirwa w’ubgenge” yarahinguye Bibiliya amamiliyoni be n’ibitabu amamiliyoni bigenewe gufasha kwiga Bibiliya. Kandi mwene ivyo bitabu ubu biboneka mu ndimi 413. Izo mfungurwa zo mu vy’impwemu Yehova yazitanze mu buryo bwinshi butandukanye, uhereye ku zimeze nk’“amata”, ni ukuvuga inyigisho z’ishimikiro za Bibiliya, ugashika ku “vyo kurya bigumye” ari vyo nyigisho zo mu vy’impwemu zirushirije kuba izimbitse (Abaheburayo 5:11-14). Ikivamwo ni uko igihe duhanganye n’ingorane canke dufise ingingo tubwirizwa gufata, dushobora guca turonka neza na neza ivyo dukeneye. None iyo hataba hariho mwene izo mfungurwa zo mu vy’impwemu tuba tugeze hehe? Vy’ukuri, Umwungere wacu ni we mutanzi w’inda nziza kuruta abandi bose!​—Yesaya 25:6; 65:13.

“Nzoba mu ngoro y’Uhoraho”

19, 20. (a) Muri Zaburi 23:6, Dawidi avuga ko yizigiye iki, kandi dushobora gute kugira ukwo kwizigira? (b) Ni igiki cihwezwa mu kiganiro gikurikira?

¹⁹ Dawidi amaze kurimbura inzira z’Umwungere wiwe akaba ari na we amuronsa ivyo akeneye, asozera ati: “N’ukuri ivyiza n’imbabazi bizonyomako imisi yose y’ukubaho kwanje, nanje nzoba mu ngoro y’Uhoraho ibihe vyose” (Zaburi 23:6). Ayo majambo Dawidi ayavuga abitumwe n’umutima wuzuye ugukenguruka n’ukwizera: arakenguruka iyo yibutse ivyo muri kahise, akizera mu kwitega ivyo muri kazoza. Uwo yahoze ari umwungere nta co yinona, kubera ko azi yuko, mu gihe yobandanya kumwiyegereza, nk’aho yoba yibera mu nzu y’uwo Mwungere wiwe, Umwungere wiwe wo mw’ijuru Yehova azokwama amwitwararikana urukundo.

²⁰ Ese ukuntu dukwiye gukenguruka ku bw’ayo majambo meza igitangaza yanditswe muri iyo Zaburi ya 23! Dawidi nta bundi buryo bubereye kuruta ubu yari kuronka bwo kudondora ukuntu Yehova ayobora intama ziwe, akazikingira akongera akazigaburira. Amajambo aranga igishika ya Dawidi yarazigamwe kugira ngo adusubirize umutima mu nda yuko Yehova ashobora kutubera Umwungere. Egome, magingo tuzoguma twiyegereje Yehova, azotubungabunga nk’Umwungere w’umunyarukundo “ibihe vyose”, eka mbere no gushika ibihe bidahera. Ariko rero, kubera yuko turi intama ziwe, turafise ibanga ryo kugendana n’uwo Mwungere wacu mukuru Yehova. Ico ivyo bisaba turaza kucihweza mu kiganiro gikurikira.

[Utujambo tw’epfo]

Woba uvyibuka?

• Ni kubera iki bibereye ko Dawidi agereranya Yehova n’umwungere?

• Yehova atuyobora gute akoresheje ugutahura ibintu?

• Ni mu buhe buryo Yehova adufasha kwihanganira ibigeragezo?

• Ni igiki cerekana yuko Yehova ari umwakiranyi w’inda nziza?

[Ifoto ku rup. 18]

Yehova ayobora intama ziwe cokimwe n’umwungere wo muri Isirayeli