Atongi

8 Buluka penepo amuna a ku Efraimu abvundza Jidhiyoni: “Thangwi yanji wacita pyenepi kuna ife? Thangwi yanji nee waticemera pidaenda iwe kamenyana na Amidhiyani?”+ Iwo alongezana kakamwe na iye.+ 2 Mbwenye iye aabvundza: “Ninji pidacita ine ndingalandanisa na pidacita imwe? Mauva adaphalakatira Efraimu+ nee ndi adidi kakamwe kupiringana adabvuna Abhiezeri?+ 3 Mulungu apereka mʼmanja mwanu akulu a Amidhiyani akuti ndi Orebhi na Zebhi,+ ninji pidacita ine ndingalandanisa na pidacita imwe?” Pidalonga iye mafala anewa, iwo akhurudzika.

4 Buluka penepo, Jidhiyoni afika pa nkulo wa Yordani mbawambuka. Iye pabodzi na anyankhondo 300 akhadaneta, mbwenye apitiriza kutowera anyamalwa awo. 5 Natenepa iye apanga amuna a ku Sukoti: “Ndaphata miyendo pasani mikate amuna ali na ine, thangwi iwo aneta, ife tikutowera amambo a Amidhiyani, Zebha na Zalmuna.” 6 Mbwenye akulu a ku Sukoti alonga: “Zebha na Zalmuna ali mʼmanja mwako toera ife tipase pyakudya anyankhondo ako?” 7 Jidhiyoni atawira: “Nakuti mwalonga pyenepi, Yahova angapereka mʼmanja mwanga Zebha na Zalmuna, ndinadzakukwapulani na matsandzo a minga ya nʼthando.”+ 8 Buluka penepo, iye aenda mpaka ku Penuweli mbacita phembo ibodzi ene, mbwenye amuna a ku Penuweli antawira ninga pidatawirwa iye na amuna a ku Sukoti. 9 Natenepa iye apangambo amuna a ku Penuweli kuti: “Ndingabwerera mwadidi kunaenda ine, ndinadzafudza nyumba iyi yakulapha yandzulu.”+

10 Zebha na Zalmuna akhali ku Karkori pabodzi na anyankhondo awo cifupi na 15.000. Anewa akhali anyankhondo adasala mwa anyankhondo onsene a Kumabulukiro a Dzuwa,+ thangwi amuna 120.000 akuti akhali na masupada akhadamala kuphiwa. 11 Jidhiyoni apitiriza kuenda na njira inapita na anthu anakhala mʼmisasa, kumabulukiro a dzuwa kwa Nobha na Yogibheya,+ mbakunda misasa ya anyamalwa akuti nee akhadakhunganyika. 12 Pidathawa amambo awiri a ku Midhiyani, Zebha na Zalmuna, iye aatowera mbaaphata, pyenepi pyacitisa anyankhondo onsene akhali mʼmisasa kugopa.

13 Buluka penepo, Jidhiyoni mwana wa Yowasi abwerera buluka kunkhondo mbapita na kunkwiriro kwa Eresi. 14 Pikhali iye nʼnjira, aphata mʼphale wa ku Sukoti mbancita mibvundzo. Mʼphale unoyu amulembera madzina 77 a akulu na atsogoleri a ku Sukoti. 15 Natenepa Jidhiyoni aenda kuna amuna a ku Sukoti mbaapanga: “Kodi Zebha na Zalmuna si awa tayu? Ale adandipwaza na imwe mbamulonga kuti: ‘Zebha na Zalmuna ali mʼmanja mwako toera ife tipase pyakudya anyankhondo ako?’”+ 16 Penepo iye aphata atsogoleri a mu nzinda, akwata matsandzo a minga ya nʼthando mbatsuka nsolo amuna anewa a ku Sukoti.+ 17 Pontho iye afudza nyumba yakulapha yandzulu ya ku Penuweli+ mbapha amuna a mu nzinda unoyu.

18 Iye abvundza Zebha na Zalmuna: “Amuna adapha imwe ku Tabhori akhali tani?” Iwo antawira: “Iwo akhali ninga iwe, onsene akhali ninga ana a mambo.” 19 Natenepa iye alonga: “Iwo akhali abale anga, ana a mai wanga. Ndikudumbira mu dzina ya Yahova, imwe mbamudakhonda kuapha, ine nee mbidakuphanimbo.” 20 Buluka penepo iye apanga Yeteri, mwanace wautombo* kuti: “Lamuka uaphe.” Mbwenye Yeteri nee abulusa supada yace; iye agopa thangwi akhali mʼphale. 21 Natenepa Zebha na Zalmuna alonga: “Lamuka iwe utiphe wekha, thangwi mphambvu za munthu zisabverana na thunga yace.” Penepo Jidhiyoni alamuka mbapha Zebha na Zalmuna,+ buluka penepo aakwatira pyakubalikisa pyakulandana na mwezi pikhali mʼmakhosi a makamelo awo.

22 Mukupita kwa ndzidzi, amuna a Izraeli apanga Jidhiyoni: “Khala ntongi wathu; iwe, mwanako na ndzukulu wako, thangwi watipulumusa mʼmanja mwa Amidhiyani.”+ 23 Mbwenye Jidhiyoni aatawira: “Ine nee ndinadzakhala ntongi wanu, pontho mwananga nee anadzakhala ntongi wanu. Yahova ndiye anafuna kudzakhala ntongi wanu.”+ 24 Jidhiyoni athimiza: “Ine ndinakuphembani cinthu cibodzi: Mʼbodzi na mʼbodzi wa imwe andipase mphete ya pa mphuno mu pinthu pidatapata iye.” (Ale adakundwa akhali na mphete za pa mphuno za ouro, thangwi akhali Aijimaeli.)+ 25 Iwo atawira: “Nkhabe pinthu, ife tinapereka.” Natenepa iwo athasika nguwo, mʼbodzi na mʼbodzi aponya pa nguwo ineyi mphete ya pa mphuno mu pinthu pidatapata iye. 26 Mphete za pa mphuno za ouro zidaphemba iye zikhalemera masiklo* 1.700 a ouro, kusiyapo pyakubalikisa pyakulandana na mwezi, mphete za mʼmakutu, nguwo zakufuirira zikhabvala amambo a ku Midhiyani na mikufu ya makamelo.+

27 Jidhiyoni aphatisira ouro ineyi toera kucita cakubvala cinacemerwa efodhi,+ mbacipangiza mu nzinda wace wa Ofra;+ pontho Izraeli onsene atoma kucilambira,+ mbacikhala ninga nsampha kuna Jidhiyoni na anthu a panyumba pace.+

28 Munjira ineyi Amidhiyani+ akundwa na Aizraeli, pontho iwo nee akhaathusabve; dziko mbikhala muntendere pyaka 40 mu ntsiku za Jidhiyoni.+

29 Natenepa, Yerubhaali*+ mwana wa Yowasi abwerera kunyumba kwace mbakhala kweneko.

30 Jidhiyoni abala ana 70, thangwi iye akhali na akazi azinji. 31 Iye abala mwana na nkazace wangʼono wa ku Sikemu, mbanʼthula Abhimeleki.+ 32 Jidhiyoni mwana wa Yowasi afa mbali nkhalamba, pontho aikhwa munthumbi ya Yowasi wakuti akhali babace, ku Ofra, nzinda wa Aabhiezeri.+

33 Pidafa Jidhiyoni, Aizraeli atoma pontho kulambira madzimunthu a Bhaale,+ mbasankhula Bhaale-Bheriti toera akhale mulungu wawo.+ 34 Aizraeli nee akumbuka Yahova Mulungu wawo,+ ule adaapulumusa mʼmanja mwa anyamalwa awo onsene;+ 35 pontho nee apangiza ufuni wandimomwene kuna anthu a panyumba ya Yerubhaali, wakuti ndi Jidhiyoni, thangwi ya pinthu pyonsene pyadidi pidacitira iye Izraeli.+