Samweli Wakutoma
1 Akhalipo mamuna mʼbodzi ku Ramataimu-Zofimu+ kucisa ca mapiri ca ku Efraimu,+ dzina yace ikhali Elikana.+ Iye akhali wa ku Efraimu, pontho akhali mwana wa Yeroamu, mwana wa Eliyu, mwana wa Tou, mwana wa Zufi. 2 Elikana akhali na akazi awiri; mʼbodzi akhacemerwa Yana, unango akhacemerwa Penina. Penina akhali na ana, mbwenye Yana nee akhali na ana. 3 Pyaka pyonsene mamuna unoyu akhabuluka mu nzinda wace mbaenda ku Silo+ toera kalambira na kupereka ntsembe kuna Yahova wa anyankhondo. Ana awiri a Eli, akuti ndi Ofini na Fineya+ akhatumikira kweneko ninga anyantsembe a Yahova.+
4 Ntsiku inango Elikana apereka ntsembe. Iye akwata mapindi a ntsembe mbapasa Penina na anace onsene, amuna na akazi.+ 5 Yana ampasa phindi yadidi kakamwe thangwi ndi nkazi akhafuna iye kakamwe; mbwenye Yahova nee akhadampasa ana.* 6 Ndzidzi onsene nʼkhazibace akhansingirira toera kuntsukwalisa thangwi Yahova nee akhadampasa ana. 7 Penina akhacita pyenepi pyaka pyonsene; Yana angaenda ku templo* ya Yahova,+ nʼkhazibace akhansingirira kakamwe, natenepa iye akhalira mbacimwana kudya. 8 Mbwenye Elikana akhambvundza: “Yana, thangwi yanji ukulira? Thangwi yanji usakhonda kudya? Thangwi yanji uli wakutsukwala kakamwe? Nee ndine wakufunika kakamwe kuna iwe kupiringana ana khumi amuna?”
9 Pidamala iwo kudya na kumwa ku Silo, Yana abuluka pakhali iye. Pa ndzidzi unoyu, nyantsembe Eli akhali nawa pansuwo wa templo*+ ya Yahova. 10 Yana akhali wakutsukwala kakamwe, natenepa atoma kuphembera kuna Yahova+ mbalira kakamwe. 11 Penepo iye apikira kuti: “Yahova wa anyankhondo, onani kuthabuka kunacita ine! Mungandikumbuka ine ntumiki wanu, mbamundipasa mwana wamamuna,+ ndinadzampereka kuna imwe Yahova toera akutumikireni mu umaso wace onsene, pontho tsisi yace nee inadzacingwa.”+
12 Pikhacita Yana phembero kuna Yahova mu ndzidzi uzinji, Eli akhayangʼana mulomo wace. 13 Yana akhalonga muntima mwace, mbakatekenyesa mulomo wace basi, mbwenye fala yace nee ikhabveka. Natenepa, Eli akhanyerezera kuti iye aledzera. 14 Eli ampanga: “Unapitiriza kukhala wakuledzera mpaka lini? Toma kungunuka vinyu idamwa iwe.” 15 Natenepa Yana antawira: “Nkhabe mbuyanga! Ndine nkazi wakutsukwala kakamwe; nee ndamwa vinyu peno cakumwa cinango cakuledzeresa, mbwenye ndiri kulonga kuna Yahova pinandidzudzumisa.+ 16 Lekani kunyerezera kuti ndine nkazi wakusowa basa, ine ndikucita phembero mpaka ndzidzi uno thangwi yakunjipa kwa nyatwa zanga na kutsukwala kwanga.” 17 Natenepa Eli ampanga: “Ndoko muntendere, Mulungu wa Izraeli mbakupase pidamʼphemba iwe.”+ 18 Penepo Yana alonga: “Pitirizani kundikomera ntima ine ntumiki wanu.” Buluka penepo iye aenda, adya, pontho nee akhalibve wakutsukwala.
19 Mangwana mwace, iwo alamuka namacibese kakamwe mbalambira Yahova, pidamala iwo kucita pyenepi abwerera kunyumba kwawo ku Rama.+ Elikana apita mʼmabonde na Yana, pontho Yahova atawira* phembero ya Yana.+ 20 Nkati mwa caka cibodzi,* Yana akhala na mimba mbabala mwana wamamuna, iye anʼthula+ Samweli,* thangwi iye alonga: “Ine ndamʼphemba kuna Yahova.”
21 Mukupita kwa ndzidzi, Elikana pabodzi na anthu a panyumba pace, aenda kapereka ntsembe ya pa caka kuna Yahova,+ pontho toera kupereka ntsembe yace ya pikiro. 22 Mbwenye Yana nee aenda nawo pabodzi,+ thangwi iye apanga mamunace: “Mwana angasiya kuyamwa, ine ndinabwera naye; ndinadzampereka kuna Yahova, mbakhala kweneko umaso wace onsene.”+ 23 Natenepa Elikana ampanga: “Cita pinaona iwe kukhala pyadidi. Khala panyumba mpaka mwana angasiya kuyamwa. Yahova mbacite pidalonga iwe.” Natenepa Yana asala panyumba, mbayamwisa mwanace mpaka pidasiya iye kuyamwa.
24 Mwana pidasiya iye kuyamwa, Yana ankwata mbaenda naye ku Silo, iye akwatambo mwanangʼombe wamamuna wa pyaka pitatu, ntsengwa ibodzi* ya ufa na citomba cibodzi ca vinyu.+ Iye afika na mwana pa templo* ya Yahova ku Silo.+ 25 Buluka penepo, iwo apha mwanangʼombe wamamuna, pontho akwata mwana mbaenda naye kuna Eli. 26 Natenepa Yana alonga: “Ndilekerereni mbuyanga! Ndikulonga na cinyindiro consene kuti ndine nkazi ule adabwera pano mbaphembera kuna Yahova pamaso panu.+ 27 Ine ndaphemba mwana uyu mu phembero, pontho Yahova andipasa pidaphemba ine.+ 28 Na thangwi ineyi, ine ndiri kumpereka* kuna Yahova. Iye anakhala wa Yahova mu umaso wace onsene.”
Penepo Elikana agodama pamaso pa Yahova.