Turemeshanye igihe turi mu busuku
1 Twese turashima “ijambo rivuzwe [“ku gihe kibereye,” NW]” ryo kuturemesha. (Imig. 25:11) Igihe dukorana n’abandi mu busuku, twomenya gute ko ikiyago tugiranira kiremesha?
2 Ikiyago kiremesha: Ese ingene biremesha gushira mu kiyago cacu ibintu vy’impwemu igihe turi mu gikorwa co kwamamaza! (Zab. 37:30) Twoshobora kuvuga ibijanye n’uburyo dukoresha mu gushikiriza inkuru nziza, canke tukigana ibintu biremesha duherutse kwibonera mu murimo wo mu ndimiro. (Ibik. 15:3) Hoba hari iciyumviro gishimishije twabonye igihe twariko turasoma Bibiliya, ibinyamakuru vya vuba canke igihe twari kw’ikoraniro ry’ishengero. Twoshobora kuyaga ku vyiyumviro vyashikirijwe mu nsiguro y’icese iheruka gushikirizwa ku Ngoro y’Ubwami.
3 Twoshobora kwumva tuvunitse umutima igihe uwo dusanze ku muhana avuze amajambo ahagarika ikiyago bikatunanira kwikurayo. Tumaze kuva kuri uwo muhana, vyoba ngirakamaro dufashe iminuta mikeyi tukarimburira hamwe n’uwo turi kumwe ingene intambamyi bene iyo twoyitorera umuti yongeye kuvyuka, kumbure mu kuraba igitabu Comment raisonner. Vyongeye, mu gihe hari ico dushimye mu buryo uwo turiko turakorana akoresha mu gushikiriza inkuru nziza, akajambo kavuye ku mutima ko kumukeza karashobora kumuremesha.
4 Twibwirize: Hoba hari abo mu mugwi w’inyigisho y’igitabu turimwo tudaherutse gukorana? Dutumiye umuntu ngo tujane mu busuku vyoshobora gutuma “[du]hanahana indemesho.” (Rom. 1:12) Abatsimvyi basanzwe be n’abo gufasha barashima kuronka abo bakorana, na canecane mu gitondo hakiri kare, canke ku mugoroba amasaha yitereye, igihe usanga abamamaji bake cane ari bo bashobora kuja mu busuku. Turashobora gufata mu mugongo abatsimvyi mu kujana na bo mu busuku. Hoba hari umwamamaji afise amagara make bigatuma adashobora gukora mu busuku nk’uko avyipfuza? Dutunganije ivyo kujana n’umuntu nk’uwo mu busuku, kumbure ku nyigisho ya Bibiliya, birashobora kuba ngirakamaro.—Imig. 27:17.
5 Gukeza umuntu no kumukengurukira vyama biremesha mbere no mu tuntu dutoduto. Turakwiye kugumiza ivyo mu muzirikanyi igihe dukorana n’abandi mu busuku, kubera ko dushaka ‘kuguma twubaka bagenzi bacu.’—1 Tes. 5:11.