Yoswa
1 Pidafa Mose ntumiki wa Yahova, Yahova apanga Yoswa*+ mwana wa Nuni, ntumiki+ wa Mose: 2 “Mose ntumiki wanga afa.+ Cincino khunganyika, wambuka nkulo wa Yordani, iwe pabodzi na mbumba, pontho ndoko mu dziko inafuna ine kupasa mbumba ya Izraeli.+ 3 Ndinadzakupasani mbuto zonsene zinafuna imwe kuponda, ninga mudapikira ine kuna Mose.+ 4 Dziko yanu inadzatomera kuthando mpaka ku Libhano na ku nkulo ukulu, wakuti ndi Nkulo wa Eufrate, dziko yonsene ya Aeti,+ pontho mpaka ku Bara Ikulu,* kumadokero a dzuwa.+ 5 Nkhabepo munthu anafuna kwanisa kukukunda mu ntsiku zonsene za umaso wako.+ Ninga mudakhala ine na Mose, ndinadzakhalambo na iwe.+ Ine nee ndinadzakusiya, pontho nee ndinadzakuthawa.+ 6 Khala wacipapo na wamphambvu,+ thangwi ndiwe anafuna kutsogolera mbumba iyi toera ipite mu dziko idapikira ine kupasa ambuyawo.+
7 “Basi ene khala wacipapo na wamphambvu kakamwe, pontho towezera mwadidi Mwambo onsene udakupanga ntumiki wanga Mose. Leka kupeuka mbuenda kukhundu yamadyo peno yabzwere,+ toera ukwanise kucita pinthu mwandzeru konsene kwene kunaenda iwe.+ 8 Bukhu iyi ya Mwambo nee isafunika kubuluka pamulomo pako,+ usafunika kuileri mwakukhonda galuza* masiku na masikati, toera utowezere mwadidi pyonsene pidalembwa mwenemu;+ natenepa unadzapembera mbucita pinthu mwandzeru.+ 9 Kodi ine nee ndakupanga kuti khala wacipapo na wamphambvu? Leka kugopa, thangwi Yahova Mulungu wako ali na iwe konsene kwene kunaenda iwe.”+
10 Penepo Yoswa apanga atsogoleri a mbumba: 11 “Pitani na pakati pa misasa mbamupanga anthu kuti: ‘Khunganyani pyakudya pyanu, thangwi pakupita ntsiku zitatu, imwe munawambuka nkulo wa Yordani, toera mupite mu dziko inafuna kukupasani Yahova Mulungu wanu mbamukhala mwenemo.’”+
12 Mbwenye kuna dzindza ya Rubheni, ya Gadhi na khundu ibodzi ya dzindza ya Manase, Yoswa aapanga: 13 “Kumbukani mafala adakupangani Mose ntumiki wa Yahova kuti:+ ‘Yahova Mulungu wanu akupasani dziko iyi toera imwe mukhale mwenemu muntendere. 14 Akazanu, ananu na pifuyo pyanu pinadzakhala mu dziko idakupasani Mose kuntunda uno* wa nkulo wa Yordani.+ Mbwenye imwe monsene anyankhondo amphambvu,+ musafunika kupakana ninga mukuenda kamenya nkhondo, mbamuwambuka patsogolo pa abale anu.+ Musafunika kuaphedza 15 mpaka Yahova apase ntendere abale anu, ninga pidacita iye kuna imwe, pontho toera akhale mu dziko idaapasa Yahova Mulungu wanu. Buluka penepo bwererani ku dziko idapaswa imwe toera mupite mbamukhala mwenemo, dziko idakupasani Mose ntumiki wa Yahova kumabulukiro a dzuwa a Yordani.’”+
16 Iwo atawira Yoswa: “Ife tinacita pyonsene pidatipanga imwe, pontho tinaenda konsene kunafuna imwe kutituma.+ 17 Ninga mudabvera ife pinthu pyonsene pidalonga Mose, tinabverambo imwe. Basi ene Yahova Mulungu wanu akhale na imwe ninga mudakhala iye na Mose.+ 18 Munthu anakhonda kubvera mitemo yanu, mbakhonda kucita pinthu pyonsene pinampanga imwe, anadzaphiwa.+ Basi ene khalani wacipapo na wamphambvu.”+