Amambo Waciwiri
16 Mu caka 17 ca utongi wa Peka mwana wa Remaliya, Ahazi+ mwana wa Yotamu Mambo wa ku Yuda adzakhala mambo. 2 Ahazi akhali na pyaka 20 pyakubalwa pidakhazikiswa iye ninga mambo, pontho iye atonga pyaka 16 mu Yerusalemu. Iye nee akhacita pinthu pyadidi pamaso pa Yahova Mulungu wace ninga pidacita Dhavidhi mbuyace.+ 3 Kusiyapo pyenepi, iye akhacitambo pinthu pidacita amambo a Izraeli,+ apisa mwanace pa moto.+ Iye akhatowezera misambo yakunyanyasa ya madzindza anango+ adathamangiswa na Yahova pakati pa Aizraeli. 4 Pontho iye akhapitiriza kupereka ntsembe m’mbuto zaulambiri,+ m’mapiri na pantsi pa miti mikulu ya masamba akubithimira,+ mbacitisa ntsembe zenezi kubuluka utci.
5 Buluka penepo, Rezini Mambo wa ku Sirya na Peka mwana wa Remaliya mambo wa Izraeli abwera kudzamenyana na Yerusalemu.+ Iwo azungulira Ahazi, mbwenye nee akwanisa kukunda nzinda. 6 Pa ndzidzi unoyu, Mambo Rezini wa ku Sirya abwezera Elati+ ku Edhomi, pidamala iye athamangisa Ayuda* ku Elati. Aedhomi apita mu Elati, pontho iwo asakhala mwenemo mpaka lero. 7 Ahazi atuma anthu kuna Mambo Tiglati-Pilezeri+ wa Asirya toera akampange: “Ine ndine ntumiki wanu, pontho ndine mwananu. Bwerani mudzandipulumuse m’manja mwa mambo wa ku Sirya na m’manja mwa mambo wa Izraeli, akuti akumenyana na ine.” 8 Buluka penepo, Ahazi akwata parata na ouro ikhali n’nyumba ya Yahova na ikhali m’mbuto yakukoyera mpfuma panyumba ya mambo, mbaitumiza kuna mambo wa Asirya toera kun’dyekera.+ 9 Mambo wa Asirya atawira pidaphembwa iye, aenda ku Dhamasku, mbakwata nzinda unoyu. Iye akwata anthu a kweneko mbaenda nawo ku Kiri+ toera akakhale mabitcu, pontho iye apha Rezini.+
10 Buluka penepo, Mambo Ahazi aenda kaonana na Mambo Tiglati-Pilezeri wa Asirya ku Dhamasku. Pidaona iye guwa ya ntsembe ikhali ku Dhamasku, Mambo Ahazi atumiza kuna nyantsembe Uriya cinthu cinapangiza kuti guwa ineyi iri tani, pontho yacitwa tani.+ 11 Nyantsembe Uriya+ amanga guwa+ mwakubverana na pitsogolero pyonsene pidatumiza Mambo Ahazi kubulukira ku Dhamasku. Nyantsembe Uriya amala kumanga guwa, Mambo Ahazi mbadzati kubwerera buluka ku Dhamasku. 12 Mambo pidabwerera iye buluka ku Dhamasku mbaona guwa ya ntsembe, iye aifendedzera, mbapereka ntsembe pa guwa ineyi.+ 13 Pontho pa guwa ineyi, iye apereka ntsembe zakupiswa na ntsembe za pyakudya; athirirambo ntsembe za pyakumwa, pontho akhwaza paguwa ineyi ciropa ca ntsembe toera kupereka takhuta. 14 Buluka penepo, iye abulusa bokosi ya nkuwa+ ikhali pamaso pa Yahova kutsogolo kwa nyumba, yakuti ikhali pakati, uku guwa yace ya ntsembe, uku nyumba ya Yahova, mbaiikha kukhundu yakunkwiriro kwa guwa yace ya ntsembe. 15 Mambo Ahazi apanga nyantsembe Uriya:+ “Pereka ntsembe yakupiswa yamacibese pa guwa ikulu,+ perekambo ntsembe yakumaulo ya pyakudya,+ ntsembe yakupiswa ya mambo na ntsembe yace ya pyakudya, kuphatanizambo ntsembe zakupiswa, ntsembe za pyakudya na ntsembe za pyakumwa za mbumba yonsene. Ciropa consene ca ntsembe zakupiswa na ciropa consene ca ntsembe zinango, usafunika kucikhwaza padzulu paguwa. Mbwenye thangwi ya guwa ya ntsembe ya nkuwa, ndisiye ndinyerezere kuti ndinacitanji nayo.” 16 Nyantsembe Uriya acita pyonsene pidapangwa iye na Mambo Ahazi.+
17 Kusiyapo pyenepi, Mambo Ahazi agwanda-gwanda pinthu pikhali n’khundu mwa ngolo+ mbabulusa mabasiya akhali mu ngolo zenezi,+ pontho iye abulusa Tanki* yakuti ikhali padzulu pa ng’ombe za nkuwa,+ mbaiikha pantsi pakusasanywa na miyala.+ 18 Thangwi ya mambo wa Asirya, iye abulusa panyumba ya Yahova khundu idaphimbirwa, yakuti ikhadamangwa panyumba ineyi toera kuphatisirwa pa ntsiku ya Sabudu, kuphatanizambo nsuwo wakunja ukhapita na mambo.
19 Mphangwa zinango zinalonga pya umaso wa Ahazi na pinthu pidacita iye, zalembwa m’bukhu inalonga pinthu pidacitika mu ndzidzi wa amambo a ku Yuda.+ 20 Pakumalisa, Ahazi afa ninga pidacita ambuyace mbaikhwa munthumbi pabodzi na ambuyace mu Nzinda wa Dhavidhi; mwanace anacemerwa Ezekiya*+ adzakhala mambo pa mbuto yace.