Yoswa

7 Mbwenye Aizraeli nee abvera ntemo wa pinthu pikhafunika kufudzwa, thangwi Akani+ mwana wa Karmi, mwana wa Zabhidhi, mwana wa Zera, wa dzindza ya Yuda, akwata pinthu pinango pyakuti pikhafunika kufudzwa.+ Natenepa, Yahova aipirwa kakamwe na Aizraeli.+

2 Buluka penepo, Yoswa atuma amuna buluka ku Yeriko toera aende ku Ai,+ dhuzi na Bheti-Aveni kumabulukiro a dzuwa a Bheteli.+ Iye aapanga: “Ndokoni mukaone dziko.” Natenepa, amuna anewa aenda, mbaona dziko ya Ai. 3 Pidabwerera iwo kuna Yoswa, ampanga: “Nee pisafunika kuti anyankhondo onsene aende kweneko. Amuna cifupi na 2.000 peno 3.000 anakwana toera kukunda Ai. Lekani kuendesa kweneko anyankhondo onsene mbamuanetesa, thangwi kweneko kuli na anthu pangʼono basi.”

4 Natenepa, amuna cifupi na 3.000 aenda kweneko, mbwenye iwo athawa amuna a ku Ai.+ 5 Amuna a ku Ai apha amuna 36, pontho iwo aatowera kubulukira kunja kwa nsuwo ukulu wa nzinda mpaka ku Sebharimu,* iwo akhapitiriza kuapha mpaka panterero. Natenepa, mʼmimba mwa* mbumba mwanyunguluka thangwi yakugopa.

6 Natenepa, Yoswa apandula nguwo zace, agodama mbakotamisa nkhope yace mpaka pantsi kutsogolo kwa Bokosi ya Yahova, mpaka dzuwa kudoka, iye pabodzi na akulu a mu Izraeli akhaikha pfumbi munsolo mwawo. 7 Yoswa alonga: “Yahova Mbuya Wankulu Kakamwe, thangwi yanji mwawambusa mbumba iyi nkulo wa Yordani? Mwatiwambusa toera kutipereka mʼmanja mwa Aamori, mbatifudzwa? Mbapidakhala mwadidi mbatidakhala pyathu kuntunda unango* wa Yordani! 8 Ndilekerereni Yahova, ndinalonganji, ­nakuti Izraeli athawa anyamalwa ace? 9 Akanani na anthu anango anakhala mu dziko ino angabva pyenepi, iwo anatizungulira mbafudza dzina yathu pa dziko yapantsi, mphapo imwe munacitanji na dzina yanu ikulu?”+

10 Yahova atawira Yoswa: “Lamuka! Thangwi yanji uli kukotamisa nkhope yako mpaka pantsi? 11 Izraeli adawa. Iwo nee abvera ntemo udaapanga ine.+ Iwo akwata pinthu pinango pyakuti pikhafunika kufudzwa,+ apiba,+ mbapibisa pabodzi na pinthu pyawo.+ 12 Na thangwi ineyi, Aizraeli nee anadzakwanisa kuthimbana na anyamalwa awo, mbwenye anadzaathawa thangwi iwo adzakhala pinthu pyakuthema kufudzwa. Nee ndinadzakhala na imwe mpaka mungafudza pakati panu pinthu pidathema kufudzwa.+ 13 Lamuka, cenesa mbumba!+ Apange tenepa: ‘Cenesekani thangwi ya mangwana, thangwi Yahova Mulungu wa Izraeli alonga: “Iwe Izraeli, pakati pako pali na pinthu pidathema kufudzwa. Iwe nee unadzakwanisa kuthimbana na anyamalwa ako mpaka ungabulusa pakati pako pinthu pidathema kufudzwa. 14 Mangwana namacibese musafunika kubwera dzindza na dzindza, dzindza inasankhulwa+ na Yahova isafunika ibwere kutsogolo. Buluka penepo, banja na banja, banja inasankhulwa na Yahova isafunika ibwere kutsogolo; nyumba na nyumba, nyumba inasankhulwa na Yahova isafunika ibwere kutsogolo, mamuna mʼbodzi na mʼbodzi. 15 Munthu anafuna kugumanwa na cinthu cakuti cikhafunika kufudzwa anadzapiswa na moto,+ iye pabodzi na pinthu pyace pyonsene, thangwi iye nee abvera pidalonga+ Yahova, pontho thangwi acita pinthu pyakupasa manyadzo mu Izraeli.”’”

16 Mangwana mwace, Yoswa alamuka namacibese kakamwe mbacemeresa Izraeli, dzindza na dzindza, mbisankhulwa dzindza ya Yuda. 17 Iye apanga mabanja a dzindza ya Yuda toera afendedze cifupi, mbisankhulwa banja ya Zera.+ Buluka penepo, iye apanga banja ya Zera toera ifendedze cifupi, mamuna mʼbodzi na mʼbodzi, mbasankhulwa Zabhidhi. 18 Pakumalisa iye apanga anthu a panyumba ya Zabhidhi toera afendedze cifupi, mamuna mʼbodzi na mʼbodzi, mbasankhulwa+ Akani mwana wa Karmi, ndzukulu wa Zabhidhi, wa mʼbanja ya Zera, wakuti akhali wa dzindza ya Yuda. 19 Penepo Yoswa apanga Akani: “Mwananga, ndaphata miyendo, pasa mbiri Yahova Mulungu wa Izraeli, bweka kuna iye. Ndaphata miyendo, ndipange pidacita iwe. Leka kundibisira cinthu.”

20 Akani atawira Yoswa: “Mwandimomwene, ndine adadawira Yahova, Mulungu wa Izraeli, pidacita ine ndi ipi: 21 Pidaona ine nkumi wakubalika wa ku Sineari+ pakati pa pinthu pyakutapatwa, masiklo* 200 a parata na ouro yakulemera masiklo 50, ndapisirira, mbandipikwata. Ndapifikira pantsi mu nsasa wanga, kobiri iri pantsi pa nkumi.”

22 Mwakukhonda dembuka, Yoswa atuma anthu mbaenda nakuthamanga ku nsasa, kweneko iwo agumana nkumi udabiswa mu nsasa wace na kobiri yakuti ikhali pantsi pa nkumi unoyu. 23 Natenepa, iwo abulusa pinthu pyenepi mu nsasa, mbaenda napyo kuna Yoswa na kuna Aizraeli onsene, mbapiikha pamaso pa Yahova. 24 Yoswa na Izraeli onsene akwata Akani+ mwana wa Zera, parata, nkumi wakubalika, ouro,+ pabodzi na anace amuna na akazi, ngʼombe zace, maburu ace, mabira ace, mbuzi zace, nsasa wace na pinthu pyonsene pikhali na iye, mbaenda nawo ku Gowa ya Akori.+ 25 Yoswa ampanga: “Thangwi yanji watibweresera nyatwa?*+ Lero Yahova anabweresa nyatwa kuna iwe.” Natenepa, Aizraeli onsene amenya na miyala iye+ pabodzi na banja yace, buluka penepo aapisa na moto.+ Penepo, iwo amenya onsene na miyala. 26 Buluka penepo, iwo agumanya nkuku ukulu wa miyala padzulu pace, wakuti uciripo mpaka lero. Natenepa, ukali ukulu wa Yahova wamala.+ Na thangwi ineyi, mbuto ineyi isacemerwa Gowa ya Akori* mpaka lero.