Samweli Waciwiri
8 Pidapita ndzidzi ungasi, Dhavidhi amenyana na Afilisti+ mbaakunda,+ pontho Dhavidhi akwata Metege-Ama m’manja mwa Afilisti.
2 Iye akunda Amoabhe,+ buluka penepo aapanga toera agone pantsi mbaagawa m’misoka mitatu.* Misoka miwiri toera aiphe, mbwenye nsoka ubodzi toera ausiye.+ Pontho anthu a ku Moabhe adzakhala atumiki a Dhavidhi mbalipa misonkho kuna iye.+
3 Dhavidhi akunda mambo Adhadhezeri wa ku Zobha+ mwana wa Reobhi mu ndzidzi ukhaenda Adhadhezeri kakhazikisa pontho utongi wace ku Nkulo wa Eufrate.+ 4 Dhavidhi aphata anyamakavalo 1.700, pontho aphata anyankhondo 20.000 akuti akhafamba na miyendo. Buluka penepo Dhavidhi agwanda uzingo wa* makavalo onsene mbasiya makavalo 100 a ngolo.+
5 Anthu a ku Sirya wa ku Dhamasku+ pidabwera iwo kudzaphedza Mambo Adhadhezeri wa ku Zobha, Dhavidhi apha anthu 22.000 a ku Sirya.+ 6 Buluka penepo Dhavidhi aikha misoka ya anyankhondo ku Sirya wa ku Dhamasku, pontho anthu a ku Sirya adzakhala atumiki a Dhavidhi mbalipa misonkho kuna iye. Yahova akhacitisa kuti Dhavidhi awine* konsene kukhaenda iye.+ 7 Kusiyapo pyenepi, Dhavidhi akwatira atumiki a Adhadhezeri maxango a ouro mbaenda nawo ku Yerusalemu.+ 8 Mambo Dhavidhi akwata nkuwa uzinji kakamwe ku Bheta na ku Bherota mizinda ya Adhadhezeri.
9 Mambo Toi wa ku Amati+ abva kuti Dhavidhi akunda nsoka onsene wa anyankhondo a Adhadhezeri.+ 10 Natenepa Toi atuma mwanace wamamuna Yoramu kuna Mambo Dhavidhi toera akadziwe kuti iye ali tani na kuncita makolokoto thangwi yakumenyana na Adhadhezeri mbankunda (Toi acita pyenepi thangwi kazinji kene Adhadhezeri akhamenyana na iye), pontho apasa Dhavidhi pinthu pya parata, pya ouro na pya nkuwa. 11 Mambo Dhavidhi apereka* pinthu pyenepi kuna Yahova, ninga pidacita iye na parata na ouro pidakwata iye kuna madzindza onsene adakunda iye:+ 12 Kuna Sirya na Moabhe,+ kuna Aamoni, Afilisti,+ Aamaleki,+ kuphatanizambo pinthu pidatapata iwo kuna mambo Adhadhezeri+ wa ku Zobha mwana wa Reobhi. 13 Kusiyapo pyenepi, Dhavidhi adzakhala wakubvekera kakamwe pidabwerera iye pakumala kupha Aedhomi 18.000 n’Gowa ya Munyu.+ 14 Dhavidhi aikha misoka ya anyankhondo mu Edhomi. Iye aikha misoka ya anyankhondo mu Edhomi monsene, pontho Aedhomi onsene adzakhala atumiki a Dhavidhi.+ Yahova akhacitisa kuti Dhavidhi awine* konsene kukhaenda iye.+
15 Dhavidhi apitiriza kutonga Aizraeli onsene,+ pontho mbumba yace yonsene+ iye akhaitonga mwadidi na mwakulungama.+ 16 Yoabhe+ mwana wa Zeruya akhali nkulu wa anyankhondo, Yosafate+ mwana wa Ailudhi akhali nyakulemba pyonsene pikhacitika. 17 Zadhoke+ mwana wa Aitubhe na Aimeleki mwana wa Abhiyatari akhali anyantsembe, mbwenye Seraya akhali mulembi. 18 Bhenaya+ mwana wa Yeoyadha akhali ntsogoleri wa Akereti na wa Apeleti.+ Pontho ana amuna a Dhavidhi adzakhala atsogoleri akulu.*