Atongi
16 Ntsiku inango Samisoni aenda ku Gaza, kweneko iye aona nkazi wakuti ndi puta, mbapita nʼnyumba mwa nkazi unoyu. 2 Anthu a ku Gaza apangwa kuti: “Samisoni ali muno.” Natenepa iwo azungulira nzinda, mbamʼbisalira masiku amumphu pansuwo ukulu wa nzinda. Iwo apitiriza kumatama masiku amumphu, mbakanyerezera: “Kunja kungaca, ife tinamupha.”
3 Natenepa, Samisoni apitiriza kugona mpaka tcititciti. Buluka penepo iye alamuka tcititciti, aphata nsuwo ukulu wa nzinda pabodzi na pyakutsidzikiza nsuwo piwiri pya nʼkhundu mwa nsuwo unoyu, mbaukhutca pabodzi na mpiringanyo wace. Iye auikha paphewa pace mbaenda nawo padzulu paphiri yakuti iri kutsogolo kwa Ebhroni.
4 Mukupita kwa ndzidzi, iye asirira nkazi ku Gowa* ya Soreki, dzina yace ikhali Dhalila.+ 5 Natenepa atongi a Afilisti aenda kuna iye mbampanga: “Nyengeza Samisoni+ toera udziwe kuti ninji cinampasa mphambvu kakamwe, pontho tinakwanisa tani kunkunda mbatimʼmanga. Ungacita pyenepi, mʼbodzi na mʼbodzi wa ife anakupasa kobiri 1.100 za parata.”
6 Mukupita kwa ndzidzi Dhalila apanga Samisoni: “Ndaphata miyendo, ndipange kunabuluka mphambvu zako, pontho ninji pinafunika kucitwa toera iwe ukwanise kukundwa mbumangwa.” 7 Samisoni ampanga: “Iwo angandimanga na nkhambala zinomwe zipswa* zakuti zidzati kuumiswa, ndinadzakhala wakusowa mphambvu ninga anthu onsene.” 8 Natenepa atongi a Afilisti amʼbweresera nkhambala zinomwe zipswa zakuti zidzati kuumiswa, penepo Dhalila amʼmanga na nkhambala zenezi. 9 Buluka penepo, iwo amʼbisalira nkwartu inango ya nkazi unoyu, penepo nkazi akhuwa: “Samisoni, Afilisti ali pano!” Penepo pene iye athumula nkhambala mwakukhonda nentsa ninga akuthumula usalu udawambizwa na moto.+ Anthu nee adziwa kudabuluka mphambvu zace.
10 Natenepa Dhalila apanga Samisoni: “Iwe wandinyengeza mbundikupwisa. Ndaphata miyendo, ndipange, ninji cinafuna kuphatisirwa toera kukumanga.” 11 Iye ampanga: “Iwo angandimanga na nkhambala zipswa zakuti zidzati kuphatisirwa, ndinadzakhala wakusowa mphambvu ninga anthu onsene.” 12 Natenepa Dhalila akwata nkhambala zipswa, amʼmanga nazo mbakhuwa: “Samisoni, Afilisti ali pano!” (Mu ndzidzi unoyu anthu akhadabisala nkwartu inango.) Iye athumula nkhambala mʼmikono mwace ninga akuthumula usalu.+
13 Buluka penepo Dhalila apanga Samisoni: “Mpaka cincino iwe usandinyengeza,+ mbundikupwisa. Ndipange pinafuna kuphatisirwa toera kukumanga.” Penepo iye ampanga: “Manga na usalu mandoto manomwe a munsolo mwanga.” 14 Natenepa iye amanga mandoto anewa, aapfinya na pega, mbakhuwa: “Samisoni, Afilisti ali pano!” Penepo Samisoni alamuka ncitulo mbabulusa pega na usalu munsolo mwace.
15 Dhalila apanga Samisoni: “Thangwi yanji iwe usalonga kuti usandifuna+ mbukhonda kundinyindira? Iwe wandinyengeza katatu mbukhonda kundipanga kunabuluka mphambvu zako zikulu.”+ 16 Nakuti ntsiku zonsene iye akhapitiriza kunsanya na kunkakamiza, Samisoni akhadaneta kakamwe na pyenepi.+ 17 Pakumalisa, iye ampanga pyonsene pikhali muntima mwace kuti: “Tsisi yanga cipo yacingwa, thangwi ndine Nazireu wa Mulungu kutomera uwana wanga.*+ Ndingacingwa, mphambvu zanga zinabuluka muna ine, mbandisowa mphambvu ninga anthu anango onsene.”
18 Dhalila pidaona iye kuti Samisoni alonga pyonsene pikhali muntima mwace, mwakukhonda dembuka acemeresa atongi a Afilisti,+ mbaapanga: “Bwerani, thangwi cincino iye andipanga pyonsene pikhali muntima mwace.” Natenepa atongi a Afilisti akwata kobiri, mbaenda kaonana na Dhalila. 19 Dhalila acitisa Samisoni kuphatwa na citulo mbagona pa miyendo pace; buluka penepo iye acemera mamuna toera ancinge mandoto manomwe a munsolo mwace. Pidamala iye atoma kunkunda, thangwi mphambvu zace zikhamala. 20 Natenepa iye akhuwa: “Samisoni, Afilisti ali pano!” Samisoni alamuka ncitulo mbalonga ekhene: “Ndinabuluka mwadidi ninga pidacita ine ntsiku zinango,+ mbandipulumuka.” Mbwenye Samisoni nee akhadziwa kuti Yahova nee akhalibve na iye. 21 Afilisti amʼphata mbamʼphola maso. Buluka penepo aenda naye ku Gaza, amʼmanga na maunyolo mawiri a nkuwa, mbadzakhala nyakupeya tirigu nkaidi. 22 Mbwenye pidamala iye kucingwa,+ tsisi yace yatoma pontho kukula.
23 Mukupita kwa ndzidzi, atongi a Afilisti agumanyikana toera acite phwando yakupereka ntsembe zizinji kuna mulungu wawo Dhagoni,+ pontho iwo akhalonga: “Mulungu wathu apereka nyamalwa wathu Samisoni mʼmanja mwathu!” 24 Anthu pidaona iwo dzimunthu, asimba mulungu wawo mbalonga: “Mulungu wathu apereka nyamalwa wathu mʼmanja mwathu, ule wakuti afudza dziko+ yathu mbapha azinji a ife.”+
25 Nakuti iwo akhali akutsandzaya kakamwe, alonga: “Bweresani Samisoni toera adzatisekese.” Natenepa iwo abulusa Samisoni nkaidi toera anseke; iwo amulimirisa pakati pa mizati miwiri. 26 Buluka penepo Samisoni apanga mʼphale akhamʼphata nkono:* “Ndiphatise mizati inalikhisa nyumba toera ndiitsamire.” 27 (Pa ndzidzi unoyu, nyumba ikhadadzala na amuna na akazi. Atongi onsene a Afilisti akhalimbo mwenemo, pontho padzulu panyumba pakhali na amuna na akazi cifupi na 3.000, akuti akhaseka Samisoni.)
28 Samisoni+ aphemba Yahova kuti: “Mbuya Wamphambvu Zonsene Yahova, ndaphata miyendo, ndikumbukeni, pontho ndipaseni mphambvu+ ulendo uno basi. Mulungu, nditawiriseni toera ndibwezere Afilisti thangwi ya ibodzi mwa maso anga mawiri.”+
29 Buluka penepo, Samisoni aphata mizati miwiri yapakati yakuti ikhalikhisa nyumba, nzati ubodzi auphata na nkono wace wamadyo, unango auphata na nkono wace wabzwere. 30 Samisoni acita phembero: “Nditawiriseni ndife pabodzi na Afilisti!” Buluka penepo iye abhoma mizati na mphambvu zace zonsene, nyumba mbigwera atongi na anthu onsene akhali mwenemo.+ Natenepa, iye afa na anthu azinji kupiringana adapha iye mu ndzidzi ukhali iye mʼmaso.+
31 Mukupita kwa ndzidzi, abale ace onsene abwera dzakwata manungo ace. Aenda nawo mbaaikha munthumbi ya Manowa+ wakuti ndi babace, pontho nthumbi ineyi ikhali pakati pa Zora+ na Esitaoli. Samisoni akhala nyakutonga miseru wa Izraeli mu pyaka 20.+