3 | Ingero z’abantu bavugwa muri Bibiliya ziradufasha

BIBILIYA IRIMO INGERO . . . Z’abagabo n’abagore bizerwa ‘bari bameze nkatwe.’ —YAKOBO 5:17.

Icyo bisobanura

Bibiliya irimo ingero nyinshi z’abagabo n’abagore bagaragaje ibyiyumvo bibi. Mu gihe dusoma ibyababayeho, dushobora kubonamo umuntu wari ufite ibyiyumvo nk’ibyacu.

Uko byadufasha

Twese twifuza ko abandi batwumva. Ariko ibyo tubikenera cyane cyane iyo dufite indwara y’agahinda cyangwa uburwayi bwo mu mutwe. Iyo dusomye ibyabaye ku bantu bavugwa muri Bibiliya, dushobora kubonamo abari bafite ibitekerezo n’ibyiyumvo nk’ibyacu. Ibyo bituma twumva ko atari twe twenyine bibaho. Iyo rero duhangayitse cyangwa tukaba dufite ibyiyumvo bidutesha umutwe, maze tukabona ko n’abandi byababayeho, biradufasha ntidukomeze kwigunga.

Bibiliya irimo ingero nyinshi z’abantu bumvaga bihebye kandi bari baritakarije icyizere. Ese wigeze kumva urambiwe ubuzima, utagishaka kubaho? Mose, Eliya na Dawidi na bo bigeze kumva bameze batyo.—Kubara 11:14; 1 Abami 19:4; Zaburi 55:4.
Bibiliya itubwira iby’umugore witwaga Hana, wumvaga “afite agahinda kenshi” kubera ko atabyaraga kandi mukeba we akaba yarahoraga amuserereza.—1 Samweli 1:6, 10.
Nanone Bibiliya itubwira urugero rw’umugabo witwaga Yobu na we wari umeze nkatwe. Nubwo yari afite ukwizera gukomeye, yagize agahinda kenshi ku buryo yavuze ati: “Nazinutswe ubuzima; sinshaka gukomeza kubaho.”—Yobu 7:16.

Kumenya ukuntu abo bantu barwanyije ibitekerezo bibi kandi bakabyikuramo, bidufasha kubona ko natwe twakwikuramo ibitekerezo bibi bituma duhangayika cyane.

Uko Bibiliya ifasha Kevin

Uko indwara y’ibyiyumvo bihindagurika yangizeho ingaruka

“Iyo ndwara nayirwaye igihe nari hafi kugira imyaka 50. Hari ubwo mba numva ko ikintu cyose cyambaho nacyihanganira, ariko mu kandi kanya nkumva kubaho nta cyo bimaze.”

Uko Bibiliya imfasha

“Umwe mu bantu bavugwa muri Bibiliya navuga ko yari ameze nkanjye, ni intumwa Petero. Yakoraga amakosa yatumaga yumva nta cyo amaze. Ariko aho kugira ngo aheranwe n’ibyo bitekerezo bibi, yakoraga uko ashoboye akaba ari kumwe n’incuti zamwitagaho. Iyo indwara yanjye imereye nabi, numva mbabajwe cyane n’amakosa nkora, bigatuma numva ntacyo maze. Kimwe na Petero, ngerageza kuba hafi y’incuti zanjye ziba zifuza kumfasha kugira ngo ubuzima bukomeze.

“Undi muntu uvugwa muri Bibiliya umpumuriza ni Umwami Dawidi. Akenshi yumvaga yihebye bitewe n’ibibazo yabaga afite kandi akababazwa n’amakosa yakoze kera. Mba numva meze nka we, kuko hari igihe nanjye mvuga cyangwa ngakora ibintu, nyuma nkazabyicuza. Amagambo yavuze muri Zaburi ya 51 arampumuriza cyane. Ku murongo wa 3 yaravuze ati: ‘Nzi neza ibicumuro byanjye, kandi icyaha cyanjye gihora imbere yanjye.’ Ayo magambo rwose agaragaza uko mba meze iyo ndi mu bihe bibi, kuko mba numva nta gaciro mfite. Ariko nanone nkunda amagambo ya Dawidi yo ku murongo wa 10 agira ati: ‘Undememo umutima uboneye, kandi unshyiremo umwuka mushya utuma nshikama.’ Nanjye nsaba Imana ngo imfashe kwikuramo ibitekerezo bibi, nkoresheje ayo magambo. Umurongo wa 17 na wo urampumuriza cyane. Uravuga ngo: ‘Umutima umenetse kandi ushenjaguwe, Mana ntuzawusuzugura.’ Uwo murongo unyizeza ko Imana inkunda.

“Iyo ntekereje ku ngero zo muri Bibiliya no ku migisha Imana impa muri iki gihe, bituma ndushaho kugira ibyiringiro by’igihe kizaza. Numva ko ibyo Bibiliya idusezeranya bizabaho koko kandi ibyo bimfasha kwihangana, ubuzima bugakomeza.”