Samweli Wakutoma
2 Buluka penepo, Yana aphembera tenepa:
Mulomo wanga wafunguka toera kutawira anyamalwa anga,
Thangwi ndisakomerwa na cipulumuso cinapereka imwe.
2 Nkhabepo munthu wakucena ninga Yahova,
Nkhabepo munthu unango kusiyapo imwe,+
Pontho nkhabepo mwala wakulandana na Mulungu wathu.+
3 Lekani kupitiriza kulonga mwakudzikuza;
Pamulomo panu mbapaleke kubuluka mafala akudzikuza,
Thangwi Yahova ndi Mulungu waudziwisi,+
Pontho ndiye anadinga mwadidi pinacita munthu.
5 Ale anadyeswa mwadidi anadzaphatira basa anango toera
agumane cakudya,
Mbwenye ale akhali na njala nee anadzakhalabve na njala.+
6 Yahova anakwanisa kupha, pontho anakwanisa kupulumusa umaso;
Iye anakwanisa kuendesa munthu Munthumbi,* pontho anakwanisa kumulamusa muli akufa.+
7 Yahova anakwanisa kutcerengesa, pontho anakwanisa kupfumisa;+
Iye anakwanisa kucepesa munthu, pontho anakwanisa kunkuza.+
8 Iye asabulusa pa pfumbi munthu wakupwazika;
Iye asabulusa pa dotha* munthu wakutcerenga,+
Mbaacitisa kukhala pabodzi na atsogoleri,
Mbaakhazika pa mpando waumambo.
Pyakutsidzikiza dziko yapantsi ndi pya Yahova,+
Pontho iye aikha dziko padzulu pa pinthu pyenepi.
9 Iye asatsidzikiza mathanyo a anthu ace akukhulupirika,+
Mbwenye anthu akuipa anadzaapha ncidima,+
Thangwi munthu nkhabe kuwina na mphambvu zace.+
11 Buluka penepo, Elikana abwerera kunyumba kwace ku Rama, mbwenye mwana akhatumikira Yahova+ mbatsogolerwa na nyantsembe Eli.
12 Ana a Eli akhali anthu akuipa;+ iwo nee akhalemedza Yahova. 13 Pikhacita iwo na pinthu pikhabweresa anthu+ toera kupasa anyantsembe ndi ipi: Munthu angapereka ntsembe, ntumiki wa nyantsembe akhabwera na garfu ya mano matatu mu ndzidzi ukhaphikwa nyama, 14 akhaipitisa mʼmapanela onsene akhaphikira iwo. Cinthu consene cikhabulusa garfu, nyantsembe akhacikwata. Ndi pyenepi pikhacita iwo ku Silo, kuna Aizraeli onsene akhaenda kweneko. 15 Pontho, nyakupereka ntsembe mbadzati kupisa mafuta a nyama,+ ntumiki wa nyantsembe akhabwera, mbampanga: “Ndipase nyama toera nyantsembe akaotce. Iye nee anatawira nyama yakuphikwa, mbwenye basi ene iwisi.” 16 Nyakupereka ntsembe angalonga kuti: “Ndisiyeni nditome kupisa mafuta a nyama,+ ndingamala munakwata pyonsene pinafuna imwe,” iye akhampanga: “Nkhabe, ndipase cincino; ungakhonda, ine ndinakupokosera!” 17 Natenepa madawo a atumiki adzakhala makulu kakamwe kuna Yahova,+ thangwi amuna anewa nee akhalemedza ntsembe za Yahova.
18 Mbwenye Samweli akhatumikira+ Yahova maseze akhali mwana, pontho akhabvala nguwo ya efodhi.+ 19 Mai wace akhansonera tunika ingʼono yakusowa mikono, mbaenda kampasa pyaka pyonsene mu ndzidzi ukhaenda iye na mamunace kapereka ntsembe ya pa caka.+ 20 Eli apasa nkhombo Elikana pabodzi na nkazace, mbalonga: “Yahova mbakupase mwana na nkazi uyu, pa mbuto ya ule adapereka iye kuna Yahova.”+ Buluka penepo, iwo abwerera kunyumba kwawo. 21 Yahova aphedza Yana, mbabala ana anango,+ atatu amuna na awiri akazi. Mbwenye mʼphale Samweli apitiriza kukula mbakatumikira Yahova.+
22 Eli akhadakalamba kakamwe, mbwenye iye akhabva pinthu pyonsene pikhacita anace+ kuna Aizraeli, akhabvambo kuti iwo akhapita mʼmabonde na akazi akhatumikira pansuwo wa nsasa wa nsonkhano.*+ 23 Iye akhaapanga: “Thangwi yanji musacita pinthu pyenepi? Anthu onsene asandipanga pinthu pyakuipa pinacita imwe. 24 Lekani kucita pyenepi ananga, thangwi mphangwa zinabva ine na mbumba ya Yahova nee ndi zadidi. 25 Munthu angadawira ndzace, unango anakwanisa kuphemba Yahova toera amʼphedze;* mphapo munthu angadawira Yahova,+ mbani anafuna kuncitira phembero?” Mbwenye iwo akhonda kubvera babawo, thangwi Yahova akhadatonga kuapha.+ 26 Mu ndzidzi unoyu, mʼphale Samweli akhapitiriza kukula mbakafuniwa na Yahova pabodzi na anthu.+
27 Mamuna adatumwa na Mulungu, aenda kuna Eli mbampanga: “Yahova alonga tenepa: ‘Kodi ine nee ndapangizika pakweca kuna mbuyako na banja yace mu ndzidzi ukhali imwe ku Ejitu ninga mabitcu a Farau?*+ 28 Pontho iye asankhulwa pakati pa madzindza onsene a Izraeli+ toera atumikire ninga nyantsembe wanga, mbakwira paguwa yanga+ toera kupereka ntsembe, insenso* na kubvala nguwo ya efodhi pamaso panga; na thangwi ineyi, ine ndatawirisa iye pabodzi na anace toera akwate phindi ya nyama zinabweresa Aizraeli*+ kuti apereke ntsembe zakupiswa kuna ine. 29 Thangwi yanji musapwaza ntsembe yanga na muoni wanga, pinthu pidalonga ine kuti pisafunika kuperekwa panyumba panga?+ Thangwi yanji usalemedza kakamwe anako kupiringana ine, mbakhuma na mapindi adidi a miyoni inabweresa mbumba yanga ya Izraeli?+
30 “‘Na thangwi ineyi, Yahova Mulungu wa Izraeli alonga: “Ndikhadalonga kuti anthu a panyumba pako na a panyumba pa mbuyako anadzanditumikira ndzidzi onsene.”+ Mbwenye cincino Yahova alonga: “Pyenepi cipo pinacitika, thangwi ine ndinalemedza ale anandilemedza,+ mbwenye ale anakhonda kundilemedza, nee anadzalemedzwa.” 31 Ntsiku ziri kufika zinafuna ine kumalisa mphambvu* zako na za panyumba pa babako, toera anthu a panyumba pako akhonde kukalamba.+ 32 Mu pinthu pyonsene pyadidi pinafuna kucitirwa Aizraeli,+ iwe unadzaona nyamalwa panyumba panga. Pontho panyumba pako cipo panadzaoneka munthu wakukalamba. 33 Mwanako anafuna khonda ine bulusa pa basa yakutumikira paguwa panga, anadzacitisa maso ako kukhala na cidima, pontho anadzakutsukwalisa. Mbwenye anthu azinji a panyumba pako anadzaphiwa na supada.+ 34 Pontho pinafuna kucitika kuna anako awiri, Ofini na Fineya, pinadzakhala cidzindikiro kuna iwe: Uwiri wawo anadzafa+ pa ntsiku ibodzi ene. 35 Buluka penepo, ine ndinadzakhazikisa nyantsembe wanga wakukhulupirika.+ Iye anadzacita pinthu mwakubverana na pinafuna ntima wanga; pontho ndinadzamʼmangira nyumba ya kwenda na kwenda, mbatumikira nyakudzodzwa wanga ndzidzi onsene. 36 Munthu anafuna kusala panyumba pako, anadzabwera kudzagodama kuna iye toera kuphemba basa kuti apaswe kobiri na cakudya, mbalonga: “Ndaphata miyendo, nditawiriseni toera ndiphate basa ya unyantsembe toera ndigumane cakudya.”’”+