Yoswa
11 Yabhini mambo wa ku Azori pidabva iye pyenepi, atumiza mphangwa kuna Yobhabhi mambo wa ku Madhoni,+ kuna mambo Simironi, kuna mambo Akisafe,+ 2 kuna amambo a kucisa ca ku mapiri ca kunkwiriro, amambo a kuthando* yakunterero kwa Kinereti, amambo a ku Sefela na amambo a ku mapiri a Dhori,+ kumadokero a dzuwa. 3 Atumizambo mphangwa kuna Akanani+ a kumabulukiro a dzuwa na a kumadokero a dzuwa, Aamori,+ Aeti, Aperesi, Ayebusi a kucisa ca mapiri na Aeveu+ akakhala nʼkhundu mwa Phiri ya Ermoni+ dziko ya Mispa. 4 Natenepa, amambo anewa abuluka pabodzi na anyankhondo awo onsene, iwo akhali azinji kakamwe ninga tcetca ya nʼkhundu mwa bara, pontho akhali na makavalo mazinji kakamwe kuphatanizambo ngolo za nkhondo. 5 Amambo anewa onsene abverana toera kugumanyikana, mbaenda kamanga pabodzi misasa dhuzi na madzi a ku Meromu, toera amenyane na Aizraeli.
6 Natenepa Yahova apanga Yoswa: “Leka kuagopa,+ thangwi mangwana ndzidzi ninga uno, ndinapereka onsene toera aphiwe na Aizraeli. Gwanda uzingo*+ wa makavalo awo, pontho pisa na moto ngolo zawo.” 7 Yoswa pabodzi na anyankhondo onsene aenda kamenyana nawo mwakututumusa dhuzi na madzi a ku Meromu. 8 Yahova aapereka mʼmanja mwa Aizraeli,+ iwo aakunda mbaatowera mpaka ku Sidhoni Wankulu,+ ku Mesirefoti-Maimu+ na ku Gowa ya Mispe kumabulukiro a dzuwa, pontho iwo apha onsene, nee mʼbodzi adapulumuka.+ 9 Yoswa acita kuna iwo mwakubverana na pidapangwa iye na Yahova; iye agwanda uzingo wa makavalo awo, mbapisa na moto ngolo zawo.+
10 Kusiyapo pyenepi, Yoswa abwerera, akunda Azori, mbapha mambo wace na supada,+ thangwi kale Azori ukhali nzinda ukulu wa maumambo anewa onsene. 11 Iwo apha+ na supada anthu onsene akhali mwenemo. Nee cinthu cibodzi cidasiya iwo na umaso.+ Buluka penepo, iye apisa na moto nzinda wa Azori. 12 Yoswa akunda mizinda yonsene ya amambo anewa, mbapha na supada amambo ace.+ Iye apha anthu onsene+ mwakubverana na pidalonga Mose, ntumiki wa Yahova. 13 Mbwenye Aizraeli nee apisa mizinda yakuti ikhali padzulu pa mapiri; kusiyapo nzinda wa Azori udapisa Yoswa na moto. 14 Aizraeli akwata pinthu pyonsene na pifuyo pya mizinda ineyi.+ Mbwenye iwo apha na supada anthu mpaka kumala onsene.+ Iwo nee asiya munthu na umaso.+ 15 Mwakubverana na pidalonga Yahova kuna Mose ntumiki wace, Mose apangambo Yoswa,+ pontho Yoswa apicita ninga mudapangwa iye. Nkhabepo cinthu cidakhonda iye kucita mwa pyonsene pidalonga Yahova kuna Mose.+
16 Yoswa akunda dziko ineyi yonsene, cisa ca ku mapiri, Nejebhu+ onsene, dziko yonsene ya Gozeni, Sefela,+ Arabha+ na cisa ca ku mapiri a Izraeli pabodzi na materero ace, 17 kutomera Kuphiri ya Alaki, yakuti iri dhuzi na Seiri mpaka ku Bhaale-Gadhi,+ ku Gowa ya Libhano nʼkhundu mwa Phiri ya Ermoni,+ pontho Yoswa aphata amambo onsene a mizinda ineyi mbaapha. 18 Yoswa amenya nkhondo na amambo anewa onsene mu ndzidzi uzinji. 19 Nkhabepo nzinda udakhazikisa ntendere na Aizraeli, kusiyapo Aeveu akuti akakhala ku Jibheyoni.+ Aizraeli amenya nkhondo mbakunda mizinda inango yonsene.+ 20 Ndi Yahova adatawirisa kuti anthu anewa aumise mitima yawo+ mbamenyana na Aizraeli, toera iye aaphe thangwi nee athema kubverwa ntsisi.+ Iwo onsene akhafunika kuphiwa ninga pidalonga Yahova kuna Mose.+
21 Pa ndzidzi unoyu, Yoswa apha Anakimu+ onsene a kucisa ca ku mapiri, ku Ebhroni, ku Dhebhiri, ku Anabhi, cisa consene ca mapiri a ku Yuda na cisa consene ca mapiri a ku Izraeli. Yoswa aapha mbafudza mizinda yawo.+ 22 Nee Anakimu mʼbodzi adasala mu dziko ya Aizraeli; iwo akhadasala+ basi ene ku Gaza,+ ku Gati+ na ku Asidhodhe.+ 23 Yoswa akunda dziko yonsene ninga mudapikira Yahova kuna Mose.+ Penepo Yoswa aipereka kuna Aizraeli ninga unthaka mbaigawa kuna iwo mwakubverana na madzindza awo.+ Natenepa, dziko ineyi nee ikhalibve na nkhondo.+