Samweli Waciwiri
9 Buluka penepo Dhavidhi abvundza: “Kodi alipo adasala panyumba ya Sauli wakuti ine ndisafunika kupangiza ufuni wakukhonda mala kuna iye thangwi ya Yonatani?”+ 2 Penepo pakhali ntumiki m’bodzi wa panyumba ya Sauli akhacemerwa Zibha.+ Natenepa iwo aenda naye kuna mambo Dhavidhi, mbambvundza: “Ndiwe Zibha?” Iye atawira: “Inde, ndine ntumiki wanu.” 3 Mambo ambvundza pontho: “Kodi alipo adasala panyumba ya Sauli wakuti ine ndisafunika kupangiza ufuni wakukhonda mala wa Mulungu kuna iye?” Zibha atawira mambo: “Asala mwana m’bodzi wamamuna wa Yonatani; iye alamala miyendo miwiri ene.”+ 4 Mambo ambvundza: “Ali kupi?” Zibha atawira mambo: “Iye ali ku Lo-Dhebhari panyumba ya Makiri+ mwana wa Amiyeli.”
5 Mwakukhonda dembuka, mambo Dhavidhi atuma anthu toera akankwate panyumba ya Makiri mwana wa Amiyeli ku Lo-Dhebhari. 6 Mefibhoseti mwana wa Yonatani, ndzukulu wa Sauli pidafika iye kuna Dhavidhi, iye agodama mbakotamisa nkhope yace mpaka pantsi. Buluka penepo Dhavidhi alonga: “Mefibhoseti!” Iye atawira: “Ndiri pano ntumiki wanu.” 7 Dhavidhi ampanga: “Leka kugopa, ine ndinapangiza kuna iwe ufuni wakukhonda mala+ thangwi ya babako Yonatani. Ndinakubwezera minda yonsene ya mbuyako Sauli, pontho ndzidzi onsene iwe unadzadya* pameza yanga.”+
8 Penepo iye agodama mbalonga: “Ndine ani ine ntumiki wanu toera imwe mutsalakane* ine mwanambwa wakufa?”+ 9 Natenepa mambo acemeresa Zibha, ntumiki wa Sauli mbampanga: “Pinthu pyonsene pya Sauli na nyumba yace yonsene ndiri kupipereka kuna ndzukulu wa mbuyako.+ 10 Iwe, anako na anyabasa ako, munadzalima munda wace, pontho munadzabvuna toera kupasa cakudya banja ya ndzukulu wa mbuyako. Mbwenye ndzidzi onsene Mefibhoseti ndzukulu wa mbuyako anadzadya pameza yanga.”+
Zibha akhali na ana amuna 15 na anyabasa 20.+ 11 Penepo Zibha atawira mambo: “Ine ntumiki wanu ndinacita pyonsene pidalonga imwe mbuyanga mambo.” Natenepa Mefibhoseti akhadya pameza ya Dhavidhi* ninga m’bodzi wa ana amuna a mambo. 12 Mefibhoseti akhalimbo na mwana wang’ono wamamuna akhacemerwa Mika;+ anthu onsene akakhala panyumba ya Zibha adzakhala anyabasa a Mefibhoseti. 13 Pontho Mefibhoseti akakhala ku Yerusalemu thangwi ndzidzi onsene akhadya pameza ya mambo.+ Iye akhadalamala miyendo miwiri ene.+