Samweli Wakutoma
4 Samweli apitiriza kulonga kuna Aizraeli onsene.
Buluka penepo, Aizraeli aenda kamenyana na Afilisti; iwo amanga misasa yawo dhuzi na Ebhenezeri, pontho Afilisti amanga misasa yawo ku Afeki. 2 Afilisti apakana toera kumenyana na Aizraeli, mbwenye Aizraeli pinthu nee pyaafambira mwadidi, natenepa iwo akundwa na Afilisti, mbaphiwa amuna cifupi na 4.000 kunkhondo. 3 Anyankhondo a Aizraeli pidabwerera iwo ku misasa yawo, akulu a Aizraeli alonga: “Thangwi yanji lero Yahova atawirisa kuti ife tikundwe* na Afilisti?+ Tendeni ku Silo+ tikakwate bokosi ya cibverano ya Yahova, toera ikhale na ife mbitipulumusa mʼmanja mwa anyamalwa athu.” 4 Natenepa, mbumba yatuma amuna toera kuenda ku Silo kakwata bokosi ya cibverano ya Yahova wa anyankhondo, wakuti akhala padzulu* pa akerubhi.+ Ana awiri a Eli, akuti ndi Ofini na Fineya,+ akhalimbo kweneko pabodzi na bokosi ya cibverano ya Mulungu wandimomwene.
5 Bokosi ya cibverano ya Yahova pidafika iyo ku misasa, Aizraeli onsene atoma kukhuwa, natenepa, kukhuwa kwawo kwabveka konsene kwene. 6 Afilisti pidabva iwo kukhuwa kwa anthu, abvundza: “Thangwi yanji anthu ali kukhuwa ku misasa ya Ahebheri?” Buluka penepo, iwo adzindikira kuti Bokosi ya Yahova ikhadafika ku misasa yawo. 7 Afilisti atoma kugopa mbalonga: “Mulungu afika ku misasa yawo!”+ Buluka penepo iwo alonga: “Dzedze kwa ife, thangwi cipo pyacitika kale pinthu ninga pyenepi! 8 Dzedze kwa ife! Mbani anafuna kutipulumusa mʼmanja mwa Mulungu unoyu wankulu? Unoyu ndi Mulungu adapha Aejitu azinji kakamwe nʼthando.+ 9 Imwe Afilisti, khalani acipapo mbamucita pinthu ninga amuna toera mukhonde kutumikira Ahebheri ninga pidakutumikirani iwo.+ Menyani nkhondo ninga amuna!” 10 Natenepa Afilisti amenya nkhondo mbakunda Aizraeli,+ mʼbodzi na mʼbodzi athawira ku nsasa kwace. Anthu adaphiwa akhali azinji kakamwe. Anyankhondo a Izraeli adaphiwa akhali akukwana 30.000. 11 Kusiyapo pyenepi, Bokosi ya Mulungu yakwatwa, pontho ana awiri a Eli, akuti ndi Ofini na Fineya afa.+
12 Mamuna mʼbodzi wa dzindza ya Bhenjamini athamanga buluka kunkhondo mbafika ntsiku ibodzi ene ku Silo. Nguwo zace zikhadapanduka, pontho akhali na mataka munsolo mwace.+ 13 Mamuna unoyu pidafika iye, agumana Eli ali nawa pa mpando wace dhuzi na nseu mbakadikhira, thangwi iye akhadzudzumika kakamwe na Bokosi ya Mulungu wandimomwene.+ Mamuna unoyu apita mu nzinda mbalonga mphangwa, natenepa anthu onsene mu nzinda atoma kukhuwa. 14 Eli pidabva iye kuti anthu akukhuwa, abvundza: “Thangwi yanji anthu akukhuwa?” Mamuna unoyu athamanga mbaenda kalonga mphangwa zibodzi zene kuna Eli. 15 (Eli akhali na pyaka 98, pontho iye nee akhakwanisabve kuona.)+ 16 Natenepa mamuna unoyu apanga Eli: “Ndabuluka kunkhondo! Ndathawa kweneko lero.” Penepo iye ambvundza: “Ninji pidacitika mwananga?” 17 Mamuna unoyu atawira: “Aizraeli athawa Afilisti thangwi iwo akundwa, pontho anthu azinji aphiwa.+ Ananu awiri ene Ofini na Fineya aphiwambo,+ pontho Bokosi ya Mulungu wandimomwene yakwatwa+ na Afilisti.”
18 Mamuna pidalonga iye pya Bokosi ya Mulungu wandimomwene, Eli agwa na nkhodolo buluka pa mpando ukakhalira iye dhuzi na nsuwo ukulu. Natenepa khosi yace yakhumuka, mbafa, thangwi akhadakalamba, pontho akhalemera. Iye atonga Aizraeli pyaka 40. 19 Nkwenyace, wakuti ndi nkazi wa Fineya, akhali na mimba, pontho akhali dhuzi na kubala. Pidabva iye kuti Bokosi ya Mulungu wandimomwene yakwatwa, pontho kuti tebzwalace na mamunace afa, iye akotama, mbabala mwakukhonda dikhira. 20 Pikhali iye dhuzi na kufa, akazi akhadalimira dhuzi na iye alonga: “Leka gopa, thangwi wabala mwana wamamuna.” Mbwenye iye nee atawira, pontho nee atsalakana pikhalonga iwo.* 21 Buluka penepo, iye athula mwanace dzina yakuti Ikabhodhi,*+ mbalonga: “Mbiri yabuluka mu Izraeli mbienda ku ubitcu.”+ Iye alonga pyenepi thangwi ya kukwatwa kwa Bokosi ya Mulungu wandimomwene, pontho thangwi yakufa kwa tebzwalace na mamunace.+ 22 Iye alonga: “Mbiri yabuluka mu Izraeli mbienda ku ubitcu, thangwi Bokosi ya Mulungu wandimomwene yakwatwa.”+