Yehova ni Umukama Segaba wacu!

“Nashize ubuhungiro bwanje mu Mukama Segaba Yehova.”​—ZAB. 73:28.

1. Mu kuvuga amajambo dusanga mu 1 Abakorinto 7:31, bigaragara ko Paulo yariko yerekeza kuki?

“IBINTU vyo kuri iyi si biriko birahinduka.” Ivyo vyavuzwe n’intumwa Paulo. (1 Kor. 7:31) Biragaragara ko yariko arasanisha isi n’ikiniro ririko abakinyi bakina uruhara rwabo mu gikino ari abantu beza canke babi gushika ibintu biriko birakinwa bihindutse hakaza ibindi.

2, 3. (a) Ivyo kurwanya ubusegaba bwa Yehova vyogereranywa n’iki? (b) Ni ibibazo ibihe tugira turimbure?

² Muri iki gihe, hari ibintu bihambaye cane vyogereranywa n’igikino biriko biraba, kandi birakuraba! Ivyo bintu vyerekeye canecane iyemezwa ry’ubusegaba bwa Yehova Imana. Ivyo bintu birashobora kugereranywa n’ukuntu ibintu vyoshobora kuba vyifashe mu gihugu kinaka. Ku ruhande rumwe, hari intwaro yemewe itegeka. Ku rundi ruhande, hari umugwi w’inkozi z’ikibi utwara ukoresheje ubugunge, ubukazi n’ubwicanyi. Uwo mugwi utemewe urarwanya ubwo butegetsi bwemewe ukongera ukagerageza gutuma abanyagihugu bose badashigikira intwaro yabo.

³ Ibintu bisa n’ivyo biriko biraba kw’isi yose. Hariho intwaro yemewe y’“Umukama Segaba Yehova.” (Zab. 71:5) Mugabo abantu ubu barageramiwe n’umugwi w’inkozi z’ikibi utwarwa na “wa mubisha.” (1 Yoh. 5:19) Uwo mugwi urarwanya intwaro yemewe y’Imana ukongera ukagerageza gutuma abantu bose badashigikira ubutegetsi bwayo. Ni igiki none catumye ibintu bimera gutyo? Ni kubera iki Imana ireka bikabandanya? Umwumwe wese muri twebwe yokora iki ku bijanye n’ivyo bintu?

Ibintu bigize ico gikino

4. Ca gikino kigenda kirahishurwa kibera kw’isi yose, cerekeye ibibazo bibiri bifitaniye isano ibihe?

⁴ Ico gikino kigenda kirahishurwa kibera kw’isi yose, cerekeye ibibazo bibiri bifitaniye isano, ivyo na vyo bikaba ari ubusegaba bwa Yehova hamwe n’ugutungana kw’abantu. Mu Vyanditswe, akenshi Yehova yitwa “Umukama Segaba.” Nk’akarorero, umwanditsi wa Zaburi abitumwe n’uko yari amwizigiye bimwe bishitse, yaririmvye ati: “Nashize ubuhungiro bwanje mu Mukama Segaba Yehova.” (Zab. 73:28) “Ubusegaba” ni ububasha canke ubutegetsi budasumbwa. Umutegetsi segaba aba afise ubukuru budasumbwa. Turi n’imvo zumvikana zo kubona ko Yehova Imana ari Rudasumbwa.​—Dan. 7:22.

5. Ni kubera iki dukwiye kuvyurirwa umutima wo gushigikira ubusegaba bwa Yehova?

⁵ Kubera ko Yehova Imana ari Umuremyi, ni we Segaba w’isi n’ibiriho vyose. (Soma Ivyahishuwe 4:11.) Vyongeye, Yehova ni Umucamanza wacu, ni we adushingira ivyagezwe akaba n’Umwami wacu, kuko ubwiwe araba ivy’ubucamanza, ivy’amategeko be n’ivy’ubutegetsi mu ntwaro iganza ibiriho vyose. (Yes. 33:22) Kubera ko Imana ari yo dukesha ukubaho kwacu ikaba kandi ari yo dukesha uburaro n’uburamuko, turakwiye kubona ko ari yo Mukama Segaba wacu. Tuzovyurirwa umutima wo gushigikira ikibanza ciwe kiri hejuru, nitwaguma twibuka yuko “Yehova ubwiwe yashimangiye intebe yiwe y’ubwami mu majuru; kandi ingoma yiwe yaganje vyose.”​—Zab. 103:19; Ivyak. 4:24.

6. Ugutungana ni iki?

⁶ Kugira ngo dushigikire ubusegaba bwa Yehova, dutegerezwa kugumana ugutungana kwacu imbere yiwe. “Ugutungana” ni ukugira inyifato runtu iroranye canke itagira agahaze. Umuntu aguma atunganye ni umuntu atagirako umugayo kandi agororotse. Umwe sekuruza w’imiryango Yobu ni ko yari ameze.​—Yobu 1:1.

Ingene ico gikino catanguye

7, 8. Shetani yahigishije gute uburenganzira Yehova afise bwo kuba Segaba?

⁷ Haraciye imyaka nka 6.000 ikiremwa c’impwemu kimwe gihigishije uburenganzira Yehova afise bwo kuba Segaba. Icipfuzo kiranga ubwikunzi co kurondera gusengwa ni co cabaye intandaro y’ivyo uwo mugarariji yavuze be n’ivyo yakoze. Yaratumye umugabo n’umugore ba mbere ari bo Adamu na Eva banka gushigikira ubusegaba bw’Imana, yongera aragerageza gusiga iceyi izina rya Yehova mu kuvuga yuko yari yababeshe. (Soma Itanguriro 3:1-5.) Uwo mugarariji yacitse Umwansi katwa, ni ukuvuga Shetani (bisobanura Umurwanizi), Umubesheranyi, inzoka (bisobanura uwuhendana), be n’igisato (bisobanura uwurotsa abandi).​—Ivyah. 12:9.

⁸ Shetani yarigize umutegetsi arwanya Imana. None Umukama Segaba Yehova yari gukora iki imbere y’ukwo guhigishwa? Yoba yari guca akuraho abo bagarariji batatu ari bo Shetani, Adamu na Eva? Nta gukeka ko yari afise ububasha bwo kubigira, kandi kubigenza gutyo vyari gutorera umuti ikibazo kijanye no kumenya uwari afise ububasha kaminuza. Vyari kwerekana kandi ko Yehova yavuze ukuri ku bijanye n’igihano boronse baramutse barenze itegeko ryiwe. Ni kubera iki none Imana itakoze ico kintu?

9. Shetani yavyuye amakenga ku bijanye n’iki?

⁹ Mu kubesha Adamu na Eva akabakura ku Mana, Shetani yaravyuye amakenga ku bijanye n’uburenganzira Yehova afise bwo gusaba ko abantu bamugamburukira. Vyongeye, mu gutuma umugabo n’umugore ba mbere bagambararira Imana, Shetani kandi yaravyuye amakenga ku bijanye n’ukudahemuka kw’ibiremwa bifise ubwenge vyose. Nk’uko vyagaragaye mu vyashikiye Yobu, uno akaba yarashigikiye ubusegaba bwa Yehova, Shetani yavuze yuko yari gushobora gukura abantu bose ku Mana.​—Yobu 2:1-5.

10. Kuba Imana yarabaye irareka kwemeza ubusegaba bwayo, vyatumye haboneka iki?

¹⁰ Kuba Yehova yarabaye arareka kwemeza ubusegaba bwiwe, vyatumye Shetani aronka umwanya wo kwerekana nimba ivyo yavuze ari ukuri. Imana yarahaye kandi abantu akaryo ko kwerekana ko bashigikira ubusegaba bwayo. None ni ibiki vyabaye uko ibinjana vyagiye birarengana? Shetani yarashizeho umugwi ukomeye w’inkozi z’ikibi. Amaherezo Yehova Imana azokuraho uwo mugwi hamwe na Shetani, abe atanze ikimenyamenya gikomeye c’uko ari we afise uburenganzira bwo kuba Segaba. Yehova Imana yari azi adakeka na gato yuko hovuyemwo ikintu ciza ku buryo yabivuze imbere y’igihe igihe bwa bugarariji bwaba muri Edeni.​—Ita. 3:15.

11. Ni igiki abantu benshi bakoze mu bijanye n’ubusegaba bwa Yehova?

¹¹ Abantu benshi baragaragaje ukwizera bongera barazigama ugutungana kwabo mu bijanye n’ubusegaba bwa Yehova be n’ukwezwa kw’izina ryiwe. Muri bo harimwo Abeli, Henoki, Nowa, Aburahamu, Sara, Musa, Rusi, Dawidi, Yezu, abigishwa ba Kristu bo mu ntango, be n’abantu amamiliyoni bagumana ugutungana kwabo muri iki gihe. Mwene abo bantu bashigikira ubusegaba bw’Imana baragira uruhara mu vyo kwerekana ko Shetani ari umubeshi no mu vyo gukura iceyi kw’izina rya Yehova, ico Shetani yarisize mu kwiyemera yuko ashobora gukura abantu bose ku Mana.​—Imig. 27:11.

Turazi ikizovamwo

12. Dushobora gute kwemera tudakeka ko Imana itazobandanya kwihanganira ububisha?

¹² Turashobora kwemera tudakeka yuko vuba Yehova azokwemeza ubusegaba bwiwe. Ntazobandanya kwihanganira ububisha, kandi turazi yuko turi mu misi ya nyuma. Yehova yarahagurukiye ububisha mu gihe ca rya Segenya. Yaratikije Sodomu na Gomora be na Farawo hamwe n’ingabo ziwe. Sisera n’ingabo ziwe hamwe na Senakeribu n’inteko ziwe z’Abashuri barananiwe kurwanya Musumbavyose. (Ita. 7:1, 23; 19:24, 25; Kuv. 14:30, 31; Abac. 4:15, 16; 2 Bm. 19:35, 36) Turashobora rero kwizigira tudakeka yuko Yehova Imana atazobandanya kwihanganira abasuzugura izina ryiwe n’abafata nabi Ivyabona vyiwe. Vyongeye, ubu turibonera ikimenyamenya ca ca kimenyetso cerekana ukuhaba kwa Yezu be n’ic’insozero y’ivy’iyi si mbi.​—Mat. 24:3.

13. Twokora iki kugira ngo ntituze dutikirizwe hamwe n’abansi ba Yehova?

¹³ Kugira ngo ntituze dutikirizwe hamwe n’abansi b’Imana, dutegerezwa gushigikira ubusegaba bwa Yehova. Ivyo twobigira gute? Twobigira mu kuguma twitandukanije n’ubutegetsi bwa Shetani burangwa n’ubukozi bw’ikibi kandi ntitwemere ko abakozi biwe badutera ubwoba. (Yes. 52:11; Yoh. 17:16; Ivyak. 5:29) Tubigenjeje gutyo ni ho gusa dushobora gushigikira ubusegaba bwa Data wa twese wo mw’ijuru, maze tukizigira kuzozigurizwa Yehova niyakura iceyi kw’izina ryiwe akongera akerekana ko ari we Segaba w’ibiriho vyose.

14. Ni ibiki bihishurwa mu bice bitandukanye vya Bibiliya?

¹⁴ Amakuru y’ido n’ido yerekeye abantu be n’ubusegaba bwa Yehova aravugwa muri Bibiliya yose uko ingana. Ibigabane bitatu vya mbere biratubwira ukuntu ibintu vyaremwe be n’ukuntu umuntu yakoze igicumuro, mu gihe ibigabane bitatu vya nyuma bivuga ukuntu abantu bazokira igicumuro. Impapuro ziri hagati y’ivyo bigabane ziratanga amakuru y’ido n’ido ajanye n’ivyo Umukama Segaba Yehova yakoze kugira ngo arangure umugambi afitiye abantu, isi be n’ibiriho vyose. Igitabu c’Itanguriro kirerekana ingene Shetani be n’ububisha vyinjiye mw’isi, igice ca nyuma c’igitabu c’Ivyahishuwe na co kikerekana ingene ikibi kizokurwaho, ingene Shetani azotikizwa, be n’ukuntu ivyo Imana igomba bizokorwa kw’isi nk’uko bikorwa mw’ijuru. Nkako, Bibiliya irahishura icatumye haba igicumuro n’urupfu ikongera ikerekana ukuntu bizokurwa kw’isi, bigasubirizwa umunezero utagira uko ungana be n’ubuzima budahera bizohabwa abagumana ugutungana kwabo.

15. Dutegerezwa gukora iki kugira ngo tuzohungukire ca kibazo cerekeye ubusegaba nicarangira?

¹⁵ Ibintu vyo kuri iyi si bigiye guhinduka rwose. Ca kibazo cerekeye ubusegaba kizorangira. Shetani azokurwa ku co twokwita ikiniro, amaherezo atikizwe, maze ivyo Imana igomba bikorwe ata kabuza. Mugabo kugira ngo tuze tuvyungukireko twongere twironkere imihezagiro myinshi yavuzwe mw’Ijambo ry’Imana, dutegerezwa gushigikira ubusegaba bwa Yehova ubu. Ntidushobora kuba ba ntahompagaze. Kugira ngo tuzoshobore kuvuga ngo “Yehova ari ku ruhande rwanje,” dutegerezwa kuguma ku ruhande rwiwe.​—Zab. 118:6, 7.

Turashobora kugumana ugutungana kwacu!

16. Ni kubera iki dushobora kwemera tudakeka ko bishoboka yuko abantu bagumana ugutunga kwabo imbere y’Imana?

¹⁶ Turashobora gushigikira ubusegaba bwa Yehova tukongera tukagumana ugutungana kwacu, kuko intumwa Paulo yanditse ati: “Nta kigeragezo cabashikiye atari igisanzwe gishikira abantu. Ariko Imana ni inyizigirwa, ntizobareka ngo mugeragezwe ibirenze ivyo mushobora kwihanganira, mugabo hamwe na nya kigeragezo, izobacira kandi icanzo kugira mushobore kucihanganira.” (1 Kor. 10:13) None ikigeragezo Paulo yavuze kiva hehe, kandi Imana iducira icanzo gute?

17-19. (a) Abisirayeli batwawe n’ikihe kigeragezo igihe bari mu gahinga? (b) Ni kubera iki bishoboka ko tugumana ugutungana kwacu imbere ya Yehova?

¹⁷ Nk’uko vyerekanwa n’ivyashikiye Isirayeli mu gahinga, ico “kigeragezo” kiva ku bintu bishobora gutuma turenga itegeko ry’Imana. (Soma 1 Abakorinto 10:6-10.) Abisirayeli bari gushobora kunanira ikigeragezo, mugabo baripfuje “ibintu bibi” igihe Yehova yabaronsa ku gitangaro inkware bari kumara ukwezi barya. Naho abantu bari bamaze igihe bataronka inyama, Imana yari yarabahaye manu ihagije yo kurya. Yamara, baroroheye ikigeragezo co gutwarwa n’umwina urenze urugero igihe bariko baregeranya izo nkware.​—Guh. 11:19, 20, 31-35.

¹⁸ Imbere y’aho, igihe Musa yariko araronswa Itegeko ku Musozi Sinayi, Abisirayeli baracitse abasenga ibigirwamana, barisuka mu vyo gusenga inyana no mu bihimbara umubiri. Kuba indongozi yabo bashobora kubona itari kumwe na bo vyatumye bataba maso ku kigeragezo. (Kuv. 32:1, 6) Gatoya imbere y’uko binjira mu Gihugu c’isezerano, Abisirayeli ibihumbi n’ibihumbi barakwegakwezwe n’Abanyamowabukazi maze basambana na bo. Ico gihe, Abisirayeli ibihumbi barapfuye kubera ico gicumuro bakoze. (Guh. 25:1, 9) Rimwe na rimwe, Abisirayeli baratwarwa n’ikigeragezo co kwidodomba mu buryo bwo kugarariza, igihe kimwe bakaba baravuze nabi Musa hamwe n’Imana ubwayo! (Guh. 21:5) Abisirayeli mbere baridodomvye inyuma y’aho Kora, Datani, Abiramu be n’abo bari bafatanije batikirijwe, biyumvira bihenda yuko abo bagarariji bishwe ku karenganyo. Ivyo vyatumye Abisirayeli 14.700 bicwa n’ikiza kivuye ku Mana.​—Guh. 16:41, 49.

¹⁹ Nta kigeragezo na kimwe muri ivyo duhejeje kuvuga Abisirayeli batari gushobora kunanira. Abo bantu barirekeranye baratwarwa n’ibigeragezo kubera yuko batakaje ukwizera maze baribagira Yehova, baribagira ukuntu abitwararikana urukundo be n’ivy’uko inzira ziwe zigororotse. Nk’uko nyene vyagenze ku Bisirayeli, ibigeragezo bidushikira ni nk’ibishikira abantu bose. Tugize akigoro gakenewe kugira ngo tubinanire tukongera tukiheka ku Mana kugira ngo idufate mu mugongo, turashobora kugumana ugutungana kwacu. Turashobora kwizigira ico kintu kubera yuko “Imana [ari] inyizigirwa” kandi ikaba itareka ngo ‘tugeragezwe ibirenze ivyo dushobora kwihanganira.’ Yehova ntiyigera aduheba gushika aho yoreka tugashikirwa n’ibintu bituma abantu badashobora gukora ivyo agomba.​—Zab. 94:14.

20, 21. Imana iducira “icanzo” gute igihe tugeragejwe?

²⁰ Yehova araducira “icanzo” mu kudukomeza kugira ngo tunanire ikigeragezo. Nk’akarorero, abaduhama boshobora kutugirira nabi ku mubiri barondera gutuma duheba ukwizera kwacu. Gufatwa gutyo vyoshobora gutuma twoshwa ngo duhemuke kugira ngo ntitubandanye gukubitwa, gusinzikarizwa ubuzima, canke mbere kugira ntitwicwe. Ariko rero, twishimikije amajambo adukura amazinda Paulo yavuze ahumekewe, ayo dusanga mu 1 Abakorinto 10:13, turazi yuko ibintu bituma haba ibigeragezo ari ivy’igihe gito gusa. Yehova ntazoreka ngo bikomere gushika aho tudashobora kuguma turi abizigirwa kuri we. Imana irashobora gukomeza ukwizera kwacu no kuduha inkomezi zo mu vy’impwemu dukeneye kugira ngo tugumane ugutungane kwacu.

²¹ Yehova aradufata mu mugongo akoresheje impwemu yiwe nyeranda. Iyo mpwemu kandi iratwibutsa ivyiyumviro bishingiye ku Vyanditswe tuba dukeneye kugira ngo tunanire ikigeragezo. (Yoh. 14:26) Ivyo biratuma tudahendwa ngo dukurikire ingendo itabereye. Nk’akarorero, turatahura vya bibazo bifitaniye isano vyerekeye ubusegaba bwa Yehova n’ugutungana kw’abantu. Kubera ko abantu benshi bamenye ivyo bintu bakongera bagafatwa mu mugongo n’Imana, baragumye ari abizigirwa gushika ku rupfu. Mugabo urupfu si rwo rwabaciriye icanzo; kuba barafashijwe na Yehova ni vyo vyatumye bashobora kwihangana gushika kw’iherezo, batirekeranye ngo batwarwe n’ikigeragezo. Na twebwe nyene arashobora kudufasha muri ubwo buryo. Nkako, arakoresha kandi abamarayika biwe b’abizigirwa ku bw’ineza yacu, nk’abasuku bakorera abantu “[b]atumwe gukorera abagiye kuzotorana ubukiriro.” (Heb. 1:14) Nk’uko ikiganiro gikurikira kivyerekana, abagumana ugutungana kwabo ni bo gusa bashobora kwizigira kuronka agateka gateye umunezero ko gushigikira ubusegaba bw’Imana ibihe bidahera. Turashobora kuba muri bo nimba twumira kuri Yehova nka we Mukama Segaba wacu.

Wokwishura gute?

• Ni kubera iki dukwiye kwemera ko Yehova ari we Mukama Segaba wacu?

• Kugumana ugutungana kwacu imbere y’Imana bisobanura iki?

• Tumenya gute ko Yehova agiye kwemeza ubusegaba bwiwe?

• Twisunze ibivugwa mu 1 Abakorinto 10:13, ni kubera iki bishoboka ko tugumana ugutungana kwacu?

[Ifoto ku rup. 24]

Shetani yaratumye Adamu na Eva bahemukira Yehova

[Ifoto ku rup. 26]

Niwiyemeze gushigikira ubusegaba bwa Yehova