Atongi

9 Mukupita kwa ndzidzi, Abhimeleki+ mwana wa Yerubhaali aenda kuna abale a mai wace ku Sikemu, mbapanga iwo pabodzi na banja ya baba wa mai wace kuti: 2 “Ndaphata miyendo, bvundzani atsogoleri* onsene a ku Sikemu kuti: ‘Ndi pipi pyadidi kwa imwe? Kutongwa na ana onsene 70 a Yerubhaali,+ peno kutongwa na munthu mʼbodzi? Pontho kumbukani kuti imwe na ine ndife a manungo mabodzi ene na a ciropa cibodzi cene.’”*

3 Natenepa, abale a mai wace Abhimeleki alonga mafala anewa kuna atsogoleri onsene a ku Sikemu, pontho mitima yawo yatunduswa mbaphedzera Abhimeleki, penepo iwo alonga: “Iye ndi mʼbale wathu.” 4 Buluka penepo iwo ampasa masiklo 70 a parata a nʼnyumba* ya Bhaale-Bheriti.+ Abhimeleki akwata masiklo anewa mbalipa amuna akusowa basa na mapswiru toera aende pabodzi na iye. 5 Pidamala iye aenda kunyumba kwa babace ku Ofra,+ mbapha abale ace onsene,+ ana 70 a Yerubhaali pamwala ubodzi. Adapulumuka basi ene akhali Yotamu, mwana wakumalisa wa Yerubhaali, thangwi iye akhadabisala.

6 Buluka penepo, atsogoleri onsene a ku Sikemu na a ku Bheti-Milo agumanyikana mbakhazikisa Abhimeleki ninga mambo,+ dhuzi na muti ukulu, dhuzi na nzati ukhali ku Sikemu.

7 Yotamu pidadziwiswa iye pyenepi, abuluka mbaenda kalimira pa ntsonga ya Phiri ya Jerizimu,+ mbaapanga mwakugaluza kuti: “Ndibvesereni imwe atsogoleri a ku Sikemu, natenepa Mulungu anakubveserani.

8 “Ntsiku inango miti yaenda kadzodza mambo toera aatonge. Natenepa iyo yapanga muti wa mulivera: ‘Khala mambo wathu.’+ 9 Mbwenye muti wa mulivera watawira miti ineyi: ‘Ndisafunika kusiya kubulusa mafuta anga anaphatisirwa* toera kupasa mbiri Mulungu na anthu, mbandienda katonga miti inango?’ 10 Buluka penepo, miti ineyi yapanga muti wa nsambvu: ‘Bwera udzakhale mambo wathu.’ 11 Mbwenye muti wa nsambvu watawira miti ineyi: ‘Ndisafunika kusiya kutapira kwanga na misapo yanga yadidi, mbandienda katonga* miti inango?’ 12 Buluka penepo, miti ineyi yapanga muti wa mauva: ‘Bwera udzakhale mambo wathu.’ 13 Muti wa mauva watawira miti ineyi: ‘Ndisafunika kusiya kubulusa vinyu yanga ipswa inatsandzayisa Mulungu na anthu, mbandienda katonga* miti inango?’ 14 Pakumalisa miti yonsene yapanga thendere ya minga: ‘Bwera udzakhale mambo wathu.’+ 15 Penepo thendere ya minga yatawira miti ineyi: ‘Khala mwandimomwene mukundidzodza toera ndikhale mambo wanu, bwerani muthawire pa nʼthundzi wanga. Mbwenye khala nkhabe, moto unadzabuluka muna ine mbupisa miti ya masedhro a ku Libhano.’

16 “Musanyerezera kuti mwacita pinthu pyakulungama na pyakuthema pidakhazikisa imwe Abhimeleki ninga mambo?+ Imwe mwapangiza kukoma ntima kuna Yerubhaali na anthu a panyumba pace? Kodi imwe mwantsalakana mwakubverana na pidacita iye? 17 Babanga pidakumenyerani iye nkhondo,+ aikha umaso wace pangozwi toera kukupulumusani mʼmanja mwa Amidhiyani.+ 18 Mbwenye lero, imwe mwasandukira anthu a panyumba ya babanga mbamupha anace amuna 70 pamwala ubodzi.+ Buluka penepo mwakhazikisa Abhimeleki, mwana wa bitcu wankazi+ wa babanga ninga mambo, toera atonge anthu a ku Sikemu basi ene thangwi iye ndi mʼbale wanu. 19 Khala imwe lero mukucita pinthu pyakulungama na pyakuthema kuna Yerubhaali na anthu a panyumba pace, tsandzayani pabodzi na Abhimeleki, pontho iye mbatsandzaye na imwe. 20 Mbwenye khala nkhabe, mbubuluke moto kuna Abhimeleki toera upise atsogoleri a ku Sikemu na a ku Bheti-Milo,+ pontho mbubuluke moto kuna atsogoleri a ku Sikemu na a ku Bheti-Milo toera upise Abhimeleki.”+

21 Buluka penepo, Yotamu+ athawira ku Bheeri mbakhala kweneko thangwi ya Abhimeleki mʼbale wace.

22 Abhimeleki atonga* Izraeli pyaka pitatu. 23 Natenepa Mulungu atawirisa* kuti Abhimeleki akhonde kubverana na atsogoleri a ku Sikemu, iwo mbatoma kusandukira Abhimeleki. 24 Pyenepi pyacitika toera kubwezera kuphiwa kwa ana 70 a Yerubhaali toera ale adacita pyenepi akhale na mulando wa ciropa. Kuna Abhimeleki thangwi yakupha abale ace,+ pontho kuna atsogoleri a ku Sikemu thangwi ­yakuphedzera Abhimeleki toera aphe abale ace. 25 Natenepa, atsogoleri a ku Sikemu aikha amuna pa ntsonga za mapiri toera abisalire Abhimeleki, pontho iwo akhabera anthu onsene akhapita na nseu unoyu. Mukupita kwa ndzidzi, Abhimeleki adziwiswa pyenepi.

26 Buluka penepo, Gaale mwana wa Ebhedhi aenda ku Sikemu pabodzi na abale ace, pontho atsogoleri a ku Sikemu+ atoma kunyindira kuti iye mbadaaphedza. 27 Iwo aenda ku minda yawo ya mauva, asaka mauva aakamula, mbacita phwando. Buluka penepo apita nʼnyumba ya mulungu wawo,+ adya mbamwa, pontho apasa dzedze Abhimeleki. 28 Natenepa Gaale mwana wa Ebhedhi alonga: “Abhimeleki mbani, pontho Sikemu* mbani toera ife tiatumikire? Siye tayu mwana wa Yerubhaali,+ pontho muimiriri wace nee ndi Zebhuli? Tumikirani ana a Hamori, babace Sikemu! Thangwi yanji ife tisafunika kutumikira Abhimeleki? 29 Anthu awa mbadakhala kuti akutongwa na ine, mbandidabulusa Abhimeleki.” Buluka penepo iye apanga Abhimeleki: “Thimizira anyankhondo ako toera udzamenyane na ine.”

30 Zebhuli ntsogoleri wa nzinda aipirwa kakamwe pidabva iye mafala a Gaale mwana wa Ebhedhi. 31 Natenepa iye atuma anthu mwacibisobiso toera kapanga Abhimeleki kuti: “Gaale mwana wa Ebhedhi pabodzi na abale ace ali mu Sikemu, iwo akukulumiza anthu a mu nzinda toera akusandukireni. 32 Natenepa, bwerani namasiku pabodzi na amuna ali na imwe, mbamubisala kunja kwa nzinda. 33 Namacibese mu ndzidzi unabuluka dzuwa, musafunika kulamuka nakweru mbamumenya nkhondo mu nzinda. Gaale na amuna ali na iye angabwera toera kumenyana na imwe, citani pyonsene pinakwanisa imwe toera muakunde.”

34 Natenepa, Abhimeleki pabodzi na anthu onsene akhali na iye alamuka namasiku, mbaenda kabisala kunja kwa nzinda wa Sikemu, iwo akhadagawana misoka minai. 35 Gaale mwana wa Ebhedhi pidaenda iye kalimira pansuwo ukulu wa nzinda, Abhimeleki pabodzi na anthu akhali na iye abuluka mʼmbuto zidabisala iwo. 36 Gaale pidaona iye anthu apanga Zebhuli: “Ona, anthu ali kutcita buluka pa ntsonga za mapiri.” Mbwenye Zebhuli antawira: “Pinthu pinaona iwe ninga anthu ndi nʼthundzi wa mapiri.”

37 Buluka penepo Gaale alonga: “Ona, anthu ali kubwera buluka pakati pa dziko, pontho nsoka unango ukubwera na njira ya ku muti ukulu wa Meonenimu.” 38 Zebhuli antawira: “Kudzikuza kwako kuli kupi pidalonga iwe kuti: ‘Abhimeleki mbani toera ife tintumikire?’+ Anthu adapwaza iwe si anewa tayu? Cincino ndoko ukamenyane nawo.”

39 Natenepa, Gaale atsogolera atsogoleri a ku Sikemu mbamenyana na Abhimeleki. 40 Abhimeleki athamangira Gaale, Gaale mbathawa, pontho anthu azinji aphiwa mu nseu mpaka pansuwo ukulu wa nzinda.

41 Abhimeleki apitiriza kukhala ku Aruma, pontho Zebhuli+ athamangisa Gaale pabodzi na abale ace mu Sikemu. 42 Mangwana mwace anthu aenda kunja kwa nzinda, pontho Abhimeleki adziwiswa pyenepi. 43 Natenepa iye akwata anthu ace, aagawa misoka mitatu mbabisala kunja kwa nzinda. Pidaona iye anthu mbakabuluka mu nzinda, iye aathamangira mbaapha. 44 Abhimeleki pabodzi na misoka ikhali na iye, aenda patsogolo mbalimira dhuzi na nsuwo ukulu wa nzinda, mu ndzidzi wakuti misoka inango miwiri ikhathamangira anthu onsene akhali kunja kwa nzinda, mbaapha. 45 Abhimeleki amenyana na anthu mu nzinda ntsiku ineyi yonsene, mbaukunda. Iye apha anthu a mu nzinda unoyu, aufudza+ mbawazamo munyu.

46 Atsogoleri onsene a nyumba yakulapha yandzulu ya ku Sikemu pidabva iwo pyenepi, aenda mwakucimbiza mʼmbuto yakubisalira mu templo ya Eli-Bheriti.*+ 47 Pidadziwiswa Abhimeleki kuti atsogoleri onsene a nyumba yakulapha yandzulu ya ku Sikemu agumanyikana pabodzi, 48 Abhimeleki pabodzi na amuna onsene akhali na iye akwira Phiri ya Zalmoni. Abhimeleki akwata macado, agwanda nthawi ya muti mbaithuka paphewa pace, buluka penepo apanga ale akhali na iye: “Pinaona imwe mbandicita, citanimbo pibodzi pyene mwakucimbiza!” 49 Natenepa anthu onsene agwandambo nthawi za miti mbatowera Abhimeleki. Buluka penepo, iwo aikha nthawi zidagwanda iwo nʼkhundu mwa mbuto yakubisalira, mbagasa moto. Natenepa anthu onsene akhali nʼnyumba yakulapha yandzulu ya ku Sikemu afa, amuna na akazi cifupi na 1.000.

50 Buluka penepo Abhimeleki aenda ku Tebhezi; iye amanga misasa toera kumenyana na nzinda unoyu mbaukunda. 51 Pakati pa nzinda unoyu pakhali na nyumba yakulapha yandzulu, pontho yakuwanga, yakuti amuna onsene, akazi na atsogoleri onsene a mu nzinda, athawira mwenemu. Iwo afunga nsuwo mbakwira padzulu panyumba ineyi. 52 Abhimeleki aenda kunyumba yakulapha yandzulu toera kuenda kaifudza. Iye aenda dhuzi na nsuwo wa nyumba ineyi toera kuipisa na moto. 53 Penepo nkazi mʼbodzi agwisira munsolo mwa Abhimeleki mwala wa libwe, nsolo wace mbusweka.+ 54 Mwakucimbiza Abhimeleki acemera ntumiki wace akhanʼthukulira pida pya nkhondo, mbampanga: “Bulusa supada yako undiphe, toera anthu akhonde kulonga kuti: ‘Aphiwa na nkazi.’” Natenepa, ntumiki wace amulasa na supada mbafa.

55 Amuna a ku Izraeli pidaona iwo kuti Abhimeleki afa, mʼbodzi na mʼbodzi abwerera kunyumba kwace. 56 Natenepa Mulungu abwezera Abhimeleki pyakuipa pidacitira iye babace, thangwi yakupha abale ace 70.+ 57 Mulungu acitisambo kuti pyakuipa pyonsene pidacita amuna a ku Sikemu, pibwerere kuna iwo. Natenepa, dzedze idalonga Yotamu+ mwana wa Yerubhaali+ yabwerera kuna iwo.