Samweli Waciwiri
21 Mu ntsiku za Dhavidhi, yaoneka njala+ mu pyaka pitatu, natenepa Dhavidhi abvundza Yahova, pontho Yahova antawira: “Sauli na banja yace ali na mulando wa ciropa, thangwi iye apha Ajibheyoni.”+ 2 Penepo mambo acemeresa Ajibheyoni+ mbacedza nawo. (Ajibheyoni nee akhali Aizraeli, mbwenye akhali Aamori+ adasalikira, pontho Aizraeli akhadadumbira kuti nee mbadaapha,+ mbwenye Sauli akhafuna kuapha onsene thangwi ya ntcanje yace kuna mbumba ya Izraeli na Yuda.) 3 Dhavidhi abvundza Ajibheyoni: “Ndisafunika kukucitiraninji, pontho ndinakwanisa tani kumalisa madawo anewa toera imwe mupase nkhombo mbumba ya* Yahova?” 4 Ajibheyoni antawira: “Ife nee tisafuna parata peno ouro+ thangwi ya pinthu pidaticitira Sauli na banja yace; pontho nee tisafuna kupha munthu mu Izraeli.” Penepo iye aapanga: “Pyonsene pinafuna imwe kulonga, ine ndinakucitirani.” 5 Iwo apanga mambo: “Ule adayesera kutifudza mbacita masasanyiro toera kutimalisa m’mbuto zonsene za dziko ya Izraeli,+ 6 tipaseni anace anomwe amuna. Ife tinadzamanika manungo awo* akufa+ pamaso pa Yahova ku Jibheya+ wa Sauli, ule adasankhulwa na Yahova.”+ Mambo alonga: “Ine ndinakupasani.”
7 Mbwenye mambo abvera ntsisi Mefibhoseti+ mwana wa Yonatani, ndzukulu wa Sauli, thangwi ya dumbiro idacita Dhavidhi na Yonatani+ mwana wa Sauli, pamaso pa Yahova. 8 Natenepa mambo akwata Armoni na Mefibhoseti ana awiri amuna a Rizipa+ mwana wankazi wa Aia, ale adabalira iye Sauli, akwatambo ana axanu amuna a Mikale*+ mwana wankazi wa Sauli adabalira iye Adhriyeli+ mwana wamamuna wa Bharzilai wa ku Meola.* 9 Buluka penepo iye aapereka m’manja mwa Ajibheyoni, iwo aapha mbamanika manungo awo paphiri pamaso pa Yahova.+ Onsene anomwe afera pabodzi pene; iwo aphiwa mu ntsiku zakutoma kubvuna, mu ndzidzi wakutoma kubvuna sevadha. 10 Penepo Rizipa+ mwana wankazi wa Aia, akwata sakha mbaithasika pamwala kutomera mu ndzidzi wakutoma kubvuna mpaka pidabvumbira madzi manungo anewa; iye nee atawirisa kuti manungo anewa aphamirwe na mbalame zakudzulu, pontho nee atawirisa kuti pinyama pya ntsanga pifike dhuzi na manungo anewa namasiku.
11 Dhavidhi apangwa pidacita Rizipa nkazi wapakhundu wa Sauli, mwana wankazi wa Aia. 12 Natenepa Dhavidhi aenda kakwata magogodo a Sauli na a mwanace anacemerwa Yonatani kuna atsogoleri* a ku Yabhesi-Jiliyadhi.+ Iwo akhadaba magogodo anewa pa mbuto yapakweca ya ku Bheti-Sani. Afilisti akhadaamanika penepa pa ntsiku idapha iwo Sauli ku Jilbhowa.+ 13 Iye abweresa magogodo a Sauli na a mwanace anacemerwa Yonatani, pontho iwo agumanya magogodo a amuna adaphiwa.*+ 14 Buluka penepo, iwo aikha munthumbi magogodo a Sauli na a mwanace anacemerwa Yonatani mu dziko ya Bhenjamini ku Zela+ m’masiye a babace anacemerwa Kisi.+ Pidamala iwo kucita pyonsene pidalonga mambo, Mulungu abva kudembetera kukhacita iwo thangwi ya dziko.+
15 Paoneka pontho nkhondo pakati pa Afilisti na Izraeli.+ Natenepa Dhavidhi akwata atumiki ace mbaenda kamenyana na Afilisti, mbwenye Dhavidhi adzaneta kakamwe. 16 Natenepa munthu m’bodzi wa dzindza ya Refaimu+ anacemerwa Ijibhi-Bhenobhi, wakuti dipa yace ikhalemera masiklo 300,*+ pontho wakuti akhali na supada ipswa, akhafuna kupha Dhavidhi. 17 Mwakukhonda dembuka, Abhisai+ mwana wa Zeruya abwera kudzaphedza Dhavidhi,+ iye amenya Nfilisti unoyu mbamupha. Penepo amuna a Dhavidhi adumbira tenepa kuna iye: “Cipo imwe munaenda pontho na ife kunkhondo,+ toera mukhonde kuthimisa nyale ya Izraeli!”+
18 Buluka penepo, yatoma nkhondo inango na Afilisti+ ku Gobhi. Pa ndzidzi unoyu, Sibhekai+ wa ku Usa* apha Safi, wakuti akhali wa dzindza ya Refaimu.+
19 Yatoma pontho nkhondo inango na Afilisti+ ku Gobhi, pontho Elanani mwana wa Yaare-Orijimu wa ku Bhetelehemu apha Goliyati wa ku Gati, dipa yace ikhali na muti ninga unaphatisirwa na ale analuka nguwo.+
20 Yaoneka nkhondo inango ku Gati, kweneko kukhali na mamuna wankulu kakamwe, iye akhali na pyala pitanthatu mu djanja ibodzi na ibodzi, pontho akhali na pyala pitanthatu m’mwendo ubodzi na ubodzi, pyala pyace pyonsene pikhali 24; pontho iye akhalimbo wa dzindza ya Refaimu.+ 21 Iye akhapitiriza kutikana Izraeli.+ Natenepa Yonatani mwana wa Simei,+ wakuti ndi m’bale wace Dhavidhi amupha.
22 Amuna anewa anai a ku Gati akhali a dzindza ya Refaimu, iwo aphiwa na Dhavidhi pabodzi na atumiki ace.+