Yoswa

6 Misuwo ya nzinda wa Yeriko ikhadafungwa mwadidi thangwi yakugopa Aizraeli; nee mʼbodzi akhakwanisa kubuluka, pontho nee mʼbodzi akhakwanisa kupita.+

2 Penepo Yahova alonga na Yoswa: “Ona, ine ndapereka kuna iwe Yeriko, mambo wace pabodzi na anyankhondo ace amphambvu.+ 3 Imwe monsene anyankhondo amphambvu, musafunika kuzungulira nzinda kabodzi. Musafunika kucita pyenepi mu ntsiku zitanthatu. 4 Sankhula anyantsembe anomwe toera akwate nyanga zinomwe za mabira acimuna, mbaenda kutsogolo kwa Bokosi. Mbwenye pa ntsiku yacinomwe, musafunika kuzungulira nzinda kanomwe, pontho anyantsembe asafunika kuliza nyanga.+ 5 Zingalizwa nyanga za mabira, mu ndzidzi unabva imwe kulira kwa nyanga, anyankhondo onsene asafunika kukhuwa ninga pinacita anthu pa nkhondo. Natenepa mpanda wa nzinda unagwa,+ pontho anyankhondo onsene asafunika kuenda kudagwa mpanda.”

6 Penepo Yoswa mwana wa Nuni acemeresa anyantsembe mbaapanga: “Kwatani bokosi ya cibverano, pontho anyantsembe anomwe asafunika kukwata nyanga zinomwe za mabira acimuna mbaenda kutsogolo kwa Bokosi ya Yahova.”+ 7 Buluka penepo iye apanga anyankhondo: “Ndokoni mukazungulire nzinda, pontho anyankhondo+ ali na pida asafunika kuenda kutsogolo kwa Bokosi ya Yahova.” 8 Mwakubverana na pidalonga Yoswa kuna anyankhondo, anyantsembe anomwe akwata nyanga zinomwe za mabira acimuna pamaso pa Yahova, iwo akhaenda kutsogolo mbaliza nyanga, pontho bokosi ya cibverano ca Yahova ikhabwera nduli mwawo. 9 Anyankhondo akhali na pida aenda kutsogolo kwa anyantsembe akuti akhaliza nyanga, pontho anyankhondo anango akhatowera Bokosi mu ndzidzi ukhalizwa nyanga.

10 Yoswa akhadapanga anyankhondo kuti: “Lekani kukhuwa peno kulonga cinthu. Pamulomo panu nee pasafunika kubveka mafala mpaka ntsiku inafuna ine kukupangani kuti: ‘Khuwani!’ Penepo imwe musafunika kukhuwa.” 11 Iye acitisa kuti Bokosi ya Yahova izungulire nzinda, iwo aithukula mbazungulira nayo nzinda kabodzi, buluka penepo iwo abwerera ku misasa mbagona kweneko namasiku.

12 Mangwana mwace, Yoswa alamuka namacibese kakamwe, pontho anyantsembe athukula Bokosi+ ya Yahova. 13 Anyantsembe akhali na nyanga zinomwe za mabira acimuna, aenda kutsogolo kwa Bokosi ya Yahova mbapitiriza kuliza nyanga. Anyankhondo akuti akhali na pida akhaenda kutsogolo kwawo, pontho anyankhondo anango akhatowera Bokosi ya Yahova mu ndzidzi ukhalizwa nyanga. 14 Pa ntsiku yaciwiri iwo azungulira nzinda kabodzi, buluka penepo abwerera ku misasa. Iwo acita pyenepi mu ntsiku zitanthatu.+

15 Pa ntsiku yacinomwe, iwo alamuka namacibese kakamwe, pidaca kunja. Iwo azungulira nzinda kanomwe ninga pikhacita iwo. Ndi pa ntsiku ineyi basi idazungulira iwo nzinda kanomwe.+ 16 Pidazungulira iwo kacinomwe, anyantsembe aliza nyanga, penepo Yoswa apanga anyankhondo: “Khuwani,+ thangwi Yahova akupasani nzinda! 17 Nzinda na pyonsene piri mwenemo pisafunika kufudzwa;+ thangwi ndi pya Yahova. Mbwenye puta Raabhe+ nee asafunika kuphiwa. Pulumusani iye pabodzi na onsene ali na iye nʼnyumba mwace, thangwi abisa anyakuona dziko adatuma ife.+ 18 Mbwenye citani mphole-mphole na pinthu pyakuti pisafunika kufudzwa,+ toera mukhonde kusirira pinthu pyakuti pisafunika kufudzwa, mbamupikwata.+ Pyenepi mbapidacitisa kuti misasa ya Izraeli itheme kufudzwa, mbapibweresa nyatwa.*+ 19 Mbwenye parata yonsene, ouro yonsene na pinthu pyonsene pidacitwa na nkuwa, pontho na utale ndi pyakucena kuna Yahova.+ Pyenepi pisafunika kuendeswa ku mbuto inakoyerwa mpfuma nʼnyumba ya Yahova.”+

20 Pidalizwa nyanga anyankhondo akhuwa.+ Pidabva anyankhondo kulira kwa nyanga mbakhuwa kakamwe ninga pinacita anthu pa nkhondo, mpanda wagwa.+ Buluka penepo anyankhondo athamangira ku nzinda, mʼbodzi na mʼbodzi athamangira mu nzinda, mbaukunda. 21 Iwo afudza na supada pinthu pyonsene pikhali mu nzinda, amuna na akazi, aphale na atsikana, ankhalamba, ngʼombe, mabira na maburu.+

22 Yoswa apanga amuna awiri adaenda kaona dziko kuti: “Ndokoni nʼnyumba mwa nkazi ule wakuti ndi puta, mbamubulusa iye na ale ali pabodzi na iye ninga mudapikira imwe kuna iye.”+ 23 Natenepa, aphale adaenda kaona dziko apita nʼnyumba mbabulusa Raabhe pabodzi na pai wace, mai wace, abale ace na onsene akhali na iye; iwo abulusa banja yace yonsene,+ mbaabweresa mwakutsidzikizika ku mbuto yakuti ikhali kunja kwa misasa ya Aizraeli.

24 Buluka penepo iwo apisa na moto nzinda pabodzi na pinthu pyonsene pikhali mwenemu. Mbwenye parata, ouro, pinthu pidacitwa na nkuwa pontho pidacitwa na utale, iwo apiikha mʼmbuto inakoyerwa pinthu nʼnyumba ya Yahova.+ 25 Yoswa+ basi ene apulumusa puta Raabhe, anthu a panyumba pa pai wace na onsene akhali na Raabhe; pontho iye asakhala mu Izraeli mpaka lero,+ thangwi iye akhadabisa amuna adatumwa na Yoswa toera kuenda kaona Yeriko.+

26 Pa ndzidzi unoyu Yoswa adumbira tenepa:* “Mbapaswe dzedze pamaso pa Yahova munthu anafuna kumanga pontho nzinda uyu wa Yeriko. Angadzatoma kuumanga, mwanace wakutoma anadzafa, pontho angadzaikha misuwo,+ mwanace wakumalisa anadzafa.”

27 Natenepa, Yahova akhali na Yoswa,+ pontho kubvekera kwace kwamwazika pa dziko yonsene yapantsi.+