Dhanyeli

3 Mambo Nabhukodhonozore acita dzimunthu ya ouro ya makhono 60* aulaphi na makhono matanthatu* augugumi. Iye atcimika dzimunthu ineyi pa gowa ya Dhura mu provinsya ya Bhabhilonya. 2 Buluka penepo, Mambo Nabhukodhonozore acemeresa aimiriri, ayangʼaniri, atsogoleri, anyakupereka uphungu, anyakukoya mpfuma, anyakutonga miseru, atongi anango na atsogoleri onsene a mʼmaprovinsya toera abwere pa kuzimulwa kwa dzimunthu idatcimika Mambo Nabhukodhonozore.

3 Natenepa, aimiriri, ayangʼaniri, atsogoleri, anyakupereka uphungu, anyakukoya mpfuma, anyakutonga miseru, atongi anango na atsogoleri onsene a mʼmaprovinsya abwera pa kuzimulwa kwa dzimunthu idatcimika Mambo Nabhukodhonozore. Pontho iwo alimira kutsogolo kwa dzimunthu idatcimika Mambo Nabhukodhonozore. 4 Nyakupereka mphangwa wa mambo alonga mwakugaluza: “Bveserani imwe mbumba, madzindza na misoka ya pilongero, 5 mungabva kulira kwa nyanga, citoliro, arpa, arpa ingʼono, cakuimba naco ca nkhambala, fulauta ikulu na pyakuimba napyo pinango pyonsene, musafunika kugodama, mbamulambira dzimunthu ya ouro idatcimika mambo Nabhukodhonozore. 6 Ule anakhonda kugodama mbalambira dzimunthu ineyi, penepo pene anadzaponywa mu forno yakugaka moto.”+ 7 Natenepa, anthu onsene pidabva iwo kulira kwa nyanga, citoliro, arpa, arpa ingʼono, cakuimba naco ca nkhambala na pyakuimba napyo pinango pyonsene, mbumba zonsene, madzindza, misoka yonsene ya pilongero agodama mbalambira dzimunthu ya ouro idatcimikwa na Mambo Nabhukodhonozore.

8 Pa ndzidzi unoyu, Akaldheya anango aenda kuna mambo mbapambizira Ayuda. 9 Iwo alonga kuna Mambo Nabhukodhonozore: “Mambo, khalani na umaso kwenda na kwenda. 10 Mambo, imwe mwapereka ntemo wakuti munthu angabva kulira kwa nyanga, citoliro, arpa, arpa ingʼono, cakuimba naco ca nkhambala, fulauta ikulu na pyakuimba napyo pinango pyonsene asafunika kugodama mbalambira dzimunthu ya ouro; 11 pontho mwalonga kuti munthu anakhonda kugodama mbalambira dzimunthu asafunika kuponywa mu forno yakugaka moto.+ 12 Mbwenye pana Ayuda anango adakhazikisa imwe toera kuyangʼanira provinsya ya Bhabhilonya: Sadhrake, Mezaki na Abhedhinego.+ Amuna anewa nee abvera pidalonga imwe mambo. Iwo nkhabe lambira alungu anu, pontho akukhonda kulambira dzimunthu ya ouro idatcimika imwe.”

13 Penepo, Nabhukodhonozore aipirwa kakamwe mbacemeresa Sadhrake, Mezaki na Abhedhinego. Natenepa amuna anewa abwereswa pamaso pa mambo. 14 Nabhukodhonozore aabvundza: “Sadhrake, Mezaki na Abhedhinego, ndimomwene kuti imwe nee musatumikira alungu anga,+ pontho mwakhonda kulambira dzimunthu ya ouro idatcimika ine? 15 Cincino imwe mungabva kulira kwa nyanga, citoliro, arpa, arpa ingʼono, cakuimba naco ca nkhambala, fulauta ikulu na pyakuimba napyo pinango pyonsene mbamugodama toera kulambira dzimunthu idacita ine pinakhala mwadidi. Mbwenye mungakhonda kuilambira, mu ndzidzi ubodzi ene munaponywa mu forno yakugaka moto. Ndi mulungu upi wakuti anakwanisa kukupulumusani mʼmanja mwanga?”+

16 Sadhrake, Mezaki na Abhedhinego antawira: “Mambo Nabhukodhonozore, thangwi ya pyenepi ife nee tisafunika kukutawirani.17 Pyenepi pingacitika, Mulungu wathu anatumikira ife anatipulumusa mu forno yakugaka moto, pontho anatipulumusa mʼmanja mwanu mambo.+ 18 Maseze iye akhonde kutipulumusa, dziwani mambo kuti ife nee tinatumikira alungu anu, peno kulambira dzimunthu ya ouro idatcimika imwe.”+

19 Penepo Nabhukodhonozore aipirwa kakamwe na Sadhrake, Mezaki na Abhedhinego, pontho nkhope yace yacinja* kuna iwo. Iye apereka ntemo kuti moto wa forno ugaswe kanomwe kupiringana ntsiku zonsene. 20 Iye apereka ntemo toera anyankhondo ace anango amphambvu amange Sadhrake, Mezaki na Abhedhinego, buluka penepo aaponye mu forno yakugaka moto.

21 Natenepa, amuna anewa amangwa uku akhadabvala makapoti awo, nguwo zawo, pyapeu pyawo na nguwo zawo zinango zonsene mbaponywa mu forno yakugaka moto. 22 Nakuti ntemo ukhadabulusa mambo ukhali wakunentsa, pontho forno ikhadapisa kakamwe, amuna adakwata Sadhrake, Mezaki na Abhedhinego ndiwo adafa na malirimi a moto. 23 Mbwenye amuna awa atatu, Sadhrake, Mezaki na Abhedhinego agwa mu forno ya moto uku mbadamangwa.

24 Natenepa thangwi yakugopa, mambo Nabhukodhonozore alamuka mwakucimbiza mbabvundza aphungu ace: “Nee tamanga amuna atatu mbitiaponya mu forno ya moto?” Iwo antawira: “Inde mambo.” 25 Iye alonga: “Onani! Ine ndiri kuona amuna anai ali kufamba pakati pa moto, iwo nee amangwa, pontho nee ali kupya, wacinai asaoneka ninga mwana wa alungu.”

26 Nabhukodhonozore aenda dhuzi na nsuwo wa forno yakugaka moto mbalonga: “Sadhrake, Mezaki na Abhedhinego, imwe atumiki a Mulungu Wankulu Kakamwe+ bulukani mwenemo mbamubwera kuno!” Natenepa, Sadhrake, Mezaki na Abhedhinego abuluka pakati pa moto. 27 Aimiriri, ayangʼaniri, atsogoleri na aphungu a mambo adagumanyikana pa mbuto ineyi+ aona kuti moto nee ukhadapisa manungo a amuna anewa;+ tsisi yawo nee ikhadabvulika, nguwo zawo nee zikhadapya, pontho iwo nee akhanunkha utci.

28 Buluka penepo, Nabhukodhonozore alonga: “Mbasimbwe Mulungu wa Sadhrake, Mezaki na Abhedhinego+ ule adatuma anju wace mbapulumusa atumiki ace. Iwo anʼnyindira mbakhonda kubvera ntemo udakhazikisa mambo, pontho akhali dzololo toera kufa* mʼmbuto mwakutumikira peno kulambira mulungu unango kusiyapo Mulungu wawo.+ 29 Natenepa, ine ndiri kukhazikisa ntemo wakuti anthu a madzindza akusiyana-siyana na a pilongero pyakusiyana-siyana anafuna kupokanya Mulungu wa Sadhrake, Mezaki na Abhedhinego asafunika kugwandwa-gwandwa, pontho nyumba zawo zinadzakhala pimbuzi pya anthu onsene* thangwi nkhabepo Mulungu unango wakuti asakwanisa kupulumusa ninga unoyu.”+

30 Buluka penepo, mambo acitisa kuti pinthu pifambe mwadidi kuna Sadhrake, Mezaki na Abhedhinego mu provinsya ya Bhabhilonya.+