Amambo Waciwiri
22 Yosiya+ akhali na pyaka pisere pyakubalwa pidatoma iye kutonga ninga mambo, pontho iye atonga mu pyaka 31 ku Yerusalemu.+ Mai wace akhacemerwa Yedhidha mwana wa Adhaya wa ku Bhozikati.+ 2 Iye acita pinthu pyadidi pamaso pa Yahova mbafamba munjira za mbuyace akhacemerwa Dhavidhi,+ pontho iye nee apeuka kukhundu yamadyo nee yabzwere.*
3 Mu caka 18 ca Mambo Yosiya, mambo atuma mulembi Safani mwana wa Azaliya wakuti ndi ndzukulu wa Mesulamu toera aende kunyumba ya Yahova,+ mbalonga: 4 “Ndoko kuna Hilkiya+ nyantsembe wankulu, pontho mpange toera agumanye kobiri yonsene idabwereswa panyumba ya Yahova+ yakuti anyakuonera misuwo aitambira m’manja mwa anthu.+ 5 Kobiri ineyi isafunika kuperekwa kuna ale adasankhulwa toera kuyang’anira basa inacitwa panyumba ya Yahova, iwombo anaiphatisira toera kulipa ale anaphata basa panyumba ya Yahova mbasasanyira nyumba, mule munafunika iyo kusasanyirwa,*+ 6 akuti ndi amesiri, anyakumanga nyumba na amesiri anacita pinthu na miyala. Iwo anaphatisirambo kobiri ineyi toera kugula matabwa na miyala yakusemwa toera kusasanyira nyumba.+ 7 Mbwenye iwo nee asafunika kubvundziswa kuti aphatisira tani kobiri idapaswa iwo, thangwi ndi akunyindirika.”+
8 Mukupita kwa ndzidzi, nyantsembe wankulu Hilkiya apanga mulembi Safani:+ “Ine ndagumana bukhu ya Mwambo+ n’nyumba ya Yahova.” Natenepa, Hilkiya apereka bukhu ineyi kuna Safani, iye mbatoma kuileri.+ 9 Buluka penepo, mulembi Safani aenda kuna mambo mbampanga: “Atumiki anu agumanya kobiri ikhali n’nyumba mbaipereka kuna ale anatsogolera basa inaphatwa panyumba ya Yahova.”+ 10 Kusiyapo pyenepi, mulembi Safani apanga mambo kuti: “Nyantsembe Hilkiya andipasa bukhu.”+ Penepo Safani atoma kuileri pamaso pa mambo.
11 Mambo pidabva iye mafala a m’bukhu ya Mwambo, penepo pene iye apandula nguwo zace.+ 12 Buluka penepo, mambo apereka ntemo uyu kuna nyantsembe Hilkiya, Aikamu+ mwana wa Safani, Akibhori mwana wa Mikaya, mulembi Safani na Azaya ntumiki wa mambo: 13 “Ndokoni mukabvundzise Yahova thangwi ya ine, thangwi ya mbumba, pontho thangwi ya Ayuda onsene, kuti mafala a m’bukhu iyi idagumanwa asabvekanji kuna ife. Ukali wa Yahova unafuna kutigwera ndi ukulu kakamwe,+ thangwi ambuyathu nee abvera mafala a bukhu iyi, pontho nee acita pinthu pyonsene pidalembwa, pyakuti tikhafunika kupicita.”
14 Natenepa nyantsembe Hilkiya, Aikamu, Akibhori, Safani na Azaya aenda kuna Uldha mprofeta wankazi.+ Iye akhali nkazi wa Salumu mwana wa Tikiva wakuti ndi ndzukulu wa Arasi. Salumu akhali nyakutsalakana nguwo,* pontho Uldha akakhala Kukhundu Ipswa ya Nzinda* wa Yerusalemu; pontho iwo alonga naye mwenemu.+ 15 Iye aapanga: “Yahova Mulungu wa Izraeli alonga tenepa: ‘Ndokoni mukapange mamuna adakutumani toera mubwere kuna ine: 16 “Yahova alonga tenepa: ‘Ine ndinadzabweresa nyatwa pa mbuto ino na kuna anthu anakhala pa mbuto ino, mafala onsene a m’bukhu adaleri mambo wa Yuda anadzakwanirisika.+ 17 Nakuti iwo andisiya, pontho asapereka ntsembe zakupiswa kuna alungu anango+ toera anditsukwalise+ na mabasa onsene a manja awo, kuipirwa kwanga nee kunadzabuluka pa mbuto ino, pontho nkhabe kudzamala.’”+ 18 Mbwenye kuna mambo wa Yuda ule adakutumani toera mukabvundzise Yahova, ndokoni mukampange tenepa: ‘Ipi ndi pidalonga Yahova Mulungu wa Izraeli thangwi ya mafala adabva iwe: 19 “Nakuti ntima wako wabvera,* mbucepeseka+ pamaso pa Yahova pidabva iwe pinthu pidalonga ine thangwi ya mbuto ino na anthu anakhala pa mbuto ino, kuti iwo anadzapaswa dzedze, pontho kuti anthu anadzaagopa, iwe wapandula nguwo zako,+ mbulira pamaso panga, inembo ndakubvesera, alonga Yahova. 20 Na thangwi ineyi, ine ndinadzakuendesa kuna ambuyako, iwe unadzaikhwa munthumbi yako muntendere, pontho nee unadzaona na maso ako nyatwa zonsene zinafuna ine kubweresa pa mbuto ino.’”’” Buluka penepo iwo abweresa mphangwa zenezi kuna mambo.