2 | “Ihumure rituruka mu Byanditswe”

BIBILIYA IGIRA ITI: “Ibintu byose byanditswe kera byandikiwe kutwigisha, kugira ngo tugire ibyiringiro binyuze mu kwihangana kwacu no ku ihumure rituruka mu Byanditswe.” —ABAROMA 15:4.

Icyo bisobanura

Bibiliya irimo amagambo aduhumuriza, akadufasha kubona imbaraga zo guhangana n’ibitekerezo bibi. Nanone ubutumwa bwo muri Bibiliya butuma twizera ko ibibazo biterwa n’agahinda kenshi, bigiye gushira vuba aha.

Uko byadufasha

Twese tujya duhura n’ibintu bikaduhangayikisha cyane. Ariko abafite indwara y’agahinda gakabije cyangwa iyo guhangayika, bahora bahangayitse buri gihe. None se Bibiliya yabafasha ite?

Bibiliya irimo ibitekerezo byiza twasimbuza ibitekerezo bituma twiheba (Abafilipi 4:8). Ishobora gutuma twuzuza mu bwenge bwacu ibitekerezo biduhumuriza bidufasha gutuza kandi ibyo ni byo bituma dutegeka ibyiyumvo byacu.—Zaburi 94:18, 19.
Bibiliya ishobora kudufasha kurwanya ibitekerezo byo kumva ko nta cyo tumaze.—Luka 12:6, 7.
Imirongo myinshi yo muri Bibiliya itwizeza ko tutari twenyine kandi ko Imana yaturemye, buri gihe yumva neza uko tumerewe.—Zaburi 34:18; 1 Yohana 3:19, 20.
Bibiliya idusezeranya ko Imana izadufasha maze ntitwongere kwibuka ibintu bibi byatubayeho bikatubabaza (Yesaya 65:17; Ibyahishuwe 21:4). Iyo duhanganye n’ibitekerezo hamwe n’ibyiyumvo biduca intege, iryo sezerano riradukomeza tugashobora kwihangana, maze ubuzima bugakomeza.

Uko Bibiliya ifasha Jessica

Uko indwara y’agahinda gakabije ingiraho ingaruka

“Igihe nari mfite imyaka 25, namaze igihe mfite ibibazo by’imihangayiko maze njya kwa muganga. Baransuzumye bansangana indwara y’agahinda gakabije. Najyaga nibuka ibintu biteye ubwoba kandi bibabaje byambayeho kandi ibyo bitekerezo sinashoboraga kugira icyo mbikoraho. Abaganga bamfashije kumva ko iyo ndwara yaterwaga no gutekereza ibyo bintu bibi byambayeho. Uretse imiti bampaga, nanone nari nkeneye kuvurwa nkamenya neza ibyo bitekerezo bibi n’uko nabyikuramo.”

Uko Bibiliya imfasha

“Igihe nabaga mfite agahinda karenze urugero, nagiraga ubwoba bwinshi, ngahangayika bikabije kandi nkabura ibitotsi. Incuro nyinshi, nijoro numvaga mfite ibitekerezo bibi byinshi ntashobora kwikuramo. Muri Zaburi ya 94:19 hagaragaza ko Imana ishobora kuduhumuriza mu gihe imihangayiko yaturenze maze tugatuza. Ubwo rero, Bibiliya n’agakaye nandikamo imirongo impumuriza, byahoraga iruhande rw’uburiri bwanjye. Iyo nabaga nabuze ibitotsi, nasomaga imirongo imwe n’imwe, maze ibyo bitekerezo bituruka ku Mana bikampumuriza.

“Bibiliya itugira inama yo kwikuramo ibitekerezo bidahuje n’ibyo Imana ishaka. Mu bihe byahise numvaga nta cyo maze, ko nta muntu wankunda kandi ko nta cyo nageraho. Ariko namenye ko ibyo bitandukanye n’ibyo Bibiliya ivuga, kuko igaragaza ko Imana idukunda, ko igira impuhwe, kandi ko yita kuri buri wese ku giti cye. Buhoro buhoro nashoboye gutegeka ibyiyumvo byanjye, aho kugira ngo abe ari byo bintegeka. Imana ibona ko mfite agaciro. Ubwo rero nitoje kubona ibintu nk’uko ibibona. Icyo ni cyo kintu cy’ingenzi cyamfashije kwikuramo ibitekerezo bibi byo kumva ko nta cyo maze.

“Ntegerezanyije amatsiko igihe umuntu azaba atakigira ibitekerezo bibi, n’ibintu bibabaje byatubayeho bitacyibukwa. Nzi ko indwara z’agahinda zizavaho burundu. Ibyo bituma ngira imbaraga zo kwihangana muri iki gihe kandi nkagira ibyiringiro by’igihe kizaza, igihe nzaba ntakigira agahinda.”