Genesi
28 Natenepa, Izaki acemera Yakobe, ampasa nkhombo mbampanga: “Leka kusemba nkazi pakati pa dzindza ya Akanani.+ 2 Ndoko ku Padhani-Aramu, kunyumba kwa Bhetuweli, pai wace mai wako, kweneko semba nkazi pakati pa ana a Labhau+ mʼbale wace mai wako. 3 Mulungu Wamphambvu Zonsene anadzakupasa nkhombo, mbakupasa ana, pontho iye anadzanjipisa dzindza yako. Mwandimomwene iwe unadzakhala nsoka* ukulu wa anthu.+ 4 Mulungu anadzakupasa nkhombo zidapikira iye Abhrahamu,+ anadzazipereka kuna iwe na dzindza* yako, toera utambire dziko inakhala iwe ninga mulendo, yakuti ndi dziko idapereka Mulungu kuna Abhrahamu.”+
5 Natenepa, Izaki asiya Yakobe toera aende, iye aenda ku Padhani-Aramu, kuna Labhau mwana wa Bhetuweli wa ku Sirya.+ Labhau akhali mʼbale wace Rabheka+ mai wace Yakobe na Izau.
6 Izau aona kuti Izaki akhadapasa nkhombo Yakobe, mbampanga toera aende ku Padhani-Aramu toera asembe nkazi kweneko, pontho kuti pidampasa iye nkhombo ampanga: “Leka kusemba nkazi pakati pa dzindza ya Akanani.”+ 7 Pontho iye aona kuti Yakobe abvera pai wace na mai wace, mbaenda ku Padhani-Aramu.+ 8 Penepo Izau adzindikira kuti Izaki+ pai wace nee akhakomerwa na akazi a dzindza ya Akanani; 9 natenepa, Izau aenda kalonga na Ijimaeli, mbasemba Malati mʼbale wace Nebhayoti, maseze iye akhali na akazi anango.+ Malati akhali mwana wa Ijimaeli, mwana wa Abhrahamu.
10 Yakobe abuluka ku Bhersebha, mbaenda ku Arani.+ 11 Pidafika iye pa mbuto inango, akhunganyika toera kugona, thangwi dzuwa ikhadadoka. Penepo iye akwata mwala ubodzi wa pa mbuto ineyi, atsamisa nsolo wace pamwala unoyu, mbagona.+ 12 Yakobe alota ndoto: Iye aona masikada adatoma pa dziko yapantsi mbafika mpaka kudzulu. Aanju a Mulungu akhatcita, mbakwira kudzulu na pa masikada anewa.+ 13 Yahova akhali padzulu pa masikada anewa, iye alonga:
“Ine ndine Yahova Mulungu wa mbuyako Abhrahamu na Mulungu wa Izaki.+ Dziko ino na mbuto idagona iwe ndinadzaipereka kuna iwe na dzindza* yako.+ 14 Mwandimomwene, dzindza* yako inadzanjipa ninga pfumbi ya pa dziko yapantsi,+ pontho anako anadzamwazika kumabulukiro a dzuwa mpaka kumadokero a dzuwa, kunkwiriro mpaka kunterero. Pontho, anthu a madzindza onsene anadzapaswa nkhombo+ kubulukira mwa iwe na dzindza yako. 15 Ine ndiri na iwe, ndinakutsidzikiza konsene kwene kunafuna kuenda iwe, pontho ndinadzakubweresa ku dziko ino.+ Ine nkhabe kudzakusiya, mpaka ndingadzacita pidakupikira ine.”+
16 Buluka penepo, Yakobe alamuka ncitulo, mbalonga: “Mwandimomwene, Yahova ali pa mbuto ino, ine nee ndikhadziwa pyenepi.” 17 Iye agopa, mbathimiza kulonga: “Mbuto ino yasiyana na mbuto zinango, ino ndi mbuto yakucena!* Mwandimomwene, mbuto ino ndi nyumba ya Mulungu,+ pontho ndi nsuwo wakudzulu.”+ 18 Natenepa, Yakobe alamuka mangwana mwace namacibese, akwata mwala ukhadatsamisa iye nsolo wace, aulimirisa toera ukhale cidzindikiro, mbathirira mafuta padzulu pamwala unoyu.+ 19 Natenepa, mbuto ineyi iye aipasa dzina ya Bheteli,* mbwenye kale nzinda unoyu ukhacemerwa Luzi.+
20 Yakobe adumbira,* mbalonga: “Mulungu angapitiriza kukhala na ine, mbanditsidzikiza paulendo wanga, mbandipasa nkate toera kudya na nguwo toera kubvala, 21 pontho mbandibwerera muntendere kunyumba kwa pai wanga, munjira ineyi, Yahova anadzapangiza kuti mwandimomwene iye ndi Mulungu wanga. 22 Mwala uyu udalimirisa ine ninga cidzindikiro, unadzakhala nyumba ya Mulungu,+ pontho, mwakukhonda penula ine ndinadzapereka kuna imwe khundu yacikhumi ya pinthu pyonsene pinafuna kundipasa imwe.”