Kronika Waciwiri
5 Natenepa Salomoni amalisa basa yonsene ikhafunika iye kucita panyumba ya Yahova.+ Buluka penepo, Salomoni akwata pinthu pidacenesa+ babace Dhavidhi, mbapipitisa mwenemu. Iye akwatambo parata, ouro na pinthu pinango pyonsene, mbapiikha mu mbuto inakoyerwa mpfuma panyumba ya Mulungu wandimomwene.+ 2 Pa ndzidzi unoyu, Salomoni acemeresa akulu a Izraeli: Atsogoleri onsene a madzindza na atsogoleri a mbumba za Aizraeli toera abwere ku Yerusalemu. Iye aapanga toera aende kakwate Bokosi ya Cibverano ca Yahova ku Nzinda wa Dhavidhi,+ wakuti ndi Sioni.+ 3 Amuna onsene a Izraeli agumanyikana pamaso pa mambo pa phwando* inacitwa pa mwezi wacinomwe.+
4 Natenepa akulu onsene a Izraeli abwera, Alevi mbathukula Bokosi.+ 5 Iwo abweresa Bokosi, nsasa wa nsonkhano+ na pyombo pyonsene pidaceneswa pyakuti pikhali mu nsasa. Adapibweresa ndi anyantsembe na Alevi.* 6 Mambo Salomoni na Aizraeli onsene adacemerwa toera agumanyikane na iye, akhali patsogolo pa Bokosi. Penepo iwo apereka ntsembe zizinji za mabira na ng’ombe,+ zakuti iwo nee akwanisa kuzilengesa thangwi yakunjipa. 7 Buluka penepo, anyantsembe aikha Bokosi ya Cibverano ca Yahova pa mbuto payo, nkwartu yankati kakamwe mwa templo, mu Mbuto Yakucena Kakamwe, pantsi pa maphapido a akerubhi.+ 8 Maphapido a akerubhi akhali akufuthuka padzulu pa mbuto ikhali Bokosi, natenepa akerubhi akhaphimbira Bokosi na miti+ yakuthukula nayo Bokosi. 9 Miti ineyi ikhali yakulapha kakamwe, natenepa ntsonga za miti ineyi ikhaoneka na pa Mbuto Yakucena, yakuti ikhali kutsogolo kwa kwartu yankati kakamwe, mbwenye izo nee zikhaoneka na kunja. Miti ineyi iri penepo mpaka lero. 10 Mu Bokosi nee mukhali na cinthu cinango kusiyapo miyala miwiri yakusemwa idaikha Mose mwenemu ku Orebhi,+ mu ndzidzi udacita Yahova cibverano+ na mbumba ya Izraeli pikhabuluka iwo ku Ejitu.+
11 Anyantsembe pidabuluka iwo mu mbuto yakucena (anyantsembe onsene akhali penepo akhadamala kuceneseka,+ mwakukhonda tsalakana misoka yawo),+ 12 Alevi akuti akhaimba+ mu nsoka wa Azafe,+ wa Emani,+ wa Yedhutuni+ na anawo pabodzi na abale awo, akhadalimira kumabulukiro a dzuwa a guwa ya ntsembe; iwo akhadabvala nguwo zadidi kakamwe, pontho akhali na pyakuimba napyo pya utale, pyakuimba napyo pya nkhambala na maarpa. Iwo akhali pabodzi na anyantsembe 120 akuti akhaimba matuluka.+ 13 Ale akhaliza matuluka na anyakuimba, akhasimba mbapereka takhuta kuna Yahova pabodzi pene. Pikhalizwa matuluka, pyakuimba napyo pya utale na pyakuimba napyo pinango, iwo akhasimba Yahova, “thangwi iye ndi wadidi, pontho ufuni wace ndi wakukhonda mala.”*+ Pa ndzidzi unoyu, khole yadzala n’nyumba+ ineyi, n’nyumba mwa Yahova. 14 Thangwi ya khole ineyi, anyantsembe nee akwanisa kupitiriza n’nyumba ineyi toera kuphata mabasa awo, thangwi mbiri ya Yahova ikhadadzala n’nyumba ya Mulungu wandimomwene.+