Yoswa
13 Yoswa akhadakalamba, pontho akhali na pyaka pizinji.+ Natenepa Yahova ampanga: “Iwe wakalamba, pontho uli na pyaka pizinji; mbwenye khundu ya dziko idasala toera kuikunda ndi ikulu kakamwe. 2 Khundu ya dziko idasala ndi iyi:+ Pisa pyonsene pya Afilisti na pisa pyonsene pya Ajesuri,+ 3 (kutomera ku nkulo ungʼono unabuluka mu Nilo kumabulukiro a dzuwa a Ejitu mpaka kumadire a ku Ekroni, kunkwiriro, kwakuti kukhaoniwa ninga dziko ya Akanani)+ kuphatanizambo pisa pya atongi axanu a Afilisti,+ pisa pyenepi ndi Gaza, Asidhodhe,+ Asikaloni,+ Gati+ na Ekroni;+ cisa ca Avimu,+ 4 mpaka kunterero; dziko yonsene ya Akanani; Meara, yakuti ndi dziko ya Asidhoni,+ mpaka ku Afeki kumadire a Aamori; 5 dziko ya Ajebhali+ na kumabulukiro a dzuwa konsene kwa Libhano, kutomera ku Bhaale-Gadhi nʼkhundu mwa Phiri ya Ermoni mpaka ku Lebho-Amati;*+ 6 anthu onsene anakhala kucisa ca mapiri kutomera ku Libhano+ mpaka ku Misirefoti-Maimu+ na Asidhoni+ onsene. Ine ndinadzaathamangisa* pamaso pa Aizraeli.+ Basi ene iwe usafunika kupereka dziko ineyi kuna Aizraeli ninga unthaka, mwakubverana na pidakupanga ine.+ 7 Natenepa, iwe usafunika kugawa dziko ineyi ninga unthaka kuna madzindza mapfemba, kuphatanizambo hafu ya dzindza ya Manase.”+
8 Dzindza ya Rubheni, ya Gadhi na hafu inango ya dzindza ya Manase, atambira unthaka udapaswa iwo na Mose kumabulukiro a dzuwa a Yordani, mwakubverana na pikhadaapasa Mose ntumiki wa Yahova:+ 9 Kutomera ku Aroeri+ nʼkhundu mwa Gowa ya Arnoni,*+ ku nzinda wakuti uli pakati pa gowa na kunkwiriro konsene kwa Medhebha mpaka ku Dhibhoni; 10 mizinda yonsene ya Sihoni, mambo wa Aamori, wakuti akhatonga ku Esibhoni mpaka kumadire a Aamoni;+ 11 pontho Jiliyadhi na dziko yonsene ya Ajesuri na ya Amaakati;+ Phiri yonsene ya Ermoni na Bhasani+ onsene mpaka ku Saleka;+ 12 utongi onsene wa Ogi mambo wa ku Bhasani, wakuti akhatonga ku Asitaroti na ku Edhirei. (Iye akhali mʼbodzi wa Arefaimu adasalikira.)+ Mose akunda anthu a madziko anewa mbaathamangisa.*+ 13 Mbwenye Aizraeli nee athamangisa+ Ajesuri na Amaakati, pontho anthu a ku Jesuri na a ku Maakati asakhala na Aizraeli mpaka lero.
14 Basi ene ndi dzindza ya Alevi idakhonda iye kupasa unthaka.+ Unthaka+ wawo ndi ntsembe zakupiswa na moto zinaperekwa kuna Yahova Mulungu wa Aizraeli, ninga pikhadapikira iye kuna iwo.+
15 Buluka penepo, Mose apereka unthaka kuna dzindza ya Rubheni, mwakubverana na mabanja awo, 16 nzinda wawo ukhatomera ku Aroeri, nʼkhundu mwa Gowa ya Arnoni,* pontho ukhatomera ku nzinda wa pakati pa gowa, kuphatanizambo kunkwiriro konsene kwa Medhebha; 17 Esibhoni na mizinda yace+ yonsene yakuti isagumanika kunkwiriro, Dhibhoni, Bhamoti-Bhaale, Bheti-Bhaale-Meoni,+ 18 Yaazi,+ Kedhemoti,+ Mefati,+ 19 Kiriyataimu, Sibhima+ na ku Zereti-Sari paphiri ya gowa, 20 Bheti-Peori, dhuzi na phiri ya Pisga,+ Bheti-Jesimoti,+ 21 mizinda yonsene yakunkwiriro na utongi onsene wa Sihoni, Mambo wa Aamori, wakuti akhatonga ku Esibhoni.+ Mose akunda iye+ pabodzi na atsogoleri a Amidhiyani, Evi, Rekemu, Zuri, Uri na Rebha.+ Atongi anewa akhatongwa na Sihoni, pontho akakhala mu dziko ibodzi ene. 22 Mwa anthu adaphiwa na Aizraeli na supada, mʼbodzi wa iwo akhali nyakulotera+ Bhalamu,+ mwana wa Bheori. 23 Madire a dziko ikakhala dzindza ya Rubheni akhali nkulo wa Yordani; pontho dziko ineyi, mizinda na midzi yace pyaperekwa kuna iwo ninga unthaka, mwakubverana na mabanja awo.
24 Kusiyapo pyenepi, Mose apereka unthaka kuna dzindza ya Gadhi, mwakubverana na mabanja awo, 25 pontho dziko yawo ikhatomera ku Yazeri,+ mizinda yonsene ya Jiliyadhi, kuphatanizambo hafu ya dziko ya Aamoni+ mpaka ku Aroeri dhuzi na Rabha;+ 26 kutomera ku Esibhoni+ mpaka ku Ramati-Mispe na ku Bhetonimu, pontho kutomera ku Manaimu+ mpaka kumadire a Dhebhiri; 27 khundu ya ku gowa ikhaphataniza Bheti-Arani, Bheti-Nimira,+ Sukoti,+ Zafoni na khundu inango yonsene ya dziko ikhatonga Mambo Sihoni wa ku Esibhoni,+ madire awo akhali kumabulukiro a dzuwa a Yordani mpaka kutcitira ku Bara ya Kinereti.*+ 28 Ineyi ikhali dziko idapaswa dzindza ya Gadhi ninga unthaka, mwakubverana na mabanja awo. Iwo apaswa mizinda na midzi ya kweneko.
29 Kusiyapo pyenepi, Mose apereka unthaka kuna hafu ya dzindza ya Manase, mwakubverana na mabanja awo.+ 30 Dziko yawo ikhatomera ku Manaimu,+ kuphatanizambo Bhasani onsene, dziko yonsene yakuti ikhatongwa na Mambo Ogi wa ku Bhasani na pisa pyonsene pya Yaire+ ku Bhasani. Dziko yawo ikhali na mizinda 60. 31 Pontho hafu ya Jiliyadhi, Asitaroti, Edhirei+ na mizinda ya dziko ikhatongwa na Ogi wa ku Bhasani, yaperekwa kuna ana a Makiri mwana wa Manase, pyenepi pisabveka, yaperekwa kuna hafu ya ana a Makiri,+ mwakubverana na mabanja awo.
32 Anewa ndi madziko adapereka Mose kuna iwo ninga unthaka kuthando ya Moabhe kuntunda unango wa Yordani, kumabulukiro a dzuwa a Yeriko.+
33 Mbwenye dzindza ya Alevi, Mose nee aipasa unthaka.+ Yahova Mulungu wa Izraeli ndi unthaka wawo, ninga pikhadapikira iye kuna iwo.+